Mesthi rasané sedhih banget nèk wong tuwané cerai. Piyé cah-cah enom isa ngatasi kuwi?

Ing artikel iki bakal dibahas:

•  Sing aja mbok lakukan

•  Sing isa mbok lakukan

•  Kandhané kanca-kancamu

 Sing aja mbok lakukan

 1. Aja ngrasa nèk kuwi salahmu

 ”Mamaku tau ngomong nèk pas aku lair, mama papaku dadi nduwé akèh masalah. Dadi, aku ngrasa nèk mama papaku cerai kuwi gara-gara aku.”—Diana.

 Élinga: Nèk wong tuwamu cerai, kuwi dudu salahmu. Kuwi merga wong tuwamu ora isa ngatasi masalahé meréka. Dudu kowé sing marakké meréka cerai. Sing kuduné ngrampungké masalahé kuwi ya wong tuwamu dhéwé.

 2. Aja terus-terusan nesu

 ”Pas papaku selingkuh, aku nesu banget. Aku ora percaya manèh karo dhèwèké.”—Rianna.

 Élinga: Wajar nèk kowé nesu lan ngrasa kecéwa. Tapi, terus-terusan nesu kuwi ora apik. Kuwi isa marakké kowé dadi lara lan strès. Terus-terusan nesu kuwi kaya kowé ngombé racun tapi berharap wong liya sing lara. a

 3. Aja mikir nèk mengko nikah kowé ora bakal bahagia

 ”Aku wedi nèk mengko aku bakal kaya bapakku. Wediné mengko nèk aku wis nikah lan nduwé anak, aku bakal ngalami masalah sing padha kaya wong tuwaku terus akhiré cerai.”—Jessica.

 Élinga: Meskipun pernikahané wong tuwamu gagal, ora berarti pernikahanmu ya bakal gagal. Malah, kowé isa belajar saka pengalamané wong tuwamu. Misalé, pas nggolèk bojo, kowé bakal luwih ati-ati. Terus, kowé ya bakal berupaya nduwé sifat-sifat sing luwih apik bèn pernikahanmu bahagia.

 Sing isa mbok lakukan

 1. Critakna perasaanmu. Wong-wong sing memendam perasaan sedhih, nesu, lan kecéwa biasané dadi nduwé kebiasaan sing èlèk, misalé kecanduan alkohol utawa nganggo narkoba. Bèn ora kaya ngono, cobanen iki:

 Crita karo wong tuwa. Nèk wong tuwamu kakèhan ngomongké soal masalah perkawinané meréka, kowé isa tetep tenang lan ngomong nganggo cara sing alus nèk kuwi sakjané ana dampaké kanggo kowé. Nèk kowé angèl crita karo wong tuwamu, kowé isa nulis surat kanggo meréka.

 Crita karo kanca sing isa dipercaya. Nèk nduwé kanca sing gelem ngrungokké tenanan pas kowé crita kuwi bermanfaat banget. Ing Alkitab disebutké nèk ”kanca sejati kuwi terus nresnani lan dadi sedulur sing isa diendelké wektu ana kesusahan”.—Wulang Bebasan 17:17.

 Crita karo Gusti Allah. Yéhuwah selalu ’ngrungokké dongamu’. (Mazmur 65:2) Ing Alkitab disebutké nèk kowé isa ”masrahké kabèh rasa kuwatirmu marang Gusti Allah merga Dhèwèké perduli karo kowé”.—1 Pétrus 5:7.

•   Kowé luwih leluasa crita karo bapak utawa ibumu?

•   Embuh sing sak umuran utawa luwih tuwa, sapa kanca sing isa mbok percaya sing isa mbantu lan nyemangati kowé?

•   Khususé apa sing péngin mbok dongakké?

 2. Nggawé penyesuaian

 Merga wong tuwamu cerai kowé mungkin kudu pindhah omah, pindhah sekolah, nggolèk kanca anyar, utawa uripmu ora nyaman kaya mbiyèn manèh. Wajar nèk kowé mumet lan strès merga perubahan kuwi. Tapi bèn isa ngatasi kuwi, pikirna kowé isa nggawé penyesuaian apa.

•   Merga wong tuwamu cerai, kowé dadi ngalami perubahan apa?

•   Piyé carané kowé ngatasi perubahan kuwi?

 3. Berupaya nduwé sifat-sifat sing apik

 Mémang nèk wong tuwamu cerai, kowé mungkin dadi ngrasa kuwatir. Tapi, kowé isa belajar sesuatu. Kuwi isa nglatih kowé nduwé sifat-sifat sing apik. Jeremy, sing wong tuwané cerai pas dhèwèké umur 13, crita, ”Merga wong tuwaku cerai, aku dadi luwih bertanggung jawab. Aku anak pertama. Dadi, aku kudu mbantu ibuku, terus ya nggatèkké adhiku.”

•   Merga wong tuwamu cerai, kowé dadi isa belajar sifat-sifat apik apa?

•   Sifat-sifat apik apa manèh sing péngin mbok upayakké?