Jeová Ndio̱s, Ta ni̱ ka̱va̱ʼa ndijaá táʼa̱n ña̱ʼa, ndichí ka̱ va si o̱ju̱ú mií yó. Ta ndíʼi ini Ndio̱s saʼa̱ yó jáchi̱ kúni̱ si yó tátu̱ʼun ki̱ʼa kúni̱ iin tatá de̱ʼe ra. Tá ni̱ ka̱va̱ʼa Ndio̱s yó, ko̱ ní kuni̱ si ña̱ ná kandoyi mií yó, ta o̱chíndeé ñaʼá sí (Jeremías 10:23). Sa̱ʼá ña̱yóʼo tátu̱ʼun ki̱ʼa xíniñúʼú ta kuálí ña̱ kaʼa̱n tatá xi xíʼín xí ndá chí íchi̱ kiʼin xi kuʼu̱n xi, ki̱ʼa jaá ní ndóʼo yó xíʼín Ndio̱s, jáchi̱ xíniñúʼú yó ña̱ kaʼa̱n Ndio̱s xíʼín yó ndá chí íchi̱ kiʼin yó kuʼu̱n yo̱ (Isaías 48:17, 18). Ndijaá ley ña̱ va̱si nuu̱ Tutu ii̱, síʼa Ndio̱s nuu̱ yó já káʼa̱n si xíʼín yó ndá chí íchi̱ kiʼin yó kuʼu̱n yo̱. Kaʼvi ní 2 Timoteo 3:16, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK].

Ndijaá ley xíʼín consejo ña̱ káʼa̱n Jeová Ndio̱s xíʼín yó, ña̱yóʼo chíndeéán yó já kuu kandoyi va̱ʼa yó. Ta jaá ní káʼa̱n ndáki̱án kuu kee yó já ná keemáni̱ ñaʼá Ndio̱s ndijaá táʼa̱n kivi̱. Kánian kujii̱ ini yó kunijo̱ʼo yó ña̱ káʼa̱n Ndio̱s, jáchi̱ mií sí ni̱ ka̱va̱ʼa yó. Kaʼvi ní Salmo 19:7, 11 xíʼín Apocalipsis 4:11.

Nu̱ú Tu̱ʼun Ndio̱s va̱si kuaʼa̱ ley ña̱ xíniñúʼú yó kundaa̱ ini yo̱, jáchi̱ káʼa̱n ña̱ xíʼín yó ndíki̱án kúni̱ Ndio̱s ña̱ ná kee yó nuu̱ iin tá iin ña̱ ndóʼo yó. Jo java ley va̱si nu̱ú Tu̱ʼun Ndio̱s chíndeéán yó saʼa̱ iin va ña̱ ndóʼo yó (Deuteronomio 22:8). Kánian nakani va̱ʼa ndiva̱ʼo ini yó já kuu kundaa̱ ini yó ndixi chíndeé ñaʼá iin ley va̱si nu̱ú Tu̱ʼun Ndio̱s (Proverbios 2:10-12). Tátu̱ʼun ña̱ kachí Tu̱ʼun Ndio̱s, ña̱ Ndio̱s va síʼa ña̱ ta̱kú yó. Tá ná naku̱ʼun ini yó ña̱yóʼo jaá kía̱n kundaa yó mií yó já o̱kée yó iin ña̱ kuu kaʼní ñaʼá, ta kundaa yó mií yó já o̱játákueʼe̱ yó java ka̱ na̱yivi. Ta ña̱yóʼo kuu chindeéán yó já kundaa yó mií yó tá ndeí kúú mií nu̱ú xíkanuu yó á kuaʼa̱n yó kachúun yó á nákaa̱ yó veʼe. Kaʼvi ní Hechos 17:28, TYK.

Ni̱ kaʼa̱n Jesús sa̱ʼá uvi̱ chuun ña̱ kúni̱ʼi chááka̱. Ña̱ kúúnu̱ú chááka̱ kuu kee iin na̱yivi kía̱n: kundaa̱ ini na ndá yoo kúú Ndio̱s, ta kuni̱ na̱ sí, ta kukuu na iin na̱yivi ndaa̱, ta kunikuáchí ná nuu̱ sí. Ta kánian naku̱ʼun ini yó consejo yóʼo nuu̱ ndá ku̱ú mií vá ña̱ kuaʼa̱n yó kee yó (Proverbios 3:6). Na̱yivi na̱ sínajo̱ʼo consejo yóʼo xíʼín ndinuʼu ini na, na̱yóʼo kúú na̱ kuu kaneʼe táʼan va̱ʼa xíʼín Ndio̱s, ta miía̱n ndaa̱ ndisa kujii̱ ini na̱yóʼo kandoyi na ndijaá táʼa̱n kivi̱. Kaʼvi ní San Mateo 22:36-38.

Ta inga̱ consejo yóʼo kuu chindeéán yó já kaneʼe táʼan va̱ʼa yó xíʼín java ka̱ na̱ (1 Corintios 13:4-7). Tá ná kee yó ña̱ va̱ʼa xíʼín na̱yivi jaá kía̱n naʼa̱ yó ña̱ kée yó tátu̱ʼun ki̱ʼa kée Ndio̱s xíʼín na̱yivi. Kaʼvi ní San Mateo 7:12 xíʼín 22:39, 40.

Consejo va̱si nu̱ú Tu̱ʼun Ndio̱s chíndeéán na̱yivi já ná kuni̱ táʼan na, ta kandoyi va̱ʼa na xíʼín na̱ veʼe na (Colosenses 3:12-14). Ta jaá ní káʼa̱n Tu̱ʼun Ndio̱s ña̱ ko̱ kánian jándákoo táʼan na̱ ni̱ ta̱ndáʼa̱. Kaʼvi ní Génesis 2:24.

Tá ná kee yó ña̱ káʼa̱n Tu̱ʼun Ndio̱s jaá kía̱n kúti̱ʼa yó kundaa yó ña̱ kúmí yó, ta kundaa yó iníma̱ yo̱. Ta jaá ní kuaʼa̱ ná tá ndúkú ná na̱ kachúun nuu̱ ná, kúni̱ na̱ ña̱ ná kukuu na na̱ jákuáʼa sa̱ʼá Tu̱ʼun Ndio̱s. Jáchi̱ xíni̱ na̱ ña̱ káchúun ndeé ndiva̱ʼo na̱yóʼo, ta ko̱ kíʼin kuíʼná ná (Proverbios 10:4, 26; Hebreos 13:18). Ta jaá ní káʼa̱n Tu̱ʼun Ndio̱s xíʼín yó ña̱ ná kujii̱ ini yó xíʼín ña̱ kúmí yó va̱árá ko̱ kuáʼa̱ kía̱n, ta ná ndi̱ʼi chááka̱ ini yó kaneʼe táʼan va̱ʼa yó xíʼín Ndio̱s, o̱ju̱ú sa̱ʼá ña̱ kúmí yó. Kaʼvi ní San Mateo 6:24, 25, 33 xíʼín 1 Timoteo 6:8-10.

Tá ná kunijo̱ʼo yó ña̱ káʼa̱n ley Ndio̱s, ña̱yóʼo chindeéa̱n yóʼo mií yó já ná kandoyi va̱ʼa yó. Tátu̱ʼun ley Ndio̱s ña̱ káʼa̱n ña̱ ko̱ kánian kukuu yó na̱ xi̱ʼí, ña̱yóʼo chíndeéa̱n yóʼo mií yó já ná o̱kíʼvi̱ yó, ta ná o̱ndóʼo yó tu̱ndóʼó ña̱ kuu kaʼní ñaʼá (Proverbios 14:30; 22:24, 25; 23:20). Síaʼa va Jeová Ndio̱s íchi̱ ña̱ koʼo yó ndutá xee̱n, jo ná o̱kóʼo yó nda̱ xi̱ni yó (Salmo 104:15; 1 Corintios 6:10). Tu̱ʼun Ndio̱s káʼa̱n ña̱ kánian kundaa yó mií yó xíʼín ña̱ kée yó, ta ña̱ nákani ini yó (Salmo 119:97-100). Jo na̱ miía̱n ndaa̱ ndisa ndíko̱ Cristo, o̱ju̱ú sa̱ʼá ña̱ va̱ʼa níʼi̱ ná nuu̱ Ndio̱s uun ni kée na ña̱yóʼo, jáchi̱ kée na ña̱yóʼo já náʼa̱ na̱ ña̱ ió ña̱ñúʼú ná nuu̱ Tatá mani̱ Jeová Ndio̱s. Kaʼvi ní San Mateo 5:14-16.