¿Á ko̱ ndáa̱ ña̱ kúni̱ chááka̱ yó Jeová Ndio̱s sa̱ʼá ña̱ ni̱ kaʼvi yó saʼa̱ ndijaá ña̱ va̱si nuu̱ Tutu ii̱? Ta viti kánian ndukúndéé ka̱ ví yó já kuni̱ chááka̱ yo̱ Jeová Ndio̱s (1 Pedro 2:2). Jáchi̱ tá ná kaʼvi chááka̱ miíní Tutu ii̱, jaá kía̱n kuyati chááka̱ ní nuu̱ Ndio̱s, ta kuu kutaku ní ndijaá táʼa̱n kivi̱. Kaʼvi ní Juan 17:3, TNM xíʼín Judas 21.

Ta xía̱n nani káti̱ʼa chááka̱ ní saʼa̱ Ndio̱s, kandeé chááka̱ ini ní si já kuu kee ní ña̱ kúni̱ si (Hebreos 11:1, 6). Ta ña̱yóʼo chindeéán yóʼo mií yó já naja̱ma yó ta nandióko̱o ini yó sa̱ʼá ña̱ kée yó. Kaʼvi ní Hechos 3:19.

Kuu va nakani mií ní nuu̱ java ka̱ na̱yivi ña̱ ni̱ ka̱ti̱ʼa ní nuu̱ Tutu ii̱, jáchi̱ ndijaá yó kújii̱ ini yó tá kástu̱ʼun yó iin ña̱ va̱ʼa nuu̱ java ka̱ na̱. Tá ná jákuáʼa chááka̱ mií ní sa̱ʼá Tu̱ʼun ndio̱s jaá kía̱n kuti̱ʼa ní kachúun nía̱n já nakani ní nuu̱ java ka̱ na̱, ndiva̱ʼa kándeé ini ní Jeová Ndio̱s, ta kándeé ini ní ña̱ káʼa̱n ndijaá tu̱ʼun va̱ʼa va̱si nu̱ú Tutu ii̱. Kaʼvi ní Romanos 10:13-15, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK].

Ta kuu kasáʼá ní kaʼa̱n ní sa̱ʼá tu̱ʼun va̱ʼa yóʼo xíʼín na̱ veʼe ní, á na̱ néʼe táʼan va̱ʼa xíʼín ní. Jo koo ña̱ñúʼú ní nuu̱ ná, ta vií kaʼa̱n ní xíʼín ná. O̱káʼa̱n ní xíʼín ná ña̱ ko̱ váʼa religión ña̱ ndíko̱ na̱, va̱ʼa ka̱ kaʼa̱n ní xíʼín ná saʼa̱ ndijaá ña̱ ni̱ kaʼa̱n Ndio̱s kee si. Ta naku̱ʼun ini ní ña̱, ña̱ kée va ní sínde̱ʼé chááka̱ na̱yivi ikáa, o̱ju̱ú ña̱ káʼa̱n ní xíʼín ná. Kaʼvi ní 2 Timoteo 2:24, 25, TYK.

Tá ná jákuáʼa chááka̱ miíní sa̱ʼá Tu̱ʼun Ndio̱s jaá kía̱n kuti̱ʼa miíní kee ní ña̱ káʼa̱n ña̱. Jáchi̱ cháá cháá kuu saa̱ miíní kaneʼe táʼan va̱ʼa ní xíʼín Jeová Ndio̱s. Ta kuu saa̱ miíní kukuu ní iin na̱ kuendá Ndio̱s tátu̱ʼun iin de̱ʼe mií sí. Kaʼvi ní 2 Corintios 6:18, TYK.

Kuu kati̱ʼa chááka̱ miíní saʼa̱ Ndio̱s tá ná kaʼvi chááka̱ ní Tutu ii̱ (Hebreos 5:13, 14). Kaʼa̱n ní xíʼín iin na̱ testigo Jeová ña̱ ná jánaʼa̱ na̱ nuu̱ ní saʼa̱ Tu̱ʼun Ndio̱s, xíʼín tutu ña̱ naní: ¿Qué nos enseña la Biblia? Jáchi̱ tá ná kati̱ʼa chááka̱ ní saʼa̱ Ndio̱s, jaá kía̱n kujii̱ chááka̱ ini ní koo ní. Kaʼvi ní Salmo 1:1-3 xíʼín 73:27, 28.

Ta naku̱ʼun ini ní ña̱ Jeová Ndio̱s, ta kúú Ndio̱s jii̱ ini va káʼa̱n ndijaá tu̱ʼun va̱ʼa va̱si nuu̱ Tutu ii̱. Ta kuu kuyati miíní nuu̱ Ndio̱s tá ná nataka ní xíʼín na̱ ñuu si (Hebreos 10:24, 25). Ta tá ná ndukúndéé ní kee ní ña̱ kúni̱ Jeová Ndio̱s jaá kía̱n kuu niʼi̱ ní ña̱ kutaku ndisa ní, jáchi̱ kuu kutaku ní ndijaá táʼa̱n kivi̱. Miía̱n ndaa̱ ndisa ña̱, ña̱ va̱ʼa chááka̱ kuu kee miíní kía̱n kuyati ní nuu̱ Ndio̱s. Kaʼvi ní 1 Timoteo 1:11, TNM xíʼín 6:19, TYK.