1, 2. (a) Apa sebabé awaké dhéwé nduwé rasa kuwatir? (Deloken gambar ing ndhuwur.) (b) Apa sing bakal dirembug ing wulangan iki?

SAIKI, Sétan ”klinteran kaya singa nggero-nggero ngupaya manungsa kang kena dimangsa”. (1 Pt. 5:8; Wy. 12:17) Mula akèh wong, klebu abdiné Gusti Allah, nduwé rasa kuwatir lan ngrasakké nèk urip iki abot. Abdiné Gusti Allah jaman mbiyèn uga ngrasakké kuwatir. Contoné, Alkitab kandha nèk Raja Dawud kadhang kala nduwé rasa kuwatir. (Ms. 13:2) Rasul Paulus uga ngrasakké kuwatir wektu mikirké jemaat-jemaat. (2 Kr. 11:28) Dadi, piyé carané ngatasi rasa kuwatir?

² Yéhuwah, Bapak kita sing welas asih, péngin mbantu kita ngatasi rasa kuwatir, kaya sing dialami abdiné jaman mbiyèn. Alkitab kandha, ”Sakabèhing sumelangmu pasrahna marang Panjenengané, sabab Panjenengané kang ngopèni kowé kabèh.” (1 Pt. 5:7) Ayo dirembug patang cara kanggo ngatasi rasa kuwatir. Carané yaiku  (1) ndonga, (2) maca lan mikirké tenanan Alkitab, (3) njaluk bantuan roh suciné Yéhuwah, lan (4) crita marang wong sing dipercaya. Wektu ngrembug patang cara iki, coba gatèkna apa sing kudu panjenengan upayakké.

3. Piyé carané masrahké rasa kuwatir marang Yéhuwah?

³ Cara kapisan kanggo masrahké rasa kuwatir marang Yéhuwah yaiku ndonga saka ati. Yéhuwah bakal mirengké wektu kita ndonga nyritakké rasa kuwatir. Dawud ndonga marang Yéhuwah, ”Dhuh Allah, Paduka mugi karsaa miyarsakaken pandonga kawula.” Dawud uga kandha, ”Sumelangmu pasrahna marang Pangéran Yéhuwah, temah kowé mesthi direksa!” (Ms. 55:2, 23) Sakwisé ngupaya ngrampungi masalahé, donga saka ati isa mbantu panjenengan ngatasi rasa kuwatir. Kok isa? Piyé carané?​—Ms. 94:18, 19.

4. Wektu kuwatir, apa sebabé ndonga kuwi penting?

⁴ Wacanen Filipi 4:6, 7. Piyé tanggepané Yéhuwah marang donga kita sing tulus lan tenanan? Yéhuwah isa mbantu kita tenang sarta mbuwang pikiran lan perasaan sing èlèk. Banjur, Yéhuwah uga mbantu kita nduwé pikiran lan ati sing ayem. Mula, awaké dhéwé dadi ora wedi lan kuwatir manèh. Akèh para sedulur sing wis ngrasakké rasa ayem kaya ngono. Panjenengan ya isa ngrasakké kuwi. ”Tentrem-rahayu kang saka ing Gusti Allah” isa mbantu panjenengan ngatasi tantangan apa waé. Panjenengan isa percaya tenan marang janjiné Yéhuwah, ”Sira aja melang-melang, awit Ingsun iki Allahira. Ingsun bakal nyantosakaké, malah bakal mitulungi sira.”​—Yé. 41:10.

5. Piyé Alkitab isa mbantu panjenengan nduwé pikiran lan ati sing ayem?

⁵ Cara kapindho bèn pikiran lan ati isa ayem yaiku maca lan mikirké tenanan Alkitab. Apa sebabé kuwi penting? Alkitab kuwi sabdané Gusti Allah, sing nggawé urip. Ing kono ana naséhat sing wicaksana lan isa ditrapké bèn ora kuwatir, utawa kanggo ngatasi lan ngurangi rasa kuwatir. Yéhuwah njelaské nèk maca lan mikirké tenanan pangandikané kuwi isa mbantu kita ”disantosa lan diteguh” sarta dadi ora ”giris lan semplah”.​—Ys. 1:7-9.

6. Piyé omongané Yésus migunani kanggo panjenengan?

⁶ Alkitab nyritakké carané Yésus ngomong. Wong-wong seneng ngrungokké Yésus, merga omongané nyenengké lan nentremké ati, kususé marang wong sing susah lan sengsara. (Wacanen  Matéus 11:28-30.) Yésus perduli marang perasaané wong-wong. (Mk. 6:30-32) Mbiyèn, Yésus wis nulungi para muridé sing ngancani nginjil ing bumi. Yésus uga wis janji bakal nulungi kita ing jaman saiki. Senajan saiki wis dadi Raja ing swarga, Yésus isih terus perduli karo kita. Mula, wektu kuwatir, panjenengan isa yakin nèk Yésus bakal nulungi. Yésus mènèhi pangarep-arep lan nguwatké kita bèn isa ngatasi rasa kuwatir.​—Ib. 2:17, 18; 4:16.

7. Apa gunané roh suci kanggo awaké dhéwé?

⁷ Cara katelu sing isa mbantu kita ngatasi rasa kuwatir yaiku roh suciné Yéhuwah. Nèk kita ndonga njaluk roh suci, Yésus janji Yéhuwah bakal maringi. (Lk. 11:10-13) Roh suci, utawa kekuwatané Gusti Allah sing mahakuwasa, isa mbantu kita nduwé sipat-sipat sing padha karo Gusti Allah. (Kl. 3:10) Ing Alkitab, sipat-sipat kuwi disebut ”wohing Roh”. (Wacanen Galati 5:22, 23.) Wektu ngupayakké sipat-sipat kuwi, kita isa nduwé hubungan sing apik karo liyané lan bakal ngedohi kahanan sing isa nggawé kuwatir. Ayo dirembug piyé sipat-sipat kuwi isa mbantu kita ngatasi rasa kuwatir.

8-12. Piyé wohing roh suciné Gusti Allah isa mbantu panjenengan?

⁸ ”Katresnan, kabungahan, tentrem-rahayu.” Nèk ngajèni wong liya, panjenengan isa ngurangi rasa kuwatir. Kok isa? Nèk ngajèni lan nduduhké rasa tresna sarta welas asih, panjenengan ora bakal ngalami kahanan sing nggawé nesu, susah, lan strès. Kuwi isa mbantu kita luwih gampang rukun karo wong liya.​—Rm. 12:10.

⁹ ”Sabar-sarèh, paramarta [apik atiné], kabecikan.” Alkitab kandha, ”Dipadha sumanak mungguh ing siji lan sijiné, kebak ing sih katresnan lan apura-ingapuraa.” (Éf. 4:32) Merga ora sampurna, isa waé kita nduwé masalah karo liyané. Ning, nèk ngetrapké naséhat Alkitab kuwi, kita bakal isa rukun karo liyané lan ora ngalami kahanan sing isa nggawé kuwatir.

¹⁰ ”Setya [Iman, Terjemahan Dunia Baru].” Kita saiki kerep kuwatir bab dhuwit lan kebutuhan saben dina. (WB. 18:11) Piyé carané ngatasi rasa kuwatir kuwi? Awaké dhéwé isa ngetrapké naséhaté Paulus sing kandha, ”Padha marema ing saanané.” Iman sing kuwat marang Yéhuwah bakal mbantu kita percaya nèk Yéhuwah bakal nyukupi kebutuhan kita. Yéhuwah janji, ”Ingsun ora bakal négakaké sira lan sira ora pisan-pisan bakal Suntilar.” Mula kita isa ngomong kaya Paulus, ”Gusti Allah kang mitulungi aku. Aku bakal ora wedi. Manungsa bisa manggawé apa marang aku?”​—Ib. 13:5, 6.

 ¹¹ ”Alusing bebudèn, bisa ngemudhèni dhiri.” Nèk ngetrapké sipat-sipat kuwi, kita ora bakal tumindak utawa ngomong bab sing isa nggawé kuwatir. Kita uga isa ngatasi rasa kuwatir nèk ngedohi ”rasa serik, brangasan, gampang nepsu, tukar-padu lan panyatur ala”.—Éf. 4:31.

¹² Panjenengan perlu andhap asor bèn isa percaya marang ”astané Gusti Allah kang kuwat” lan isa masrahké ’sakabèhing sumelang’ marang Yéhuwah. (1 Pt. 5:6, 7) Nèk panjenengan andhap asor, Yéhuwah bakal ndhukung lan nulungi panjenengan. Andhap asor kuwi tegesé ngakoni perkara sing isa utawa ora isa panjenengan tindakké. Dadi, panjenengan luwih ngendelké Yéhuwah timbang awaké dhéwé lan panjenengan bakal isa ngatasi rasa kuwatir.​—Mi. 6:8.

13. Apa maksudé Yésus wektu kandha, ”Aja padha sumelang”?

¹³ Ing Matéus 6:34 (wacanen), Yésus mènèhi naséhat, ”Aja padha sumelang.” Naséhat kuwi kayané ora mungkin isa ditrapké. Apa maksudé Yésus kabèh abdiné Yéhuwah ora tau kuwatir? Ora ngono. Dawud lan Paulus waé ya wis tau kuwatir. Ning, Yésus mbantu para muridé ngerti nèk rasa kuwatir sing ora perlu, utawa sing kebangeten kuwi ora ngrampungi masalah. Saben dina tantangan kuwi mesthi ana. Mula, ora perlu nguwatirké masalah sing wis liwat utawa sing durung kelakon. Piyé naséhaté Yésus isa mbantu panjenengan ngurangi rasa kuwatir?

14. Kaya Dawud, piyé panjenengan isa ngurangi rasa kuwatir?

¹⁴ Kadhang kala ana sing kuwatir merga kesalahané mbiyèn lan rumangsa gela banget karo apa sing wis ditindakké, senajan kuwi wis kelakon pirang-pirang taun kepungkur. Raja Dawud kadhang kala ya rumangsa kaya ngono merga kesalahané mbiyèn. Dhèwèké ngakoni, ”Kawula asesambat amargi manah kawula trataban.” (Ms. 38:4, 5, 9, 19) Ning, Dawud percaya marang Yéhuwah sing welas asih lan seneng ngapura. Kuwi tumindak sing wicaksana. Banjur, Dawud seneng banget merga ngerti nèk Yéhuwah  wis ngapura kesalahané.​—Wacanen Jabur 32:1-3, 5.

15. (a) Apa manèh sing isa disinau saka Dawud? (b) Apa sing isa ditindakké kanggo ngurangi rasa kuwatir? (Deloken kothak ” Cara Ngurangi Rasa Kuwatir”.)

¹⁵ Sakliyané kuwi, panjenengan isa waé kuwatir bab kahanan sing dialami saiki. Contoné, wektu Dawud nulis Jabur 55, dhèwèké wedi arep dipatèni. (Ms. 55:3-6) Ning, rasa kuwatir kuwi ora marahi Dawud kélangan rasa percaya marang Yéhuwah. Dawud ngerti nèk dhèwèké tetep kudu tumindak kanggo ngrampungi masalahé, senajan wis njaluk bantuané Yéhuwah. (2 Sa. 15:30-34) Panjenengan isa sinau saka Dawud. Ketimbang terus kuwatir, panjenengan isa tumindak sak isa-isané kanggo ngrampungi masalahé lan percaya nèk Yéhuwah bakal mbantu.

16. Apa sebabé mikirké tegesé asmané Gusti Allah kuwi isa nguwatké iman?

¹⁶ Kadhang kala ana wong Kristen sing nguwatirké bab sing durung mesthi kelakon. Ning, panjenengan ora perlu nguwatirké bab kuwi. Apa sebabé? Merga isa waé kahanané ora kaya sing dibayangké. Élinga uga nèk asmané Gusti Allah kuwi tegesé, ”Sing Nyebabké Dadi.” Mula, Yéhuwah isa ngendhalèni kahanan apa waé. (Pa. 3:14, Terjemahan Dunia Baru) Asmané Gusti Allah dadi jaminan nèk kabèh kersané bab manungsa bakal kelakon. Dadi, awaké dhéwé ora perlu kuwatir bab apa sing durung kelakon. Panjenengan isa yakin nèk Yéhuwah bakal mberkahi abdiné sing setya lan mbantu ngurangi rasa kuwatir bab perkara sing wis kelakon, sing lagi dialami, lan sing durung kelakon.

17, 18. Apa sebabé crita marang wong sing dipercaya lan teka ing pakumpulan ibadah isa mbantu ngatasi rasa kuwatir?

¹⁷ Cara kapapat kanggo ngatasi rasa kuwatir yaiku crita kabèh sing dirasakké marang wong sing dipercaya lan sing isa mbantu panjenengan nduwé pandhangan sing bener bab masalahé. Contoné isa crita karo bojo, kanca cedhak, utawa pinituwa ing jemaat. Alkitab kandha, ”Sumelanging ati ndadekaké wungkuking wong, nanging pitembungan kang  becik iku ndadèkaké senengé atiné.” (WB. 12:25) Alkitab uga kandha, ”Rancangan bakal ora kelakon, manawa tanpa tetimbangan, nanging bakal kaleksanan manawa dikanthèni juru pirembug akèh.”​—WB. 15:22.

¹⁸ Ajeg teka ing pakumpulan ibadah uga isa mbantu kita ngatasi rasa kuwatir. Ing pakumpulan ibadah, panjenengan isa srawung karo para sedulur sing perduli lan isa nguwatké siji lan sijiné. (Ib. 10:24, 25) Kuwi isa mbantu panjenengan luwih gampang ngatasi rasa kuwatir.​—Rm. 1:12.

19. Apa sebabé panjenengan isa yakin nèk hubungan karo Yéhuwah kuwi isa nguwatké panjenengan?

¹⁹ Ana pinituwa ing Kanada sing nyambut gawé dadi guru sekolah lan guru BP. Gawéan kuwi nggawé dhèwèké strès. Dhèwèké uga nduwé penyakit sing isa marahi kuwatir. Apa sing mbantu sedulur kuwi tetep kuwat? Dhèwèké ngupaya nguwatké hubungané karo Yéhuwah. Sakliyané kuwi, dhèwèké nyritakké kabèh sing dirasakké marang bojoné lan kanca cedhaké sing isa nguwatké wektu susah. Para pinituwa lan pinituwa wilayah uga mbantu dhèwèké mikirké pandhangané Yéhuwah bab kahanané. Dhokter uga mbantu dhèwèké ngerti penyakité, banjur dhèwèké ngowahi jadwal kagiyatané bèn isa lèrèn lan olahraga. Saya suwé, dhèwèké isa ngendhalèni kahanan lan perasaané. Wektu rumangsa kewalahan, dhèwèké ngendelké bantuané Yéhuwah.

20. (a) Piyé carané masrahké rasa kuwatir marang Gusti Allah? (b) Apa sing bakal dirembug ing wulangan sakbanjuré?

²⁰ Ing wulangan iki, kita wis sinau carané masrahké rasa kuwatir marang Gusti Allah. Carané yaiku liwat donga sarta maca lan mikirké tenanan Alkitab. Sakliyané kuwi, awaké dhéwé uga kudu njaluk bantuan roh suciné Yéhuwah, crita marang wong sing dipercaya, lan teka ing pakumpulan ibadah. Ing wulangan sakbanjuré, awaké dhéwé bakal ngrembug piyé Yéhuwah bakal mbantu kita liwat pangarep-arep sing dijanjèkké.​—Ib. 11:6.