LECCIÓN 8
¿Ndiva̱ʼa síʼa Ndio̱s íchi̱ ña̱ ió ña̱ kini xíʼín ña̱ ndóʼo ini na̱yivi?
1. ¿Ndixi ni̱ kuu já ni̱ ka̱sáʼá ió ña̱ kini?
Sa̱ kuaʼa̱ vá kuia̱ ni̱ si̱aʼa Ndio̱s íchi̱ ña̱ ni̱ saʼnda ta̱ ta̱a chuun nuu̱ Ñúʼu̱ yóʼo, ta sa̱ ni̱ naʼa̱ káxí váán ña̱ o̱kúu mií vá jándíʼi ra nu̱ú tu̱ndóʼó ña̱ ió ñuyíví yóʼo
Tá ni̱ kaʼa̱n Satanás ña̱tu̱ʼún míínu̱ú jaá ni̱ ka̱sáʼá ió ña̱ kini nuu̱ Ñúʼu̱ yóʼo. Iin ángel va̱ʼa va ni̱ si̱kuu Satanás, ta ko̱ó kua̱chia̱n ni̱ síio, jo “ko̱ ndíko̱a̱n ña̱ ndaa̱” (San Juan 8:44, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK]). Ta ni̱ ka̱sáʼá ni̱ kuni̱ Satanás ña̱ kandañu̱ʼu na̱yivi miíán, jo iin túʼún láá Ndio̱s va kánian kandañu̱ʼu yó. Ni̱ ja̱nda̱ʼví Satanás ñá ñáʼa̱ míínu̱ú ni̱ si̱naní Eva, já ná kunijo̱ʼo ñá ña̱ ni̱ kaʼa̱n, ta o̱ju̱ú ña̱ ni̱ kaʼa̱n Ndio̱s xíʼín ñá. Ta jaá ní ko̱ ní sínajo̱ʼo Adán ña̱ ni̱ kaʼa̱n Ndio̱s, ta ni̱ kee ra tátu̱ʼun ni̱ kee Eva. Ta sa̱ʼá ña̱ ni̱ kee na ña̱yóʼo ndóʼo ndiva̱ʼo ini na̱yivi ta jaá ni̱ xíʼi̱ na̱. Kaʼvi ní Génesis 3:1-6, 19.
Tá ni kaʼa̱n Satanás xíʼín Evá ña̱ ná o̱kúnijo̱ʼo ñá ña̱ ni̱ kaʼa̱n Ndios xíʼín ñá, yóʼo kúú nu̱ú ni̱ ka̱sáʼá Satanás kéean ña̱ ko̱ nákuni ka̱ na̱yivi ña̱ mií Ndio̱s Jeová, Ta káʼno chááka̱ nuu̱ ndijaá táʼa̱n ña̱ʼa kánian kaʼnda chuun nuu̱ ná. Kuaʼa̱ ndiva̱ʼo na̱yivi ko̱ nákuni na ña̱ Ndio̱s kúú ta kánian kaʼnda chuun, ta kée na ña̱ kúni̱ Satanás va. Sa̱ʼá ña̱kán kachí Tu̱ʼun Ndio̱s ña̱ Satanás kúú’ “ñá kómí kuéntá sa̱ʼá ña̱yivi ñuyíví yóʼo”. Kaʼvi ní San Juan 14:30 xíʼín 1 Juan 5:19.
2. ¿Á ko̱ ní káva̱ʼa va̱ʼa Ndio̱s ndijaá táʼa̱n ña̱ʼa?
Va̱ʼa ndiva̱ʼo ni̱ ka̱va̱ʼa Ndio̱s ndijaá táʼa̱n ña̱ʼa, ta ko̱ó ni iin ña̱ ko̱ ní káva̱ʼa va̱ʼa si. Jáchi̱ na̱yivi xíʼín na̱ ángel ni̱ si̱kuu va ni̱ sa̱ sinajo̱ʼo na ndijaá ña̱ ni̱ sa̱ kaʼa̱n Ndio̱s xíʼín ná (Deuteronomio 32:4, 5). Ni̱ si̱aʼa Ndio̱s íchi̱ nuu̱ yó ña̱ ka̱xi yó ndíki̱án kúni̱ yo̱ kee yó, á ña̱ va̱ʼa, á ña̱ ko̱ váʼa. Ta ni̱ kee si ña̱yóʼo já ná kuu naʼa̱ yó ña̱ miía̱n ndaa̱ ndisa kúni̱ yó si. Kaʼvi ní Santiago 1:13, TNM xíʼín 1 Juan 5:3, TYK.
3. ¿Ndiva̱ʼa síaʼa Ndio̱s íchi̱ ña̱ ndóʼo ini na̱yivi nda̱ kivi̱ víti?
Síaʼa va Ndio̱s íchi̱ nu̱ú na̱yivi ña̱ ko̱ nákuni na ña̱ mií sí kánian kaʼnda chuun, jo nda̱á cháá vá kivi̱ kukuu ña̱yóʼo. Jáchi̱ kúni̱ si ña̱ ná kundaa̱ ini yó, ña̱ ni iin mií vá na̱yivi o̱kúu kaneʼe va̱ʼa chuun, tá ná o̱chíndeé ñaʼá sí (Eclesiastés 7:29; 8:9). Sa̱ iñu̱ mil va kuia̱ ni̱ ya̱ʼa. Ta ña̱yóʼo náʼa̱ káxíán ña̱ ko̱ ku̱ú mií vá jándíʼi ta̱ gobierno ñuyíví yóʼo nu̱ú tu̱ndóʼó ña̱ saʼní táʼan na̱yivi, ni nu̱ú na̱ ko̱ kée ndaa̱ chuun, ni nu̱ú na̱ kée ña̱ kini, ni kueʼe̱, ni ko̱ síaʼa ra ña̱ xíniñúʼú na̱yivi já kutaku na. Kaʼvi ní Jeremías 10:23 xíʼín Romanos 9:17, TYK.
Jo jíin va kee gobierno Ndio̱s, jáchi̱ tá ná kunijo̱ʼo yó ña̱ káʼa̱n Ndio̱s, jaá kía̱n niʼi̱ yó ña̱ va̱ʼa (Isaías 48:17, 18). Sa̱ yati ñúʼú vá, jánaá Jeová Ndio̱s nuu̱ ndijaá gobierno ñuyíví yóʼo. Sa̱ va̱ʼa na̱yivi na̱ nákuni ña̱ Ndio̱s va kúú ta kánian kaʼnda chuun nuu̱ ná, sa̱ va̱ʼa na̱yóʼo va kúú na̱ kandoyi nuu̱ Ñúʼu̱ yóʼo (Isaías 11:9). Kaʼvi ní Daniel 2:44.
Kande̱ʼéní video ¿Ndiva̱ʼa sóno Ndio̱s ndoʼo níma̱ yó?
4. ¿Ndíki̱án kuu kee yó viti ña̱ kueé ini Ndio̱s xíʼín yó?
Ni̱ kachi Satanás ña̱ ndijaá na̱yivi káchúun na nuu̱ Ndio̱s jáchi̱ chíndeé sí na̱, ta níʼi̱ ná ña̱ va̱ʼa nuu̱ sí, ta o̱ju̱ú sa̱ʼá ña̱ kúni̱ na̱ sí. ¿Ndixi kuu naʼa̱ mií ní ña̱ kúú ña̱yóʼo ña̱tu̱ʼún? Sa̱ʼá ña̱ kueé ini Ndio̱s xíʼín yó. Ndijaá yó kuu naʼa̱ yo̱ xíʼín ña̱ kée yó ndá yoo kúni̱ yo̱ kaʼnda chuun, á Ndio̱s, á ta̱ ta̱a. Kaʼvi ní Job 1:8-12 xíʼín Proverbios 27:11.
5. ¿Ndixi kuu naʼa̱ yó ña̱ kúni̱ yó ña̱ Ndio̱s ná kaʼnda chuun nuu̱ yó?
Xíʼín ña̱ kée yó náʼa̱ yó, á kúni̱ yó kaʼnda Ndio̱s chuun nuu̱ yó, á ko̱ó
Kuu naʼa̱ yó ña̱ kúni̱ yo̱ ña̱ Ndio̱s ná kaʼnda chuun nuu̱ yo̱, tá ná jákuáʼa yó, ndixi kúni̱ si ña̱ ná kandañu̱ʼu yó si. Ta ná kee yó ña̱ káʼa̱n Tu̱ʼun Ndio̱s (San Juan 4:23). Tá ná kee yó tátu̱ʼun ni̱ kee Jesús ña̱ ko̱ ní ki̱ʼvinuu si tein política, ni tein tu̱ndóʼó ña̱ saʼní táʼan na̱yivi, jaá kía̱n naʼa̱ yó ña̱ ko̱ kúni̱ yo̱ ña̱ Satanás kaʼnda chuun nuu̱ yo̱. Kaʼvi ní San Juan 17:14.
Jákaʼa̱n Satanás ini na̱yivi já ná kee na ña̱ ko̱ váʼa xíʼín kua̱chi kini. Kuu ña̱ o̱nátaʼan ini na̱ veʼe yó xíʼín na̱ néʼe táʼan va̱ʼa xíʼín yó tá ná o̱kée yó ndiʼi ña̱yóʼo (1 Pedro 4:3, 4). Jo tá ndóʼo yó jaá, va̱ʼa chááka̱ ná ndukú yó na̱ kúni̱ Ndio̱s kaneʼe táʼan va̱ʼa xíʼín yó, ta ná kunijo̱ʼo yó chuun saʼndá Ndio̱s. Tá ná kee ña̱yóʼo jaá kía̱n naʼa̱ yó ña̱ ko̱ ní kaʼa̱n Satanás ña̱ ndaa̱, tá ni̱ kachia̱n ña̱ o̱kúnijo̱ʼo yó ña̱ káʼa̱n Ndio̱s tá ná ndoʼo yó tu̱ndóʼó. Kaʼvi ní 1 Corintios 6:9, 10 xíʼín 15:33, TYK.
Kuu va kandeé ini yó ña̱ jándíʼi Ndio̱s ndijaá ña̱ kini xíʼín ña̱ ndóʼo ini yó jáchi̱ kíʼvi̱ ndiva̱ʼo ini si saʼa̱ yó. Na̱yivi na̱ náʼa̱ ña̱ kándísa na ña̱ káʼa̱n Ndio̱s, kúú na̱ kandoyi ndijaá táʼa̱n kivi̱ nuu̱ Ñúʼu̱ yóʼo. Kaʼvi ní San Juan 3:16.
