Meskipun Yéhuwah sabar, tapi sedhéla manèh Dhèwèké bakal nyingkirké kabèh wong jahat. Ana peristiwa-peristiwa sing sedhéla manèh bakal kelakon. Misalé, agama palsu bakal disingkirké, umaté Yéhuwah bakal diserang gabungan bangsa-bangsa, lan wong jahat bakal dipatèni Yéhuwah ing Armagédon.

Mémang, awaké dhéwé ora ngerti kabèh informasi soal sengsara gedhé. Misalé, soal kapan persisé kuwi kelakon, ngapa kok pamréntah nyingkirké agama-agama, apa sing bakal dialami umaté Gusti Allah pas diserang bangsa-bangsa, lan serangané kuwi nganti kapan. Awaké dhéwé ya ora ngerti piyé carané Yéhuwah matèni kabèh wong jahat ing Armagédon.

Tapi, ing Alkitab ana keterangan nèk saiki wis ”akhir jaman”, nèk mengko serangané bangsa-bangsa bakal ”digawé singkat” bèn umaté Yéhuwah ora katut dipatèni, lan nèk Yéhuwah mesthi bakal nylametké umaté. (2Tim 3:1; Mat 24:22; 2Ptr 2:9) Terus, ya ana keterangan nèk Yésus sing dipilih Yéhuwah kanggo ngukum wong jahat lan nylametké kumpulan gedhé pas Armagédon kuwi adil lan kuwat. (Why 19:11, 15, 16) Merga ngerti keterangan-keterangan kuwi, awaké dhéwé isa luwih yakin lan kendel ngadhepi apa sing bakal kelakon sukmbèn.

Peristiwa-peristiwa kuwi isa marakké wong ”semaput merga kewedèn”. Tapi, awaké dhéwé isa yakin bakal dislametké nèk kèt saiki ngrenungké piyé Yéhuwah nylametké umaté jaman mbiyèn lan janjiné soal masa depan. Sukmbèn, awaké dhéwé bakal ’ngadeg jejeg lan ndhangak’ merga yakin ora suwé manèh bakal dibébaské.​—Luk 21:26, 28.