Injil Matius 8:1-34
8 Sakwisé Yésus mudhun saka gunung, ana akèh wong sing ngetutké dhèwèké.
2 Terus, ana wong sing lara kusta marani Yésus lan sujud. Wong kusta kuwi kandha, ”Gusti, nèk njenengan gelem, mbok aku tulung dimarèkké.”*+
3 Mula, Yésus ngulurké tangané lan ndemèk wong kuwi. Yésus kandha, ”Ya, aku gelem marèkké kowé.+ Saiki kowé wis mari.”* Wong sing lara kusta kuwi langsung mari.+
4 Terus Yésus kandha, ”Aja kandha sapa-sapa.+ Lungaa, duduhna awakmu marang imam,+ lan wènèhna korban kaya sing dipréntahké ing Hukum Musa+ kanggo mbuktèkké nèk kowé wis mari.”
5 Wektu Yésus mlebu ing Kapernaum, ana perwira sing mara lan njaluk tulung marang Yésus. Wong kuwi kandha,+
6 ”Pak, pembantuku ing omah lumpuh lan ora isa tangi. Dhèwèké sengsara banget.”
7 Yésus kandha marang perwira mau, ”Ya, aku tak mrana lan marèkké dhèwèké.”
8 Perwira kuwi njawab, ”Pak, aku ngrasa ora pantes mbok tamoni. Njenengan cukup ngomong sak kata waé, lan pembantuku mesthi bakal mari.
9 Aku iki ya nduwé pemimpin, lan aku ya nduwé prajurit-prajurit sing tak pimpin. Nèk aku ngongkon salah siji prajuritku, ’Lungaa!’ dhèwèké bakal lunga. Terus nèk aku ngongkon prajurit liyané, ’Mrénéa!’ dhèwèké bakal mara. Nèk aku ngongkon budhakku, ’Tindakna iki!’ dhèwèké bakal nindakké kuwi.”
10 Wektu krungu kuwi, Yésus kagum lan kandha marang wong-wong sing ngetutké dhèwèké, ”Percayaa, aku durung tau ketemu wong ing Israèl sing imané gedhé kaya wong iki.+
11 Aku ngandhani kowé, akèh wong saka wétan lan kulon bakal teka, terus lungguh lan mangan bareng karo Abraham, Ishak, lan Yakub ing Kerajaan swarga.+
12 Ning, wong-wong sing kuduné mlebu ing Kerajaan swarga* bakal diuncalké ing njaba, ing petengan. Ing kono, wong-wong kuwi bakal nangis lan putus asa.”*+
13 Terus, Yésus kandha marang perwira kuwi, ”Balia. Apa sing mbok jaluk bakal kelakon merga kowé nduwé iman.”+ Wektu kuwi, pembantuné langsung mari.+
14 Wektu tekan ing omahé Pétrus, Yésus ndelok ibu maratuwané Pétrus+ turon ing ambèn lan lagi demam.+
15 Bar kuwi, Yésus ndemèk tangané wong wédok kuwi.+ Wong wédok kuwi mari, terus tangi lan mulai ngladèni Yésus.
16 Benginé, akèh wong sing kesurupan roh jahat padha digawa marang Yésus. Yésus ngusir roh-roh kuwi mung nganggo sak kata waé. Yésus ya marèkké kabèh sing lara.
17 Mula, apa sing diomongké liwat Nabi Yésaya kelakon, yaiku, ”Dhèwèké nyingkirké penyakitku lan nanggung kesengsaraanku.”+
18 Wektu Yésus ndelok kumpulan wong ing sekitaré, Yésus ngejak murid-muridé lunga ing sabrang.+
19 Terus, ana salah siji ahli Taurat sing marani Yésus lan kandha, ”Guru, aku bakal mèlu ing endi waé njenengan lunga.”+
20 Ning Yésus kandha marang dhèwèké, ”Rubah nduwé sarang, lan manuk nduwé susuh, ning Anaké manungsa ora nduwé omah.”*+
21 Terus, ana murid liyané sing kandha marang Yésus, ”Gusti, nèk éntuk, aku tak ngubur bapakku sik.”+
22 Yésus njawab, ”Terusa mèlu aku. Bèn waé wong mati ngubur wong mati.”+
23 Wektu Yésus numpak prau, murid-muridé padha mèlu.+
24 Ujug-ujug ana angin gedhé ing laut. Prauné diterjang ombak lan klebon banyu. Ning, wektu kuwi Yésus lagi turu.+
25 Terus, murid-murid nggugah Yésus lan kandha, ”Gusti, tulung! Awaké dhéwé bakal mati.”
26 Ning Yésus njawab, ”Ngapa kok kowé wedi? Kowé kuwi kurang iman.”+ Yésus ngadeg, terus nggetak angin lan laut. Bar kuwi, keadaané dadi tenang.+
27 Wong-wong kuwi nggumun lan kandha, ”Sapa sakjané wong iki, kok nganti angin lan laut waé manut karo dhèwèké?”
28 Wektu Yésus tekan ing sabrang, ing dhaérahé wong Gadara, ana wong lanang loro sing kesurupan roh jahat teka saka kuburan lan marani Yésus.+ Wong loro kuwi medèni, mula ora ana wong sing wani liwat dalan kuwi.
29 Wong loro kuwi mbengok, ”Apa urusanku karo kowé, hé Anaké Gusti Allah?+ Apa kowé mréné arep nyiksa aku+ sakdurungé wektu sing wis ditentokké?”+
30 Ing dhaérah sing adoh saka kono, ana sak kumpulan babi lagi mangan.+
31 Mula, roh-roh jahat kuwi kandha marang Yésus, ”Nèk kowé arep ngusir aku, préntahna aku bèn mlebu ing babi-babi kuwi.”+
32 Yésus njawab, ”Lungaa!” Roh-roh jahat kuwi metu lan mlebu ing babi-babi kuwi. Bar kuwi, sak kumpulan babi kuwi mlumpat saka tebing lan njegur ing laut nganti akhiré mati kleleb.
33 Wong-wong sing njaga kumpulan babi kuwi mlayu lan mlebu ing kutha. Wong-wong kuwi nyritakké kabèh peristiwa kuwi, termasuk soal wong-wong sing kesurupan roh jahat mau.
34 Terus, wong-wong sing ana ing kutha kuwi metu nemoni Yésus. Sakwisé weruh Yésus, wong-wong kuwi ngongkon Yésus lunga saka dhaérahé.+
Katrangan Tambahan
^ Utawa ”tulung digawé ora najis manèh”.
^ Utawa ”kowé wis ora najis manèh”.
^ Lit.: ”anak-anaké Kerajaan”.
^ Lit.: ”lan ngerotké untu”.
^ Lit.: ”panggonan kanggo ndèlèhké sirahé”.
