SECCIÓN 2
Káni kukuu ndó na̱yivi ndaa̱ iin xíʼín táʼan ndó
“Ko ndítaʼan nu̱ú na̱ kán janí táʼan na ña̱ na̱jakatáʼan Ndióxi̱ ta na̱tanda̱ʼa̱ ná.” (San Marcos 10:9)
Kúni̱ Jeová ña̱ ná kukuu yó na̱yivi ndaa̱ (Miqueas 6:8). Ña̱yóʼo kúni̱ʼi ndiva̱ʼa ña̱ tá tandaʼa̱ na̱, jáchi̱ ta ko̱ó kúú ná na̱yivi ndaa̱ ko̱ó kandeé ini táʼan ná. Ta ña̱ ná kandeé ini táʼan ná ña̱yóʼo chindeéán ná já kúni̱ táʼan cháá ga̱ na̱.
Kivi̱ ndóyi yó viti, kuaʼa̱ na̱ tandaʼa̱ ko̱ó kúú ná na̱yivi ndaa̱ xíʼín yíi̱ ná á ñajiʼí ná. Ña̱káa, tá ko̱ó kúni̱ ní ndóʼo ní jaá káni̱ kée ní uvi̱ ña̱ʼa.
1 XINAÑÚʼÚ NDI̱ʼI INI NÍ SAʼA̱ YÍI̱ NÍ Á ÑAJIʼÍ NÍ
ÑA̱ KÁʼA̱N TU̱ʼUN NDIO̱S: “[Ndi̱ʼi ini ndó] saʼa̱ ña̱ kúni̱ʼi cháá ga̱” (Filipenses 1:10, TNM). Iin ña̱ʼa ña̱ kúni̱ʼi cháá ga̱ nuu̱ miíní káni kukuu yíi̱ ní á ñajiʼí ní. Káni ndi̱ʼi ini ní saʼa̱ ná.
Kúni̱ Jeová ña̱ si̱va̱ʼa xíʼín yíi̱ ní á ñajiʼí ní káni koo ní tá jaá ní kúni̱ rá ña̱ ná kandoyi núchí ndó (Eclesiastés 9:9). Kachi Jeová ña̱ káni ndi̱ʼi ini ní saʼa̱ na̱ ni̱ tandaʼa̱ xíʼín ní, káni kée ní ña̱ʼa ña̱ ná keean na̱ kujii̱ ini ná (1 Corintios 10:24). Káni kandaa̱ ini na̱ ni̱ tandaʼa̱ xíʼín ní ña̱ kúni̱ʼi ndiva̱ʼa na̱ nuu̱ ní tá jaá ní ña̱ síniñúʼú ní ná.
KÉE NÍ ÑA̱YÓʼO:
-
Kuaʼa̱ tiempo koo ní xíʼín ñajiʼí ní á yíi̱ ní, tá o̱ndi̱ʼi ini ní saʼa̱ iinka̱ ña̱ʼa
-
Káni ndi̱ʼi ini saʼa̱ na̱ ni̱ tandaʼa̱ xíʼín ní, tá o̱ju̱ú si̱va̱ʼa saʼa̱ míí vá ní
2 KANDAA NÍ ÁNIMA̱ NÍ
ÑA̱ KÁʼA̱N TU̱ʼUN NDIO̱S: “Da̱ sánde̱ʼé in ñáñáʼa ta káʼvi núu ini da xi̱ʼi̱n ñá já kéa̱ kómí tá kómí da̱ kua̱chi nu̱ Ndióxi̱ jáchi̱ kúúá tátu̱ʼun sa̱ íin da xi̱ʼi̱n ñá” (San Mateo 5:28). Tá si̱jaá na̱kani ini iin na̱yivi ña̱ kée ná kua̱chi kini, kíán tátu̱ʼun ña̱ si̱jándaʼví vá ná ñajiʼí ná á yíi̱ ná.
Kachi Jeová ña̱ kúni̱ʼi ndiva̱ʼa ña̱ ná kandaa yó ánima̱ yó (Proverbios 4:23; Jeremías 17:9). Já ná kuu kée ní ña̱yóʼo, káni kandaa ní ña̱ ndéʼé ní (San Mateo 5:29, 30). Kée ní tátu̱ʼun ni̱ kée Job, ña̱ ko̱ó ni̱ si̱nde̱ʼé míí vá rá iinka̱ ñáʼa̱ ña̱ ko̱ó kúú ñajiʼí rá (Job 31:1). O̱kunde̱ʼé míí vá ní na̱yivi na̱ ndaá vichi. Tá ko̱ó káni kúu ini ní koo ní xíʼín iinka̱ na̱yivi na̱ ko̱ó kúú ñajiʼí ní á yíi̱ ní.
KÉE NÍ ÑA̱YÓʼO:
-
Naʼa̱ ní nuu̱ na̱yivi ña̱ o̱jándákoo míí vá ní na̱ ni̱ tandaʼa̱ xíʼín ní
-
Tá ko̱ó sitaʼan ini na̱ ni̱ tandaʼa̱ xíʼín ní ña̱ ná néʼe táʼan va̱ʼa ní xíʼín iin na̱yivi, o̱káneʼe táʼan ga̱ ní xíʼín ná
