Kanggo ndhukung gawéan nginjil, Pengurus Pusat ngatur bèn dhuwit sumbangan isa dienggo mbangun bangunan organisasi. Misalé selama taun dinas 2023 badan hukumé Seksi-Seksi Yéhuwah tuku, mbangun, ndandani, lan ngrawat Balai Ibadah lan Balai Pertemuan ing sak donya sing biayané nèk ditotal luwih saka 500 juta dolar AS. a Jumlah kuwi durung termasuk biaya sing ditokké jemaat-jemaat kanggo ngrawat Balai Ibadahé meréka.

 Sakliyané kuwi, dhuwit sumbangan ya dienggo mbangun lan ngrawat kantor-kantor cabang sing ngurusi gawéan nginjil sak donya. Gawéan lan fasilitas ing kantor cabang digawé luwih sederhana dadi dhuwit sumbangané isa dienggo mbangun lan ndandani Balai Ibadah utawa Balai Pertemuan. Tapi tetep isih butuh biaya kanggo ndandani lan mindhah kantor-kantor cabang. Kenapa proyèk kuwi penting? Apa pengaruhé kanggo gawéan nginjil?

 Akèh kantor cabang wis dibangun luwih saka 30 utawa 40 taun. Nicholas saka Departemèn Rancang/Bangun Sedunia ngomong, ”Meskipun bangunané wis dirawat tenanan, tapi suwé-suwé bangunané isa rusak lan ora apik manèh. Makané kudu dirénovasi bèn isa terus dienggo.”

 Kebutuhan ing organisasi tambah akèh. Kèt kantor-kantor cabang dibangun, penginjil ing sak donya tambah akèh. Mula gawéan ing Bètel dadi tambah akèh lan dibutuhké luwih akèh sing kerja ing Bètel. Merga pekerjané tambah akèh, kantor cabangé dadi ora cukup.

 Alesan liyané, bèn wong-wong sing kerja ing Bètel isa tetep aman. Merga saiki wis akhir jaman, mula akèh bencana alam sing kelakon. (Lukas 21:11) Nèk kantor-kantor cabangé didandani, sedulur-sedulur sing kerja ing kono isa luwih aman. Pas ana bencana, bangunané isa tetep kokoh lan isa dienggo. Dadi, sedulur-sedulur ing kono isa tetep ngatur bantuan kanggo sedulur-sedulur sing kena bencana lan gawéan nginjil ora mandheg.

 Pengurus Pusat mutuské nèk 43 kantor cabang bakal dirénovasi selama taun dinas 2023. Kuwi berarti 50 persèn kantor cabang ing sak donya lagi dirénovasi. Gatèkna manfaat sing dirasakké merga ana proyèk rénovasi iki.

 Angola. Matt, salah siji anggota Panitia Cabang Angola ngomong, ”Kami bener-bener ngrasakké nèk ramalan ing Hagai 2:7 bener-bener kelakon. Selama sepuluh taun, jumlah penginjil ing kéné mundhak 60 persèn. Dadi jumlahé keluarga Bètel kudu ping telu luwih akèh. Tapi merga kantor cabangé cilik, kami ora isa ngundang luwih akèh sedulur kanggo mbantu ing kéné. Akibaté, akèh anggota Bètel sing kudu lembur merga gawéané tambah akèh.”

 Ana sedulur-sedulur sing ditugaské kanggo ndelok apa sing dibutuhké kantor cabang Angola. Awalé meréka mikir solusi sing paling apik lan sing paling cepet kuwi dirénovasi waé kantor cabangé. Tapi sakwisé dipikirké, ternyata kuwi dudu cara sing apik lan malah ngentèkké akèh dhuwit sumbangan. Makané meréka ngekèki saran bèn tuku bangunan ing cedhak kono lan dirénovasi. Matt ngomong, ”Pas Panitia Cabang ngerti saran kuwi, awalé kami ora yakin nèk kualitas bangunané isa padha karo bangunan sing dibangun organisasi. Tapi sakwisé proyèké rampung, kami ngerti nèk mémang kuwi sing dibutuhké. Jelas banget nèk Yéhuwah mberkahi proyèk iki.”

 Mémang mengko kantor cabang Angola butuh panggonan sing luwih gedhé manèh. Tapi saiki ing kana wis ana bangunan anyar, tempat tinggal, lan beberapa apartemèn sing diséwa. Manfaaté, gawéan nginjil ing Angola isa terus berkembang.

 Jepang. Bangunan kantor cabang Jepang wis mèh 40 taun lan durung tau dirénovasi total. Meskipun sedulur-sedulur wis berupaya ngrawat bangunané, tapi tetep kudu dirénovasi bèn isa terus dienggo. Nah saiki proyèké lagi berlangsung.

 Ing Bètel ya ana perubahan. Sakdurungé taun 2015, ana sing nyiapké lan masak panganan kanggo anggota Bètel. Makané ing kamaré mung ana dapur sing cilik. Saiki, anggota Bètel kudu nyiapké panganané dhéwé-dhéwé. Dadi pas rénovasi, ing saben kamar, dapuré digawé luwih gedhé. Kumiko, sedulur wédok sing nglayani ing kantor cabang Jepang ngomong, ”Merga dapuré wis dirénovasi, aku ngrasa luwih nyaman kaya ing omah. Aku ya dadi isa ndhukung pengaturan ing Bètel.”

 Gawéan sing ana ing kantor cabang Jepang kuwi penting banget. (Matius 28:19, 20) Soalé kuwi salah siji kantor cabang sing nyétak Alkitab. Makané, pas rénovasi dipasang mesin penyedot debu lan sisa kertas. Meskipun mesin kuwi lan biaya pemasangané mèh nganti sak juta dolar AS, tapi manfaaté sedulur-sedulur sing kerja ing Percétakan isa tetep séhat lan aman. Terus, organisasi isa tetep nyétak lan ngirim bacaan-bacaan termasuk Alkitab.

 Para sedulur mastèkké gawéan percétakan tetep berlangsung meskipun ana rénovasi. Trey, salah siji anggota Panitia Cabang saka Jepang ngomong, ”Selama rénovasi, tetep ana rilis Alkitab ing beberapa basa lan ing sak donya ya isih ana akèh sing butuh Alkitab. Dadi para sedulur ing akèh departemèn kudu kerja sama karo para kontraktor lan nggawé jadwal sing apik bèn isa tetep nyétak meskipun ana rénovasi.” Meskipun keadaané angèl, tapi kèt bulan Maret nganti Agustus 2023, mèh 220.000 Alkitab dicétak saben sasi. Rénovasiné isa rampung lan ora ngentèkké akèh biaya.

 Organisasi ya ngupaya bèn isa luwih hémat ènergi. Misalé, bakal dipasang panèl surya sing bakal menghémat nganti 120.000 dolar AS saben taun. Terus ya bakal dipasang jendhéla sing lapisan kacané ana telung lapis, sing bakal menghémat biaya nganti 10.000 dolar AS saben taun. Meskipun biaya pemasangané larang banget, tapi kèt nganggo panèl surya lan jendhéla kuwi, organisasi isa menghémat nganti 3,5 juta dolar AS. Terus ya ora bakal ngrusak lingkungan sekitar.

 Saka loro proyèk rénovasi iki, awaké dhéwé dadi isa ngerti nèk isih ana akèh gawéan kanggo nggawé fasilitas Bètel dadi luwih apik bèn isa ndhukung gawéan nginjil. Aaron saka Departemèn Rancang/Bangun Sedunia ngomong, ”Meskipun wis ana akèh sing wis rampung, tapi sakjané isih ana luwih akèh sing kudu dikerjakké.” Gawéané isa berhasil merga apa? Aaron ngomong manèh, ”Gawéan iki isa berhasil merga ana sumbangan lan bantuan saka sedulur-sedulur sing gelem mbantu ing proyèk iki. Kami ya selalu bersyukur merga ana para sedulur sing selalu siap mbantu wektu ana proyèk-proyèk liyané. Saka sumbangan lan bantuané para sedulur, kuwi nduduhké nèk Yéhuwah mberkahi proyèk iki.”—Mazmur 110:3.

 Akèh proyèk lan rénovasi isa berhasil merga sumbangané njenengan sing akèh-akèhé dikèkké liwat donate.pr418.com. Maturnuwun banget merga njenengan wis murah hati.