LECCIÓN 05
Nuu̱ Tu̱ʼun Ndio̱s va̱xi tu̱ʼun va̱ʼa káʼa̱n Ndio̱s xíʼínyó
Jeová ni̱xi̱ʼona iin regalo káʼno ndiva̱ʼo nuu̱yó: tá si̱naʼá ni̱taana̱ 66 libro ña̱yóʼo kúú Tu̱ʼun Ndio̱s. Jo kuu ndakatu̱ʼúnní miíní: “¿Ndeí ni̱kixi Tu̱ʼun Ndio̱s? ¿Ndáyoo ni̱ndaku ini tu̱ʼun káʼa̱nña̱?”. Jaá ná kuu ki̱ʼoyó respuesta nuu̱ pregunta yóʼo, ná kande̱ʼéyó ndixi ni̱kuu ni̱kasaa̱ Tu̱ʼun Ndio̱s nda̱ kivi̱ víti.
1. Tá ta̱ava ni̱taa Tu̱ʼun Ndio̱s, ¿ndiva̱ʼa káchiyó ña̱ ni̱kixiña nuu̱ Ndio̱s?
Iin 40 ká ta̱a —ni̱taa Tu̱ʼun Ndio̱s— ta jíin jíin chúun sa̱keera. Ni̱kusáʼána taana̱ ña̱ kuia̱ 1513 tá kúmani̱ kixi Cristo ta ni̱ndiʼi ni̱taana̱ ña̱ kuia̱ 98 tá sa̱ni̱kixi Cristo. Sa̱ʼá ña̱yóʼo, 1.600 ká kuia̱ ni̱taana̱ ña̱. Va̱árá jaá, inííkúú nuu̱ Tu̱ʼun Ndio̱s na̱kitáʼan tu̱ʼun káʼa̱n ña̱. ¿Ndiva̱ʼa vií na̱kitáʼan ña̱? Jáchi̱ miíva Ndio̱s ni̱ndaku ini tu̱ʼun káʼa̱nña̱ (kaʼviní 1 Tesalonicenses 2:13). Ta̱a yóʼo ko̱ ni̱taara ña̱ nákani ini miíra. Va̱ʼa chááka̱, “Mií vá Espíritu ii̱ Ndios ni̱ da̱tóo̱n ña̱xintóni̱ ta̱a ni̱ ka̱xi mií ná, dá ni̱ taa ra ña̱” (2 Pedro 1:21). a Xíʼín espíritu ii̱ Ndio̱s, ni̱ja̱tóo̱na ña̱xinitóni̱ ta̱a yóʼo jaá ni̱taara ña̱ nákani ini miína (2 Timoteo 3:16).
2. ¿Ndáyoo kúú na̱ kuu kaʼvi Tu̱ʼun Ndio̱s?
Na̱yivi na̱ ndóyi “ndidaá nación, noo̱ ndidaá ñoo kuálí, no̱ó na̱ káꞌa̱n iin rá iin yúꞌu̱” kuu niʼi̱na̱ ña̱ va̱ʼa tá ná kunijo̱ʼona̱ ña̱ káʼa̱n Tu̱ʼun Ndio̱s (kaʼviní Apocalipsis 14:6). Mií Ndio̱s ni̱kee jaá ió Biblia kuaʼa̱ yúʼu̱. Ña̱ ndaa̱ kían, libro yóʼo kúú ña̱ kána kuaʼa̱ chááka̱ yúʼu̱ nuu̱ javaka̱ libro. Inííkúú ñuyíví kuu kanaʼána̱ ña̱ káʼa̱n Tu̱ʼun Ndio̱s, ndeí kúú miíva nuu̱ ndóyina o ndeí yúʼu̱ kúú miíva ña̱ káʼa̱nna̱.
3. ¿Ndixi ni̱sandaá Jeová Biblia?
Nuu̱ ni̱taana Tu̱ʼun Ndio̱s tá miísaʼa̱ sa̱kuuña ña̱ʼa ko̱ íʼvi̱ sa̱nati̱ví. Sa̱kuchúunna̱ rollo xíʼín ñíí kiti̱ o xíʼín joo̱ planta naní papiro. Jo ta̱a sa̱kiʼvi ini saʼa̱ Tu̱ʼun Ndio̱s ni̱taa ndáʼa̱ra̱ kuaʼa̱ copia ta sa̱iora̱ cuidado nuu̱ ni̱taara̱ ña̱. Va̱árá kuaʼa̱ na̱yivi kini ni̱kutoóna ja̱naána̱ ña̱, jo kuaʼa̱ ta̱a ni̱saiora ña̱ ma̱ní kivira saʼa̱ñá. Nuu̱ Jeová ko̱ iin ña̱ʼa kuu kaji nuu̱na ña̱ káʼa̱nna xíʼínyó. Tu̱ʼun Ndio̱s káchi: “Ña̱ kúú Tu̱ʼun Ndio̱s kooña ndiʼi tiempo” (Isaías 40:8).
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná kundaa̱ va̱ʼa chááka̱ iniyó saʼa̱ ndixi ni̱kee Ndio̱s jaá ni̱janátóo̱na ña̱xinitóni̱ ta̱a jaá ni̱taara̱ Biblia. Ná kande̱ʼéyó ndixi ni̱kee Ndio̱s sandaánaña̱ jaá nasaa̱ ña̱ kooña nuu̱ ndijaá na̱yivi.
4. Tu̱ʼun Ndio̱s kástu̱ʼun xíʼínyó ndeí ni̱kixiña̱
Kande̱ʼéndó VIDEO. Ta kaʼvindó 2 Timoteo 3:16 ta kanatúʼúnndó saʼa̱ ña̱ va̱xi yóʼo:
-
Tá ta̱a ni̱taa Biblia, ¿ndiva̱ʼa káchiyó ña̱ kúúña Tu̱ʼun Ndio̱s?
-
¿Á miía̱ndaa̱ kuu kandísayó ña̱ Ndio̱s ni̱xi̱ʼo ña̱xinitóni̱ ta̱a jaá ni̱taara Biblia?
Ta̱ kúú secretario taara carta, jo ndijaá ña̱ʼa taara kúú ña̱ káʼa̱n satoʼora. Janí ndóʼoyó xíʼín Tu̱ʼun Ndio̱s: ta̱a ni̱taaña, jo ña̱ káʼa̱nña̱ kúú Tu̱ʼun Ndio̱s.
5. Tu̱ʼun Ndio̱s ni̱ka̱kuña nuu̱ kuaʼa̱ tu̱ndóʼó
Tá Ndio̱s ni̱xi̱ʼo Biblia, ña̱ ndátiyó kían kandaánaña̱. Tátu̱ʼun nakani historia kuaʼa̱ ta̱ gobierno ni̱kúni̱ra ja̱naára nuu̱ Tu̱ʼun Ndio̱s. Janí sa̱ndoyi ta̱a kuendá religion ko̱ ni̱sakutoóra ña̱ kaʼvi na̱yiviña̱. Jo, va̱árá kuaʼa̱na kandajíña̱ ta kúni̱na kaʼáníñana, kuaʼa̱na ni̱xi̱ʼona vida na ni̱sandaánaña. Tá káʼánní kundaa̱ ininí saʼa̱ iin ta̱a yóʼo, kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
-
Viti náʼání ña̱ ni̱ndoʼo tei ánima̱na jaá ni̱sandaána Biblia, ¿á kutoó chááka̱ní kaʼviníña viti? Ta ¿ndiva̱ʼa?
Kaʼvindó Salmo 119:97 ta kanatúʼúnndó saʼa̱ ña̱ va̱xi yóʼo:
-
¿Ndiva̱ʼa kuaʼa̱ na̱yivi ni̱xi̱ʼona vida na jaá ni̱taana ta ni̱jasana Biblia?
6. Iin libro kuchúunna inííkúú ñuyíví
Biblia kúú iin libro ni̱taana kuaʼa̱ chááka̱ yúʼu̱ ta ña̱ kuaʼa̱ chááka̱ ndajasa̱ ndijaá tiempo. Kaʼvindó Hechos 10:34, 35 ta kanatúʼúnndó saʼa̱ ña̱ va̱xi yóʼo:
-
¿Ndiva̱ʼa kúni̱ Ndio̱s ña̱ Tu̱ʼunna ná taanaña kuaʼa̱ yúʼu̱ tá nájasáña kuaʼa̱ xíán?
-
¿Ndíki̱án keejaá kutoó chááka̱ní xininí Biblia?
Sa̱yati
100 %
na̱yivi inííkúú ñuyíví
kuu kaʼvina Tu̱ʼun Ndio̱s nuu̱ yúʼu̱ kundaa̱ inina
Ióña nuu̱
3.000 chááka̱
yúʼu̱,
ña̱ va̱xi iníí o iin táʼvi
5.000 millón
Chááka̱ Biblia sa̱ ni̱kana.
Ta kúúña iin libro kuaʼa̱ chááka̱, kána ndijaá tiempo
ÑA̱ KÁʼA̱N INGA NA̱YIVI: “Biblia kúúña iin libro yata̱ ni̱taa ta̱a ñuyíví”.
-
¿Ndixi nákani ini miíní?
-
¿Ndíki̱án naʼa̱ ña̱ Biblia kúú ndísa Tu̱ʼun Ndio̱s?
ÑA̱ NI̱KATI̱ʼAYÓ
Biblia kúú Tu̱ʼun Ndio̱s, ta miína kée jaá ndijaá táʼan kúú na̱yivi ná kooña̱ nuu̱na.
¿Á naku̱ʼun inión?
-
¿Ndíki̱án kúni̱ kachi ña̱ Ndio̱s ni̱chikaa̱na ña̱xinitóni̱ ta̱a jaá ni̱taara Biblia?
-
¿Ndíki̱án ni̱kati̱ʼaní saʼa̱ ña̱ Tu̱ʼun Ndio̱s ni̱ka̱kuña nuu̱ kuaʼa̱ tei tu̱ndóʼó? ¿Ndíki̱án ni̱kundaa̱ ininí saʼa̱ ña̱ ni̱taanaña̱ xíʼín ña̱ nájasánaña̱?
-
¿Ndixi kuu ininí viti náʼání ndijaá ña̱ ni̱kee Ndio̱s jaá kuu káʼa̱nna xíʼínní?
KUU NANDUKÚNÍ JAVAKA̱ ÑA̱ʼA
Kuu nandukúní saʼa̱ ña̱ ni̱ndoʼo Biblia: nda̱ ña̱ ni̱taana̱ nda̱ miísaʼa̱ nda̱ ña̱ taváná nda̱ tiempo viti.
“Ndixi ni̱kuu ni̱saa̱ Biblia nuu̱yó” (¡Despertad!, noviembre de 2007)
Kaʼviní ndixi Biblia ni̱ka̱kuña nuu̱ uni̱ ña̱ kandajíñá.
“Biblia. Historia nakanian ndixi ni̱ka̱kuña” (La Atalaya, núm. 4 2016)
Kande̱ʼéní ndixi ni̱ya̱ʼa kuaʼa̱ na̱yivi kuaʼa̱ tu̱ndóʼó jaá ni̱taana Biblia.
Ió kuaʼa̱ copia xíʼín javaka̱ traducción Biblia. ¿Ndiva̱ʼa kuu koo seguro miíní ña̱ jánaʼa̱ Tu̱ʼun Ndio̱s ko̱ naja̱maña?
“¿Á ni̱naja̱mana o ni̱ji̱tána̱ java ña̱ʼa nuu̱ Tu̱ʼun Ndio̱s?” (Artículo nuu̱ jw.org)
a Espíritu ii̱ kúú ndee̱ ió nuu̱ Ndio̱s, o ña̱ kuchúun Ndio̱s jaá keena ndijaá ña̱ʼa, tátu̱ʼun ki̱ʼo nakani lección 07.
