BUMI IKI TAMBAH RUSAK
Laut
KABÈH sing ana ing laut ora mung isa dadi sumber panganan, tapi ya isa dadi bahan kanggo nggawé obat. Laut isa ngasilké oksigén sing akèh banget lan nyerep gas karbon berbahaya ing bumi. Laut ya isa nggawé iklim tetep stabil.
Kenapa Laut Kudu Dirawat?
Perubahan iklim berbahaya kanggo terumbu karang, kerang, lan makhluk hidup laut liyané. Para ilmuwan ngomong nèk 30 taun manèh mèh kabèh terumbu karang mati, padahal kuwi bermanfaat kanggo makhluk hidup ing laut.
Para ahli ngomong nèk kira-kira 90 persèn manuk sing nggolèk mangan ing laut wis mangan plastik. Saben taun jutaan kéwan laut mati merga sampah plastik.
Taun 2022, Sekretaris-Jéndral PBB sing jenengé António Guterres ngomong, ”Merga ora dirawat, lauté dadi rusak. Saiki awaké dhéwé ngadhepi ’Darurat Laut.’”
Bukti-Bukti Nèk Bumi Ora Bakal Rusak
Sakjané laut wis dirancang bèn isa resik dhéwé. Terus ya ana makhluk hidup ing kono sing isa nggawé laut tetep resik. Tapi, kuwi isa kelakon nèk manungsa ora mencemari laut. Buku Regeneration: Ending the Climate Crisis in One Generation nyebutké nèk manungsa ora mencemari laut, ”lauté isa resik dhéwé”. Buktiné:
-
Fitoplankton nyerep karbon dioksida sing nyebabké pemanasan global. Jumlah gas karbon dioksida sing diserap fitoplankton mèh padha kaya sing diserap wit, suket, lan tanduran liyané.
-
Baktèri mangan iwak sing wis mati, termasuk balung-balungé. Kuwi nggawé laut ora tercemar karo bangkai iwak. Terus, baktèri kuwi dadi panganan kanggo makhluk hidup liyané ing laut. Menurut situs wèb Smithsonian Institution Ocean Portal, prosès kuwi ”nggawé laut tetep resik lan jernih”.
-
Akèh makhluk hidup laut sing sistem pencernaané isa ngurangi tingkat keasaman banyu laut. Dadi banyuné ora berbahaya kanggo terumbu karang, kerang, lan makhluk hidup liyané.
Sing Wis Diupayakké Manungsa
Nèk nganggo tas blanja utawa botol sing isa dienggo bola-bali, kuwi isa ngurangi sampah plastik sing dibuwang ing laut
Nèk ora ana sampah sing dibuwang ing laut, lauté bakal tetep resik. Makané para ahli ngandhani, daripada nganggo barang saka plastik sing sekali pakai, mendhing nggunakké tas, barang-barang, lan wadhah sing isa dienggo bola-bali.
Tapi cara kuwi durung berhasil kanggo ngurangi sampah. Buktiné selama setaun, ana organisasi perduli lingkungan sing wis nglumpukké kira-kira 8.300 ton sampah saka pantai ing 112 negara. Jumlah kuwi sithik banget nèk dibandhingké karo jumlah sampah sing dibuwang ing laut saben taun.
Ana laporan saka National Geographic, ”Merga saking akèhé polusi, tingkat keasaman [banyu laut] dadi bertambah.” Akibaté kéwan-kéwan ing laut wis ora sanggup ngubah tingkat keasaman kuwi lan ora isa nggawé banyu laut tetep resik.
Ing Alkitab Ana Harapan Apa?
”Kabèh hasil karya-Mu ngebaki bumi. Laut kuwi gedhé banget lan amba. Ing kono ana akèh banget makhluk hidup sing cilik lan gedhé.”—Mazmur 104:24, 25.
Gusti Allah wis nggawé laut lan ngrancang bèn laut isa resik dhéwé tanpa bantuané manungsa. Nèk Gusti Allah sanggup nyiptakké laut lan kabèh makhluk hidup sing ana ing kono, berarti Gusti Allah sanggup nggawé laut sing tercemar dadi resik manèh. Deloken artikel ”Gusti Allah Janji Nèk Bumi Ora Bakal Tambah Rusak” ing halaman 15.
