Jeová * Ndio̱s ni̱ jatandaʼa̱ rá ta̱a xíʼín ñáʼa̱ míínu̱ú. Kachi Tu̱ʼun Ndio̱s ña̱ miírá ni̱ ka̱va̱ʼa rá ñáʼa̱ míínu̱ú “ta ni̱ si̱ʼa rá ña̱yóʼo nuu̱ ta̱ ta̱a”. Ni̱ kujii̱ ndiva̱ʼa ini Adán tá ni̱ sini rá ñá tá ni̱ kachi rá: “Ñáʼa̱ yóʼo kúú lásá nu̱ú ña̱ kúú lásai̱ ta ñáʼa̱ yóʼo kúú ku̱ñu nu̱ú ña̱ kúú ku̱ñu̱i” (Génesis 2:22, 23). Ndá míí saʼa̱ ta̱ ndá kivi̱ viti kúni̱ Jeová ña̱ ná kandoyi núchí na̱ ni̱ tandaʼa̱.

Tá iin ta̱a xíʼín iin ñáʼa̱ tandaʼa̱ ná, káʼán ná ña̱ chí ni̱ o̱ko̱ó tu̱ndóʼó nuu̱ ná. Jo ndá ná kúni̱ táʼan ndiva̱ʼa koo tu̱ndóʼó nuu̱ ná (1 Corintios 7:28). Nuu̱ tutu yóʼo naniʼi̱ ní kuaʼa̱ consejo ña̱ va̱si nuu̱ Tu̱ʼun Ndio̱s, tá ná kée ní ña̱ káʼa̱n ña̱ já kandoyi núchí ní xíʼín yíi̱ ní á ñajiʼí ní tá xíʼín ndiʼi na̱ veʼe ní (Salmo 19:8-11).

ÑA̱ KÁʼA̱N TU̱ʼUN NDIO̱S: Ta̱ kúú yíi̱ kúú rá xini̱ na̱ veʼe rá (Efesios 5:23).

Jeová kúni̱ rá ña̱ miíní ta̱ kúú yíi̱, ná kandaa vií ní ñajiʼí ní (1 Pedro 3:7). Jeová ni̱ ka̱va̱ʼa rá ñá ñáʼa̱ já ná chindeé ñá yíi̱ ñá, tá ña̱káa kúni̱ Jeová ña̱ ta̱ kúú yíi̱ ná kiʼvi ini rá ñajiʼí rá tá ná koo ña̱ñúʼú rá nuu̱ ñá (Génesis 2:18). Káni kiʼvi ndiva̱ʼa ini ní ñá tá ndi̱ʼi cháá ga̱ ini ní saʼa̱ ñá tá o̱ju̱ú saʼa̱ miíní (Efesios 5:25-29).

Jeová kúni̱ rá ña̱ miíní ña̱ kúú ñajiʼí, ná koo ña̱ñúʼú ní nuu̱ yíi̱ ní tá chindeé ní rá já ná kée rá ña̱ káni kée rá (1 Corintios 11:3; Efesios 5:33). Chindeé ní rá xíʼín ndiʼi ña̱ kúni̱ rá kée rá (Colosenses 3:18). Tá ná kée ní ña̱yóʼo, kujii̱ ndiva̱ʼa ini yíi̱ ní tá jaá ní Jeová (1 Pedro 3:1-6).

KÉE NÍ ÑA̱YÓʼO:

• Ndakatu̱ʼún ní yíi̱ ní á ñajiʼí ní ndíki̱án kuu kée ní já kukuu ní iin yíi̱ va̱ʼa cháá ga̱ á iin ñajiʼí va̱ʼa chááka̱. Kunijo̱ʼo va̱ʼa ní ña̱ káʼa̱n yíi̱ ní á ñajiʼí ní tá kée ní ña̱ káʼa̱n ná

• Kueé koo ini ndó. Kueé kueé já kutu̱ʼva ndó kandoyi núchí ndó

ÑA̱ KÁʼA̱N TU̱ʼUN NDIO̱S: Kúni̱ʼi ndiva̱ʼa ña̱ ndi̱ʼi ini ní saʼa̱ ña̱ nakani ini yíi̱ ní á ñajiʼí ní (Filipenses 2:3, 4). Si̱jaá vií káni kukuu ní xíʼín ná, jáchi̱ Jeová kúni̱ rá ña̱ ná sínukuáchí nuu̱ rá si̱jaá kuití vií káni kukuu ná (2 Timoteo 2:24). Nakani va̱ʼa ini ní ndixi káʼa̱n ní, jáchi̱ Tu̱ʼun Ndio̱s kachian: “Ió na̱ ko̱ó nakani ini ta káʼa̱n na̱, tá jataiʼvi ná miíyó tátu̱ʼun iin yúchi̱, jo na̱ káʼa̱n tu̱ʼun ndichí jándúva̱ʼa ná miíyó” (Proverbios 12:18). Espíritu ii̱ Jeová chindeéán miíní já káʼa̱n ní tu̱ʼun vií ta tu̱ʼun núchí (Gálatas 5:22, 23; Colosenses 4:6).

KÉE NÍ ÑA̱YÓʼO:

• Ta ndatu̱ʼun ní saʼa̱ iin ña̱ʼa ña̱ kúni̱ʼi xíʼín na̱ ni̱ tandaʼa̱ xíʼín ní kaka ní nuu̱ Ndio̱s ná chindeé rá miíní já ná o̱kukama ini ní tá jaá ní ña̱ ná chikuéntá ní ña̱ o̱kukáʼán inuu̱ ní xíʼín ná

• Nakani va̱ʼa ini ní ndíki̱án káʼa̱n ní tá ndixi káʼa̱n ní ñá

ÑA̱ KÁʼA̱N TU̱ʼUN NDIO̱S: Tá tandaʼa̱ iin ta̱ ta̱a xíʼín iin ñá ñáʼa̱ ‘nduu ná iin túʼún ku̱ñu váʼ (San Mateo 19:5). Jo va̱árá jaá koo tein ña̱ jíin jíin nakani ini ná. Ña̱káa síniñúʼú ná ndukundeé ná já iin ná nakani ini ná ta iin koo ini ná (Filipenses 2:2). Ña̱yóʼo kúni̱ʼi ndivaʼa ña̱ nuu̱ ndá kúú míí vá ña̱ kée ná. ¿Ndixi kuu kée ná ña̱yóʼo? Tu̱ʼun Ndio̱s kachian ña̱: “Tá ná kunijo̱ʼo yó consejo [...] ndiʼi ña̱ kée yó kana va̱ʼa ña̱” (Proverbios 20:18). Tá kúni̱ na̱ kée ná iin ña̱ʼa ña̱ kúni̱ʼi xinañúʼú ná kunde̱ʼé ná ña kachi Tu̱ʼun Ndio̱s já kée ná ñá (Proverbios 8:32, 33).

KÉE NÍ ÑA̱YÓʼO:

• Nakani ní nuu̱ yíi̱ ní á ñajiʼí ní ndixi kúu ini ní tá o̱ju̱ú si̱va̱ʼa saʼa̱ ña̱ kuu iin kivi̱

• Tá kúni̱ ní kée ní iin ña̱ʼa, xinañúʼú ndatu̱ʼun ní xíʼín yíi̱ ní á ñajiʼí ní já kée ní ña̱