Nuu̱ ndijaá vá religión ñúʼu na̱yivi na̱ va̱ʼa ini. Ta, ¿á ko̱ ndáa̱ ña̱ ña̱ va̱ʼa ndiva̱ʼo kía̱n ndíʼi ini Ndio̱s sa̱ʼá na̱yivi yóʼo? Jo java na̱yivi káchúun na̱ religión já kúu kée na ña̱ kini va (2 Corintios 4:3, 4; 11:13-15). Ta jaá ní kúndaa̱ ini yó nuu̱ noticia ña̱ kuaʼa̱ religión yóʼo kíʼvi nuan xíʼín na̱yivi na̱ iin ñuu na̱ na̱á táʼan xíʼín na̱ inga̱ ñuu, ta xíʼín na̱ saʼní kuaʼa̱ na̱yivi sa̱ʼá ña̱ jíin nákani ini na̱, ta xíʼín na̱ kée ña̱ kini já jáyu̱ʼú na̱ java ka̱ na̱, ta java na tíin na ta kuálí kíxi̱ xíʼín ná, ta kée nda̱va̱ʼa na xíʼín xí. ¡Ndixi ví ndaʼví kúu ini na̱yivi na̱ miía̱n ndaa̱ ndisa kándeé ini Ndio̱s, tá kúndaa̱ ini na ña̱ kée na̱ kúú kuendá religión ná! Kaʼvi ní San Mateo 24:3-5, 11, 12.

Na̱yivi na̱ ndíko̱ religión ña̱ jánaʼa̱ ña̱ ndaa̱, kéekáʼno na Jeová Ndio̱s, jo na̱ ndíko̱ religión ña̱ ko̱ jánaʼa̱ ña̱ ndaa̱, ko̱ káʼa̱n va̱ʼa na saʼa̱ Ndio̱s. Ta ko̱ jánaʼa̱ na̱yóʼo ña̱ ndaa̱ saʼa̱ Ndio̱s ni sa̱ʼá na̱ ni xiʼi̱, jáchi̱ ko̱ jánaʼa̱ na̱ ña̱ va̱si nu̱ú Tu̱ʼun Ndio̱s. Jo kúni̱ va Jeová Ndio̱s ña̱ ná kundaa̱ ini na̱yivi ña̱ ndaa̱ saʼa̱ sí. Kaʼvi ní Ezequiel 18:4 xíʼín 1 Timoteo 2:3-5.

Va̱árá kachí na̱yivi na̱ ndíko̱ religión yóʼo ña̱ kúni̱ na̱ Ndio̱s, jo xíni̱ va Jeová Ndio̱s ña̱ o̱ju̱ú ña̱ ndaa̱ káʼa̱n na̱yóʼo, jáchi̱ ña̱ ió nuu̱ ñuyíví yóʼo ña̱ nákaa̱ nuu̱ ndáʼa̱ Satanás va kúni̱ na̱yóʼo (Santiago 4:4). Kachí Tu̱ʼun Ndio̱s ña̱ ndijaá religión ña̱ ko̱ jánaʼa̱ ña̱ ndaa̱ kúúán tátu̱ʼun “Ká’ano nda̱’o ñoo Babilonia”. Babilonia yóʼo ni̱ si̱kuu ñuu nu̱ú ni̱ ka̱sáʼá ió ndijaá religión ña̱ ko̱ jánaʼa̱ ña̱ ndaa̱, tá ni̱ ndiʼi ni̱ kuun Ti̱kui̱í kuáʼa̱ kivi̱ ni̱ si̱io Noé. Sa̱ yati ñúʼú vá já iin kuití vá jánaá Ndio̱s nuu̱ ndijaá religión ña̱ jándaʼví na̱yivi, ta kéean ña̱ ndóʼo ini na. Kaʼvi ní Apocalipsis 17:1, 2, 5, 16, 17, Tuti yóʼo kúú to̱ʼon Ndios, ta xíʼo ña kuendá saʼa̱ Jesús, [TYK] xíʼín 18:8, TYK.

Ta xíni̱ va Jeová Ndio̱s ña̱ ñúʼu va na̱yivi na̱ ndinuʼu ini kándeé ini na Ndio̱s tein ndijaá religión ña̱ ko̱ jánaʼa̱ ña̱ ndaa̱ ñuyíví  yóʼo. Ta nákiʼin va̱ʼa si ndijaá na̱yóʼo, ¿ndixi? Jáchi̱ jánaʼa̱ si ña̱ ndaa̱ nuu̱ ná. Kaʼvi ní Miqueas 4:2, 5.

Ndíʼi va ini Jeová Ndio̱s sa̱ʼá na̱yivi na̱ miía̱n ndaa̱ ndisa kúni̱ kundaa̱ ini ña̱ ndaa̱, ta kúni̱ na̱ kee na ña̱ va̱ʼa. Sa̱ʼá ña̱yóʼo káʼa̱n si xíʼín ná ña̱ ná jándákoo na religión ña̱ ko̱ jánaʼa̱ ña̱ ndaa̱. Ta tá miía̱n ndaa̱ ndisa kúni̱ na̱ Ndio̱s jaá kía̱n ki̱ʼa na mií ná jándákoo na ndáa ña̱ ko̱ váʼa kée na. Kaʼvi ní Apocalipsis 18:4, TYK.

Tá ni̱ ka̱sáʼá kuia̱ iin, kuaʼa̱ na̱yivi na̱ ndinuʼu ini kándísa Ndio̱s, ni̱ na̱tiin va̱ʼa na tu̱ʼun va̱ʼa ña̱ ni̱ kaʼa̱n na̱ apóstol xíʼín ná. Ta na̱yóʼo ni̱ ka̱ti̱ʼa na kandoyi va̱ʼa na̱, ta kujii̱ ini na, ta ni̱ niʼi̱ ná to̱ndeé ini. Ta jaá ni mií yó kánian kandísa yó ña̱ káʼa̱n Tu̱ʼun Ndio̱s tátu̱ʼun ni̱ kee na̱yóʼo, ta ná chi kuendá yó Jeová Ndio̱s nuu̱ ndijaá ña̱ kuaʼa̱n yó kee yó. Kaʼvi ní 1 Tesalonicenses 1:8, 9, TNM xíʼín 2:13, TYK.

Kújii̱ ini Jeová Ndio̱s nátiin si na̱yivi na̱ jándákoo religión ña̱ ko̱ jánaʼa̱ ña̱ ndaa̱, ta kásáʼá ná ndíko̱ na religión ña̱ jánaʼa̱ ña̱ ndaa̱ saʼa̱ Ndio̱s. Tá ná kee miíní ña̱ káʼa̱n Jeová Ndio̱s jaá kía̱n kuu kaneʼe táʼan va̱ʼa ní xíʼín sí, ta jaá ní kuu kaneʼe táʼan va̱ʼa ní xíʼín java ka̱ ñani táʼan yó na̱ ndáñu̱ʼu Jeová Ndio̱s, ta kuu kutaku ní ndijaá táʼa̱n kivi̱. ¿Á kúni̱ miíní niʼi̱ ní ndijaá ña̱ va̱ʼa yóʼo? Kaʼvi ní San Marcos 10:29, 30, TYK xíʼín 2 Corintios 6:17, 18, TYK.

Tá ná jánaá Jeová Ndio̱s nuu̱ ndijaá religión ña̱ ko̱ jánaʼa̱ ña̱ ndaa̱, jaá kía̱n naka̱ndoyi va̱ʼa na̱yivi nuu̱ iníí kúú ñuyíví, ta ko̱ó ka̱ tu̱ndóʼó ndoʼo na. Ta ni iin kivi̱ ka̱ o̱jándaʼví religión yóʼo na̱yivi, ta ni o̱kée ka̱a̱n ña̱ kundiko̱ na jíin jíin religión. Ta sa̱ va̱ʼa iin túʼún láá Ndio̱s ndaa̱ ndisa va kandañu̱ʼu ndijaá táʼa̱n na̱yivi na̱ kandoyi yóʼo. ¿Á ko̱ ndáa̱ ña̱ iin ña̱ va̱ʼa ndiva̱ʼo kía̱n yóʼo? Kaʼvi ní Apocalipsis 18:20, 21, TYK xíʼín 21:3, 4.