Káʼa̱n Ndio̱s xíʼín ndijaá táʼa̱n na̱yivi ña̱ ná kaka̱taʼvi̱ na nuu̱ sí, já kuu kuyati na nuu̱ sí (Salmo 65:2). Jo ko̱ kúni̱ kachi ña̱yóʼo ña̱ sinájo̱ʼo Ndio̱s ña̱ xíka̱taʼvi̱ ndijaá na̱yivi. Tátu̱ʼun iin ta̱a ta̱ kée nda̱va̱ʼa xíʼín ñajiʼí ra̱, kuu ña̱ o̱kúnijo̱ʼo Ndio̱s ña̱ xíka̱taʼvi̱ ra (1 Pedro 3:7). Ta jaá ní tá ni̱ sa̱ kee na̱ ñuu Israel ña̱ kini, ko̱ ní sínajo̱ʼo ka̱ Ndio̱s ña̱ ni̱ sa̱ káʼa̱n na̱ xíʼín sí. Jo sinájo̱ʼo va Ndio̱s ña̱ káʼa̱n iin na̱yivi na̱ ni̱ ya̱ʼa ni̱ kee kua̱chi kini, tá nándióko̱o ini na sa̱ʼá ña̱ ni̱ kee na. Ta ná o̱nándojó yó ña̱ iin ña̱ káʼno ndiva̱ʼo kía̱n kuu kaka̱taʼvi̱ yó nuu̱ Jeová Ndio̱s. Kaʼvi ní Isaías 1:15 xíʼín 55:7.

Kande̱ʼéní video ¿Escucha Dios todas las oraciones?

Tá xíka̱taʼvi̱ yó nuu̱ Ndio̱s jaá kía̱n náʼa̱ yó ña̱ mií sí kúú Ndio̱s yó, sa̱ʼá ña̱yóʼo nuu̱ iin túʼún láá Ndio̱s Jeová, Ta ni̱ ka̱va̱ʼa ndijaá táʼa̱n ña̱ʼa kánian kaka̱taʼvi̱ yó (San Mateo 4:10; 6:9). Jo na̱yivi kua̱chi va kúú yó sa̱ʼá ña̱kán kánian kaʼa̱n yó kivi̱ Jesús tá xíka̱taʼvi̱ yó nuu̱ Ndio̱s jáchi̱ Jesús ni̱ xiʼi̱ sa̱ʼá kua̱chi yó (San Juan 14:6). Ta ko̱ kúni̱ Jeová Ndio̱s ña̱ jaá kuití nandióko̱o yó kaʼa̱n yo̱ iin ni tu̱ʼun xíʼín sí, ni ña̱ ná kaʼvi yó ña̱ va̱si nuu̱ iin tutu já kaʼa̱n yo̱ xíʼín sí. Jáchi̱ kúni̱ si ña̱ ndinuʼu ini yó ná kaʼa̱n yo̱ xíʼín sí. Kaʼvi ní San Mateo 6:7 xíʼín Filipenses 4:6, 7.

Sinájo̱ʼo va Jeová Ndio̱s tá xíka̱taʼvi̱ yó va̱árá nákani uun ini yó ña̱yóʼo (1 Samuel 1:12, 13). Ta kúni̱ Ndio̱s ña̱ ná kaka̱taʼvi̱ yó nuu̱ sí ndá tein kúú mií vaan, tá kásáʼá kivi̱, ta tá ndíʼi kivi̱, tá kuaʼa̱n yo̱ kasáʼan yó, á tá ndóʼo yó tu̱ndóʼó. Kaʼvi ní Salmo 55:22 xíʼín San Mateo 15:36.

Tu̱ndóʼó vá já kuu kuyati yó nuu̱ Ndio̱s jáchi̱ tein na̱yivi na̱ ko̱ kándeé ini Ndio̱s va ndóyi yó. Ta ko̱ kándísa na ña̱ káʼa̱n Ndio̱s  ña̱ naka̱ndoyi va̱ʼa na̱yivi nuu̱ Ñúʼu̱ yóʼo (2 Timoteo 3:1, 4; 2 Pedro 3:3, 13). Sa̱ʼá ña̱yóʼo xíniñúʼú yó nataka yó jákuáʼa yó sa̱ʼá Tu̱ʼun Ndio̱s xíʼín ñani táʼan yó já naki̱ʼo táʼan yó to̱ndeé ini. Kaʼvi ní Hebreos 10:24, 25, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK].

Tá ná nataka yó xíʼín na̱yivi na̱ kúni̱ Ndio̱s, ña̱yóʼo chindeéán mií yó já kuyati chááka̱ yó nuu̱ Ndio̱s. Tá nu̱ú nátaka na̱ testigo Jeová, yóʼo kuu kande̱ʼé yó ndixi kándeé ini java ka̱ na̱ Ndio̱s, ta ña̱yóʼo naki̱ʼo ña to̱ndeé ini yó. Kaʼvi ní Romanos 1:11, 12, TYK.

Kuu va kuyati miíní nuu̱ Ndio̱s tá ná kaʼvi ní tu̱ʼun si, ta nakani ini ní sa̱ʼá ña̱ káʼa̱n ña̱. Ta jaá ní nakani ini ní saʼa̱ ndijaá ña̱ kée Ndio̱s, ta ndijaá consejo ña̱ síaʼa si nuu̱ ní, ta ndijaá ña̱ káʼa̱n si kee si. Tá ná kaka̱taʼvi̱ yó nuu̱ Ndio̱s, ta ná nakani ini yó sa̱ʼá ña̱ káʼa̱n nu̱ú tu̱ʼun si, ña̱yóʼo kía̱n chindeéa̱n yóʼo mií yó já ná kundaa ini yó ndixi ví kúni̱ si yó, ta ndixi ví ndichí si. Kaʼvi ní Josué 1:8 xíʼín Salmo 1:1-3.

Kuu va kuyati miíní nuu̱ Ndio̱s tá kándeé ndisa ini ní si. Jo ña̱ kandeé ini yó Ndio̱s ña̱yóʼo kíán tátu̱ʼun iin yíto̱, jáchi̱ xíniñúʼú yó chikaa̱ yo̱ ti̱kui̱í saʼa̱ to̱ já kuu kuaʼno tó, ta ki̱ʼa jaá ndóʼo yó xíʼín ña̱ kándísa yó Ndio̱s. Jáchi̱ kuu kee yó ña̱yóʼo tá jaá kuití ná jákuáʼa yó Tu̱ʼun Ndio̱s, ta nakani va̱ʼa ini yó ndiva̱ʼa kándísa yó ña̱ káʼa̱n Ndio̱s. Kaʼvi ní San Mateo 4:4; Hebreos 11:1, 6, TNM.

Ndíʼi ini Jeová Ndio̱s saʼa̱ na̱yivi na̱ kúni̱ ñaʼá. Ta kuu va kundaa ñaʼá Ndio̱s nuu̱ ndijaá ña̱ kuu kee ña̱ o̱kándeé ka̱ ini na si, ta ña̱ kuu kee ña̱ o̱kúu ka̱ kándoyi na ndijaá táʼa̱n kivi̱ (Salmo 91:1, 2, 7-10). Jáchi̱ kástu̱ʼun si xíʼín yó sa̱ʼá ña̱ kuu kee ña̱ kasáʼá yó kiʼvi̱ yo̱, ta o̱kándoyi va̱ʼa yó. Ta jánaʼa̱ Jeová Ndio̱s nuu̱ yó ndíki̱án kánian kee yó já kandoyi va̱ʼa chááka̱ yó. Kaʼvi ní Salmo 73:27, 28 xíʼín Santiago 4:4, 8, TYK.