1. Critakna mukjijaté Yésus sing pertama.

 BAYANGNA situasiné. Yésus, Maria, karo beberapa muridé diundang teka ing pésta mantènan ing kutha Kana, ing cedhak omahé Yésus ing Nazarèt. Kétoké Maria kuwi kancané keluarga mantèn lan dipasrahi kanggo ngurusi tamu-tamu. Tapi ndilalah angguré entèk, mungkin merga sing teka akèh banget. Jaman mbiyèn kuwi isa marahi mantèné isin banget. b Maria langsung ngomong karo Yésus, ”Wong-wong kuwi kentèkan anggur.” (Yoh. 2:1-3) Terus Yésus piyé? Yésus nggawé mukjijaté sing pertama. Dhèwèké ngubah banyu dadi ”anggur sing apik”.​—Yoh. 2:9, 10.

2-3. (a) Ngapa Yésus nggawé akèh mukjijat? (b) Apa manfaaté nèk ngrembug mukjijaté Yésus?

² Sakwisé kuwi, isih ana akèh mukjijat sing digawé Yésus. c Yésus nggawé mukjijat merga péngin mbantu  akèh wong. Misalé, Yésus ngekèki mangan 5.000 wong lan 4.000 wong. Nèk diétung karo wong wédok lan cah-cah cilik mungkin jumlahé kabèh 27.000. (Mat. 14:15-21; 15:32-38) Yésus ya marèkké akèh wong lara. (Mat. 14:14; 15:30, 31) Wong-wong kuwi mesthi seneng banget.

³ Ana akèh sing isa dipelajari saka mukjijaté Yésus. Ing artikel iki bakal dibahas ngapa kok mukjijaté Yésus isa nguwatké iman. Terus ya bakal dibahas piyé carané niru Yésus sing rendah hati lan gampang mesakké wektu nggawé mukjijat.

4. Nèk ngrembug mukjijaté Yésus, isa nguwatké imané awaké dhéwé karo sapa?

⁴ Nèk ngrembug mukjijaté Yésus, imané awaké dhéwé karo Yéhuwah isa luwih kuwat. Kok isa? Merga Yéhuwah sing ngekèki Yésus kuwasa kanggo nggawé mukjijat. Ing Kisah 10:38 disebutké, ”Gusti Allah wis nglantik dhèwèké nganggo roh suci lan mènèhi dhèwèké kuwasa. Merga Gusti Allah ndhukung dhèwèké, dhèwèké lunga ing kabèh dhaérah kuwi karo nindakké apa sing apik lan marèkké kabèh wong sing dikuwasani Iblis.” Pikiran lan perasaané Yésus padha karo Yéhuwah merga Yésus selalu niru Yéhuwah termasuk pas nggawé mukjijat. (Yoh. 14:9) Ana telu sing isa dipelajari saka mukjijaté Yésus.

5. Ngapa Yésus gelem nggawé mukjijat? (Matius 20:30-34)

⁵ Pertama, Yésus karo Yéhuwah sayang awaké dhéwé. Yésus nggawé mukjijat merga ora téga ndelok wong liya sengsara. Kuwi bukti nèk Yésus sayang manungsa. Misalé, ana wong wuta loro sing mbengok-mbengok njaluk tulung karo Yésus. (Wacanen Matius 20:30-34.) Yésus gelem marèkké wong loro kuwi ”merga mesakké”. Yésus gelem mènèhi mangan wong akèh lan marèkké wong lara kusta ya ”merga mesakké”. (Mat. 15:32; Mrk. 1:41) Awaké dhéwé ya dadi yakin nèk Yéhuwah ”mesakké awaké dhéwé”. Wektu awaké dhéwé susah, Yéhuwah ya ngrasa susah. (Luk. 1:78; 1 Ptr. 5:7) Yéhuwah wis ora sabar péngin nyingkirké kabèh masalahé manungsa.

6. Yéhuwah mènèhi Yésus kuwasa kanggo apa?

⁶ Keloro, Yéhuwah mènèhi Yésus kuwasa kanggo nyingkirké kabèh masalahé manungsa. Mukjijaté Yésus mbuktèkké nèk dhèwèké sanggup nyingkirké kabèh masalahé manungsa. Contoné, Yésus isa mbébaské wong-wong saka akibat dosa, yaiku penyakit lan kematian. (Mat. 9:1-6; Rm. 5:12, 18, 19) Yésus isa marèkké ”kabèh penyakit” lan nguripké kabèh wong sing wis mati. (Mat. 4:23; Yoh. 11:43, 44) Yésus ya nduwé kuwasa kanggo ngendhegké badai lan mbébaské wong-wong saka roh jahat. (Mrk. 4:37-39; Luk. 8:2) Awaké dhéwé mesthi dadi nduwé harapan merga Yéhuwah mènèhi kuwasa kanggo Yésus.

7-8. (a) Saka mukjijaté Yésus, awaké dhéwé isa yakin soal apa? (b) Njenengan ngentèni janjiné Yéhuwah sing endi?

⁷ Ketelu, awaké dhéwé yakin nèk janjiné Gusti Allah mesthi bakal kelakon. Mukjijaté Yésus kuwi bukti nèk sukmbèn pas Yésus mréntah ing bumi keadaané bakal luwih apik. Coba bayangna, kabèh wong bakal séhat lan wong sing cacad  bakal sampurna. (Yés. 33:24; 35:5, 6; Why. 21:3, 4) Kelaparan lan bencana alam ya bakal ora ana manèh. (Yés. 25:6; Mrk. 4:41) Kabèh wong sing ”ing njero kuburan” ya bakal diuripké manèh. Awaké dhéwé mesthi seneng nyambut wong-wong kuwi. (Yoh. 5:28, 29) Nèk njenengan ngentèni janjiné Gusti Allah sing endi?

⁸ Saka mukjijaté Yésus, awaké dhéwé isa ngerti Yésus kuwi wong sing rendah hati lan gampang mesakké. Awaké dhéwé mesthi péngin niru dhèwèké. Mengko bakal dibahas loro mukjijaté Yésus. Saiki ayo dibahas sik pas Yésus teka ing pésta mantènan ing Kana.   

9. Pas pésta mantènan ing Kana Yésus ngapa? (Yohanes 2:6-10)

⁹ Wacanen Yohanes 2:6-10. Coba bayangna situasiné. Pas pésta mantènan angguré entèk. Nèk njenengan dadi mantèné, njenengan mesthi isin banget. Sakjané Yésus ora kudu mbantu mantèn kuwi. Terus ya ora ana ramalan nèk Mésias bakal ngubah banyu dadi anggur. Tapi merga Yésus mesakké, khususé karo mantèné, Yésus gelem nggawé mukjijat kaya sing wis disebutké mau. Dhèwèké ngubah 390 liter banyu dadi anggur sing apik. Jumlah kuwi akèh banget nganti angguré isih isa disimpen, bahkan  nèk gelem isa diedol. Mantèn kuwi mesthi seneng banget.

10. Ana fakta menarik apa ing Yohanes bab 2? (Deloken gambar kanggo paragraf 10.)

¹⁰ Coba pikirna fakta-fakta iki. Apa Yésus dhéwé sing mondar-mandir ngisi genthong banyuné? Ora. Yésus njaluk tulung karo para pelayan. (Ayat 6, 7) Sakwisé ngubah banyu dadi anggur, apa Yésus dhéwé sing mènèhké kuwi kanggo ketua pésta? Ora. Tapi para pelayan. (Ayat 8) Terus, apa Yésus pamèr karo ngomong, ”Ayo diombé angguré. Iki aku sing nggawé”? Critané ora kaya ngono. Yésus ora nggolèk perhatian.

11. Apa sing isa dipelajari saka mukjijaté Yésus?

¹¹ Apa sing isa dipelajari saka mukjijaté Yésus ngubah banyu dadi anggur? Sakwisé nggawé mukjijat, Yésus ora pamèr. Malah dhèwèké babar blas ora tau pamèr. Yésus rendah hati. Dhèwèké bola-bali ngomong nèk isa nggawé mukjijat merga dibantu Yéhuwah. (Yoh. 5:19, 30; 8:28) Nèk niru Yésus, awaké dhéwé ora bakal pamèr. Meskipun awaké dhéwé wis akèh mbantu sedulur-sedulur lan éntuk tugas-tugas ing organisasi, dudu kuwi sing dibanggakké. Tapi, sing dibanggakké merga isa nglayani Yéhuwah. (Yér. 9:23, 24) Awaké dhéwé péngin sing dipuji kuwi mung Yéhuwah. Sakjané apa awaké dhéwé isa berhasil nèk ora dibantu Yéhuwah?​—1 Kor. 1:26-31.

12. Apa salah siji cara niru Yésus sing rendah hati? Wènèhana conto.

¹² Gatèkna salah siji cara kanggo niru Yésus sing rendah hati. Bayangna ana abdiné jemaat sing lagi pertama kali arep nyampèkké ceramah. Terus ana pinituwa sing nyisihké akèh wektu kanggo persiapan bareng karo dhèwèké. Hasilé, ceramahé abdiné jemaat kuwi apik banget. Sakwisé rampung pertemuan ibadah ana sedulur sing ngomong karo pinituwa kuwi, ”Ceramahé apik ya.” Apa pinituwa kuwi perlu njawab, ”Ya mesthi. Wong sing ngajari aku”? Utawa dhèwèké bakal njawab, ”Ya ceramahé dhèwèké mémang apik.” Nèk rendah hati, awaké dhéwé ora bakal crita-crita nèk wis mbantu sedulur-sedulur. Ngerti Yéhuwah nggatèkké upayané awaké dhéwé waé wis nggawé seneng. (Bandhingna karo Matius 6:2-4; Ibr. 13:16) Yéhuwah mesthi seneng nèk awaké dhéwé niru Yésus sing rendah hati.​—1 Ptr. 5:6.

13. Pas wis cedhak gerbang kutha Yésus ndelok apa, lan Yésus piyé? (Lukas 7:11-15)

¹³ Wacanen Lukas 7:11-15. Gatèkna peristiwa penting liyané sing kelakon taun 31 M. Yésus lunga ing kutha Nain, ora adoh saka Syunem. Kira-kira 900 taun sakdurungé, Nabi Èlisa tau nguripké manèh anaké wong wédok saka Syunem. (2 Raj. 4:32-37) Pas wis mèh tekan gerbang kutha, Yésus ndelok ana jenazah sing diusung metu arep dikubur. Suasanané wektu kuwi sedhih banget merga sing ditinggal mati kuwi randha, lan sing mati kuwi anaké siji-sijiné. Wektu kuwi sing mèlu ngancani randha kuwi akèh banget. Yésus ngendhegké wong-wong kuwi. Terus Yésus nggawé mukjijat nguripké manèh anak kuwi. Ing Injil dicathet ana telu sing diuripké manèh karo Yésus. Iki sing pertama.

14. Ana fakta menarik apa ing Lukas bab 7? (Deloken gambar kanggo paragraf 14.)

¹⁴ Gatèkna fakta-fakta iki. Yésus ”ndelok” randha kuwi, terus Yésus ”ngrasa  mesakké”. (Ayat 13) Yésus ngrasa mesakké merga nggatèkké tenanan randha kuwi. Yésus ora mung sekedar ngrasa mesakké, tapi ya mbuktèkké kuwi. Yésus ngomong, ”Bu, aja nangis manèh.” Tapi ora mung kuwi, Yésus nguripké manèh terus ”masrahké cah lanang kuwi marang ibuné”.​—Ayat 14, 15.

15. Apa sing dipelajari saka mukjijaté Yésus?

¹⁵ Apa sing isa dipelajari saka mukjijaté Yésus nguripké manèh anaké randha? Mémang awaké dhéwé ora isa nguripké manèh wong mati. Tapi, awaké dhéwé tetep isa niru Yésus nèk nggatèkké wong-wong sing berduka. Buktèkna nèk awaké dhéwé bener-bener ngrasa mesakké. Kuwi kétok saka omongan lan sikapé awaké dhéwé. d (WB. 17:17; 2 Kor. 1:3, 4; 1 Ptr. 3:8) Bahkan kata-kata utawa perbuatan sing kétoké sepélé isa nguwatké.   

16. Kaya ing gambar, apa sing isa dipelajari saka pengalamané sedulur wédok kuwi?

¹⁶ Gatèkna pengalaman iki. Ana sedulur wédok sing ndelok sedulur wédok liyané nangis pas nyanyi ing pertemuan ibadah. Laguné nyritakké soal harapan isa ketemu manèh karo wong sing wis mati. Sedulur wédok sing nangis kuwi lagi waé ditinggal mati karo anaké wédok. Merga ngerti keadaané, sedulur wédok mau marani sedulur wédok sing lagi nangis terus ngrangkul dhèwèké lan nyanyi bareng nganti laguné rampung. Sedulur wédok sing nangis mau ngomong, ”Aku tambah sayang karo sedulur-sedulurku.” Dhèwèké ya crita nèk bersyukur merga teka ing pertemuan ibadah. Dhèwèké ngomong, ”Awaké dhéwé isa dibantu nèk teka ing Balai Ibadah.” Awaké dhéwé yakin nèk Yéhuwah nggatèkké lan menghargai upayané awaké dhéwé kanggo mbuktèkké nèk bener-bener mesakké karo ”wong sing sengsara”.​—Mzm. 34:18.

17. Apa waé sing wis dipelajari ing artikel iki?

¹⁷ Isih ana akèh mukjijaté Yésus sing dicathet ing Injil. Nèk sinau kuwi, imané awaké dhéwé isa tambah kuwat. Awaké dhéwé dadi ngerti nèk Yéhuwah karo Yésus sayang manungsa, Yésus sanggup nyingkirké kabèh masalah, lan janjiné Yéhuwah mesthi bakal kelakon. Pas sinau soal kuwi, awaké dhéwé ya isa mikirké piyé carané niru Yésus. Pas pelajaran pribadi utawa ibadah keluarga, cobanen sinau soal mukjijat-mukjijaté Yésus. Terus awaké dhéwé ya isa mbagèkké pelajarané karo wong liya. Kuwi kesempatan kanggo saling nguwatké.​—Rm. 1:11, 12.   

18. Apa sing bakal dirembug ing artikel berikuté?

¹⁸ Ing Injil disebutké nèk ana wong telu sing diuripké manèh karo Yésus. Ing akhir pelayanané, Yésus nguripké manèh wong sing ketelu. Tapi sing iki béda. Sing diuripké kuwi kancané Yésus lan dhèwèké mati wis rada suwé. Apa sing isa dipelajari saka kisah kuwi? Kok isa awaké dhéwé dadi tambah yakin nèk isa ketemu manèh karo wong sing wis mati? Kuwi bakal dirembug ing artikel berikuté.