Ing Alkitab wis diramalké nèk ing akhir jaman bakal ana perang, gempa bumi, wabah penyakit, lan ”perkara-perkara sing nggawé wedi”. (Lukas 21:10, 11) Misalé ing taun dinas 2022, a ana perang ing Ukraina, lan ana akèh sing mati. Akèh negara ya isih kena dampak saka pandemi COVID-19. Terus ya ana akèh bencana alam. Misalé gempa bumi ing Haiti, terus badai ing Amerika Tengah, Filipina, lan Afrika. Seksi-Seksi Yéhuwah mènèhi bantuan apa?

 Selama taun dinas 2022, organisasi wis mbantu akèh korban bencana alam. Nèk ditotal, organisasi wis ngetokké dhuwit kira-kira 187 milyar rupiah. Nah, dhuwité dienggo apa waé?

 Tanggal 14 Agustus 2021, ing Haiti selatan ana gempa sing kekuwatané 7,2 magnitudo. Ana telu Seksi Yéhuwah sing mati. Terus, ana akèh sedulur-sedulur sing luka-luka lan trauma. Sedulur lanang sing jenengé Stephane ngomong, ”Ing kuthaku akèh banget sing mati. Selama rong sasi, mèh saben minggu kami layatan.” Sedulur lanang sing jenengé Éliézer ngomong, ”Akèh sedulur-sedulur omahé rusak, ora nduwé klambi, sepatu, lan kebutuhan liyané. Selama berbulan-berbulan meréka kewedèn merga terus ana gempa susulan.”

 Organisasi cepet mbantuné. Kantor cabang Haiti ngirimké luwih saka 53 ton panganan, téndha, terpal, kasur, lan power bank tenaga surya. Terus wis ana luwih saka 100 omahé sedulur-sedulur sing didandani utawa dibangun manèh. Totalé, organisasi wis ngetokké luwih saka 15 milyar rupiah dienggo bantuan kemanusiaan.

 Sedulur-sedulur bersyukur banget wis dibantu. Misalé Lorette crita, ”Gara-gara gempa bumi, omahku hancur. Terus merga ora isa nggolèk dhuwit, kami ora isa mangan. Tapi organisasiné Yéhuwah terus ndhukung. Meréka nyedhiakké apa waé sing kami butuhké.” Micheline crita, ”Merga gempa, omahku hancur. Dadi, aku karo anakku loro kudu ngungsi. Aku bingung. Aku ora ngerti kudu piyé. Makané, aku ndonga karo Yéhuwah. Yéhuwah njawab liwat organisasiné. Organisasi nggawèkké aku omah sing kuwat lan apik. Yéhuwah apikan banget, makané aku péngin terus nglayani Dhèwèké.”

 Upayané organisasi ya digatèkké pamréntah. Walikota ing L’Asile ngomong, ”Kalian cepet banget ngekèki bantuan. Kami seneng merga kalian mesthi ngandhani kami sik sakdurungé ngirim bantuan. Kalian bener-bener tulus mbantu wong, ora nggolèk untung.”

 Tanggal 24 Januari 2022, ana Badai Ana ing Mozambik, terus badainé ya tekan Malawi. Udané deres banget, terus anginé ya kenceng banget nganti 100 kilomèter per jam. Akibaté listriké mati, jembatan padha rusak, terus banjir ing endi-endi.

 Ana luwih saka 30.000 sedulur-sedulur ing Malawi lan Mozambik sing dadi korban. Sedulur Charles, sing mèlu mbantu penanggulangan bencana, ngomong, ”Aku sedhih banget ndelok keadaané sedulur-sedulur.” Sing luwih parah, stok panganan lan keboné sedulur-sedulur kebanjiran. Terus akèh omahé sedulur-sedulur hancur. Malah, ana sedulur sing bojoné karo anaké loro mati kleleb merga kapal penyelamaté malik.

 Badainé ngeri banget. Jam siji bengi, keluarga Sengeredo ing Nchalo, Malawi, tiba-tiba krungu swara banyu. Ternyata ana kali loro sing mbludag. Sedulur Sengeredo langsung ngungsi. Ora suwé bar ngungsi, omahé hancur merga banjir. Barang-barangé ana sing rusak, terus ana sing kèli. Keluarga Sengeredo ngungsi ing Balai Ibadah. Sakjané Balainé ora pati adoh, mung setengah jam nèk mlaku. Tapi merga banjir, pas kuwi butuh wektu rong jam. Makané meréka dadi kesel banget. Ning, sing penting meréka wis aman.

 Kantor cabang Malawi karo Mozambik langsung ngekèki bantuan. Terus para pinituwa lan pinituwa wilayah mastèkké apa waé kebutuhané sedulur-sedulur. Meréka ya nguwatké lan nyemangati sedulur-sedulur. Ana beberapa Panitia Penanggulangan Bencana (PPB) sing ditugaské kanggo mbantu nyedhiakké kebutuhané sedulur-sedulur. Totalé, organisasi ngetokké dhuwit kira-kira 500 juta rupiah dienggo nyedhiakké bantuan kemanusiaan, lan kira-kira 4,7 milyar rupiah dienggo ndandani omahé sedulur-sedulur.

 PPB berupaya menghémat dhuwit sumbangan, soalé ing kono lagi ana inflasi. Misalé, regané tepung jagung ing Malawi mundhak nganti 70 persèn. Terus bahan bakar ya regané mundhak. Bèn hémat, sedulur-sedulur tuku panganan lan bahan bangunan ing cedhak kono, terus tukuné akèh sisan. Makané meréka isa éntuk diskon lan ongkos kirimé ora larang.

 Sedulur-sedulur sing éntuk bantuan padha terharu banget. Sedulur Felisberto saka Mozambik ngomong, ”Organisasiné Yéhuwah bener-bener luar biasa. Ora mung nyepaki bahan bangunan, transportasi, rélawan sing mbantu mbangun, lan panganan, tapi ya ngekèki penghiburan lan nguwatké. Iki kabèh bener-bener bukti nèk muridé Yésus saling menyayangi, kaya sing ditulis ing Yohanes 13:34, 35.” Sedulur Ester saka Malawi omahé hancur. Dhèwèké crita, ”Aku ora nduwé dhuwit kanggo mbangun omah manèh. Tapi, sedulur-sedulur nggawèkké omah kanggo aku. Aku dadi terharu banget. Rasané kaya wis ing Firdaus.”

 Merga saiki wis akhir jaman, bakal ana akèh bencana alam. (Matius 24:7, 8) Tapi merga sumbangané njenengan, organisasiné Yéhuwah isa mbantu sedulur-sedulur sing kena bencana alam. Nèk péngin nyumbang, njenengan isa mbukak ing donate.pr418.com. Maturnuwun merga njenengan wis murah hati.