Va̱árá ndukundeé ní já ná kandoyi núchí ní xíʼín na̱ ni̱ tandaʼa̱ xíʼín ní ta xíʼín de̱ʼe ní, jo ió tein ña̱ iin tivi naa vá ndóʼo ndó tu̱ndóʼó tá keean ña̱ o̱kujii̱ ga̱ ini ndó (Eclesiastés 9:11). Jo Ndio̱s chindeé rá miíyó tá ndóʼo yó tu̱ndóʼó. Tá ná kée ndó consejo ña̱ va̱si nuu̱ Tu̱ʼun Ndio̱s ñá kunde̱ʼé yó yóʼo, miíní xíʼín na̱ veʼe ní kuaʼá ndeé ini ndó tá ná yaʼa ndó tu̱ndóʼó va̱árá káʼnu ndiva̱ʼa ña̱.

ÑA̱ KÁʼA̱N TU̱ʼUN NDIO̱S: “Ka̱ka̱ta̱ʼví ndó nu̱ Ndióxi̱ ña̱ ná chindeéa̱n ndo̱ʼó jáchi̱ ñúʼu inia sa̱ʼa̱ ndo̱” (1 Pedro 5:7). Jaá kuití naku̱ʼun ini ní ña̱ o̱ju̱ú kua̱chi Ndio̱s kúú ña̱ ndóʼo ini ní (Santiago 1:13). Tá ná nandukú ní Ndio̱s, miía̱ndaa̱ chindeé rá miíní (Isaías 41:10). “Ndiʼi ña̱ nakaa̱ ánima̱ ndó nakani ndó nuu̱ rá.” (Salmo 62:8.)

Jaá ní iinka̱ ña̱ kuaʼá ña̱ tu̱ndeé ini nuu̱ ní kíán ña̱ kaʼvi ní tá jákuáʼa ní Tu̱ʼun Ndio̱s ndini kivi̱. Tá ná kée ní ña̱, kunde̱ʼé ní ña̱ Jeová “mé a̱ kán sáʼan tu̱ʼun ndeé iní nu̱ tókó ndiʼi ña̱ ndóʼo iní” (2 Corintios 1:3, 4; Romanos 15:4). Kachi Tu̱ʼun Ndio̱s “ta naki̱ʼo Ndio̱s ña̱ koo va̱ʼa ini ndo̱” (Filipenses 4:6, 7, 13, Tyk).

KÉE NÍ ÑA̱YÓʼO:

• Kaka ní nuu̱ Jeová ná chindeé rá miíní já ná kuaʼá ndeé ini ní ta ná nakani va̱ʼa ini ní ña̱ kée ní

• Ió kuaʼa̱ ña̱ kuu kée ni, ka̱si ní ña̱ sini miíní ña̱ va̱ʼa cháá ga̱ kée ní

ÑA̱ KÁʼA̱N TU̱ʼUN NDIO̱S: “Ánima̱ na̱yivi ndichí kandaa̱ va̱ʼa cháá ga̱ ini, ta na̱yivi na̱ nakani va̱ʼa ini sinijo̱ʼo ná tá nandukú ná ña̱ ndichí” (Proverbios 18:15). ¿Ndíki̱án síniñúʼú iin iin na̱ veʼe ní? Ndakatu̱ʼún va̱ʼa ní ná. Tá ndatu̱ʼun ní xíʼín ná jaá kandaa̱ va̱ʼa ini ní ña̱ nakani ini ná (Proverbios 20:5).

Tá, ¿ndíki̱án kée ní tá ná kivi iin na̱yivi ná kiʼvi ini ní? Ná o̱kukáʼan nuu̱ ní káʼa̱n ní ndixi kúu ini ní. Naku̱ʼun ini ní ña̱ nda̱á Jesús “a̱nda̱ já na̱saku” (San Juan 11:35; Eclesiastés 3:4). Kúni̱ʼi ña̱ naniʼi̱ ndée̱ va̱ʼa ní tá kuju̱ va̱ʼa ní (Eclesiastés 4:6). Já kuu kuaʼá ndeé ini ní yaʼa ní nuu̱ tu̱ndóʼó yóʼo.

KÉE NÍ ÑA̱YÓʼO:

• Si̱jaá ndatu̱ʼun ní xíʼín na̱ veʼe ní ta kumani ndóʼo ndó tu̱ndóʼó. Jaá, tá ná ndóʼo ndó tu̱ndóʼó, káʼa̱n vá ná xíʼín ní ña̱ nakani ini ná

• Ndatu̱ʼun ní xíʼín java ná si̱ ni̱ ndóʼo ná tu̱ndóʼó tátu̱ʼun ña̱ ndóʼo miíní

ÑA̱ KÁʼA̱N TU̱ʼUN NDIO̱S: “Iin na̱ miía̱ndaa̱ néʼe táʼan va̱ʼa xíʼín yó kúni̱ ná miíyó ndiʼi tiempo ta tá ndóʼo yó tu̱ndóʼó kúú ná tátu̱ʼun ñani yó na̱ ni̱ kaku ná já chindeé ná miíyó” (Proverbios 17:17). Ná néʼe táʼan va̱ʼa xíʼín ní kúni̱ ná chindeé ná miíní, jo ndá ko̱ó sini ná ndíki̱án kée ná. Káʼa̱n ní xíʼín ná ndíki̱án kuu kée ná jaá kuu chindeé ná miíní (Proverbios 12:25). Jaá ni ndakatu̱ʼún ní na̱ sini va̱ʼa Tu̱ʼun Ndio̱s jaá ná chindeé ná miíní jaá ná koo va̱ʼa ní xíʼín Ndio̱s. Texto ña̱ kaʼvi ná nuu̱ ní chindeéán miíní já yaʼa ní nuu̱ tu̱ndóʼó ña̱ ndóʼo ní (Santiago 5:14).

Tá si̱jaá néʼe táʼan va̱ʼa ní xíʼín na̱ miía̱ndaa̱ kandísa Ndio̱s tá kandeé ini ná ña̱ Káʼa̱n rá, na̱yóʼo chindeé ná miíní. Jaá ni náni̱ʼi̱ ní tu̱ndeé ini tá ná chindeé ní na̱ kundaʼvi ini. Káʼa̱n ní xíʼín ná ña̱ kée Jeová cháá ga̱ chinuú tá ña̱ kandeé ini ní rá. Ndi̱ʼi ini ní chindeé ní java ka̱ na̱yivi tá o̱kusikaa ní nuu̱ na̱ nakani ini saʼa̱ ní tá kúni̱ ná miíní (Proverbios 18:1; 1 Corintios 15:58).

KÉE NÍ ÑA̱YÓʼO:

• Káʼa̱n ní xíʼín na̱ néʼe táʼan va̱ʼa xíʼín ní tá kuaʼá ní ichí ná chindeé ná miíní

• Káʼa̱n ní ndá kúú ña̱ miía̱ndaa̱ síniñúʼú ní