Tátu̱ʼun ni̱ kaʼvi ní nuu̱ tutu yóʼo, nuu̱ Tu̱ʼun Ndio̱s va̱si kuaʼa̱ consejo ña̱ chindeéán miíní xíʼín na̱ veʼe ní. Jeová kúni̱ rá ná kandoyi núchí ndó. Tá kachi rá ña̱ ná ndi̱ʼi cháá ga̱ ini ndó kunikua̱chi ndó nuu̱ rá o̱ju̱ú ña̱ kée ndó java ga̱ ña̱ʼa, jaá “ta kúú ndidaá ña̱ʼa yóʼo koo noo̱ ndo̱” (San Mateo 6:33, Tyk). Ndio̱s kúni̱ rá kaneʼe táʼan va̱ʼa rá xíʼín ní. Ña̱káa ndukundeé ní já kueé kueé kaneʼe táʼan va̱ʼa cháá ga̱ ní xíʼín rá, jáchi̱ ña̱ kaneʼe táʼan va̱ʼa yó xíʼín Ndio̱s iin ña̱ káʼnu ndiva̱ʼa kíán (San Mateo 22:37, 38).

ÑA̱ KÁʼA̱N TU̱ʼUN NDIO̱S: “‛Ta já ye̱ʼe kakuu u̱ tátá ndó, tá mé ndó kakuu ja̱ʼyi ta̱ai̱ xi̱ʼín ja̱ʼyi jíʼíʼ, káchí Ndióxi̱” (2 Corintios 6:18). Miía̱ndaa̱ Ndio̱s kúni̱ rá kaneʼe táʼan va̱ʼa rá xíʼín ní, tá kuu kuyati ní nuu̱ Jeová tá ná kaka̱taʼvi̱ ní nuu̱ rá. Tutu ii̱ kachian ña̱: “Ka̱ka̱ ta̱ʼví ndó nu̱ Ndióxi̱ níí tiempo” (1 Tesalonicenses 5:17). Kúni̱ Ndio̱s ña nakani ní nuu̱ rá ndiʼi ña ndóʼo ní tá ña̱ nakani ini ní (Filipenses 4:6). Tá kaka̱taʼvi̱ ní nuu̱ Ndio̱s xíʼín na̱ veʼe ní, kunde̱ʼé ná ña̱ miía̱ndaa̱ kandeé ini ní rá.

Ta o̱ju̱ú si̱va̱ʼa káʼa̱n uun vá ní xíʼín Ndio̱s káni kunijo̱ʼo ní ña̱ káʼa̱n rá. ¿Ndixi kée ní ña̱yóʼo? Káni jákuáʼa ní Tu̱ʼun Ndio̱s xíʼín tutu ña̱ tandaʼá ná nuu̱ yó (Salmo 1:1, 2). Nakani ini ní saʼa̱ ña̱ kutu̱ʼva ní (Salmo 77:11, 12). Jaá ní tá kúni̱ ní kunijo̱ʼo ní ña̱ káʼa̱n Ndio̱s káni kuʼu̱n ní nuu̱ nátaka yó jákuáʼa yó saʼa̱ Tu̱ʼun Ndio̱s (Salmo 122:1-4).

Iinka̱ ña̱ kuu kée ní já kaneʼe táʼan va̱ʼa cháá ga̱ ní xíʼín Ndio̱s kíán ña̱ káʼa̱n ní xíʼín java ka̱ na̱yivi saʼa̱ rá. Tá si̱ jaá ná kée ní ña̱yóʼo, jaá kuyati cháá ga̱ ní nuu̱ rá (San Mateo 28:19, 20).

KÉE NÍ ÑA̱YÓʼO:

• Tavá ní tiempo já kaka̱taʼvi̱ ní nuu̱ Ndio̱s tá ndini kivi̱ kaʼvi ní Tutu ii̱

• Chindeé ní na̱ veʼe ní já ná kandaa̱ ini ná ña kúni̱ʼi cháá ga̱ kunikua̱chi ná nuu̱ Ndio̱s tá o̱ju̱ú ña̱ kée ná java ga̱ ña̱ʼa

ÑA̱ KÁʼA̱N TU̱ʼUN NDIO̱S: “Kayati ndó nu̱ Ndióxi̱ ta já kayati Ndióxi̱ nu̱ ndo̱” (Santiago 4:8). Kaki ní iin hora tá iin kivi̱ jaá kandañu̱ʼu ní Ndio̱s xíʼín na̱ veʼe ní (Génesis 18:19). Jo o̱ju̱ú si̱va̱ʼa ña̱káa: ndá kúú mií vá ña̱ kée ní ndini kivi̱ chikuéntá ní Ndio̱s tá chindeé ní na̱ veʼe ní já ná kaneʼe táʼan va̱ʼa cháá ga̱ na̱ xíʼín rá. Tu̱ʼun Ndio̱s kachian: “Káni [...] káʼa̱ún [saʼa̱ Jeová] ta nakáau̱n veʼeu̱n tá síkanuun ichí ta kánduʼu̱n ta ndakou̱n” (Deuteronomio 6:6, 7). Káʼa̱n ní tátu̱ʼun ni̱ kachi Josué: “Jo yuʼu̱ xíʼín na̱ veʼei̱, miíndu̱ kunikua̱chi ndu̱ nuu̱ Jeová” (Josué 24:15).

KÉE NÍ ÑA̱YÓʼO:

• Kande̱ʼé ní ndíki̱án miía̱ndaa̱ síniñúʼú iin iin ná veʼe ní ta jaá jákuáʼa ní xíʼín na̱