Ndio̱s kúú Ta ni̱ ka̱va̱ʼa ndijaá táʼa̱n ña̱ʼa. Sa̱ jaá ió va si, ta jaá koo va si (Salmo 90:2). Nuu̱ Tutu ii̱ va̱si ndijaá ña̱ va̱ʼa jánaʼa̱ Ndio̱s nuu̱ yó (1 Timoteo 1:11). Iin túʼún láá Ndio̱s va kánian kandañu̱ʼu yó jáchi̱ mií sí kúú ta síaʼa ña̱ ta̱kú yó. Kaʼvi ní Apocalipsis 4:11.

Ni iin mií vá na̱yivi o̱kúu kuni na Ndio̱s, jáchi̱ iin espíritu va kúú sí. Jáchi̱ jíin va kúú sí, ko̱ó yikí ku̱ñu si tátu̱ʼun ki̱ʼa mií yó na̱yivi (San Juan 1:18; 4:24). Jo kuu va kundaa̱ ini yó ndixi nákani ini Ndio̱s, ta ndixi ió ini si, tá ná kande̱ʼé yó ndijaá ña̱ ni̱ ka̱va̱ʼa si. Ta tá ná kande̱ʼé yó ndijaá nu̱u kui̱ʼi xíʼín ita, ña̱yóʼo kíán náʼa̱ ña̱ kúni̱ ndiva̱ʼo si mií yó, ta ndichí ndiva̱ʼo si. Ta jaá ní tá ná kande̱ʼé yó ña̱ káʼno ndiva̱ʼa ni̱ ka̱va̱ʼa Ndio̱s indiví xíʼín nuu̱ Ñúʼu̱, ta ña̱yóʼo kía̱n náʼa̱ ña̱ ió ndiva̱ʼo ndée̱ sí. Kaʼvi ní Romanos 1:20.

Ta jaá ní kuu kundaa̱ chááka̱ ini yó ndixi nákani ini Ndio̱s tá ná kaʼvi yó Tutu ii̱. Jáchi̱ ña̱yóʼo káʼa̱n xíʼín yó ndíki̱án nátaʼan ini Ndio̱s, ta ña̱ ko̱ nátaʼan ini si. Ta ndixi ió ini si xíʼín na̱yivi, ta ndixi ndéʼé sí ña̱ kúu nuu̱ ñuyíví yóʼo. Kaʼvi ní Salmo 103:7-10.

“Tatá Ndióxi̱ ña̱ íin indiví káʼnu ná kakuu kivi̱ [ní]” ni̱ kachi Jesús (San Mateo 6:9). Sa̱ʼá ña̱káa va̱árá ió kuaʼa̱ vá ndixi kaʼa̱n na̱ xíʼín Ndio̱s, jo iin túʼún láá vá kúú kivi̱ sí. Jáchi̱ tá iin tá iin yúʼu̱ sa̱ jíin jíin va káʼa̱n na̱ kivi̱ sí. Tu̱ʼun jáʼán, java na káʼa̱n na̱ Jehová, ta java ka̱ na̱ káʼa̱n na̱ Yavé. Kaʼvi ní Salmo 83:18 (82:19 nuu̱ java Biblia).

Ni̱ ja̱kúsio na kivi̱ Ndio̱s nuu̱ java Tutu ii̱, ta nu̱ú va̱si kivi̱ sí ni̱ chi̱kaa̱ na̱ Sa̱toʼo á Ndio̱s. Jo nu̱ú Tu̱ʼun Ndio̱s ña̱ xinañúʼú ni̱ taa na, tátu̱ʼun usa̱ mil ká taʼndá va̱si kivi̱ mií Ndio̱s. Ta jaá kuití vá ni̱ sa̱ ja̱náʼa̱ Jesús kivi̱ Ndio̱s nu̱ú na̱yivi. Kaʼvi ní San Juan 17:26.

Kande̱ʼéní video ¿Á ió kivi̱ Ndio̱s?

Tá miía̱n ndaa̱ ndisa kíʼvi̱ ini Jeová Ndio̱s saʼa̱ yó, ¿ndiva̱ʼa síaʼa si íchi̱ ña̱ ndóʼo ini yó? Kuaʼa̱ na̱yivi káʼán ná ña̱ jándóʼo Ndio̱s ini yó já sínde̱ʼé sí á miía̱n ndaa̱ ndisa kúni̱ ñaʼá yó. Jo o̱ju̱ú ña̱ ndaa̱ kúúa̱n yóʼo. Kaʼvi ní Santiago 1:13, TNM.

Ni̱ si̱ʼa va Jeová Ndio̱s íchi̱ nuu̱ yó ña̱ ná ka̱xi mií yó ndíki̱án kúni̱ yo̱ kee yó, á ña̱ va̱ʼa á ña̱ ko̱ váʼa. Ta ña̱ va̱ʼa chááka̱ kuu kee yó kía̱n kunikuáchí yó nuu̱ Ndio̱s (Josué 24:15). Jo kuaʼa̱ na̱yivi kée na ña̱ ko̱ váʼa, saʼa̱ ña̱káa ió ndiva̱ʼa ña̱ ndóʼo ini yó. Jo táiʼvi̱ va ini Jeová Ndio̱s ña̱ sínde̱ʼé sí ña̱ ió ndiva̱ʼo ña̱ kini nuu̱ Ñúʼu̱ yóʼo. Kaʼvi ní Génesis 6:5, 6.

Xíni̱ va mií Jeová Ndio̱s ndiva̱ʼa síaʼa si íchi̱ ña̱ ndóʼo ini na̱yivi cháá tiempo, jo sa̱ yati ñúʼú vá jándíʼi Jeová Ndio̱s nu̱ú ña̱ ndóʼo ini yó, ta jaá ní nu̱ú ña̱ kini íin ñuyíví yóʼo, jáchi̱ kíʼvi̱ ini si saʼa̱ yó, ta kúni̱ si ña̱ ná kandoyi va̱ʼa yó. Ta nuu̱ lección 8 ña̱ va̱si nuu̱ tutu yóʼo, kúú nu̱ú nákanian, ¿ndiva̱ʼa síaʼa Ndio̱s íchi̱ ña̱ ndóʼo ini yó? Kaʼvi ní 2 Pedro 2:9, TNM xíʼín 3:7, 13, TNM.

Síʼa va Jeová Ndio̱s íchi̱ nuu̱ yó ña̱ ná kaka̱taʼvi̱ yó nuu̱ sí. Jáchi̱ ndíʼi ini si saʼa̱ iin tá iin yó (Salmo 65:2; 145:18). Ta jaá kúni̱ va Ndio̱s koo káʼno ini si saʼa̱ yó. Va̱árá o̱ju̱ú jaá kuití kuu kee yó ña̱ kúni̱ si, jo xíni̱ va si tá ndúkúndeé yó kée yó ña̱ kúni̱ si. Sa̱ʼá ña̱yóʼo va̱árá na̱yivi kua̱chi kúú yó, jo kuu va kaneʼe táʼan va̱ʼa yó xíʼín Ndio̱s. Kaʼvi ní Salmo 103:12-14 xíʼín Santiago 4:8, Tuti yóʼo kúú to̱ʼon Ndios, ta xíʼo ña kuendá saʼa Jesús, [TYK].

Ndio̱s va kúú ta kánian kuni̱ chááka̱ yó nuu̱ ndijaá táʼa̱n va ña̱ʼa, jáchi̱ mií sí kúú ta síaʼa ña̱ ta̱kú yó (San Marcos 12:30). Kuu naʼa̱ yó ña̱ kúni̱ yó Ndio̱s tá ná jákuáʼa chááka̱ yó saʼa̱ sí, ta ná kunijo̱ʼo yó chuun saʼndá sí. Ta tá ná kee yó ña̱yóʼo jaá kía̱n kaneʼe táʼan va̱ʼa chááka̱ yó xíʼín sí. Kaʼvi ní 1 Timoteo 2:4 xíʼín 1 Juan 5:3, TYK.