Para Hakim 8:1-35
8 Terus, wong Éfraim kandha marang Gidéon, ”Ngapa kok kowé kaya ngono karo aku? Ngapa kok kowé ora ngejak aku nglawan Midian?”+ Wong Éfraim nesu-nesu karo Gidéon.+
2 Ning Gidéon njawab, ”Sing tak tindakké kan ora ana apa-apané karo sing mbok tindakké, ta? Sisa panèné Éfraim+ kan luwih apik timbang panèn angguré Abi-èzèr, ta?+
3 Gusti Allah wis mbantu kowé ngalahké para pemimpiné Midian yaiku Orèb lan Zéèb.+ Mula, sing tak tindakké iki kan ora sebandhing karo sing mbok tindakké.” Pas Gidéon ngomong kaya ngono, wong Éfraim dadi tenang.
4 Terus, Gidéon tekan Kali Yordan lan nyabrang. Dhèwèké lan 300 prajurité padha kesel, ning kabèh wong kuwi terus ngoyak* mungsuhé.
5 Mula, Gidéon kandha marang penduduk Sukot, ”Tulung wènèhana roti kanggo pasukanku merga padha kesel lan aku lagi ngoyak* Zébah lan Zalmuna, raja-rajané Midian.”
6 Ning, para pemimpin Sukot kandha, ”Zébah lan Zalmuna kan durung mbok cekel, ta? Ngapa aku kudu mènèhi roti marang pasukanmu?”
7 Gidéon njawab, ”Merga kowé ngomong kaya ngono, pas Yéhuwah nggawé aku menang nglawan Zébah lan Zalmuna, aku bakal mecuti kowé nganggo tanduran eri lan suket eri saka padhang belantara.”+
8 Saka kono, Gidéon lunga menyang Pénuèl. Ing kana, Gidéon ya njaluk sing padha. Ning, jawabané penduduk Pénuèl padha kaya jawabané penduduk Sukot.
9 Mula, Gidéon kandha marang penduduk Pénuèl, ”Mengko nèk aku slamet tekan kéné, aku bakal ngambrukké menara iki.”+
10 Wektu kuwi, Zébah lan Zalmuna ana ing Karkor bareng karo pasukané sing jumlahé kira-kira wong 15.000. Kuwi wong-wong sing isih urip saka kabèh pasukané wong-wong saka Wétan+ merga 120.000 prajurit liyané sing nggawa pedhang wis padha mati.
11 Terus, Gidéon ngliwati dalan sing biasa diliwati wong sing manggon ing kémah-kémah, ing sisih wétané Nobah lan Yogbéha.+ Bar kuwi, Gidéon nyerang perkémahan kuwi. Ning, perkémahan kuwi ora siap pas ngadhepi serangan.
12 Wektu Zébah lan Zalmuna mlayu, Gidéon ngoyak* lan nangkep loro raja Midian kuwi. Kuwi nyebabké kabèh wong ing perkémahan padha bingung.
13 Terus, Gidéon anaké Yoas bali saka perang liwat dalan sing nanjak menyang Hèrès.
14 Pas ing perjalanan, Gidéon nangkep lan nakon-nakoni cah lanang saka Sukot. Terus, cah lanang kuwi nulis 77 jenengé para pejabat lan pemimpiné* Sukot.
15 Mula, Gidéon nemoni penduduk Sukot lan kandha, ”Iki Zébah lan Zalmuna. Wektu kuwi kowé ngécé aku, ’Zébah lan Zalmuna kan durung mbok cekel, ta? Ngapa aku kudu mènèhi roti marang pasukanmu sing padha kekeselen?’”+
16 Terus, Gidéon nangkep para pemimpin kutha kuwi lan ngajar penduduk Sukot nganggo tanduran eri lan suket eri saka padhang belantara.+
17 Gidéon ya ngrubuhké Menara Pénuèl+ lan matèni penduduk kutha kuwi.
18 Terus, Gidéon takon marang Zébah lan Zalmuna, ”Wong-wong sing mbok patèni ing Tabor kuwi kaya apa?” Wong loro kuwi njawab, ”Wongé kaya kowé. Wong-wong kuwi kaya anaké lanang raja.”
19 Gidéon kandha, ”Kuwi sedulur-sedulurku, anak-anaké lanang ibuku. Demi Yéhuwah Gusti Allah sing urip, sakjané nèk wong-wong kuwi ora mbok patèni, aku ya ora bakal matèni kowé.”
20 Terus, Gidéon ngongkon Yètèr anak pertamané, ”Patènana wong loro kuwi.” Ning, cah enom kuwi ora nyabut pedhangé. Dhèwèké wedi merga isih enom.
21 Terus, Zébah lan Zalmuna kandha, ”Nèk kowé wong lanang tenan, kowé waé sing matèni aku.” Mula, Gidéon matèni Zébah lan Zalmuna.+ Gidéon njupuk perhiasan sing bentuké bulan sing ana ing guluné untané wong loro kuwi.
22 Terus, wong Israèl kandha marang Gidéon, ”Kowé wis nylametké aku saka wong Midian,+ mula dadia pemimpinku, yaiku kowé, anakmu, lan putumu.”
23 Ning Gidéon kandha, ”Aku utawa anakku ora bakal mimpin kowé. Yéhuwah sing bakal mimpin kowé.”+
24 Gidéon kandha manèh, ”Aku mung njaluk supaya saben wong ing antaramu mènèhi aku anting-anting irung siji sing mbok jarah.” (Mungsuhé wong Israèl nduwé anting-anting emas sing dienggo ing irung merga wong-wong kuwi keturunané Ismaèl.)+
25 Wong Israèl njawab, ”Mesthi tak wènèhi.” Terus, wong Israèl nggelar jubah siji, lan saben wong nguncalké anting-anting irung sing dijarah ing jubah kuwi.
26 Boboté anting-anting emas sing dijaluk Gidéon kuwi 1.700 syèkel,* durung termasuk perhiasan sing bentuké bulan, kalung, klambi wol ungu sing dienggo para raja Midian, lan kalungé untané wong-wong kuwi.+
27 Gidéon nggunakké emas kuwi kanggo nggawé éfod*+ lan nduduhké kuwi ing kuthané, yaiku Ofra.+ Terus, kabèh wong Israèl ora setya karo Gusti Allah+ lan nyembah éfod kuwi. Kuwi dadi jerat kanggo Gidéon lan keluargané.+
28 Ya ngono kuwi Midian+ dikalahké ing ngarepé wong Israèl. Wong Midian ora wani manèh nantang Israèl.* Tanah kuwi tentrem nganti 40 taun suwéné ing jamané Gidéon.+
29 Mula, Yérubaal+ anaké Yoas bali menyang omahé lan manggon ing kono.
30 Gidéon nduwé anak lanang* 70 merga bojoné akèh.
31 Gundhiké sing ana ing Syikhèm ya nglairké anak lanang, lan Gidéon njenengi anak kuwi Abimèlèkh.+
32 Gidéon anaké Yoas mati pas umuré wis tuwa banget lan dikubur ing kuburané Yoas bapaké, ing Ofra kuthané wong Abi-èzèr.+
33 Ora suwé sakwisé Gidéon mati, wong Israèl ora setya marang Gusti Allah lan nyembah manèh déwa-déwa Baal+ lan ndadèkké Baal-bèrit dadi allahé.+
34 Wong Israèl lali karo Yéhuwah Gusti Allahé,+ sing wis nylametké wong-wong kuwi saka kabèh mungsuh sing ana ing sekitaré.+
35 Wong Israèl ya ora setya* marang keluargané Yérubaal yaiku Gidéon, padahal Gidéon wis nindakké apa sing apik kanggo wong Israèl.+
Katrangan Tambahan
^ Utawa ”nguber”.
^ Utawa ”nguber”.
^ Utawa ”nguber”.
^ Utawa ”para sesepuhé”.
^ Deloken Daftar Istilah.
^ Lit.: ”ora wani ngangkat sirahé”.
^ Lit.: ”70 anak lanang sing metu saka pupuné”.
^ Utawa ”ora nduduhké katresnan sing langgeng”. Deloken Daftar Istilah.
