Tá kaku de̱ʼe nu̱ú ná kujii̱ ini ná jo jaá ní nakani ndiva̱ʼa ini ná. Jáchi̱ nda̱á jaá ví kundaa̱ ini ná ña̱ síniñúʼú ná kuaʼa̱ tiempo, tá ña̱ tu̱ndóʼó ndiva̱ʼa já jákuáʼnu ná leé ná. Saʼa̱ ña̱ ko̱ó naniʼi̱ ndeé va̱ʼa ná tá saʼa̱ ña̱ ko̱ó sini ná ndíki̱án kée ná ña̱yóʼo kuu keean ña̱ kanitáʼan ná. Ña̱káa káni ndatu̱ʼun va̱ʼa ná ndíki̱án kée iin iin ná jaá kandaa na leé ná ta jaá ní ña̱ na̱ kandoyi núchí ná. Tu̱ʼun Ndio̱s kuu chindeéán ná já ná yaʼa ná ña̱yóʼo.

ÑA̱ KÁʼA̱N TU̱ʼUN NDIO̱S: “Jáchi̱ tá mé a̱ nda̱a̱ táʼyí kíʼvi̱ iní ña̱yivi ko̱ ndíʼi iní xi̱ʼi̱n ná [...] ta ko̱ kájíʼnda̱ yó ña̱ʼa nu̱ ná jáchi̱ ko̱ ndúkú yó ña̱ va̱ʼa mé kuití yo̱. Ta ni ko̱ xójo iní xi̱ʼi̱ ná” (1 Corintios 13:4, 5). Ña̱ kúú ná de̱ʼe nu̱ú ní, si̱ ndíki̱án kúu vá ini ní xíʼín leé ní. Ña̱káa kuu ku̱káʼán yíi̱ ní ña̱ ko̱ó kúni̱ ga̱ ní rá, saʼa̱ ña̱yóʼo káni ndi̱ʼi ini ní saʼa̱ rá. Kueé koo ini ní xíʼín rá ta vií káʼa̱n ní xíʼín rá, naʼa̱ ní ña̱ ndáya̱ʼvi ndiva̱ʼa ña̱ kée rá, tá síniñúʼú ní rá já ná chindeé rá miíní kandaa ndó leé ndó.

“Tá jári ndóʼó va da̱ta̱a, da̱ iin ñájíʼí, a̱ kája ndiva̱ʼa ndó xi̱ʼi̱n ñájíʼí ndo. Koo to̱ni ñúʼú ndó xi̱ʼi̱n ña.” (1 Pedro 3:7.) Tá miíní kúú tatá nu̱ú, káni kundaa̱ ini ní ña̱ viti ñajiʼí ní ndukundeé ndiva̱ʼa ñá já kandaa ñá leé, tá kuitá ñá á chitu ini ñá ta ku̱ndaʼví ini ñá jáchi̱ viti si̱ kuaʼa̱ vá chúun kúmí ñá. Ió tein ña̱ ndukueʼe ñá xíʼín ní jo kueé koo ini ní jáchi̱ “na ko̱ó kama ini va̱ʼa cháá ga̱ ná nuu̱ iin na̱yivi ná ndakú” (Proverbios 16:32). Nakani va̱ʼa ini ní ndíki̱án kée ní tá chindeé ní ñá (Proverbios 14:29).

KÉE NÍ ÑA̱YÓʼO:

• Tá kúú ní tatá: Ndá hora kúú míí vá chindeé ní ñajiʼí ní kandaa ndó leé. Ja̱ndákoo ní iinka̱ chúun ña̱ ko̱ó kúni̱ʼi já koo cháá ga̱ ní xíʼín de̱ʼe ní tá xíʼín ñajiʼí ní

• Tá kúú ní naná: Tá kúni̱ yíi̱ ní chindeé rá miíní kandaa rá leé, kuaʼá ní ichi̱ ná chindeé rá miíní. Tá ta̱ ko̱ó sini rá ndixi kandaa rá leé o̱ndukueʼe ní xíʼín rá, vií jánaʼa̱ ni nuu̱ rá ndixi kée rá

ÑA̱ KÁʼA̱N TU̱ʼUN NDIO̱S: “Tá nduu ná iin túʼún ku̱ñu” (Génesis 2:24). Va̱árá viti si̱ ió iin de̱ʼe ndó, jo naku̱ʼun ini ní ña̱ miíní xíʼín na̱ ni̱ tandaʼa̱ xíʼín ní “iin túʼún ku̱ñu” kúú vá ndó. Ndukundeé ndó já kaneʼe táʼan va̱ʼa cháá ga̱ ndó.

Miíní ña̱ kúú ñajiʼí, nákuni ní ña̱ kée yíi̱ ní já chindeé rá miíní kandaa rá leé ndó. Tu̱ʼun va̱ʼa ‘ja̱ndúva̱ʼa ña̱ miíyóʼ (Proverbios 12:18). Miíní tá kúú yíi̱, káʼa̱n ní xíʼín ñajiʼí ní ña̱ kúni̱ ndiva̱ʼa ní ña̱ tá ndáya̱ʼvi ndiva̱ʼa ñá nuu̱ ní tá nákuni ní ndiʼi ña̱ kée ña̱ saʼa̱ ndó (Proverbios 31:10, 28).

“Ko̱ ndítaʼan nu̱ yo̱ ndukú yó ña̱ va̱ʼa mí kuití yo̱. Ndítaʼan ndi̱ʼi iní kajaí ña̱ va̱ʼa sa̱ʼá ñani táʼan í.” (1 Corintios 10:24.) Si̱jaá kuití kée ní ña̱ nataʼan ini na̱ ni̱ tandaʼa̱ xíʼín ní ta kunde̱ʼé ní ndixi ví ndukundeé ná ña̱ chindeé ná miíní. Tavá ní tiempo já ndatu̱ʼun ndó ta kunijo̱ʼo ndó ña̱ káʼa̱n iin iin ndó. Tá saʼa̱ ña̱ kuju̱ xíʼín taʼan ndó o̱nákani ini ní saʼa̱ mií vá ní. Ndi̱ʼi ini ní saʼa̱ na̱ ni̱ tandaʼa̱ xíʼín ní. Tu̱ʼun Ndio̱s kachian: “Sa̱ʼá ña̱ kán kéa̱ ndítaʼan ndikia̱ʼva nu̱ táʼan ndó ta a̱ kándají táʼan ndó. Ta tá ko̱ kúni̱ ndó ku̱ju̱ xi̱táʼan ndó xíníñúʼú kakuua sa̱ʼá ña̱ sa̱ na̱jándike táʼan tu̱ʼun ndó” (1 Corintios 7:3-5). Ña̱káa káʼa̱n ndaa̱ ndó saʼa̱ ndixi kúu ini ní saʼa̱ ña̱yóʼo. Tá ná kundaa̱ ini ndó ndixi kúu ini ndó tá kueé koo ini ndó ña̱yóʼo chindeéán ndoʼó já kaneʼe táʼan va̱ʼa cháá ga̱ ndó.

KÉE NÍ ÑA̱YÓʼO:

• Tavá ní tiempo koo ní xíʼín na̱ ni̱ tandaʼa̱ xíʼín ní

• Kuu taa ní iin tutu á kuaʼá ní iin ña̱ʼa nuu̱ na̱ ni̱ tandaʼa̱ xíʼín ní já naʼa̱ ní ña̱ kúni̱ ní ná

ÑA̱ KÁʼA̱N TU̱ʼUN NDIO̱S: “Ta kándaa̱ va̱ʼa inún tu̱ʼun Ndióxi̱ jáchi̱ a̱nda̱ tá loʼún na̱jákuaʼún ña̱. Ta mé tu̱ʼun Ndióxi̱ kuu jána̱ʼa̱ yo̱ʼó kajún ña̱ kúni̱ mé á ta kuu jáka̱ku a yo̱ʼó” (2 Timoteo 3:15). Nakani ini ní ndixi jánaʼa̱ ní nuu̱ de̱ʼe ní. Naku̱ʼun ini ní ña nda̱á tá kúmani̱ kaku ná, si̱ kundaa̱ vá ini ná, ña̱ ndi̱ʼi ini vá yó kía̱n. Tátu̱ʼun tá nakaa̱ ii̱ vá ná ti̱si ní si̱ nákuni ná tachi̱ ní ta kundaa̱ ini ná ndixi kúu ini ní. Nda̱á tá ni̱ kaku ná kaʼvi ní nuu̱ ná, va̱árá ko̱ó kundaa̱ ini ná tu̱ʼun ña̱ kaʼvi ní, ña̱yóʼo keean ña̱ tá ná kuaʼnu ná kutoó ná kaʼvi ná.

O̱kukáʼán ní ña̱ lóʼo̱ ndiva̱ʼa leé ní ña̱ jánaʼa̱ ní saʼa̱ Tu̱ʼun Ndio̱s nuu̱ ná. Ná kunijo̱ʼo leé ní ña̱ síka̱taʼvi̱ ní nuu̱ Jeová (Deuteronomio 11:19). Tá síjikí ní xíʼín ná, káʼa̱n ní xíʼín ná saʼa̱ ña̱ ni̱ kava̱ʼa Ndio̱s (Salmo 78:3, 4). Nani sáʼnu ná kuaʼa̱n ná, kundaa̱ ini ná ndixi ví kúni̱ ní Jeová tá jaá ní miíná kúni̱ ná Jeová.

KÉE NÍ ÑA̱YÓʼO:

• Kaka̱taʼvi̱ ní nuu̱ Ndio̱s jaá ná chindeé rá miíní já jákuáʼnu ní de̱ʼe ní

• Kuaʼa̱ taʼndá káʼa̱n ní tu̱ʼun ña̱ kúni̱ʼi nuu̱ leé ní já ná kutu̱ʼva kama ná