LECCIÓN 10
¿Ndixi kuu kee yó já kundaa̱ ini yó ndá religión kía̱n ndaa̱ ndisa jánaʼa̱ ña̱ ndaa̱?
1. ¿Á iin túʼún láá vá kúú religión ña̱ jánaʼa̱ ña̱ ndaa̱?
“Kandaa ndo̱ mií ndó noo̱ profeta to̱ʼón.” (SAN MATEO 7:15, TYK)
Saʼa̱ iin túʼún láá religión ña̱ jánaʼa̱ ña̱ ndaa̱ va, ni̱ ja̱náʼa̱ Jesús nu̱ú na̱ ni̱ si̱ndíko̱ ñaʼá. Ta ni̱ kachi Jesús ña̱ religión yóʼo kúúán tátu̱ʼun iin íchi̱ nu̱ú kuaʼa̱n na̱yivi na̱ kutaku ndijaá táʼa̱n kivi̱. Ta jaá ní ni̱ kachi si ña̱ cháá ndiva̱ʼo kúú na̱yivi na̱ kuaʼa̱n íchi̱ yóʼo (San Mateo 7:14). Sa̱ va̱ʼa na̱yivi na̱ ndáñu̱ʼu Ndio̱s tátu̱ʼun ki̱ʼa káʼa̱n Tutu ii̱ va kúú na̱ nátaʼan ini si ña̱ kée. Sa̱ʼá ña̱yóʼo na̱ miía̱n ndaa̱ ndisa ndáñu̱ʼu Ndio̱s tátu̱ʼun ki̱ʼa kúni̱ si, iin nu̱ú ini na, ta iin nu̱ú ki̱ʼa kándísa na. Kaʼvi ní San Juan 4:23, 24, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK]; 14:6, TYK xíʼín Efesios 4:4, 5, TYK.
Kande̱ʼéní video ¿Aprueba Dios todas las religiones?
2. ¿Ndíki̱án ni̱ kaʼa̱n Jesús sa̱ʼá na̱yivi na̱ káʼa̱n ña̱ ndíko̱ na̱ mií sí, jo ko̱ kée ña̱ ni̱ kaʼa̱n si?
“Vátí kachí na̱ yóʼo ña̱ kándeé ini na Ndióxi̱ joo xíʼín ña̱ núu kája na náʼa̱ na̱ ña̱ méa̱ ndaa̱ ko̱ kándeé ini na méá.” (TITO 1:16)
Ni̱ kachi Jesús ña̱ ná kundaa yó mií yó jáchi̱ kandoyi ta̱ profeta, ta̱ najama ña̱ ni̱ ja̱náʼa̱ si. Ta na̱ yóʼo xíʼín veʼe ñu̱ʼu na, kaʼa̱n na̱ ña̱ miía̱n ndaa̱ ndisa ndíko̱ na̱ Cristo, ta kée na ña káʼa̱n si. Jo kuu va kundaa̱ ini yó á miía̱n ndaa̱ ndisa kúú ná na̱ ndíko̱ Cristo, ¿ndixi? Tá ná kande̱ʼé yó ña̱ kée na. Jáchi̱ sa̱ va̱ʼa na̱ ndáñu̱ʼu Ndio̱s ndaa̱ ndisa va kúú na̱ kuu naʼa̱ xíʼín ña̱ kée na ña̱ miía̱n ndaa̱ ndisa ndíko̱ na̱ Cristo. Kaʼvi ní San Mateo 7:13-23, TYK.
3. ¿Ndixi kuu kee miíní já kundaa̱ ini ní ndá na̱yivi kúú na̱ miía̱n ndaa̱ ndisa kée ña̱ ni̱ kaʼa̱n Jesús?
Ná kande̱ʼé yó uʼu̱n ña̱ kée na̱yóʼo, ña̱ náʼa̱ ña̱ miía̱n ndaa̱ ndisa kúú ná na̱ ndíko̱ Cristo:
-
Na̱ ndíko̱ ndisa Jesús, sínde̱ʼé ná Tu̱ʼun Ndio̱s ña̱ kíán iin ña̱ ii̱. Ta ndúkúndeé ná kée na ña̱ káʼa̱n ley va̱si nu̱ú Tu̱ʼun Ndio̱s. Sa̱ʼá ña̱yóʼo iin ña̱ jíin kée na̱ ndíko̱ religión ña̱ jánaʼa̱ ña̱ ndaa̱ kía̱n ko̱ jánaʼa̱ na̱ ña̱ nákani ini ta̱yiví (San Mateo 15:7-9). Na̱ miía̱n ndaa̱ ndisa ndíko̱ Cristo ko̱ jánaʼa̱ na̱ iin ña̱ʼa ta kée na inga̱ ña̱ʼa. Kaʼvi ní San Juan 17:17, TYK xíʼín 2 Timoteo 3:16, 17, TYK.
-
Na̱ ndíko̱ ndisa Cristo kéekáʼno na kivi̱ Ndio̱s, Jeová. Ni̱ keekáʼno Jesús kivi̱ Ndio̱s tá ni̱ ja̱náʼa̱ sia̱n nu̱ú na̱yivi. Ta ni̱ chi̱ndeé sí na̱ já ni̱ ku̱ndaa̱ ini na saʼa̱ Ndio̱s, ta ni̱ ja̱náʼa̱ si nuu̱ ná ndixi kánian kaka̱taʼvi̱ na já ná kuu káʼno kivi̱ Ndio̱s (San Mateo 6:9). Nu̱ú ió miíní, ¿ndá religión kúú ña̱ jánaʼa̱ sa̱ʼá kivi̱ Ndio̱s nu̱ú na̱yivi? Kaʼvi ní San Juan 17: 26, TYK xíʼín Romanos 10:13, 14r, TYK.
-
Na̱ ndíko̱ ndisa Cristo jánaʼa̱ na̱ saʼa̱ Reino Ndio̱s nu̱ú na̱yivi. Ni̱ ta̱ndaʼá Ndio̱s de̱ʼe si Jesús já ni̱ kixi si nuu̱ Ñúʼu̱ yóʼo ni̱ kaʼa̱n si tu̱ʼun va̱ʼa saʼa̱ Reino Ndio̱s xíʼín na̱yivi. Iin túʼún láá Reino Ndio̱s va kuu jándíʼi nu̱ú tu̱ndóʼó ndóʼo na̱yivi. Ta jaá kuití ni̱ sa̱ káʼa̱n Jesús sa̱ʼá ña̱yóʼo nda̱ kivi̱ ni̱ xiʼi̱ si (San Lucas 4:44; 8:1; 23:42, 43). Ta ni̱ kachi si ña̱ kakanuu na̱ ndíko̱ ñaʼá kastu̱ʼun na saʼa̱ Reino yóʼo nu̱ú na̱yivi. Sa̱ʼá ña̱yóʼo tá ná saa̱ iin na̱yivi kaʼa̱n na̱ xíʼín miíní saʼa̱ Reino Ndio̱s, ¿ndá religión káʼán miíní ña̱ ndíko̱ na̱? Kaʼvi ní San Mateo 24:14.
-
Na̱ ndíko̱ Jesús ko̱ kúú ná kuendá ñuyíví kini yóʼo. Kuu va kundaa̱ ini miíní ndá yoo kúú na̱ ndíko̱ ndisa Jesús jáchi̱ ko̱ kíʼvinuu na̱yóʼo tein política, ta ni ko̱ kíʼvi nuu na xíʼín na̱yivi na̱ kútoó kee tu̱ndóʼó (San Juan 17:16; 18:36). Ta ni ko̱ kée nda̱va̱ʼa na xíʼín java ka̱ na̱ tátu̱ʼun ki̱ʼa kée java na̱yivi, ta ni ko̱ nákani ini na̱yóʼo ña̱ kini. Kaʼvi ní Santiago 4:4, TYK.
-
Na̱ ndíko̱ ndisa Cristo kúú na̱ miía̱n ndaa̱ ndisa kíʼvi̱ ini saʼa̱ táʼan na. Sa̱ʼá ña̱ jákuáʼa na̱yóʼo Tu̱ʼun Ndio̱s, ña̱káa kúti̱ʼa na ió ña̱ñúʼú ná nuu̱ ndijaá na̱yivi na̱ ndijaá táʼa̱n ñuu. Ta va̱árá síaʼa va religión ña̱ ko̱ jánaʼa̱ ña̱ ndaa̱, íchi̱ ña̱ saʼní táʼan na̱yivi na̱ iin ñuu xíʼín na̱ inga̱ ñuu, jo na̱ ndíko̱ ndisa Cristo ko̱ kée na ña̱yóʼo (Miqueas 4:1-3). Ña̱ kée na̱ miía̱n ndaa̱ ndisa ndíko̱ Cristo kía̱n ndíʼi ini na chíndeé ná na̱yivi ta síʼa na to̱ndeé ini nuu̱ ná. Kaʼvi ní San Juan 13:34, 35 xíʼín 1 Juan 4:20, TYK.
4. ¿Ndixi kuu kundaa̱ ini miíní ndá religión kúúa̱n jánaʼa̱ ña̱ ndaa̱?
¿Ndá religión kúúa̱n ndaa̱ ndisa jánaʼa̱ ña̱ káʼa̱n Tu̱ʼun Ndio̱s? ¿Ndá religión kúúa̱n kée káʼno kivi̱ Ndio̱s? ¿Ndá religión kúú ña̱ jánaʼa̱ ña̱ iin túʼún láá Reino Ndio̱s va kuu jándíʼi nuu̱ ndijaá tu̱ndóʼó ndóʼo na̱yivi? ¿Ndá na̱yivi kúú na̱ kíʼvi̱ ini saʼa̱ táʼan, ta ko̱ kíʼvinuu na xíʼín na̱ kuaʼa̱n kaʼní táʼan? ¿Ndixi káʼán miíní sa̱ʼá ña̱yóʼo? Kaʼvi ní 1 Juan 3:10-12, TYK.
