LECCIÓN 6
¿Ndá ku̱ú ña̱ va̱ʼa kuu kundati na̱ ni̱ xiʼi̱ kachí Tu̱ʼun Ndio̱s?
1. ¿Ndá ku̱ú ña̱ va̱ʼa kuu kundati na̱ ni̱ xiʼi̱ kachí Tu̱ʼun Ndio̱s?
Tá ni̱ saa̱ Jesús nuu̱ ñuu Betania, iin ñuu lóʼo̱ ni̱ si̱káa̱ yati ñuu Jerusalén, sa̱ kumi̱ va kivi̱ ni̱ ya̱ʼa ña̱ ni̱ xiʼi̱ Lázaro iin ta̱ ni̱ si̱neʼe táʼan va̱ʼa xíʼín sí. Já ni̱ kiʼin Jesús kuaʼa̱n si xíʼín na̱ ki̱ʼa Lázaro na̱ naní Marta xíʼín María, nu̱ú ni̱ ndu̱xi ta̱ yóʼo. Tóó víʼí vá kúú sa̱ kuaʼa̱ ndiva̱ʼo na̱yivi ni̱ na̱taka yóʼo. Á kuu nakani ini miíní ndixi ví ni̱ ku̱jii̱ ini Marta xíʼín María tá ni̱ xini na ña̱ ni̱ ja̱nátaku Jesús Lázaro. Kaʼvi ní San Juan 11:21-24, 38-44, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK].
Sa̱ jaá ni̱ sa̱ xíni̱ va Marta ña̱ káʼa̱n Jeová Ndio̱s ña̱ jánátaku si na̱ ni̱ xiʼi̱ já ná kandoyi tuku na nuu̱ Ñúʼu̱ yóʼo. Kaʼvi ní Job 14:14, 15.
2. ¿Ndá ki̱án ndóʼo na̱yivi tá xíʼi̱ na̱?
“Ñúʼu̱ ya̱ká kúún ta ñúʼu̱ ya̱ká nandióko̱o tukuún nduún” ni̱ kachi Ndio̱s xíʼín Adán (GÉNESIS 3:19)
Xíʼín ñúʼu̱ ya̱ká va ni̱ ka̱va̱ʼa Ndio̱s na̱yivi (Génesis 2:7; 3:19). Ko̱ kúú yó iin espíritu ña̱ ió yikí ku̱ñu xíʼín lásá. Na̱yivi na̱ xíʼi̱ va kúú yó. Sa̱ʼá ña̱yóʼo tá xíʼi̱ iin na̱yivi ndáʼva̱ va ña̱ xi̱nítóni̱ ná, ta ko̱ nákani ka̱ ini na̱. Sa̱ʼá ña̱yóʼo tá ni̱ na̱taku Lázaro ni ko̱ó mií vá ña̱ʼa ní nákani ra sa̱ʼá ña̱ ni̱ ndoʼo ra tá ni̱ xiʼi̱ ra̱. Kaʼvi ní Salmo 146:4; Eclesiastés 9:5, 6, 10.
Tá xíʼi̱ iin na̱yivi, ¿á jándóʼo Ndio̱s ini na indayá? Java na̱yivi káʼán ná ña̱ ió va indayá, jo ña̱tu̱ʼún vá kíán yóʼo, jáchi̱ Tu̱ʼun Ndio̱s kachía̱n ña̱ ko̱ nákani ka̱ ini na̱ ni̱ xiʼi̱. Ta sa̱ʼá ña̱yóʼo ko̱ jánaʼa̱ na̱yóʼo ña̱ ndaa̱ saʼa̱ Ndio̱s, jáchi̱ ko̱ nátaʼan mií vá ini Ndio̱s ña̱ kaʼán na̱yivi ña̱ ió indayá nu̱ú jándóʼo si ini na̱ ni̱ xiʼi̱. Kaʼvi ní Jeremías 7:31.
Kande̱ʼéní video ¿Ndíki̱án ndóʼo na̱ ni̱ xiʼi̱?
3. ¿Á kuu kaʼa̱n na̱ ni̱ xiʼi̱ xíʼín yó?
Na̱ sa̱ ni̱ xiʼi̱ ko̱ káʼa̱n ka̱ na̱, ni ko̱ sínajo̱ʼo ka̱ na̱ (Salmo 115:17). Jo java na̱ ángel kini kúu va káʼa̱n na̱ xíʼín na̱yivi, ta kée na ña̱ ná kaʼán na̱yóʼo, ña̱ kúú ná na̱yivi na̱ sa̱ ni̱ xiʼi̱ (2 Pedro 2:4). Saʼndá Jeová Ndio̱s chuun ña̱ ko̱ kánian ndukú yó ndíki̱án kee yó já kaʼa̱n yo̱ xíʼín na̱ sa̱ ni̱ xiʼi̱. Kaʼvi ní Deuteronomio 18:10, 11.
4. ¿Ndá na̱yivi kúú na̱ nataku?
Kuaʼa̱ millón na̱yivi na̱ sa̱ ni̱ xiʼi̱, nataku na já kandoyi na nuu̱ Ñúʼu̱ yóʼo. Ta nda̱ java na̱yivi na̱ ko̱ ní kúndaa̱ ini saʼa̱ Ndio̱s, ta ni̱ kee na ña̱ kini nataku na. Kaʼvi ní Lucas 23:43, TNM xíʼín Hechos 24:15, TNM.
Ndijaá na̱yivi na̱ nataku yóʼo kuu saa̱ na̱ kundaa̱ ini na ña̱ ndaa̱ saʼa̱ Ndio̱s, ta kandísa na Jesús, ta kunijo̱ʼo na chuun saʼndá si (Apocalipsis 20:11-13). Tá ná kee na̱ nataku yóʼo ña̱ va̱ʼa jaá kía̱n kuu kandoyi na ndijaá táʼa̱n kivi̱ nuu̱ Ñúʼu̱ yóʼo. Kaʼvi ní Juan 5:28, 29, TNM.
5. ¿Ndíki̱án kúndaa̱ ini yó saʼa̱ Jeová Ndio̱s, tá jákuáʼa yó sa̱ʼá ña̱ nataku na̱ ni̱ xiʼi̱?
Kuu va nataku na̱yivi na̱ ni̱ xiʼi̱, jáchi̱ ni̱ ta̱ndaʼá Ndio̱s de̱ʼe mani̱ sí ni̱ kixi si ni̱ xiʼi̱ si saʼa̱ yó. Ta ña̱yóʼo jánaʼa̱ ña̱ nuu̱ yó ña̱ kíʼvi̱ ndiva̱ʼo ini Ndio̱s saʼa̱ yó, ta jaá ní jánaʼa̱n ña̱ va̱árá ko̱ kánian niʼi̱ yó ña̱yóʼo, jo va̱ʼa ndiva̱ʼo ini Ndio̱s xíʼín yó. Ta miíní, ¿ndá yoo kúni̱ ní kuni tuku ní tá ná nataku na̱ ni̱ xiʼi̱? Kaʼvi ní San Juan 3:16 xíʼín Romanos 6:23, TYK.
