SA̱ UNI̱ kuia̱ java ni̱ xika̱nuu Jesús ni̱ ka̱stu̱ʼun si saʼa̱ Ndio̱s xíʼín na̱yivi, ta si̱ xíni̱ va si ña̱ si̱ ni̱ ku̱yati kivi̱ ña̱ kaʼní ná si. Ta si̱ nákani va ini ta̱ ni̱ si̱ ja̱náʼa̱ saʼa̱ ley Ndio̱s kaʼní rá si, jo ni̱ si̱ yu̱ʼú ra ña̱ ndaku̱ita na̱ ñuu kaʼa̱n na̱ saʼa̱ sí, jáchi̱ mií na̱ ñuu ikáa ni̱ si̱nde̱ʼé ná Jesús tátu̱ʼun iin profetá. Jaá kía̱n ni̱ ka̱chúun Satanás —iin ta̱ kúú kuendá uxi̱ uvi̱ na̱ ni̱ xika tuun xíʼín Jesús— ni̱ si̱naní Judas já ni̱ xi̱kó rá si nu̱ú ta̱ ni̱ si̱ ja̱náʼa̱ saʼa̱ ley Ndio̱s sa̱ʼá oko̱ uxi̱ xu̱ʼún kuxí.

Tá si̱kuáa nu̱jandíʼí ni̱ si̱io Jesús nuu̱ Ñúʼu̱ yóʼo, jaá ni̱ na̱taka si xíʼín na̱ ni̱ xika tuun xíʼín sí já ni̱ kee káʼno na víko̱ Pascuá. Tá ni̱ ndiʼi ña̱ ni̱ kaʼa̱n Jesús xíʼín Judas ña̱ ná kuʼu̱n ra̱, jaá ni̱ chi̱ndúʼu̱ si iin kivi̱ ña̱ kánian kee káʼno na: ki̱ví ni̱ Xíxíni Jesús. Jaá ni̱ tiin si pan, ni̱ na̱ki̱ʼa si ndivéʼe nuu̱ Ndio̱s ta ni̱ ja̱yáʼa si pan yóʼo nuu̱ ndin uxi̱ iin na̱ ni̱ xika tuun xíʼín sí. Ta ni̱ kachi si: “Mé pan yóʼo kúúá tátu̱ʼun yikí ku̱ñu̱i jáchi̱ ndikia̱ʼva̱i míi̱ kivii̱ sa̱ʼá ndiʼi ndó. Xíniñúʼú kaja ndó ña̱yóʼo ña̱ ná ndiku̱ʼu̱n ini ndó ña̱ na̱xi̱ʼi̱i̱ sa̱ʼa̱ ndo̱”. Ta jaá ní ni̱ ja̱yáʼa si iin copá vinó nuu̱ ná ta ni̱ kachi si: “Ndúta̱ ñóʼo ini copa yóʼo dándáki ña̱ sa̱á ni̱ ka̱ndo̱o Ndio̱s kee na xíʼín ña̱yuu na̱, ta xi̱nko̱oan kee nii̱ yuʼu̱” (San Lucas 22:19, 20).

Si̱kuaá jaá, kuaʼa̱ ndiva̱ʼo ña̱ʼa ni̱ ja̱náʼa̱ Jesús nu̱ú na̱ ni̱ xika tuun xíʼín sí. Ta jaá ní ni̱ saʼnda si inga̱ chuun sa̱á nuu̱ ná: ña̱ ná kiʼvi̱ ini táʼan na sata̱ ndijaá táʼa̱n ña̱ʼa. Ta ni̱ kachi si: “Tá ná kiʼvi̱ ini táʼan ndó já kandaa̱ ini [...] ndiʼi ña̱yivi ña̱ méa̱ ndaa̱ táʼyí kúú ndó kuentá míi̱” (San Juan 13:34, 35). Ta ni̱ kachi si xíʼín ná ña̱ ná o̱kúndaʼví ini na sa̱ʼá ña̱ ni̱ ku̱yati ndoʼo si, jaá ni̱ xika̱taʼvi̱ si saʼa̱ ná nuu̱ Ndio̱s. Tá ni̱ ndiʼi jaá ni̱ xita na yaa nuu̱ Ndio̱s já ni̱ kiʼin na kuaʼa̱n na̱ nuu̱ ñúʼu̱ ñúchí Getsemaní.

Yóʼo kúú nu̱ú ni̱ si̱kuíi̱n xi̱tí Jesús já ni̱ xika̱taʼvi̱ si nuu̱ Jeová Ndio̱s. Jo iin kuití vá ni̱ saa̱ ta̱ soldadó xíʼín java ka̱ ta̱yiví xíʼín java jutu̱ tiin ra Jesús. Jaá ni̱ na̱tivi yati Judás nuu̱ nákaa̱ Jesús já ni̱ chitó rá nuu̱ sí. Ta ni̱ tiin ta̱ soldadó yóʼo Jesús néʼe ra kuaʼa̱n ra̱, jaá ni̱ xino na̱ ni̱ xika tuun xíʼín Jesús kuaʼa̱n na̱.

Ta ni̱ kaʼa̱n Jesús nu̱ú ta̱ juéz náʼno na̱ ñuu Judá ña̱ de̱ʼe Ndio̱s kúú sí. Ta ni̱ si̱nde̱ʼé ta̱ juéz yóʼo si tátu̱ʼun iin na̱ ni̱ kaʼa̱n nda̱va̱ʼa saʼa̱ Ndio̱s, ta ni̱ si̱nde̱ʼé rá ña̱ kúúán iin kua̱chi káʼno ndiva̱ʼo ña̱káa kánian kivi si. Jaá kía̱n ni̱ si̱neʼe na si ni̱ saʼa̱n na̱ nuu̱ iin ta̱ néʼe chuun nuu̱ ñuu Romá ni̱ si̱naní Poncio Pilato. Ta va̱árá ko̱ó kua̱chi Jesús ní nániʼi̱ ta̱ yóʼo, jo sa̱ʼá ña̱ ni̱ sika̱ ndiva̱ʼo na̱ ñuu yóʼo ña̱ ná kivi Jesús, ni̱ si̱ʼa va ta̱ yóʼo íchi̱ ña̱ kaʼní ná si.

Jaá ni̱ sa̱neʼe na Jesús ni̱ saʼa̱n na̱ iin xíán nuu̱ naní Gólgota, yóʼo kúú nu̱ú ni̱ chita̱kaa ta̱ soldadó yóʼo Jesús ndi̱ka iin yíto̱. Ta iin kuití ni̱ si̱kúi̱n naá kivi̱ jaá. Ta mií si̱ini jaá tá ni̱ xiʼi̱ Jesús, ni̱ʼi ndiva̱ʼo ni̱ ta̱an. Ta ini iin yávi̱ ña̱ ni̱ kaan na ndi̱ka káva̱ ni̱ ja̱ndúxi na Jesús, ta inga̱ kivi̱ jaá ni̱ saji tuun ta̱ jutu̱ yuʼú yávi̱ íkáa ta ni̱ saʼnda ra chuun ña̱ ná kandoyi ta̱ soldadó kandaa ra yuʼú yávi̱ íkáa. Jo ¿á ndijaá táʼa̱n kivi̱ kando̱o Jesús kakaa̱ si ini yávi̱ yóʼo? Ko̱ó, jáchi̱ si̱ va̱si va inga̱ milagró káʼno chááka̱ koan.

(Ña̱yóʼo va̱sian nuu̱ capítulo 26 xíʼín 27 San Mateo, capítulo 14 xíʼín 15 San Marcos, capítulo 22 xíʼín 23 San Lucas xíʼín capítulo 12 nda̱ 19 San Juan.)