1. Apa manfaaté nèk mikirké soal harapan urip saklawasé?

 YÉHUWAH janji bakal mènèhi awaké dhéwé ”urip saklawasé”. (Rm. 6:23) Yéhuwah sayang banget karo awaké dhéwé. Dhèwèké ora péngin awaké dhéwé dadi tuwa terus mati. Nèk ngrenungké soal harapan urip saklawasé, awaké dhéwé mesthi dadi tambah sayang karo Yéhuwah.

2. Merga nduwé harapan urip saklawasé, awaké dhéwé dadi piyé?

² Merga nduwé harapan urip saklawasé, awaké dhéwé isa tetep setya karo Yéhuwah. Misalé nèk diancam arep dipatèni, awaké dhéwé ora bakal ninggalké Yéhuwah. Kenapa? Soalé nèk tetep setya nganti mati, awaké dhéwé bakal diuripké manèh lan isa urip saklawasé. (Yoh. 5:28, 29; 1 Kor. 15:55-58; Ibr. 2:15) Tapi, kenapa awaké dhéwé isa yakin nèk bakal isa urip saklawasé?

3. Kenapa Yéhuwah isa nggawé awaké dhéwé urip saklawasé? (Mazmur 102:12, 24, 27)

³ Yéhuwah kuwi sing mènèhi urip, lan Dhèwèké ana nganti saklawasé. (Mzm. 36:9) Kuwi sebabé Yéhuwah isa nggawé awaké dhéwé urip saklawasé. Gatèkna apa sing disebutké ing  Alkitab soal Yéhuwah. Misalé ing Mazmur 90:2 disebutké nèk Yéhuwah kuwi ”Gusti Allah sing abadi”. Ing Mazmur 102 ya disebutké nèk Yéhuwah kuwi ana nganti saklawasé. (Wacanen Mazmur 102:12, 24, 27.) Terus Nabi Habakuk tau nulis, ”Oh Yéhuwah, Njenengan wis ana kèt mbiyèn. Oh Gusti Allahku, Gusti Allahku sing Mahasuci, Njenengan ora isa mati.”​—Hab. 1:12.

4. Meskipun ora bener-bener paham apa maksudé Yéhuwah kuwi ana saklawasé, apa berarti kuwi ora bener? Jelasna.

⁴ Apa maksudé Yéhuwah kuwi ”Gusti Allah sing ana saklawasé”? (Yés. 40:28) Mungkin awaké dhéwé ora isa bener-bener paham apa artiné kata-kata kuwi. Mbiyèn Èlihu tau ngomong, ”Ora ana sing isa ngétung wis pirang taun Gusti Allah urip.” (Ayb. 36:26) Tapi, apa berarti keterangan kuwi ora bener mung merga awaké dhéwé ora isa paham? Ora. Misalé ngéné, awaké dhéwé ngerti nèk lampu isa murub merga ana listrik. Tapi mungkin awaké dhéwé ora paham cara kerjané listrik. Meskipun ngono, ora berarti nèk listrik kuwi ora ana. Padha kaya ngono, Yéhuwah kuwi mémang ana saklawasé, ora soal awaké dhéwé paham apa ora. (Rm. 11:33-36) Yéhuwah kuwi ya wis ana sakdurungé alam semesta ana. Kaya sing disebutké ing Alkitab, Yéhuwah kuwi ’Sing Nggawé bumi nganggo kuwasané lan sing nggelar langit’. (Yér. 51:15; Kis. 17:24) Kuwi sebabé Yéhuwah isa nggawé awaké dhéwé urip saklawasé. Terus, apa manèh alesan liyané?

5. Awalé, Yéhuwah nggawé manungsa piyé?

⁵ Kabèh ciptaané Yéhuwah ing bumi isa mati, ning manungsa ora ngono. Awalé, Yéhuwah nggawé manungsa isa urip saklawasé. Tapi Yéhuwah tau ngomong ngéné karo Adam, manungsa sing pertama, ”Buah saka wit pengetahuan soal sing apik lan sing jahat ora éntuk mbok pangan, merga ing dina kowé mangan buah kuwi, kowé mesthi bakal mati.” (PD. 2:17) Nèk Adam karo Hawa manut, wong loro kuwi ora bakal mati. Isa waé wong loro kuwi éntuk mangan buah saka ”wit kehidupan”, sing maksudé isa ”urip saklawasé”. b—PD. 3:22.

6-7. (a) Wènèhana bukti nèk Yéhuwah ngrancang manungsa isa urip saklawasé. (b) Njenengan arep ngapa ing donya anyar? (Deloken gambar kanggo paragraf 7.)

⁶ Akèh ilmuwan kandha nèk otaké manungsa kuwi isa nyimpen informasi akèh banget. Malah sakjané jumlahé luwih akèh timbang informasi sing isa disimpen selama 70  utawa 80 taun. Taun 2010 ana buku sing nyebutké nèk otaké manungsa isa nyimpen informasi sing akèhé padha kaya vidéo sing suwéné telung yuta jam utawa 300 taun. Tapi kenyataané isa luwih akèh timbang kuwi. Dadi, jelas nèk Yéhuwah ora mungkin ngrancang otaké manungsa mung kanggo nyimpen informasi selama 70 utawa 80 taun.​—Mzm. 90:10.

⁷ Yéhuwah ya nggawé awaké dhéwé nduwé kepénginan isa urip terus. Ing Alkitab disebutké nèk Yéhuwah ”mènèhi wektu sing ora ana akhiré ing atiné manungsa”. (Pkh. 3:11) Kuwi sebabé awaké dhéwé ora péngin mati lan malah nganggep kematian kuwi mungsuh. (1 Kor. 15:26) Nèk lagi lara, awaké dhéwé ora mungkin meneng waé. Awaké dhéwé mesthi priksa ing dokter lan ngombé obat bèn mari. Terus nèk ana keluargané awaké dhéwé sing mati, awaké dhéwé mesthi sedhih banget. (Yoh. 11:32, 33) Dadi apa kesimpulané? Yéhuwah ngrancang otaké manungsa nduwé kemampuan sing luar biasa. Yéhuwah ya mènèhi manungsa kepénginan isa urip terus. Kuwi kabèh bukti nèk kèt awal Yéhuwah péngin manungsa urip saklawasé. Tapi, apa kepénginané Yéhuwah kuwi berubah? Ora. Ayo ngrembug soal kuwi.

8. Nurut Yésaya 55:11, awaké dhéwé isa yakin soal apa?

⁸ Merga Adam lan Hawa nggawé dosa, kabèh keturunané dadi mèlu dosa lan akhiré mati. Tapi, kepénginané Yéhuwah ora berubah. (Wacanen Yésaya 55:11.) Yéhuwah isih péngin manungsa urip saklawasé. Apa buktiné?

9. Yéhuwah janji apa? (Danièl 12:2, 13)

 ⁹ Yéhuwah janji bakal nguripké manèh wong-wong sing wis mati lan mènèhi harapan urip saklawasé kanggo wong-wong kuwi. (Kis. 24:15; Tit. 1:1, 2) Mbiyèn, Ayub tau kandha nèk Yéhuwah kangen karo abdiné sing wis mati lan bakal nguripké manèh wong kuwi. (Ayb. 14:14, 15) Nabi Danièl ya ngerti nèk manungsa sing wis mati bakal diuripké manèh lan nduwé harapan urip saklawasé. (Mzm. 37:29; wacanen Danièl 12:2, 13.) Terus, wong-wong Yahudi ing jamané Yésus ya ngerti nèk umaté Yéhuwah sukmbèn isa ”urip saklawasé”. (Luk. 10:25; 18:18) Yésus dhéwé bola-bali nyebutké soal janji kuwi, lan pas mati, dhèwèké ya diuripké manèh karo Yéhuwah.​—Mat. 19:29; 22:31, 32; Luk. 18:30; Yoh. 11:25.

10. Awaké dhéwé isa ngerti apa saka kisahé wong-wong sing diuripké manèh ing jaman mbiyèn? (Deloken gambar kanggo paragraf 10.)

¹⁰ Yéhuwah kuwi sing mènèhi urip. Dhèwèké nduwé kuwasa kanggo nguripké manèh wong mati. Mbiyèn, Yéhuwah tau mbantu Nabi Èlia nguripké manèh anaké randha ing Zaréfat. (1 Raj. 17:21-23) Terus, Yéhuwah ya tau mbantu Nabi Èlisa nguripké manèh anaké wong wédok Syunem. (2 Raj. 4:18-20, 34-37) Kisah-kisah kuwi karo kisah-kisah liyané ing Alkitab dadi bukti nèk Yéhuwah isa nguripké manèh wong mati. Terus pas Yésus ing bumi, Yéhuwah ya mènèhi Yésus kuwasa kanggo nguripké manèh wong mati. (Yoh. 11:23-25, 43, 44) Saiki Yésus ana ing swarga, lan Gusti Allah wis ”mènèhké kabèh wewenang ing swarga lan ing bumi” marang Yésus. (Mat. 28:18) Mula, Yésus isa nguripké manèh ”kabèh wong sing ana ing njero kuburan”. Terus, wong-wong kuwi isa nduwé harapan urip saklawasé.​—Yoh. 5:25-29.

11. Apa gunané tebusané Yésus kanggo manungsa?

¹¹ Yésus ngomong nèk Yéhuwah ”tresna banget karo wong-wong ing donya iki”. Mulané, Yéhuwah ”gelem mènèhké Anaké siji-sijiné, supaya saben wong sing nduduhké iman marang Anaké ora mati, ning isa urip saklawasé”. (Yoh. 3:16) Gusti Allah mènèhké Anaké dadi tebusan kanggo dosané manungsa bèn manungsa isa urip saklawasé. (Mat. 20:28) Rasul Paulus ya kandha nèk Gusti Allah tetep péngin manungsa urip saklawasé. Dhèwèké ngomong, ”Kematian ana merga wong siji. Wong mati diuripké manèh ya merga wong siji. Kabèh mati merga Adam, lan kabèh bakal diuripké merga Kristus.”​—1 Kor. 15:21, 22.

12. Bèn kepénginané kelakon, Yéhuwah piyé? Jelasna.

¹² Mbiyèn, Yésus ngajari murid-muridé ndonga bèn Kerajaané Gusti Allah teka lan kepénginané Gusti Allah kelakon ing bumi. (Mat. 6:9, 10) Salah siji kepénginané Gusti Allah kuwi bèn manungsa isa urip saklawasé ing bumi. Bèn kuwi isa kelakon, Yéhuwah wis milih Yésus dadi raja ing Kerajaané. Terus, Yéhuwah ya milih wong 144.000 kanggo mréntah bareng karo Yésus ing swarga.​—Why. 5:9, 10.

13. Yéhuwah saiki lagi ngapa, lan apa hubungané karo awaké dhéwé?

¹³ Saiki, Yéhuwah lagi ngumpulké ”kumpulan gedhé wong akèh” bèn isa dadi rakyat Kerajaané Gusti Allah. (Why. 7:9, 10; Yak. 2:8) Meskipun ing donya iki akèh perang, tapi wong-wong kuwi berusaha bèn isa tetep rukun karo kabèh wong. Kuwi seolah-olah nggawé pedhangé dadi mata bajak. (Mi. 4:3) Wong-wong kuwi ya ora mèlu perang tapi malah mbantu wong liya kenal Yéhuwah bèn sukmbèn isa ”urip sing saktenané”. (1 Tim. 6:19) Wong-wong kuwi isa waé  ya dimungsuhi karo keluargané utawa ditokké saka gawéané merga terus ndhukung Kerajaané Gusti Allah. Tapi, Yéhuwah terus nyukupi kabèh kebutuhané wong-wong kuwi. (Mat. 6:25, 30-33; Luk. 18:29, 30) Kabèh kuwi bukti nèk Kerajaané Gusti Allah ana tenan, lan kepénginané Yéhuwah akhiré isa kelakon liwat Kerajaané.

14-15. Piyé carané kepénginané Yéhuwah akhiré kelakon?

¹⁴ Saiki, Yésus wis mréntah ing Kerajaané Gusti Allah. Sukmbèn, dhèwèké bakal nggawé kabèh janjiné Yéhuwah kelakon. (2 Kor. 1:20) Taun 1914, Yésus wis nyingkirké Sétan lan para pengikuté saka swarga. (Mzm. 110:1, 2) Terus, sukmbèn Yésus karo 144.000 bakal nyingkirké kabèh wong sing jahat.​—Why. 6:2.

¹⁵ Pas Pamréntahan Sèwu Tauné Yésus, wong-wong sing mati bakal diuripké. Terus, kabèh sing manut karo Yéhuwah bakal dadi sampurna. Pas akhir sèwu taun, Yéhuwah bakal mènèhi kabèh wong sing bener hadiah sing luar biasa. Wong-wong kuwi bakal ’manggon ing bumi lan bakal manggon ing kono saklawasé’. (Mzm. 37:10, 11, 29) Terus, ”mungsuh sing terakhir, yaiku kematian, bakal disingkirké”.​—1 Kor. 15:26.

16. Kuduné awaké dhéwé nglayani Yéhuwah merga apa?

 ¹⁶ Kaya sing wis dirembug mau, awaké dhéwé yakin nèk isa urip saklawasé merga harapan kuwi wis dicathet ing Alkitab. Merga nduwé harapan urip saklawasé, awaké dhéwé isa tetep setya karo Yéhuwah ora soal apa sing kelakon. Tapi, kuduné awaké dhéwé setya karo Yéhuwah ora mung merga éntuk urip saklawasé. Yéhuwah karo Yésus péngin awaké dhéwé tetep setya merga sayang karo Yéhuwah lan Yésus. (2 Kor. 5:14, 15) Awaké dhéwé kudu ngupaya niru Yéhuwah karo Yésus lan terus semangat nginjil. (Rm. 10:13-15) Hasilé, awaké dhéwé isa dadi kancané Yéhuwah kanggo saklawasé.​—Ibr. 13:16.

17. Bèn isa urip saklawasé, awaké dhéwé kudu piyé? (Matius 7:13, 14)

¹⁷ Apa njenengan bakal urip saklawasé? Yéhuwah wis mènèhi kesempatan bèn awaké dhéwé isa urip saklawasé. Awaké dhéwé isa milih tetep ana ing dalan sing sempit sing ngarah ing urip utawa malah pindhah ing dalan sing jembar. (Wacanen Matius 7:13, 14.) Tapi, urip saklawasé kuwi kaya apa? Kuwi bakal dirembug ing artikel berikuté.