GUSTI Allah ngerti sapa sing paling cocog kanggo nuntun manungsa. Sing dipilih kuwi Almasih. Kaya apa Almasih iku? Apa Almasih iku jéndral sing prakosa? Sing ngurusi negara, utawa wong sing sekolahé dhuwur? Nèk nurut Kitab Suci, Almasih kuwi nabi sing béda karo liyané, sing jenengé Isa.​—Matéus 23:10.

Gusti Allah njaga bèn nabi Isa lair dadi manungsa sing ora nduwé dosa. Nabi Isa uga ora gelem manut karo Iblis. Tumindak lan omongané nabi Isa ora tau salah, merga niru carané Gusti Allah nggunakké kwasané lan nduduhké sipat adilé, katresnané, lan kawicaksanané. Gatèkna carané awaké dhéwé isa sinau saka tuladhané Isa Almasih.

Nabi Isa nggunakké kwasa saka Gusti Allah kanggo mbantu wong liya. Nabi Isa nggatèkké wong liya, lan nggunakké kwasané kanggo nyukupi kebutuhané wong-wong iku. Nabi Isa ngendika, ”AtiKu trenyuh banget marga saka welasKu marang wong akèh iki. Wis telung dina anggoné padha ngetutaké Aku, mangka saiki ora ana kang dipangan.” (Markus 8:2) Banjur, nabi Isa nggawé mukjijat maringi panganan wong akèh sing teka kanggo ngrungokké wulangané.

Nabi Isa uga lunga ing endi-endi kanggo mulang lan ”nyarasaké sarupané lelara lan sarupané memala, kang tinemu ing satengahing bangsa kono”. (Matéus 4:23) Mula, akèh wong ngetutké nabi Isa lan ”wong akèh iku mau kabèh padha mbudidaya bisané ndemèk Panjenengané, awit banjur ana daya kang metu saka ing Panjenengané, temah kabèh padha diwarasaké”. (Lukas 6:19) Tujuané nabi Isa ing bumi ”ora supaya diladosi, nanging malah ngladosi sarta masrahaké nyawané minangka tetebusan tumrap wong akèh”. (Matéus 20:28) * Apa ana pemimpin manungsa sing gelem tumindak kaya ngono?

Nabi Isa tumindak adil kaya Gusti Allah. Nabi Isa manut karo hukumé Gusti Allah sing ana ing Kitab Suci, lan tumindaké cocog karo pathokan-pathokané Gusti Allah. Nabi Isa ngendika kaya sing diramal ing Kitab Suci, ”Kawula remen nglampahi karsa Paduka; sarta angger-angger Paduka wonten ing batos kawula.” (Jabur 40:9) Nabi Isa ngajèni lan ora mbédak-bédakké wong, senajan wong kuwi sugih, mlarat, lanang, wadon, bocah, lan sing diwasa, kaya sing ditindakké Gusti Allah. Murid-muridé nabi Isa tau nyenèni para wong tuwa sing nggawa anak-anakké nyedhaki nabi Isa. Ning, nabi Isa ngendika, ”Cikbèn bocah-bocah padha sowan marang Aku, aja kokpenggak, amarga wong kang kaya mangkono iku kang nduwèni Kratoning Allah.”​—Markus 10:14.

Nabi Isa nduduhké kawicaksanané Gusti Allah. Nabi Isa, isa ngerti sing dirasakké wong-wong. ”Panjenengané wis mirsa piyambak apa kang ana ing batiné manungsa.” (Yokanan 2:25) Pas mungsuh-mungsuhé ngongkon wong-wong nyekel nabi Isa, wong-wong kuwi ngakoni, ”Awaké dhéwé durung tau krungu wong liyané ngomong kaya wong iki.” Sapa sing mulang nabi Isa nganti pinter kaya ngono? Nabi Isa ngendika, ”Sing tak wulangké iki ora pikiranku déwé, nanging piwulangé Gusti Allah sing ngongkon Aku.”​—Yokanan 7:16, 46, BJS.

Nabi Isa niru Gusti Allah nresnani wong liya. Nabi Isa uga mesakké karo wong-wong sing susah. Ana wong lanang sing lara kusta  utawa lépra nyuwun karo nabi Isa, bèn gelem nambani dhèwèké. Merga trenyuh, nabi Isa ”terus ndemèk wongé lan ngomong: ’Aku gelem! Kowé wis mari saiki!’ Sakwat wongé ya terus mari tenan.” (Lukas 5:12, 13; Markus 1:41, 42, BJS) Nabi Isa péngin tenan nambani wong kuwi.

Apa nabi Isa uga perduli karo panjenengan? Nabi Isa ngendika, ”Padha mrénéa, Aku bakal gawé ayemmu. Pasanganku padha tampanana ing pundhakmu lan padha nggegurua marang Aku, awit Aku iki alus lan lembah ing budi, temahan kowé bakal padha olèh ayeming nyawamu.”​—Matéus 11:28, 29.

Nabi Isa kuwi sing nuntun awaké dhéwé. Mula, nabi Isa ndhawuhi awaké dhéwé, ”Padha nggegurua marang Aku.” Apa panjenengan gelem nampa undangan sing nentremké ati iki? Nèk panjenengan gelem, panjenengan bakal urip ayem tentrem.