Merga bahaya, akèh wong tuwa sing ora ngijinké anaké nganggo média sosial. Tapi nèk njenengan ngijinké, piyé carané bèn anaké njenengan ora kena pengaruh èlèk lan tetep ngati-ati?

Ing artikel iki bakal dibahas:

•  Sing dianggep penting

•  Dampaké

•  Kelakuané ing média sosial

•  Sing isa dirembug

 Keterangan: Merga média sosial isa marahi kecanduan, njenengan isa mbantu anaké njenengan bèn wektuné ora entèk kanggo média sosial.

 Ayat: ”Mastèkké endi sing luwih penting.”​—Filipi 1:10.

 Pikirna: Apa merga nganggo média sosial anaké njenengan dadi kurang turu, ora nggarap PR, lan ora ngumpul karo keluarga? Menurut para peneliti, cah-cah enom kudu turu paling ora sangang jam saben dina. Tapi, cah-cah sing kakèhan nganggo média sosial turuné ora nganti pitung jam.

 Sing perlu diupayakké: Bahasen karo anaké njenengan ngapa kok aja nganti wektuné entèk dienggo média sosial. Gawénen aturan. Misalé, nèk bengi ora éntuk dolanan HP. Anak-anak kudu belajar ngendhalèni diri. Nèk isa ngendhalèni diri, kuwi isa bermanfaat kanggo dhèwèké.​—1 Korintus 9:25.

 Keterangan: Nèk ndelok postingan kanca-kancané sing apik-apik, anaké njenengan isa waé dadi kesepian, iri, lan strès.

 Ayat: ”Aja iri.”​—1 Pétrus 2:1.

 Pikirna: Apa anaké njenengan dadi seneng mbandhing-mbandhingké penampilané karo wong liya? Apa anaké njenengan dadi iri merga ndelok postingan kanca-kancané?

 Sing perlu diupayakké: Bahasen karo anaké njenengan apa bahayané nèk seneng mbandhing-mbandhingké. Njenengan kudu ngerti nèk cah wédok biasané luwih nggatèkké penampilané lan hubungané karo wong liya. Makané, cah wédok luwih gampang terpengaruh karo postingan sing ana ing média sosial ketimbang cah lanang. Njenengan ya isa ngandhani anaké njenengan bèn mandheg sik nganggo média sosial. Cah lanang sing jenengé Jacob ngomong, ”Pas média sosialku tak hapus, aku dadi isa ngatur wektu lan ngerti endi sing luwih penting.”

 Keterangan: Nèk nganggo média sosial, ana akèh sing isa ndelok kegiatané awaké dhéwé. Makané isa waé ana sing ora seneng.

 Ayat: ”Aja nganti kowé dendam, nesu, ngamuk, nggetak-nggetak, ngrèmèhké . . . Kowé kudu apikan karo wong liya.”—Éfésus 4:31, 32.

 Pikirna: Apa anakku dadi seneng nggosip, ora rukun karo wong liya, lan omongané kasar?

 Sing perlu diupayakké: Kandhanana anaké njenengan nèk ing média sosial kuwi tetep kudu sopan. Menurut buku Digital Kids, ”Wong tuwa kudu ngandhani anaké nèk ora éntuk ngomong kasar karo wong liya, embuh ketemu langsung apa ing média sosial.”

 Sakjané anak-anak ki ora kudu nduwé média sosial. Tapi nèk njenengan ngijinké anaké njenengan nduwé média sosial, njenengan kudu mastèkké nèk anaké njenengan isa ngatur wektu, nduwé kanca sakliyané ing média sosial, lan ngati-ati pas nganggo média sosial.