Seksi-Seksi Yéhuwah seneng mbantu wong-wong, misalé liwat gawéan nginjil. Kuwi wis ditindakké ing luwih saka 200 negara. Ning, kira-kira mung 35 negara sing sanggup nyukupi kebutuhan ing wilayahé. Terus, piyé Seksi-Seksi Yéhuwah isa mbiayai kegiatan ing negara-negara sing kurang mampu?

 Pengurus Pusat Seksi-Seksi Yéhuwah mikirké tenanan kebutuhané umaté Yéhuwah ing sak donya bèn isa terus ngibadah lan nginjil. Pengurus Pusat ngati-ati wektu arep nggunakké dhuwit sumbangan iki. Nèk ana kantor cabang sing nampa sumbangan luwih akèh saka sing dibutuhké, kantor cabang kuwi kudu ngirimké ing cabang liyané sing luwih mbutuhké. Cara iki niru contoné wong Kristen ing jamané para rasul, sing tujuané bèn ”bebané dadi rata”. (2 Korintus 8:14) Wong-wong Kristen kuwi nggunakké kelebihané kanggo mbantu para sedulur liyané sing kekurangan.

 Piyé perasaané para sedulur sing nampa bantuan saka cabang liyané? Contoné negara Tanzania, sing setengah penduduké nduwé penghasilan kurang saka 30.000 rupiah, nampa sumbangan saka cabang liyané. Para sedulur ing kono nggunakké sumbangan kuwi kanggo ngrénovasi Balé Ibadah sing dienggo Jemaat Mafinga. Para sedulur ing jemaat kuwi ngomong, ”Kèt baléné dirénovasi, hadirin sing teka dadi saya akèh. Para sedulur ing kéné bersyukur banget merga organisasiné Yéhuwah lan para sedulur sak donya wis apikan banget.”

 Ana beberapa sedulur ing Sri Lanka sing ngalami kurang pangan merga wabah corona. Contoné, Sedulur Imara Fernando karo anaké lanang sing jenengé Enosh. Ning, merga éntuk sumbangan saka cabang liya, wong loro kuwi isa nampa bantuan sing dibutuhké. Wong loro kuwi nulis kartu ucapan sing isiné, ”Aku lan Enosh bener-bener bersyukur merga para sedulur tetep nduduhké katresnan senajan keadaané angèl. Aku ya seneng merga isa dadi bagéan saka organisasiné Yéhuwah. Aku lan Enosh terus ndonga bèn Yéhuwah terus mbantu kabèh sedulur sing ngalami keadaan sing susah.”

  Kabèh sedulur ing endi waé isa mèlu mènèhi bantuan kanggo sedulur liyané sing kekurangan. Contoné Enosh. Dhèwèké nggawé kothak sumbangan dhéwé bèn isa mènèhi bantuan kanggo para sedulur sing mbutuhké. Conto liyané, Guadalupe Álvarez sing manggon ing negara bagéan Meksiko. Ing kana akèh penduduké nduwé penghasilan sing rendah. Ning, dhèwèké tetep nyumbang sak isané. Dhèwèké ngomong, ”Aku bersyukur merga Yéhuwah wis apikan lan nduduhké katresnan. Senajan sumbanganku ora akèh, ning aku yakin mesthi kuwi ana manfaaté kanggo para sedulur sing mbutuhké.”

 Kantor-kantor cabang mesthi seneng banget isa mbantu para sedulur sing mbutuhké. Panitia Cabang Brasil sing jenengé Anthony Carvalho kandha, ”Pirang-pirang taun, Kantor Cabang Brasil mbutuhké bantuan saka kantor cabang liyané. Merga bantuan kuwi, ana akèh sing isa ditindakké. Ning, saiki keadaané dadi luwih apik. Kantor Cabang Brasil nduwé kesempatan kanggo mbantu cabang liyané. Para sedulur ing Brasil ngupaya nggolèk informasi soal cabang endi sing mbutuhké bantuan. Terus, para sedulur ya ngupaya sak isa-isané kanggo mbantu para sedulur kuwi.”

 Piyé carané awaké dhéwé isa mbantu para sedulur sing mbutuhké? Njenengan ora perlu langsung ngirim dhuwit ing kantor cabang liyané. Ning, njenengan isa mènèhi sumbangan ing kothak sumbangan sing ana tulisané ”Gawéan Sak Donya” utawa liwat donate.pr418.com. Sumbangané njenengan berharga banget.