1. Apa buktiné nèk Abraham percaya marang kaadilané Yéhuwah? (Deloken gambar ing ndhuwur.)

”PUNAPA Hakiming jagad boten nindakaken kaadilan?” (Pd. 18:25) Abraham sing setya takon kaya ngono dudu merga ragu-ragu. Ning, pitakonan kuwi mbuktèkké nèk Abraham percaya nèk Yéhuwah bakal tumindak adil wektu ngukum kutha Sodom lan Gomora. Abraham yakin nèk Yéhuwah ora mungkin ”mejahi tiyang mursid tunggil kaliyan tiyang duraka”. Banjur, Yéhuwah ngendika nèk Yéhuwah kuwi ”Gunung Parang, kang sampurna pakaryané, jejeg sakèhé marginé; marga Gusti Allah kang setya-tuhu, ora ana kaculikané, Panjenengané iku bener lan adil”.—PT. 31:19; 32:4.

2. Apa sebabé Yéhuwah ora mungkin tumindak ora adil?

² Apa sebabé Abraham yakin nèk tumindaké Yéhuwah mesthi bener? Merga Yéhuwah kuwi pribadi sing paling adil lan bener. Tembung ”adil” lan ”bener” kerep  digunakké bebarengan ing Kitab-Kitab Ibrani merga tegesé mèh padha. Dadi, Yéhuwah mesthi bakal dadi hakim sing adil merga pathokané uga mesthi bener. Alkitab kandha, ”Panjenengané karenan marang kang bener lan adil.”—Ms. 33:5.

3. Wènèhana conto tumindak ora adil ing donya saiki.

³ Lega banget rasané merga ngerti nèk Yéhuwah kuwi mesthi adil. Donya saiki kebak tumindak sing ora adil. Contoné, ana wong sing ditudhuh nindakké kejahatan banjur dipenjara senajan sakjané ora salah. Mbokmenawa wong kuwi akiré isa bébas sakwisé ana akèh bukti sing mbuktèkké nèk dhèwèké ora salah. Ning, dhèwèké wis kebacut dipenjara pirang-pirang taun. Tumindak ora adil kaya ngono isa nggawé nesu lan strès. Ning, ana tumindak ora adil liyané sing isa waé ora gampang diadhepi. Apa kuwi?

4. Apa sing isa nguji iman kita?

⁴ Wong-Kristen isa waé ngalami tumindak ora adil ing njaba jemaat. Ning, iman kita isa diuji wektu ndelok utawa ngalami tumindak ora adil ing jemaat. Nèk kuwi kelakon, piyé tanggepan panjenengan? Apa panjenengan ndadèkké kuwi dadi sandhungan?

5. Kenapa awaké dhéwé ora kagèt wektu ana tumindak sing ora adil ing jemaat?

⁵ Kita kabèh ora sampurna lan nggawé kesalahan. Dadi, isa waé ana sing tumindak ora adil marang kita utawa awaké dhéwé sing ora adil marang wong liya ing jemaat. (1 Yo. 1:8) Pancèn, kuwi arang kelakon. Ning, wong Kristen sing setya ora kagèt utawa dadi kesandhung wektu ana tumindak sing ora adil. Yéhuwah wis maringi naséhat saka Alkitab kanggo mbantu bèn kita isa tetep setya wektu ngalami tumindak ora adil ing jemaat.—Ms. 55:13-15.

6, 7. Critakna pengalamané salah siji sedulur sing ngalami tumindak ora adil, lan sipat apa waé sing isa mbantu dhèwèké tetep setya?

⁶ Gatèkna pengalamané Willi Diehl. Sedulur Diehl setya ngabdi ing Bètel Bern, Swiss, wiwit taun 1931. Taun 1946, dhèwèké mèlu Sekolah Giléad kelas kawolu ing New York, AS. Sakwisé lulus, dhèwèké ditugaské dadi pinituwa wilayah ing Swiss. Ing sasi Mei 1949, Sedulur Diehl kandha karo kantor cabang Swiss nèk dhèwèké arep nikah. Ning, para sedulur sing nduwé wewenang kandha nèk kabèh hak istiméwané bakal dicabut. Dhèwèké mung éntuk dadi perintis. Sedulur Diehl kandha, ”Aku ora éntuk nyampèkké ceramah. Akèh sedulur sing wis ora gelem srawung sarta nganggep aku lan bojoku kaya wong sing dipecat.”

⁷ Piyé tanggepané Sedulur Diehl? Dhèwèké kandha, ”Aku ngerti nèk nikah kuwi ora dilarang ing Alkitab. Aku lan bojoku terus ndonga lan ngendelké Yéhuwah.” Mauné ana sedulur sing ora ngerti pandhangané Yéhuwah bab nikah. Ning, akiré pangertèné para sedulur padha dibenerké lan Sedulur Diehl isa éntuk hak istiméwa  manèh. Yéhuwah mberkahi kasetyané Sedulur Diehl. * (Deloken katrangan ing ngisor.) Coba pikirna: ’Nèk aku ngalami tumindak sing ora adil, apa aku gelem sabar ngentèni Yéhuwah tumindak kanggo ndandani kahanané? Utawa, aku malah ngendelké awakku dhéwé lan nglawan tumindak ora adil kuwi?’—WB. 11:2; wacanen Mikha 7:7.

8. Apa sebabé isa waé kita salah paham bab tumindak sing ora adil ing jemaat?

⁸ Nèk panjenengan rumangsa ana tumindak sing ora adil ing jemaat, élinga nèk isa waé kita salah paham bab masalahé utawa ora ngerti kabèh faktané, merga kita kabèh ora sampurna. Ning, ora masalah ngerti tenan apa ora, kita kudu ndonga lan ngendelké Yéhuwah sarta ngupaya tetep setya. Iki mbantu awaké dhéwé bèn ora dadi ’ngundhamana [nesu] marang Yéhuwah’.—Wacanen Wulang Bebasan 19:3.

9. Contoné sapa waé sing arep dirembug ing wulangan iki lan sakbanjuré?

⁹ Ayo ngrembug telung conto saka abdiné Yéhuwah jaman mbiyèn sing ngalami tumindak ora adil. Ing wulangan iki, kita arep ngrembug pengalamané buyuté Abraham, yaiku Yusuf, sing ngalami sengsara merga kakang-kakangé. Ing wulangan sakbanjuré, kita bakal ngrembug carané Yéhuwah tumindak marang Raja Akhab lan pengalamané rasul Pétrus wektu ing Antiokhia Siria. Karo ngrembug conto-conto kuwi, coba gatèkna piyé carané bèn isa tetep setya lan cedhak karo Yéhuwah, kususé nèk panjenengan rumangsa wis ngalami tumindak ora adil.

10, 11. (a) Yusuf ngalami tumindak ora adil apa? (b) Kesempatan apa sing diduwèni karo Yusuf wektu ing penjara?

¹⁰ Yusuf kuwi wong sing setya marang Yéhuwah. Yusuf ngalami tumindak ora adil saka wong sing ora dikenal. Ning, Yusuf uga wis tau ngalami tumindak ora adil saka sedulur-seduluré dhéwé. Wektu umuré 17 taun, para seduluré nyulik lan ngedol Yusuf dadi budhak banjur digawa menyang Mesir. Kuwi mesthi nglarani atiné banget. (Pd. 37:23-28; 42:21) Sakbanjuré, ing Mesir, Yusuf ditudhuh arep merkosa wong wédok lan dipenjara tanpa diadili. (Pd. 39:17-20) Yusuf dadi budhak lan dipenjara 13 taun. Apa sing isa disinaoni saka pengalamané Yusuf sing isa mbantu kita wektu ngalami tumindak ora adil saka para sedulur?

¹¹ Wektu Yusuf dipenjara, pengawas juru-minumané raja uga dipenjara. Wektu lagi turu ing wayah bengi,  juru-minuman kuwi ngimpi lan Yéhuwah mbantu Yusuf napsirké mimpiné. Yusuf nerangké nèk juru-minuman kuwi bakal dibébaské saka penjara lan isa ngladèni Firaun manèh. Banjur, Yusuf nggunakké kesempatan kuwi kanggo nyritakké kahanané. Kita isa sinau akèh saka apa sing diomongké lan sing ora diomongké Yusuf.—Pd. 40:5-13.

12, 13. (a) Saka ngendi kita ngerti nèk Yusuf ora mung nrima? (b) Apa sing ora diomongké karo Yusuf marang juru-minuman?

¹² Wacanen Purwaning Dumadi 40:14, 15. Yusuf kandha nèk dhèwèké ”dipun colong dipun culik”. Dadi, cetha nèk Yusuf kuwi sakjané ora salah lan dadi kurban saka tumindak ora adil. Mula, Yusuf njaluk tulung karo juru-minuman bèn crita bab kahanané marang Firaun supaya Yusuf isa metu saka penjara.

¹³ Apa Yusuf mung nrima tanpa ngupaya mbéla awaké dhéwé? Ora. Yusuf ngerti nèk dhèwèké wis dadi kurban. Mula, Yusuf njelaské kahanané marang juru-minuman bèn dhèwèké isa éntuk bantuan. Ning, Alkitab ora nyritakké nèk Yusuf kandha karo wong-wong, uga karo Firaun, nèk sing nyulik dhèwèké kuwi kakang-kakangé dhéwé. Malah, wektu para seduluré teka ing  Mesir lan dadi rukun manèh karo Yusuf, Firaun nampa lan ngundang sedulur-seduluré Yusuf bèn manggon ing Mesir lan ngrasakké ”kang becik dhéwé ing tanah Mesir”.—Pd. 45:16-20.

14. Apa sing isa mbantu kita bèn ora nganti ngomong sing nglarani ati wektu ngalami tumindak ora adil ing jemaat?

¹⁴ Nèk kita rumangsa ana tumindak sing ora adil ing jemaat, kita kudu ngati-ati banget aja nganti nggawé gosip. Pancèn, kita kudu kandha lan njaluk bantuané pinituwa nèk ana sing nindakké dosa serius. (Km. 5:1) Ning, akèh masalah sing mbokmenawa ora ana kaitané karo dosa serius. Dadi, luwih apik nèk awaké dhéwé ngupaya rukun waé karo para sedulur lan ora usah crita-crita marang wong liya utawa pinituwa. (Wacanen Matéus 5:23, 24; 18:15.) Kita kudu tetep setya lan ngetrapké pathokané Alkitab. Kadhang kala, jebulé kuwi mung salah paham lan awaké dhéwé dudu kurban saka tumindak ora adil. Dadi, kita mesthi lega banget nèk ora kebacut nggedhèk-nggedhèkké masalahé lan ngomong sing ora bener bab sedulur kita. Élinga nèk omongan sing nglarani ati kuwi ora isa ngrampungi masalah, ora soal awaké dhéwé bener apa ora. Nèk tetep setya marang Yéhuwah lan para sedulur, kita ora bakal nganti nindakké kesalahan kuwi. Sing nulis Jabur kandha nèk ”wong kang lakuné tanpa cacad . . . ora nyebar pitenah kalawan ilaté, sarta ora nindakaké piala marang kancané”.—Ms. 15:2, 3; Yb. 3:5.

15. Apa berkahé merga Yusuf tetep setya?

¹⁵ Ana manèh sing isa disinaoni saka pengalamané Yusuf. Saksuwéné 13 taun ngalami tumindak sing ora adil, Yusuf nduduhké nèk cara mikiré padha karo cara mikiré Yéhuwah. (Pd. 45:5-8) Yusuf pancèn ora lali karo kasusahan sing dialami. Ning, Yusuf ora tau nyalahké Yéhuwah utawa dadi nelangsa. Sing luwih penting, senajan ngalami kasusahan merga kesalahané wong sing ora sampurna, Yusuf tetep setya lan cedhak karo Yéhuwah. Mula, Yusuf dadi isa ndelok dhéwé Yéhuwah tumindak kanggo ngatasi masalahé sarta mberkahi Yusuf lan keluargané.

16. Kenapa kita kudu luwih nyedhak marang Yéhuwah wektu ngalami tumindak ora adil ing jemaat?

¹⁶ Semono uga, kita kudu tetep ngajèni lan njaga hubungan karo Yéhuwah. Aja nganti kesalahané para sedulur sing ora sampurna nggawé kita adoh saka Yéhuwah, Gusti Allah sing  kita sembah lan tresnani. (Rm. 8:38, 39) Dadi, nèk ngalami tumindak ora adil ing jemaat, ayo niru tuladhané Yusuf lan luwih nyedhak marang Yéhuwah. Ngupayaa bèn cara mikiré awaké dhéwé padha karo cara mikiré Yéhuwah. Sakwisé ngupaya ngatasi masalahé manut pathokané Alkitab, kita kudu masrahké masalah kuwi marang Yéhuwah. Kita isa yakin nèk Yéhuwah mesthi isa ngrampungi masalah kuwi manut wektu lan carané Yéhuwah dhéwé.

17. Piyé carané nduduhké nèk kita percaya karo ”Hakiming jagad”?

¹⁷ Saksuwéné urip ing donya sing jahat iki, isa waé kita ngalami tumindak sing ora adil. Kadhang kala, panjenengan utawa wong liya sing panjenengan kenal isa ndelok utawa ngalami dhéwé kahanan sing kétoké ora adil ing jemaat. Aja nganti dadi kesandhung. (Ms. 119:165) Tetepa setya marang Yéhuwah, ndongaa, lan percayaa karo bantuané. Élinga nèk manungsa kuwi ora sampurna, mula isa waé kita salah paham lan ora ngerti kabèh faktané. Tirunen Yusuf lan aja nganti ngomong sing èlèk, merga kuwi malah nggawé masalahé dadi tambah parah. Dadi, ketimbang ngupaya dhéwé kanggo ngrampungi masalahé, nduwéa tékad kanggo tetep setya lan sabar ngentèni Yéhuwah tumindak. Panjenengan bakal isa nyenengké Yéhuwah lan éntuk berkahé, kayadéné Yusuf mbiyèn. Panjenengan isa yakin nèk Yéhuwah kuwi ”Hakiming jagad” sing mesthi nindakké apa sing bener lan ”jejeg sakèhé marginé”.—Pd. 18:25; PT. 32:4.

18. Apa sing bakal dirembug ing wulangan sakbanjuré?

¹⁸ Ing wulangan sakbanjuré, kita bakal ngrembug rong conto manèh bab tumindak ora adil sing dialami karo umaté Yéhuwah jaman mbiyèn. Conto-conto iki bakal mbantu kita ngerti nèk sipat andhap asor lan seneng ngapura kuwi isa mbantu kita bèn isa niru kaadilané Yéhuwah.