LECCIÓN 11

Tá ná ndukundeéyó kaʼviyó Tu̱ʼun Ndio̱s kuaʼa̱ ña̱ʼa va̱ʼa niʼi̱yó

JÁ KUU KANDE̱ʼÉ NÍ ÑA̱ NUU̱

¿Á ndandikú naá ininí tá nákani ininí kéení iin chúun káʼno? Kuu cháá cháá o táʼvi tá táʼviña̱ kéení, jaá ná o̱nduu kuáchi̱ña̱. Ki̱ʼa janí kéení tá kaʼviní Tu̱ʼun Ndio̱s. Ndandikú ndakatu̱ʼún miíní: “¿Ndeí chí kusáʼi kaʼvi?”. Nuu̱ lección yóʼo kande̱ʼéyó java consejo kuu chindeéña jaá tá kaʼviyó Tu̱ʼun Ndio̱s ki̱ʼoña ña̱ kujii̱ iniyó.

1. ¿Ndiva̱ʼa ña̱ va̱ʼa kían kaʼviyó Tu̱ʼun Ndio̱s ndijaá kivi̱?

Na̱yivi kaʼvi ndijaá kivi̱ Tu̱ʼun Ndio̱s, o “ley Jeová”, niʼi̱na̱ ña̱ jii̱ ini ta saa̱na̱ niʼi̱na̱ ña̱ va̱ʼa (kaʼviní Salmo 1:1-3). Kuu kusáʼání kaʼviní ña̱ va̱árá cháává minuto ndijaá kivi̱. Tá kundaa̱ ininí ña̱ káʼa̱n Tu̱ʼun Ndio̱s, kutoóvaní kaʼviní ña̱.

2. ¿Ndiku̱ú ña̱ chindeéní jaá kundaa̱ va̱ʼa ininí tá kaʼviní Tu̱ʼun Ndio̱s?

Tá kúni̱yó kundaa̱ va̱ʼa iniyó ña̱ káʼa̱n Tu̱ʼun Ndio̱s kánian chi̱tivi toóyó ta nákani iniyó saʼa̱ ña̱ kaʼviyó. Biblia ko̱ kánian kaʼvi oo̱nyó ña̱, janí kánian “nákani iniyó saʼa̱ ña̱ káʼa̱n ña̱” (Josué 1:8). Tá kaʼviní ña̱, kuu ndakatu̱ʼúnní miíní tátu̱ʼun ña̱yóʼo: “¿Ndíki̱án jánaʼa̱ versículo yóʼo saʼa̱ Jeová nuu̱i? ¿Ndíki̱án kéei jaá kéei ña̱ káʼa̱n ña̱? ¿Ndixi kuchúuin ña̱ jaá chindeéi javaka̱ná?”.

3. ¿Ndeí kuu tavání tiempo jaá kuu kaʼviní Tu̱ʼun Ndio̱s?

¿Á ña̱ kuáchi̱ kían nuu̱ní tavání cháá tiempo jaá kaʼviní Tu̱ʼun Ndio̱s? Kuaʼa̱yó ndóʼo jaá. Ndi̱ʼi ini ndo̱ “kee ndó ña̱ va̱ʼa viti nónó noo̱ ndo̱” (Efesios 5:16). Kandeéní keení ña̱ tá ná tavání cháá tiempo ndijaá kivi̱ kaʼviní Tu̱ʼun Ndio̱s. Javana̱ naʼa tá kusáʼá kivi̱ kaʼvinaña̱. Javaka̱ná kutoóna̱ kaʼvinaña̱ tá ná niʼi̱ ndee̱ toóna o tá sa̱sáʼanna. Ta javaka̱ná kaʼviná Tu̱ʼun Ndio̱s sikuaá tá kúmani̱ kuʼu̱nna ku̱ju̱na. ¿Ndá hora kúú ña̱ va̱ʼa chááka̱ kuu kée miíní ña̱?

NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO

Ná kande̱ʼéyó ndíki̱án kuu keeyó jaá tá kaʼviyó Tu̱ʼun Ndio̱s ná kakuuñá ña̱ ndayaʼvi nuu̱yó. Yóʼo naniʼi̱yó java ña̱ kuu chindeé miíyó tá jákuáʼa va̱ʼayó Tu̱ʼun Ndio̱s ta kundaa̱ va̱ʼa iniyó ña̱ káʼa̱n ña̱.

Tátu̱ʼun ki̱ʼa va̱ʼa kuu iniyó tá sa̱sáʼanyó iin comida, ki̱ʼa janí va̱ʼa kuu iniyó tá kaʼviyó Tu̱ʼun Ndio̱s.

4. Kutoóní tá ná kati̱ʼaní kaʼviní Tu̱ʼun Ndio̱s

Ndandikú ña̱ kuáchi̱va kúúñá kusáʼáyó kaʼviyó Tu̱ʼun Ndio̱s. Tátu̱ʼun ki̱ʼa ndóʼoyó xíʼín iin comida kusáʼá kutoóyóña, chi kuukíi̱ iniyó kasáʼanyó ña̱. Ki̱ʼa janí ndóʼoyó xíʼín Tu̱ʼun Ndio̱s “kusáʼá kuukíi̱ iniyó” kaʼviyó ña̱. Kaʼvindó 1 Pedro 2:2, TNM ta kanatúʼúnndó saʼa̱ ña̱ va̱xi yóʼo:

¿Á káʼánní ña̱ tá ná kusáʼá kaʼvi kuaʼa̱ chááka̱ní Tu̱ʼun Ndio̱s ndijaá kivi̱ keean ña̱ kutoóní kaʼvi chááka̱ní ña̱?

Kande̱ʼéndó VIDEO ta kunindó java na̱kuálí ni̱kutoóná ni̱kaʼviná Tu̱ʼun Ndio̱s. Tá ni̱ndiʼi kanatúʼúnndó saʼa̱ ña̱ va̱xi yóʼo:

VIDEO: Na̱kuálí ni̱kutoóváná kúni̱ chááka̱na Tu̱ʼun Ndio̱s (5:33)

¿Ndiku̱ú tu̱ndóʼó ni̱kandeé na̱kuálí nuu̱ video ni̱ya̱ʼana?
¿Ndíki̱án ni̱chindeéña jaá ko̱ ni̱ja̱ndákoona ña̱ kaʼvinaña̱?
¿Ndíki̱án ni̱keena jaá tá sa̱kaʼvina Tu̱ʼun Ndio̱s sa̱kutoó chááka̱na sa̱xininá ña̱?

Ña̱ kuu kéeyó tá ni̱kusáʼáyó:

Ka̱xiní iin traducción kandeé ininí ta kuchúunní iín ña̱ káʼa̱n tátu̱ʼun káʼa̱nyó viti. Kuchúunní Traducción del Nuevo Mundo tá ióña nuu̱ yúʼu̱ káʼa̱nní.
Kusáʼání kaʼviní ña̱ nakani saʼa̱ iin ña̱ʼa kutoó chááka̱ní xininí. Ndaniʼi̱ní ndixi kéení ña̱yóʼo nuu̱ tabla “Tátu̱ʼun kuu kéení jaá kusáʼání kaʼviní Biblia”.
Kuu taaní iin marca nuu̱ kaʼviní kuaʼa̱nní. Kuchúunní tabla “Nuu̱ kuu taai ndixi kaʼvi Tu̱ʼun Ndio̱s kuaʼa̱in”, va̱xi nuu̱ libro yóʼo.
Kuchúunní aplicación JW Library^®. Tá ná chikaa̱níña̱ nuu̱ teléfono ní o nuu̱ inga dispositivo kuu kaʼviní o kunijo̱ʼoní Tu̱ʼun Ndio̱s ndeí kúú miívá nuu̱ nakaa̱ní.
Kuchúunní javaka̱ sección nakani saʼa̱ ña̱ va̱xi nuu̱ Traducción del Nuevo Mundo. Yóʼo naniʼi̱ní mapa, tabla xíʼín iin glosario chindeéña jaá kutoó chááka̱ní kaʼviní Tu̱ʼun Ndio̱s.

5. Kenduuní tá iin iin kuaʼa̱nní jákuáʼaní Tu̱ʼun Ndio̱s

Kaʼvindó Salmo 119:34 ta kanatúʼúnndó saʼa̱ ña̱ va̱xi yóʼo:

¿Ndiva̱ʼa ña̱ va̱ʼa kían kaka̱taʼvi̱ní tá kuaʼa̱nní kaʼviní Tu̱ʼun Ndio̱s o tá kenduuní jákuáʼaní?

¿Ndixi kéení jaá va̱ʼa kati̱ʼaní iin iin tá jákuáʼaní? Tá jákuáʼaní lección curso yóʼo, kuu kéení ña̱yóʼo:

Kaʼviní ndijaá párrafo parte kúú nu̱ú iin iin lección.
Nandukúní texto ña̱ va̱xi nuu̱ Tu̱ʼun Ndio̱s, ta kaʼviníña ta kéení tata̱ chitáʼanníña xíʼín ña̱ kaʼviní.
Keʼiní tu̱ʼun o frase ña̱ xíʼo respuesta nuu̱ ña̱ ndakatu̱ʼún. Ña̱yóʼo chindeé miíní tá jákuáʼaní lección xíʼín maestro ní.

¿Á náʼání?

Nduʼu̱ na̱ testigo Jeová kuchúunndu̱ kuaʼa̱ traduccion ña̱ Biblia, jo ña̱ kuchúun chááka̱ndu̱ kúú Traducción del Nuevo Mundo jáchi̱ va̱ʼa chááka̱ káʼa̱nña̱ o kásí káʼa̱nña̱ ta janí va̱xi kivi̱ Ndio̱s nuu̱ñá (kande̱ʼéní ña̱yóʼo nuu̱ jw.org: “¿Á ió Biblia mií na̱ testigo Jeová?”).

ÑA̱ KÁʼA̱N INGA NA̱YIVI: “Ña̱ jákuáʼa Tu̱ʼun Ndio̱s ña̱ kuáchi̱va kúúña nuu̱i. Ko̱ tiempoi ta ko̱ kutoói”.

Ta miíní ¿ndíki̱án káʼánní?

ÑA̱ NI̱KATI̱ʼAYÓ

Tá káʼánní kati̱ʼa chááka̱ní saʼa̱ ña̱ káʼa̱n Tu̱ʼun Ndio̱s, tavání tiempo kaʼviníña̱, ta kaka̱taʼvi̱ní nuu̱ Ndio̱s ná chindeéna miíní kundaa̱ ininí ña̱ kaʼviní ta kenduuní iin tá iin kuaʼa̱nní jákuáʼaní Tu̱ʼun Ndio̱s.