¿ÁKUU ki̱ʼo ndeé ini na̱yivi kukuu na na̱yivi ndaa̱ nuu̱ Ndio̱s tá ndóʼo na tu̱ndóʼó? Va̱árá ná kuu kaʼán ná ña̱ ko̱ chúun mií vá ña̱ ki̱ʼo ndeé ini na. Ña̱yóʼo ni̱ ndoʼo iin ta̱ ni̱ si̱naní Job. Ná kande̱ʼé yó ndixi ni̱ ndoʼo ra.

Kivi̱ ni̱ si̱ndoyi na̱ ñuu Israel nuu̱ ñuu Egipto ni̱ si̱io iin táʼan Abraham ni̱ si̱naní Job, ta ni̱ si̱io ra iin ñuu naní Arabia kivi̱ víti. Iin kivi̱ ni̱ na̱taka ndijaá ángel indiví nuu̱ ió Ndio̱s, ta jaá ní ni̱ si̱na̱kaa̱ Satanás yóʼo. Ta nuu̱ ndijaá na̱yóʼo ni̱ kaʼa̱n va̱ʼa Jeová Ndio̱s saʼa̱ Job, ni̱ kachi si ña̱ ko̱ó mií vá inga̱ na̱yivi ndaa̱ nuu̱ sí tátu̱ʼun ki̱ʼa Job, jáchi̱ si̱síni̱ va̱ʼa va Ndio̱s ña̱ iin na̱yivi ndaa̱ kúú Job nuu̱ sí. Jo ni̱ chi̱núu kua̱chi Satanás Job ña̱ káchúun ndaa̱ ra̱ nuu̱ Ndio̱s jáchi̱ chíndeé sí ra̱ ta kuaʼa̱ ña̱ va̱ʼa si̱ʼa si nuu̱ rá. Ni̱ kaʼán Ti̱míaʼá ña̱ tá ná naá nuu̱ ndijaá ña̱ʼa kómí Job o̱kéekáʼno ka̱ ra̱ Jeová Ndio̱s.

Ni̱ si̱ʼa Ndio̱s íchi̱ ña̱ ni̱ ja̱naá Ti̱míaʼá nuu̱ ndijaá de̱ʼe Job ta ndijaá ña̱ ni̱ si̱komí rá, ta ni̱ ndoʼo ra kueʼe̱ kaʼví ni̱ keean. Jo ko̱ ní sísini̱ ra̱ ña̱ Satanás kúúa̱n ni̱ kee ña̱ ni̱ ndoʼo ra ndijaá tu̱ndóʼó yóʼo, ko̱ ní sikundaa̱ taʼon ini Job ndiva̱ʼa ni̱ si̱ʼa Ndio̱s íchi̱ ña̱ ni̱ ndoʼo ra ña̱yóʼo. Jo ko̱ ní jándákoo ra ña̱ si̱keekáʼno ra Jeová Ndio̱s.

Jaá ni̱ saʼa̱n uni̱ ta̱ kachí néʼe táʼan va̱ʼa xíʼín Job nu̱ú nákaa̱ ra̱, ta ni̱ ka̱sáʼá rá kána̱ʼá ra̱ xíʼín Job. Ndiʼi ña̱ ni̱ kaʼa̱n ra̱ va̱sian nuu̱ tutu Job, ni̱ kaʼán rá jásino̱ ra̱ ini Job ña̱ ió iin ña̱ ko̱ váʼa, ni̱ ya̱ʼa ra ni̱ kee ra nuu̱ Ndio̱s sa̱ʼá ña̱ káa ni̱ ndoʼo ra ña̱yóʼo. Jo o̱ju̱ú ña̱ ndaa̱ ní síkuu ña̱yóʼo. Ta ni̱ kachi ra ña̱ ko̱ ndíʼi ini Ndio̱s sa̱ʼá na̱yivi káchúun nuu̱ sí, ta ni ko̱ kándeé ini si na̱. Jo ko̱ ní kándísa Job ña̱ ni̱ kaʼa̱n ta̱ yóʼo xíʼín rá, ta ni̱ kachi Job ña̱ kukuu ra iin ta̱yiví ndaa̱ nuu̱ Ndio̱s nda̱ ná kivi ra.

Jo ni̱ ya̱ʼa Job xíʼa̱n ni̱ na̱kani ndiva̱ʼo ini ra saʼa̱ mií rá. Iin ta̱a lóʼo̱ ni̱ si̱naní Elihú ni̱ sinajo̱ʼo ra ña̱ ni̱ nda̱túʼún Job xíʼín ndin uni̱ ta̱ kachí néʼe táʼan va̱ʼa xíʼín rá, ni̱ kachi ra xíʼín Job ña̱ ko̱ váʼa ní kée ra ña̱ ni̱ ndi̱ʼi chááka̱ ini ra sa̱ʼá ña̱ ndóʼo mií rá o̱ju̱ú sa̱ʼá ña̱ keekáʼno ra Jeová Ndio̱s. Ta ni̱ ja̱náni ra̱ ndin uni̱ ta̱ kachí néʼe táʼan va̱ʼa xíʼín Job yóʼo.

Tá ni̱ ndiʼi já ni̱ kaʼa̱n Jeová Ndio̱s xíʼín Job. Xíʼín ndijaá ña̱ ñúchí ni̱ ka̱va̱ʼa Ndio̱s ni̱ ja̱náʼa̱ si nuu̱ rá ña̱ ko̱ó ña̱ kúú míí vá ta̱yiví nuu̱ Ndio̱s tá ná chitáʼén ra̱ xíʼín sí. Ndaʼví ni̱ si̱io ini Job ta ni̱ na̱tiin ra ña̱ ni̱ kaʼa̱n Ndio̱s xíʼín rá. Ta Jeová kúú sí “iin Ndio̱s va̱ʼa nda̱ʼo ini, ta kúʼu̱ nda̱ʼo ini na̱ saʼa̱ yó”, ni̱ na̱ke̱ʼe tuku si uxi̱ ka̱ de̱ʼe Job nuu̱ rá, ni̱ ja̱ndúva̱ʼa si ra̱ ta ni̱ na̱ke̱ʼe si kua̱ʼá ña̱ kui̱ká nuu̱ rá (Santiago 5:11). Ta sa̱ʼá ña̱ ni̱ si̱ʼa ndeé ini Job tá ni̱ ndoʼo ra ndijaá tu̱ndóʼó yóʼo ni̱ naʼa̱ ra̱ ña̱ ko̱ ní kaʼa̱n Satanás ña̱ ndaa̱, ta ni̱ naʼa̱ ra̱ ña̱ kuu va kukuu yó na̱yivi ndaa̱ nuu̱ Ndio̱s va̱árá ndóʼo yó tu̱ndóʼó.

(Ña̱yóʼo va̱sian nuu̱ tutu Job.)