Mbiyèn, Yéhuwah ngongkon manungsa ”ngebaki lan nguwasani bumi”. (PD. 1:28) Kuwi artiné Yéhuwah péngin bèn kabèh wilayah ing bumi iki dadi firdaus. Wong-wong sing bakal éntuk warisan bumi ya kudu manut karo préntah kuwi. Tapi merga taman Èden wis ora ana manèh, ana akèh gawéan sing kudu dikerjakké bèn bumi iki isa dadi firdaus. Bar Armagédon, mesthi ana akèh sing kudu diresiki lan ditata. Kabèh umaté Yéhuwah mesthi bakal sibuk banget.

Mbiyèn, wong Israèl ya sibuk banget pas bali saka Babilon. Wis 70 taun dhaérahé wong Israèl kuwi ora diurus. Tapi, Nabi Yésaya ngramalké nèk dhaérah kuwi isa dadi apik manèh kaya mbiyèn. Yéhuwah ngomong, ”Padhang belantarané bakal Tak dadèkké kaya Èden, lan padhang pasiré bakal Tak dadèkké kaya tamané Yéhuwah.” (Yés. 51:3) Merga dibantu Yéhuwah, wong Israèl isa nggawé dhaérahé dadi apik manèh. Sukmbèn mesthi ya kaya ngono. Yéhuwah  bakal mbantu umaté bèn isa nggawé bumi iki dadi firdaus. Tapi, saiki awaké dhéwé ya isa mbuktèkké nèk péngin nggawé bumi iki dadi firdaus. Piyé carané?

Njenengan isa njaga omahé njenengan tetep rapi lan resik, meskipun wong-wong ing sekitaré njenengan ora kaya ngono. Njenengan isa mèlu ngresiki Balai Ibadah lan Balai Pertemuan duwèké organisasi. Njenengan ya isa mèlu ndaftar dadi rélawan kanggo mbantu sedulur-sedulur sing kena bencana. Malah, njenengan ya isa belajar ketrampilan sing anyar sing isa berguna sukmbèn ing firdaus.

Mbiyèn bar nguripké anaké wédok Yairus, Yésus ngongkon bèn cah wédok kuwi diwènèhi mangan. (Mrk. 5:42, 43) Nèk mung mènèhi mangan cah wédok umur 12 taun mesthiné ya gampang ta? Tapi, coba bayangna nèk sing kudu diurus kuwi ”kabèh wong sing ana ing njero kuburan” sing ”bakal krungu swarané [Yésus] lan metu”. (Yoh. 5:28, 29) Mémang, ing Alkitab ora disebutké apa waé kebutuhané wong-wong sing diuripké manèh. Tapi mesthiné wong-wong kuwi butuh panganan, tempat tinggal, lan klambi ta? Saka saiki, awaké dhéwé isa mbuktèkké nèk péngin mbantu wong-wong sing bakal diuripké manèh sukmbèn. Piyé carané? Awaké dhéwé isa mikirké pertanyaan-pertanyaan iki.

Wektu ana pinituwa wilayah sing arep teka ing jemaaté njenengan, apa njenengan gelem ngundang sedulur kuwi mangan bareng? Wektu sedulur-sedulur sing nglayani ing Bètel éntuk tugas anyar utawa pinituwa wilayah ing jemaaté njenengan ora nglayani dadi pinituwa wilayah manèh, apa njenengan gelem mbantu sedulur-sedulur kuwi éntuk tempat tinggal sing cocog? Apa njenengan gelem mèlu mbantu resik-resik gedhung sing arep dienggo pertemuan gabungan wilayah utawa pertemuan wilayah lan nyambut sedulur-sedulur sing teka?

Kaya sing disebutké ing Kisah 24:15, ana akèh wong sing bakal diuripké manèh. Wong-wong kuwi akèh sing durung kenal Yéhuwah. Dadi, wong-wong kuwi bakal sinau soal Yéhuwah pas diuripké manèh. a Sapa sing mulang wong-wong kuwi? Ya umaté Yéhuwah. (Yés. 11:9) Sedulur Charlotte sing tau nglayani ing Eropa, Amerika Selatan, lan Afrika ngomong, ”Aku péngin banget isa mulang wong-wong sing diuripké manèh. Aku tau maca buku soal kisahé wong-wong ing jaman mbiyèn. Terus aku mikir, ’Coba dhèwèké kenal karo Yéhuwah, mesthi uripé ora bakal kaya ngono.’ Aku wis ora sabar ngandhani wong-wong kuwi soal Yéhuwah.”

Tapi, ora mung wong-wong kuwi sing kudu sinau soal Yéhuwah. Umaté Yéhuwah sing urip sakdurungé Yésus teka ing bumi ya kudu sinau akèh. Misalé, Danièl bakal ngerti piyé ramalan sing mbiyèn dhèwèké tulis kelakon. (Dan. 12:8) Terus, Rut lan Naomi bakal ngerti nèk akhiré anaké Rut kuwi bakal dadi nènèk moyangé Mésias. Awaké dhéwé mesthi seneng banget isa mulang wong-wong kuwi. Terus mulangé mesthi ya tambah nyenengké, merga ora ana manèh pengaruh sing èlèk saka donya iki.

Piyé carané njenengan isa siap mulang wong-wong sing bakal diuripké manèh? Saka saiki, njenengan isa ngupaya bèn luwih trampil mulang lan luwih kerep nginjil. (Mat. 24:14) Tapi, piyé nèk njenengan saiki wis tuwa utawa ora isa kerep nginjil manèh kaya mbiyèn? Nèk tetep ngupaya semangat nginjil, kuwi bukti nèk njenengan siap mulang wong-wong sing bakal diuripké manèh.

Apa njenengan bener-bener péngin éntuk warisan bumi? Apa njenengan péngin nggawé bumi iki dadi firdaus, nyedhiakké kebutuhané wong-wong sing diuripké manèh, lan mulang wong-wong kuwi? Saka saiki, njenengan kudu ngupayakké apa waé sing wis dibahas mau. Kuwi bukti nèk njenengan bener-bener siap pas sukmbèn isa urip ing donya anyar.