Reino Ndio̱s kúú iin gobierno nákaa̱ indiví. Ta gobierno yóʼo jándíʼi nuu̱ ndijaá gobierno ñuyíví yóʼo, ta kasáʼá gobierno yóʼo kaʼndaan chuun já ná koo ña̱ kúni̱ Ndio̱s nuu̱ Ñúʼu̱ yóʼo, tátu̱ʼun ki̱ʼa ió indiví. Ña̱ va̱ʼa ndiva̱ʼo kúú ña̱ káʼa̱n Tutu ii̱ saʼa̱ Reino Ndio̱s. Nda̱á cháá vá kúmani̱ já ki̱ʼa Reino Ndio̱s ndiʼi ña̱ va̱ʼa ña̱ xíniñúʼú na̱yivi. Ta kandeé vá Reino Ndio̱s jákitáʼan ndijaá na̱yivi ndóyi nuu̱ Ñúʼu̱ yóʼo, iin nduu va na. Kaʼvi ní Daniel 2:44; Mateo 6:9, 10, TNM xíʼín 24:14, TNM.

Nuu̱ ndijaá gobierno ió iin ta̱ kúú rey. Ta ni̱ ka̱xi Jeová Ndio̱s de̱ʼe si Jesucristo já ná kukuu si rey nuu̱ gobierno si. Kaʼvi ní Apocalipsis 11:15, TNM.

Kande̱ʼéní video ¿Ndáki̱an kúú Reino Ndio̱s?

De̱ʼe Ndio̱s kúú ta va̱ʼa chááka̱ kuu kaʼnda chuun jáchi̱ va̱ʼa ndiva̱ʼo ini si xíʼín na̱yivi, ta ndinuʼu ña̱ va̱ʼa kuití vá kée si (San Mateo 11:28-30). Ta jaá ní kuu chindeé Jesús na̱yivi tá ná kaʼnda si chuun nuu̱ Ñúʼu̱ yóʼo. Ta kuu va kee si ña̱yóʼo jáchi̱ nda̱ indiví kaʼnda si chuun (Hebreos 10:12, 13). Tá ni̱ na̱taku Jesús jaá ni̱ na̱ndióko̱o tuku si kuaʼa̱n si indiví, ta ni̱ si̱io si ni̱ si̱ndati si xoo kuaʼá Ndio̱s, jaá ni̱ si̱aʼa Ndio̱s íchi̱ nuu̱ sí ña̱ kaʼnda si chuun. Kaʼvi ní Daniel 7:13, 14.

Iin nduʼú na̱yivi na̱ kúú “na̱yivi vií nuu̱ Ndio̱s” na̱yóʼo kúú na̱ kaʼnda chuun xíʼín Jesús nda̱ indiví (Daniel 7:27). Na̱ ni̱ xika tuun xíʼín Jesús na̱yóʼo ni̱ si̱kuu na̱ xinañúʼú ka̱ ni̱ ka̱xi Ndio̱s já  kukuu na na̱yivi vií. Ta nda̱ kivi̱ víti va káxi i̱í vá Jeová Ndio̱s java ta̱ ta̱a xíʼín na̱ ñáʼa̱ já ná kukuu na na̱yivi vií nuu̱ sí. Jaá ní tátu̱ʼun ki̱ʼa ni̱ ndoʼo Jesús, tá nátaku na̱yóʼo ndúu na espíritu va. Kaʼvi ní San Juan 14:1-3, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK] xíʼín 1 Corintios 15:42-44, TYK.

¿Ndijaa na̱yivi kúú na̱ kuʼu̱n indiví? Ni̱ kachi Jesús xíʼín na̱yivi na̱ kuʼu̱n indiví, ña̱ kúú ná tátu̱ʼun “ndikachi válí” jáchi̱ cháá vá kúú ná (San Lucas 12:32). Ta 144,000 va kúú nditáʼa̱n na̱ kaʼnda chuun xíʼín Jesús nuu̱ Ñúʼu̱ yóʼo. Kaʼvi ní Apocalipsis 14:1.

Kuia̱ 1914 ni̱ ka̱sáʼá Jesús saʼndá si chuun indiví. * Ta ña̱ xinañúʼú ka̱ ni̱ kee si kía̱n ni̱ ja̱kána niʼni si Satanás xíʼín ndijaá ángel kini va̱sian nuu̱ Ñúʼu̱ yóʼo. Ta ni̱ xijo̱ ndiva̱ʼo ini Satanás tátu̱ʼun iin ti̱na tíin kueʼe̱, ta ni̱ keean ña̱ ni̱ ka̱sáʼá ió ndiva̱ʼo tu̱ndóʼó nuu̱ iníí kúú ñuyíví (Apocalipsis 12:7-10, 12). Nda̱ kivi̱ jaá ni̱ ka̱sáʼá ndóʼo ndiva̱ʼo ini na̱yivi. Tu̱ndóʼó ña̱ saʼní táʼan na̱yivi, kueʼe̱, jo̱ko, xíʼín ña̱ táan, ndijaá ña̱yóʼo kúú java ña̱ náʼa̱ ña̱ sa̱ yati ñúʼú vá kasáʼá kaʼnda Reino Ndio̱s chuun nuu̱ Ñúʼu̱ yóʼo, ta ko̱ó ka̱ tu̱ndóʼó koo. Kaʼvi ní San Lucas 21:7, 10, 11, 31.

Sa̱ kuaʼa̱ ndiva̱ʼo na̱yivi na̱ ndijaá táʼa̱n ñuu ni̱ ka̱sáʼá ná ndíko̱ na̱ Reino Ndio̱s, jáchi̱ nuu̱ iníí ñuyíví xíkanuu na̱yivi jánaʼa̱ na̱ sa̱ʼá Tu̱ʼun Ndio̱s. Ta millón na̱yivi na̱ nda̱ʼví ini ni̱ ka̱sáʼá ná ndíko̱ na̱ Jesús. Ka̱ku va ndijaá na̱yóʼo tá ná kasaa̱ Reino Ndio̱s jánaán nuu̱ ñuyíví kini yóʼo. Sa̱ʼá ña̱yóʼo tá kúni̱ yó niʼi̱ yo̱ ña̱ va̱ʼa tá ná kasáʼá Reino Ndio̱s kaʼndaan chuun nuu̱ Ñúʼu̱ yóʼo, jaá kía̱n kánian kunijo̱ʼo yó ña̱ káʼa̱n Jesús. Kaʼvi ní Apocalipsis 7:9, 14, 16, 17.

Tein iin mil kuia̱ yóʼo, kee Reino Ndio̱s ña̱ naka̱ndoyi va̱ʼa na̱yivi tátu̱ʼun ki̱ʼa ni̱ kuni̱ Ndio̱s tá ni̱ ka̱va̱ʼa si na̱ nda̱ mií saʼa̱. Nuu̱ iníí kúú ñuyíví nduu ñúchí. Tá ni̱ ndiʼi jaá naki̱ʼo Jesús Reino yóʼo nuu̱ tatá si (1 Corintios 15:24-26). ¿Nuu̱ ndá yoo kúni̱ miíní nakani ní saʼa̱ Reino Ndio̱s? Kaʼvi ní Salmo 37:10, 11, 29.