Ni̱ chi̱ko̱o Ndio̱s ndixi kánian koo chuun tein na̱ de̱ʼe Abraham já ná nduu na iin ñuu káʼno, ta ni̱ si̱aʼa si kuaʼa̱ ley nuu̱ ná. Ta “Israel” ni̱ chi̱naní sí na̱ ñuu yóʼo, ta ni̱ saʼnda si chuun nuu̱ ná ña̱ ná kandaa na ña̱ káʼa̱n nuu̱ Tutu ii̱, ta ná jánaʼa̱ na nu̱ú na̱yivi ña̱ kandañu̱ʼu na Ndio̱s ndaa̱ ndisa (Salmo 147:19, 20). Ta na̱yivi na̱ ndijaá táʼa̱n ñuu kuu niʼi̱ ná ña̱ va̱ʼa sa̱ʼá ña̱yóʼo. Kaʼvi ní Génesis 22:18.

Ni̱ ka̱xi Ndio̱s na̱ ñuu Israel já ná kukuu na testigo si. Ña̱ ni̱ ndoʼo na̱ ñuu Israel yóʼo jánaʼa̱ nuu̱ yó ña̱ tá ná kunijo̱ʼo yó ña̱ káʼa̱n ley Ndio̱s jaá kía̱n niʼi̱ yó ña̱ va̱ʼa (Deuteronomio 4:6). Ta sa̱ʼá na̱ ñuu Israel yóʼo ni̱ saa̱ java ka̱ na̱ ni̱ kundaa̱ ini na saʼa̱ Ndio̱s ndaa̱ ndisa. Kaʼvi ní Isaías 43:10, 12.

Tá ni̱ ya̱ʼa tiempo, ni̱ ja̱ndákoo va na̱ ñuu Israel Ndio̱s, sa̱ʼá ña̱káa ko̱ ní kuni̱ ka̱ Jeová Ndio̱s na̱, ta ni̱ na̱jama si na̱ xíʼín na̱ kuendá Cristo va (San Mateo 21:43; 23:37, 38). Ta kivi̱ víti na̱ kuendá Cristo va kúú na̱ xínukuáchí nuu̱ Jeová Ndio̱s, tátu̱ʼun na̱ testigo si, ta ko̱ kúú ka̱ na na̱ ñuu Israel. Kaʼvi ní Hechos 15:14, 17, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK].

Ni̱ saʼnda Jesús chuun nu̱ú na̱ kuendá si ña̱ ná kuʼu̱n yíko̱ na̱ jánaʼa̱ na̱ tu̱ʼun va̱ʼa saʼa̱ Ndio̱s nu̱ú na̱yivi na̱ ndóyi nuu̱ iníí kúú ñuyíví, já ná nduu na na̱ kuendá si (San Mateo 10:7, 11; 24:14; 28:19, 20). Kivi̱ víti, tein kivi̱ nu̱jandíʼí ka̱ ña̱ nákaa̱ ñuyíví kini yóʼo, nákuita̱ ka̱ ví tu̱ʼun yóʼo kuaʼa̱n ña̱. Kivi̱ víti sa̱ ni̱ na̱kiʼin va Jeová Ndio̱s millón na̱yivi na̱ ndijaá táʼa̱n ñuu já ná nduu na kuendá religión ña̱ jánaʼa̱ ña̱ ndaa̱ (Apocalipsis 7:9, 10). Sa̱ʼá ña̱ ió yíko̱ chuun tein na̱ ndíko̱ ndisa Cristo, já kúu chíndeé táʼan na, ta náki̱ʼo to̱ndeé ini táʼan na. Ta nuu̱ iníí kúú ñuyíví nu̱ú nátaka na jákuáʼa na, iin ña̱ jákuáʼa va na sa̱ʼá Tu̱ʼun Ndio̱s. Kaʼvi ní Hebreos 10:24, 25, TYK.

Yati kuia̱ 1870 jaá ni̱ ka̱sáʼá java na̱ ni̱ sa̱ ja̱kuáʼa Tu̱ʼun Ndio̱s kúndaa̱ ini na sa̱ʼá ña̱ ndaa̱ jánaʼa̱ Tu̱ʼun Ndio̱s, ta tá si̱naʼá ko̱ íin ní sá xini̱ na̱ sa̱ʼá ña̱yóʼo. Ta na̱ ni̱ sa̱ ja̱kuáʼa Tu̱ʼun ndio̱s yóʼo ni̱ sa̱ xíni̱ na̱, ña̱ ni̱ saʼnda Jesús chuun nu̱ú na̱ kuendá si já ná jánaʼa̱ na̱ saʼa̱ Ndio̱s nu̱ú na̱yivi, sa̱ʼá ña̱yóʼo ni̱ ka̱sáʼá ná xíkanuu na jánaʼa̱ na saʼa̱ Reino Ndio̱s nuu̱ ndijaá táʼa̱n ñuu. Ta kuia̱ 1931 já ni̱ ka̱sáʼá na̱yóʼo naní ná na̱ testigo Jeová. Kaʼvi ní Hechos 1:8, TYK; 2:1, 4, 11, TYK xíʼín 5:42, TYK.

Tá kivi̱ ni̱ si̱ndoyi na̱ ni̱ xika tuun xíʼín Jesús. Ndijaá na̱ kuendá Cristo, na̱ jíin jíin ñuu ni̱ niʼi̱ ná ña̱ va̱ʼa nuu̱ Iin nduʼú na̱yivi na̱ Néʼe chuun, na̱ ni̱ si̱ndoyi iin ñuu va, ta ni̱ na̱kuni na̱yóʼo Jesús ña̱ kúú sí xini̱ congregación (Hechos 16:4, 5). Jaá ní kivi̱ víti, na̱ testigo Jeová na̱ ndóyi nuu̱ iníí kúú ñuyíví, chíndeé ñaʼá Iin nduʼú na̱yivi na̱ Néʼe chuun, na̱ kúú na̱ kuaʼa̱n nuu̱ tein na̱ testigo Jeová, ta sa̱ naʼá ndiva̱ʼo xínukuáchí ná nuu̱ Ndio̱s. Ta na̱yóʼo kée yíko̱ ndijaá chuun ió veʼe nu̱ú káchúun na̱ testigo Jeová na̱ iníí ñuyíví. Ta veʼe yóʼo kúú nu̱ú nátaa na, ta tavá na̱, ta nájasá ná ndijaá tutu ña̱ káʼa̱n saʼa̱ Ndio̱s, nuu̱ yáʼa ka̱ iñu̱ ciento yúʼu̱. Ta Tu̱ʼun Ndio̱s va káchúun Iin nduʼú na̱yivi na̱ Néʼe chuun yóʼo já chíndeé ná, ta náki̱ʼo na to̱ndeé ini nuu̱ yáʼa ka̱ iin ciento mil congregación nuu̱ iníí kúú ñuyíví. Ta nuu̱ iin tá iin congregación yóʼo ñúʼu ta̱a ta̱ kuaʼa̱n yíko̱ xíʼín ña̱ káʼa̱n Tu̱ʼun Ndio̱s, ta ndaá ra, ta kúni̱ ra̱ na̱yivi na̱ kúú tátu̱ʼun ndikachi Ndio̱s. Kaʼvi ní 1 Pedro 5:2, 3.

Ió yíko̱ ndiva̱ʼo chuun tein na̱ testigo Jeová já kuaʼa̱n na̱ kastu̱ʼun na tu̱ʼun va̱ʼa saʼa̱ Ndio̱s nu̱ú na̱yivi, já ná nduu na kuendá Jesús. Ta veʼe tá veʼe xíkanuu na̱yóʼo jánaʼa̱ na̱ sa̱ʼá Tu̱ʼun Ndio̱s, tátu̱ʼun ni̱ sa̱kee na̱ ni̱ xika tuun xíʼín Jesús (Hechos 20:20). Ta jaá ní jánaʼa̱ na̱ sa̱ʼá Tu̱ʼun Ndio̱s nu̱ú na̱yivi na̱ kúni̱ kundaa̱ ini sa̱ʼá ña̱ ndaa̱. Jo o̱ju̱ú sa̱ va̱ʼa na̱ kútoó kachúun yíko̱ uun ni kúú na̱yóʼo, jáchi̱ tátu̱ʼun ki̱ʼa ndóʼo na̱yóʼo xíʼín na̱ veʼe na, ki̱ʼa jaá ndóʼo na xíʼín ñani táʼan na, jáchi̱ kíʼvi̱ ini sa̱táʼan na, chi̱ Ndio̱s va kúú tatá mani̱ ná (2 Tesalonicenses 1:3). Ta sa̱ʼá ña̱ káchúun yíko̱ ndiva̱ʼa na̱ ñuu Jeová Ndio̱s já kée na ña̱ kúni̱ si, ta chíndeé ná java ka̱ na̱yivi, sa̱ʼá ña̱yóʼo kúú ná na̱yivi na̱ ñúchí chááka̱ ndóyi nuu̱ iníí kúú ñuyíví. Kaʼvi ní Salmo 33:12 xíʼín Hechos 20:35, TNM.