Ni̱ ka̱va̱ʼa Jeová Ndio̱s nuu̱ Ñúʼu̱ yóʼo já ná kandoyi na̱yivi nu̱úán. Sa̱ʼá ña̱yóʼo tá ni̱ ka̱va̱ʼa Ndio̱s ta̱a míínu̱ú ni̱ si̱naní Adán xíʼín ñá ñáʼa̱ ni̱ si̱naní Eva, ko̱ ní káva̱ʼa si na já kandoyi na indiví, jáchi̱ sa̱ ni̱ ka̱va̱ʼa va Ndio̱s na̱ ángel já kandoyi na káa (Job 38:4, 7). Ta ni̱ chi̱kaa̱ si Adán nuu̱ ñúʼu̱ ñúchí naní Edén (Génesis 2:15-17). Ta ni̱ si̱aʼa si íchi̱ nuu̱ rá xíʼín nu̱ú de̱ʼe ra na̱ kandoyi chááka̱ ni chínuu̱, ña̱ kandoyi va̱ʼa na ndijaá táʼa̱n kivi̱ nuu̱ Ñúʼu̱ yóʼo. Kaʼvi ní Salmo 37:29 xíʼín 115:16.

Tá mií saʼa̱, sa̱ va̱ʼa nuu̱ ñúʼu̱ naní Edén yóʼo va kúú nu̱ú ñúchí ni̱ si̱kaa. Ta ni̱ saʼnda Ndio̱s chuun nuu̱ Adán xíʼín Evá ña̱ ná kandoyi kuaʼa̱ de̱ʼe na já ná nduu kuaʼa̱ ná, já kundaa na, ta cháá cháá jándúu ñúchí ná iníí kúú nuu̱ Ñúʼu̱ yóʼo (Génesis 1:28). Nuu̱ Ñúʼu̱ yóʼo ni̱ si̱aʼa Jeová Ndio̱s kandoyi na̱yivi ta o̱ndíʼi nu̱úán, jaá koo vaan. Kaʼvi ní Salmo 104:5.

Kande̱ʼéní video ¿Por qué creó Dios la Tierra?

Ko̱ ní sínajo̱ʼo Adán xíʼín Eva ña̱ ni̱ kaʼa̱n Ndio̱s xíʼín ná, sa̱ʼá ña̱kán ni̱ tavá sí na̱ nuu̱ ñúʼu̱ ñúchí nu̱ú ni̱ si̱ndoyi na. Ta ni̱ naá vá nuu̱ ñúʼu̱ ñúchí, ta ko̱ íin mií vá kuu jándúu ñúchí tuku nuu̱ Ñúʼu̱ yóʼo tátu̱ʼun ki̱ʼa ni̱ kee Ndio̱s. Nda̱ kivi̱ jaá ni̱ ka̱sáʼá ni̱ nduu kuaʼa̱ ndiva̱ʼo na̱yivi kíni ndóyi nuu̱ Ñúʼu̱ yóʼo kachí Tu̱ʼun Ndio̱s (Job 9:24). Kaʼvi ní Génesis 3:23, 24.

¿Á kúni̱ kachi ña̱yóʼo ña̱ o̱jándúu ñúchí ka̱ Ndio̱s nuu̱ Ñúʼu̱ yóʼo tátu̱ʼun ki̱ʼa ni̱ kuni̱ si nda̱ mií saʼa̱? ¡Ko̱ó! Jáchi̱ mií sí kúú Ndio̱s ta kúú kée ndijaá táʼa̱n va ña̱ʼa, ta kuu va kee si ndijaá ña̱ káʼa̱n si (Isaías 45:18). Chááka̱ ni chínuu̱, jaá kía̱n kee Ndio̱s ña̱ naka̱ndoyi va̱ʼa tuku na̱yivi tátu̱ʼun ki̱ʼa ni̱ kuni̱ si ña̱ kandoyi na nda̱ mií saʼa̱. Kaʼvi ní Salmo 37:11, 34.

Chááka̱ ni chínuu̱, Jesús ta kúú rey gobierno Ndio̱s jándúu ñúchí si nuu̱ Ñúʼu̱ yóʼo. Tá ná koo tu̱ndóʼó káʼno naní Armagedón,  jaá kía̱n Jesús xíʼín ndijaá na̱ ángel Ndio̱s jánaá na nuu̱ ndijaá na̱ ko̱ xi̱ín kandísa ña̱ káʼa̱n Ndio̱s. Jaá kía̱n jákána Jesús Satanás ini yávi̱ kuná ta iin mil kuia̱ kakaa̱ ña̱ íkáa. Ta ka̱ku va na̱ xínukuáchí nuu̱ Ndio̱s, jáchi̱ mií vá Jesús kundaa̱ na̱yóʼo. Ta ndijaá táʼa̱n kivi̱ kandoyi na̱yóʼo nuu̱ ñúʼu̱ ñúchí. Kaʼvi ní Apocalipsis 20:1-3 xíʼín 21:3, 4, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK].

¿Ndá ama jándíʼi Ndio̱s nu̱ú ña̱ kíni kúu nuu̱ Ñúʼu̱ yóʼo? Sa̱ ni̱ kaʼa̱n va Jesús ndáki̱án kúú ña̱ naʼa̱ tá sa̱ ni̱ ku̱yati ña̱yóʼo kooan. Ndijaá ña̱ kúu nuu̱ ñuyíví yóʼo kivi̱ víti, kuu jánaá ña̱yóʼo nuu̱ ndijaá na̱yivi. Ta ndiʼi ña̱yóʼo náʼa̱n ña̱ sa̱ ni̱ ku̱yati va kivi̱ jánaá Ndio̱s nu̱ú na̱yivi na̱ kée ña̱ kini ió nuu̱ Ñúʼu̱ yóʼo. Kaʼvi ní San Mateo 24:3, 7-14, 21, 22.

Tá ná kaʼnda Jesús chuun tein iin mil kuia̱ indiví, jaá kía̱n cháá cháá jándíʼi si nu̱ú ña̱ ndóʼo ini na̱yivi (Isaías 9:6, 7; 11:9). Tá ná kukuu si rey xíʼín jutu̱ miínu̱ú, jaá kía̱n jándóo si kua̱chi ndijaá na̱yivi na̱ kúni̱ Ndio̱s. Sa̱ʼá ña̱yóʼo kachúun Ndio̱s de̱ʼe si Jesús já jándíʼi si nu̱ú kueʼe̱, ta o̱kúu sáʼno ka̱ na̱yivi, ta o̱ki̱ví ka̱ na̱. Kaʼvi ní Isaías 25:8 xíʼín 33:24.

Na̱yivi na̱ sínajo̱ʼo ña̱ káʼa̱n Ndio̱s kúú na̱ kandoyi nuu̱ Ñúʼu̱ ñúchí (1 Juan 2:17). Ni̱ ta̱ndaʼá Jesús na̱ kuendá si ná kuʼu̱n na̱ nandukú ná na̱yivi na̱ nda̱ʼví ini, ta ná jánaʼa̱ na̱ nu̱ú na̱yóʼo ña̱ kánian kee na já ná kiʼvi̱ ini Ndio̱s saʼa̱ ná. Kivi̱ víti sa̱ jánaʼa̱ va Jeová Ndio̱s nuu̱ millón na̱yivi ndixi kandoyi na nuu̱ ñúʼu̱ ñúchí (Sofonías 2:3). Na̱yivi na̱ nátaka xíʼín na̱ testigo Jeová nu̱ú nátaka na jákuáʼa na sa̱ʼá Tu̱ʼun Ndio̱s, káti̱ʼa na ndixi kukuu na iin yíi̱ váʼa, á iin ñajiʼí va̱ʼa, á kukuu na iin tatá xíʼín naná va̱ʼa xíʼín de̱ʼe na. Ta ndiʼi ña̱ káti̱ʼa na nu̱ú Tu̱ʼun Ndio̱s chíndeéán na̱ já ndóyi va̱ʼa na. Kaʼvi ní Miqueas 4:1-4.