LECCIÓN 09

Ña̱ kaka̱taʼvi̱ní keyati chááka̱ña miíní nuu̱ Ndio̱s

JÁ KUU KANDE̱ʼÉ NÍ ÑA̱ NUU̱

¿Á xiníní ña̱ ndá xiniñúʼúnní chindeéñana jaá niʼi̱ ininí ña̱ kéení? ¿Á ndakatu̱ʼúnní miíní tá ko̱ niʼi̱ní respuesta? ¿Á xiniñúʼúnní tu̱ʼun va̱ʼa naki̱ʼo ta̱ndeé ini nuu̱ní? ¿Á ko̱ kutoóní koo yati chááka̱ní nuu̱ Jeová? Ña̱ kaka̱taʼvi̱ní chindeéña jaá niʼi̱ní ndiʼi ña̱ xiniñúʼúnní. Jo ¿ndixi kéení kaka̱taʼvi̱ní? ¿Á xinijo̱ʼo Ndio̱s ndijaá na̱ xíka̱taʼvi̱? ¿Ndixi kéení jaá kundaa̱ ininí á xinijo̱ʼo Ndio̱s tá xíka̱taʼvi̱ miíní? Ná kande̱ʼéyó.

1. ¿Nuu̱ ndáyoo kánian kaka̱taʼvi̱yó? ¿Saʼa̱ ndá ña̱ʼa kuu káʼa̱nyó tá xíka̱taʼvi̱yó?

Jesús ni̱ja̱naʼa̱na ña̱ xiniñúʼúnyó ña̱ kaka̱taʼvi̱yó nuu̱ iin túʼún Tatá mani̱yó nakaa̱ indiví. Ña̱ ndaa̱ kían, mií Jesús sa̱xíka̱taʼvi̱na nuu̱ Jeová. Iin kivi̱ ni̱kachina: “Tá kuaʼa̱n ndo̱ kaʼa̱n ndo̱ xíʼín Ndios, ta diʼa kaa ndo̱: ‘Tatá mií nduʼu̱, na̱ ió induú...ʼ” (Mateo 6:9). Tá xíka̱taʼvi̱yó nuu̱ Jeová, jaá ña̱ nétáʼan va̱ʼayó xíʼínna nduu ni̱sísa chááka̱ña.

Tá xíka̱taʼvi̱yó kuu kaka̱yó ndiku̱ú miívá ña̱ʼa. Jo, ña̱ ndaa̱ kían, tá kúni̱yó ña̱ Ndio̱s naki̱ʼo ña̱ xíka̱yó jaá kía̱n kanaʼáyó ña̱ o̱kúu kaka̱yó ña̱ ko̱ natáʼan inina xinína. Tu̱ʼun Ndio̱s káchi “chi̱ tá xíka̱ yo̱ iin ña̱ʼa noo̱ ná táto̱ʼon ki̱ʼo kóni̱ míí ná, ta kúú seído̱ʼo na ña̱ xíka̱ yo̱” (1 Juan 5:14). Jesús ni̱ka̱ʼa̱n saʼa̱ java ña̱ʼa kuu kaka̱yó tá xíka̱taʼvi̱yó (kaʼviní Mateo 6:9-13). Tá xíka̱yó ña̱ xiniñúʼúnyó nuu̱na, ná o̱sanandojóyó naki̱ʼoyó ndiveʼe nuu̱ Ndio̱s ña̱ ni̱keena saʼa̱yó ta ná kaka̱yó ña̱ ná chindeéna javaka̱ na̱yivi.

2. ¿Ndixi kéeyó kaka̱taʼvi̱yó?

Tu̱ʼun Ndio̱s xíka̱ ña̱yóʼo nuu̱yó: “Ndijaá ña̱ nakaa̱ ini ánima̱yó ná jándákooyóña̱ nuu̱na [Ndio̱s]” (Salmo 62:8). Sa̱ʼá ña̱yóʼo ndinuʼu iniyó ná kaka̱taʼvi̱yó, ná kanáña nda̱ ánima̱yó. Tá xíka̱taʼvi̱yó nuu̱ Jeová kuu káʼa̱n niʼiyó kuu káʼa̱n yaayó, ta ndixi kúni̱ miíyó á kuiin xitíyó o inga modo kuu kéeyóña̱ jaá naʼa̱yó ña̱ ió ña̱ñóʼóyó nuu̱na. Janí, kuu kaka̱taʼvi̱yó ndá hora o ndeí kúú miívá nakaa̱yó.

3. ¿Ndixi nandiónéʼe Ndio̱s ña̱ xíka̱taʼvi̱yó nuu̱na?

Sa̱ jíin jíin kéenaña. Xíʼín Tu̱ʼunna, Biblia, kuchúunna jaá xíʼona respuesta nuu̱ ña̱ ndakatu̱ʼúnyó miíyó. Ta ña̱ ka̱ʼviyó Tu̱ʼun Ndio̱s kée ña̱, “na̱ ko̱ xíni̱, nduú ndíchína” (Salmo 19:7; kaʼviní Santiago 1:5). Tá, ndóʼoyó iin tu̱ndóʼó, Jeová kuu chindeénayó jaá kuu koo va̱ʼa iniyó. Janí kuu kuchúunna na̱ xínukuáchí nuu̱na jaá chindeénayó.

NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO

Ná kande̱ʼéyó ndixi kéeyó jaá ndinuʼu iniyó kaka̱taʼvi̱yó jaá ná natáʼan ini Ndio̱s kuninaña ta ndixi ña̱ xíka̱taʼvi̱yó kuu chindeéñayó.

4. Ió java ña̱ʼa kuu kéeyó tá xíka̱taʼvi̱yó nuu̱ Ndio̱s

¿Ndíki̱án kuu kéeyó jaá natíin va̱ʼa Ndio̱s ña̱ xíka̱taʼvi̱yó? Kande̱ʼéndó VIDEO.

VIDEO: ¿Á xinijo̱ʼo Ndio̱s ndijaá na̱ xíka̱taʼvi̱? (iin táʼvi) (2:42)

Jeová kúni̱ ña̱ kaka̱taʼvi̱yó nuu̱ iin túʼún miína. Kaʼvindó Salmo 65:2 ta kanatúʼúnndó saʼa̱ ña̱ va̱xi yóʼo:

¿Á káʼán miíní ña̱ Ndio̱s “ta̱ xinijo̱ʼo tá xíka̱taʼvi̱na” kúni̱na ña̱ kaka̱taʼvi̱ miíní nuu̱na? ¿Ndiva̱ʼa nákani ininí jaá?

Tá kúni̱yó ña̱ ná kunijo̱ʼo Ndio̱s ña̱ xíka̱taʼvi̱yó, xíniñúʼúnyó ndukundeéyó jaá kéeyó ña̱ kúni̱na. Kaʼvindó Miqueas 3:4 xíʼín 1 Pedro 3:12, TNM ta kanatúʼúnndó saʼa̱ ña̱ va̱xi yóʼo:

¿Ndixi kuu kéeyó jaá kundaa̱ va̱ʼa iniyó á kunijo̱ʼo Ndio̱s ña̱ xíka̱taʼvi̱yó?

Ndandikú ivi̱ ejército xíka̱ra nuu̱ Ndio̱s kandeéra nuu̱ naára. Jo ¿á kuu nákani iniyó ña̱ Ndio̱s kéena ña̱ xíka̱ra?

5. Tá xíka̱taʼvi̱yó kánian kánaña nda̱ maa ini ánima̱yó

Nuu̱ kuaʼa̱ na̱yivi jánaʼa̱na ña̱ xiniñúʼúnná kati̱ʼa ji̱ni̱na tá xíka̱taʼvi̱na o tá na̱kuatina. Jo ¿á jaá kúni̱ Ndio̱s kéeyó tá xíka̱taʼvi̱yó? Kaʼvindó Mateo 6:7 ta kanatúʼúnndó saʼa̱ ña̱ va̱xi yóʼo:

¿Ndixi kéendó ta najaʼani “ndandió kuéi tóó tuku ndó káʼa̱n ndó to̱ʼon ña̱ sa̱ ni̱ kaʼa̱n ndo̱” tá xíka̱taʼvi̱ndó?

¿Á kuu nákani ininí iin ta iin kivi̱ saʼa̱ iin ña̱ ñúchí ña̱ ni̱ndoʼoní ta naki̱ʼoní ndiveʼe nuu̱ Jeová saʼa̱ ña̱yóʼo? Tá ná kéení ña̱yóʼo ndijaá semana tá ni̱ndiʼi semana ña̱ usa̱ kivi̱ yóʼo, sa̱ jíin jíin ña̱ ni̱ka̱ʼa̱nní xíʼín Ndio̱s ta ko̱ ni̱nandiókoní káʼa̱n tukuní iin mií tu̱ʼun káa.

Iin tatá kúni̱na ña̱ de̱ʼena nakáʼa̱nna xíʼínna xíʼín ndinuʼu inina ta janí ña̱ nakaa̱ ánima̱na. Jeová taʼani kúni̱na ña̱ tá xíka̱taʼvi̱yó ndinuʼu iniyó nakáʼa̱nyó xíʼínna.

6. Ña̱ xíka̱taʼvi̱yó kúú iin ña̱ʼa va̱ʼa ni̱xi̱ʼo Ndio̱s nuu̱yó

¿Ndixi kuu chindeé ña̱ xíka̱taʼvi̱yó ki̱ʼoña̱ ndee̱ nuu̱yó tá kivi̱ yáʼayó iin tu̱ndóʼó káʼno? Kande̱ʼéndó VIDEO.

VIDEO: Ña̱ xíka̱taʼvi̱ chindeéña jaá kakayó kuʼu̱n chínuu̱ (1:32)

Tu̱ʼun Ndio̱s káʼa̱n ña̱ tá xíka̱taʼvi̱yó kuu chindeéña jaá va̱ʼa koo iniyó. Kaʼvindó Filipenses 4:6, 7 ta kanatúʼúnndó saʼa̱ ña̱ va̱xi yóʼo:

Va̱árá ña̱ xíka̱taʼvi̱yó ko̱ jándiʼiña, ndijaá tu̱ndóʼó ndóʼoyó, jo ¿ndixi chindeéñayó?
¿Saʼa̱ ndiku̱ú ña̱ʼa kutoó miíní kaka̱taʼvi̱ní?

¿Á náʼání?

Tu̱ʼun amén kúni̱ kachi “jaá nákoo” o “miía̱nda̱”. Nda̱ tiempo sata̱ tá ni̱taa Biblia sa̱káʼa̱nna “amén” tá sa̱ndiʼi sa̱xíka̱taʼvi̱na (1 Crónicas 16:36).

7. Tavání tiempo jaá kaka̱taʼvi̱ní

Ndakána ió tei chúun kéeyó ta nándojóyó kaka̱taʼvi̱yó. ¿Ndiva̱ʼa ña̱ ndayaʼvi tei sa̱kía̱n nuu̱ Jesús ña̱ kaka̱taʼvi̱na? Kaʼvindó Mateo 14:23 xíʼín Marcos 1:35, ta kanatúʼúnndó saʼa̱ ña̱ va̱xi yóʼo: