Gusti Allah péngin panjenengan dadi kancané. Apa panjenengan wis tau mbayangké isa dadi kancané Gusti Allah sing nguwasani jagat? Abraham utawa Ibrahim, wis tau dadi kancané utawa mitrané Gusti Allah. (Yakobus 2:23) Ana wong-wong sing dicathet ing Kitab Suci utawa Alkitab, sing dadi kancané Gusti Allah lan diberkahi. Jaman saiki ing kabèh nggon ing bumi ana wong-wong sing dadi kancané Gusti Allah. Panjenengan uga isa dadi kancané Gusti Allah.

Luwih apik dadi kancané Gusti Allah timbang dadi kancané manungsa. Gusti Allah ora tau nggawé gela kanca-kancané sing setya. (Jabur 18:26) Mula, dadi kancané Gusti Allah kuwi luwih ana ajiné timbang nduwé bandha sing akèh. Pas wong sugih mati, bandhané ora bakal digawa, malah bandhané bakal dipèk wong liya. Ning, wong-wong sing dadi kancané Gusti Allah nduwé bandha sing ora bakal ilang.​—Matéus 6:19.

Ana wong-wong sing péngin ngalang-alangi panjenengan sinau bab Gusti Allah. Mbokmenawa wong-wong kuwi malah kanca utawa kluarga panjenengan dhéwé. (Matéus 10:36, 37) Nèk ana wong ngongkon panjenengan mandheg sinau Alkitab, panjenengan isa mikir ngéné, ’Aku arep nyenengké Gusti Allah apa manungsa?’ Kuwi isa dipadhakké kaya wong sing ngongkon panjenengan ora mangan manèh sakterusé. Apa panjenengan gelem manut? Ya mesthiné ora, ta? Panjenengan butuh mangan bèn isa tetep urip. Gusti Allah isa nggawé panjenengan urip saklawasé. Mula, aja nganti ana wong liya utawa perkara liya ngalangi panjenengan sinau bab carané dadi kancané Gusti Allah.​—Yokanan 17:3.