Purwaning Dumadi 9:1-29
9 Gusti Allah mberkahi Nuh lan anak-anaké, terus kandha, ”Kowé kudu nduwé anak akèh lan ngebaki bumi.+
2 Kabèh jenis kéwan,* kabèh manuk, lan kabèh iwak ing laut bakal wedi karo kowé. Kowé bakal nguwasani kabèh kéwan kuwi.+
3 Kabèh kéwan éntuk mbok pangan.+ Kabèh kéwan mau Tak wènèhké kanggo kowé kaya tanduran sing isa dipangan.+
4 Tapi, daging sing isih ana getihé+ aja dipangan,+ merga getih kuwi nyawa.
5 Nèk ana wong utawa kéwan sing matèni kowé,* wong utawa kéwan kuwi kudu tanggung jawab karo Aku. Nèk kuwi kéwan, kéwan kuwi kudu mati. Nèk manungsa matèni wong liya, manungsa kuwi ya kudu mati.+
6 Sapa waé sing matèni manungsa,* dhèwèké bakal dipatèni manungsa+ merga manungsa diciptakké mirip kaya Gusti Allah.+
7 Kowé kudu nduwé anak akèh lan ngebaki bumi.”+
8 Terus, Gusti Allah kandha marang Nuh lan anak-anaké,
9 ”Saiki aku nggawé perjanjian karo kowé,+ keturunanmu,
10 lan karo kabèh kéwan sing metu saka kapal karo kowé, kabèh kéwan ing bumi, yaiku manuk, kéwan peliharaan, lan kéwan liar.+
11 Aku nggawé perjanjian karo kowé: Kabèh makhluk hidup ora bakal disingkirké nganggo banjir gedhé manèh, lan bumi ora bakal dirusak nganggo banjir gedhé manèh.”+
12 Gusti Allah ya kandha, ”Iki tandha perjanjian sing Tak gawé karo kowé lan karo kabèh makhluk hidup. Kuwi ya kanggo kabèh keturunanmu sukmbèn.
13 Aku ndèlèhké pelangi ing langit, lan kuwi bakal dadi tandha perjanjian-Ku karo kabèh sing urip ing bumi.
14 Saben Aku nggawé méga ing ndhuwuré bumi, mesthi bakal ana pelangi ing langit.
15 Aku ora bakal lali karo perjanjian-Ku, yaiku perjanjian-Ku karo kowé lan kabèh jenis makhluk hidup. Ora bakal ana manèh banjir gedhé sing nyingkirké kabèh makhluk hidup.+
16 Bakal ana pelangi ing awan. Aku mesthi bakal ndelok kuwi lan éling karo perjanjian sing bakal ana sakterusé antarané Aku lan kabèh jenis makhluk hidup ing bumi.”
17 Gusti Allah ngomong manèh karo Nuh, ”Iki tandha perjanjian sing Tak gawé karo kabèh makhluk hidup ing bumi.”+
18 Anak-anaké Nuh sing metu saka kapal yaiku Sèm, Ham, lan Yafèt.+ Ham nduwé anak sing jenengé Kanaan.+
19 Wong telu kuwi anak-anaké Nuh, lan kabèh wong sing manggon ing bumi keturunané wong-wong kuwi.+
20 Nuh dadi petani, lan dhèwèké nggawé kebon anggur.
21 Pas ngombé anggur, Nuh dadi mabuk, terus turu karo wuda ing njero kémahé.
22 Ham, bapaké Kanaan, ndelok bapaké wuda, terus dhèwèké ngandhani Sèm lan Yafèt sing ana ing njaba.
23 Sèm lan Yafèt njupuk jubah lan ndèlèhké kuwi ing pundhaké. Terus, wong loro kuwi mlaku mundur lan nutupi bapaké sing wuda, tapi ora madhep bapaké. Wong loro kuwi ora ndelok bapaké sing wuda.
24 Wektu Nuh sadhar saka mabuké lan ngerti kelakuané anaké sing terakhir,
25 dhèwèké kandha,”Kanaan bakal dikutuk.+
Dhèwèké bakal dadi budhaké* kakang-kakangé.”+
26 Nuh kandha manèh,
”Muga-muga Yéhuwah Gusti Allahé Sèm diluhurké,Lan Kanaan bakal dadi budhaké Sèm.*+
27 Muga-muga Gusti Allah mènèhi Yafèt panggonan sing amba.
Muga-muga dhèwèké manggon ing kémah-kémahé Sèm.
Muga-muga Kanaan dadi budhaké Yafèt.”
28 Sakwisé Banjir Gedhé,+ Nuh isih urip 350 taun manèh.
29 Dadi, Nuh urip nganti umur 950 taun, terus dhèwèké mati.
Katrangan Tambahan
^ Utawa ”tanggung jawab karo Aku merga getihmu, merga kuwi nyawamu”.
^ Lit.: ”sing ngutahké getihé manungsa”.
^ Lit.: ”budhak saka budhaké”.
^ Lit.: ”dhèwèké”.
