1-2. (a) Nèk ana sing nggawé dosa gedhé lan ora bertobat, piyé perasaané Yéhuwah? (b) Yéhuwah pénginé meréka ngapa?

 YÉHUWAH sengit banget karo dosa. Makané, umaté ora éntuk bébas sak karepé dhéwé. (Mzm. 5:​4-6) Yéhuwah péngin umaté manut pathokané sing ana ing Alkitab. Mémang Yéhuwah ngerti umaté ora sampurna, dadi ora isa persis kaya sing Dhèwèké karepké. (Mzm. 130:​3, 4) Tapi, Yéhuwah ora seneng nèk ’sifaté sing apikan banget didadèkké alesan bèn wong-wong isa tumindak kurang ajar’. (Yud. 4) Ing Alkitab disebutké nèk ”wong-wong sing ora ngajèni Gusti Allah” bakal disingkirké ing perang Armagédon.—2 Ptr. 3:7; Why. 16:16.

² Tapi, Yéhuwah ora péngin ana wong sing disingkirké. Kaya sing wis dibahas ing majalah iki, ing Alkitab disebutké nèk Yéhuwah pénginé ”kabèh wong mertobat”. (2 Ptr. 3:9) Kaya Yéhuwah, para pinituwa mungkin wis sabar wektu mbantu wong sing nggawé dosa gedhé bèn bertobat lan akrab manèh karo Yéhuwah. Tapi, ora kabèh wong sing nggawé dosa gedhé kuwi gelem dibantu. (Yés. 6:9) Meskipun wis dibantu bola-bali karo para pinituwa, ana sing isih terus nglakoni dosané. Nèk wis kaya ngono, para pinituwa kudu piyé?

”SINGKIRNA WONG SING JAHAT KUWI”

3. (a) Nèk ana sing nggawé dosa gedhé lan ora bertobat, menurut Alkitab, wong kuwi kudu diapakké? (b) Nèk ana sing ditokké saka jemaat, ngapa kok isa disebut nèk kuwi pilihané dhèwèké dhéwé?

³ Nèk sing nggawé dosa ora gelem bertobat, para pinituwa kudu manut petunjuk ing 1 Korintus 5:​13, ”Singkirna  wong sing jahat kuwi saka antaramu”. Nah, sakjané sing milih kanggo ditokké saka jemaat kuwi ya wong kuwi dhéwé. Wong kuwi ’manèn sing wis dhèwèké sebar’. (Gal. 6:7) Kok isa? Dhèwèké wis ngerti nèk ora bertobat, bakal ditokké saka jemaat. Tapi dhèwèké tetep ora gelem berubah, meskipun wis bola-bali dibantu para pinituwa. (2 Raj. 17:​12-15) Perbuatané nduduhké nèk dhèwèké milih ora manut karo pathokané Yéhuwah.—PT. 30:​19, 20.

4. Nèk ana sing ditokké saka jemaat, ngapa kok kuwi kudu diumumké?

⁴ Wektu ana sing ditokké saka jemaat, bakal ana pengumuman sing diwacakké ing jemaat nèk wong kuwi wis dudu Seksi Yéhuwah manèh. a Tujuané pengumuman kuwi dudu kanggo ngisin-isinké wong mau, tapi bèn para sedulur liyané isa manut petunjuk ing Alkitab yaiku kudu ”mandheg bergaul” lan ’ora mangan bareng karo wong kuwi’. (1 Kor. 5:​9-11) Rasul Paulus ngandhani alesané. Dhèwèké ngomong, ”Ragi sithik isa nyebar ing kabèh adonan.” (1 Kor. 5:6) Nèk wong kuwi ora ditokké saka jemaat, mengko para sedulur liyané isa dadi mèlu-mèlu ora manut pathokané Yéhuwah.—WB. 13:20; 1 Kor. 15:33.

5. Piyé pandhangané awaké dhéwé karo wong sing ditokké saka jemaat? Lha ngapa?

⁵ Piyé pandhangané awaké dhéwé karo wong sing ditokké saka jemaat? Mémang, awaké dhéwé ora bakal bergaul karo meréka. Tapi ora éntuk nganggep nèk meréka wis ora nduwé harapan. Meréka kuwi kaya domba sing ilang. Domba sing ilang isa bali manèh ing kawanan. Élinga, nèk meréka mbiyèné wis janji arep setya karo Yéhuwah, tapi sayangé meréka ora terus nepati janjiné. Kuwi isa marakké meréka ora nduwé kesempatan manèh kanggo urip saklawasé. (Yèh. 18:31) Meskipun ngono, selama isih ana wektu lan Yéhuwah isih gelem nduduhké rasa mesakkéné, isih ana harapan kanggo meréka. Nah, piyé carané para pinituwa mbantu meréka?

CARANÉ PARA PINITUWA MBANTU

6. Kanggo mbantu bèn wong sing ditokké saka jemaat gelem bertobat, apa waé sing diupayakké para pinituwa?

⁶ Nèk ana sing ditokké saka jemaat, para pinituwa ora bakal mandheg mbantu wong kuwi bèn isa bali manèh ing jemaat. Apa buktiné? Wektu ngandhani wong kuwi nèk bakal ditokké saka jemaat, panitia ya bakal ngandhani piyé carané bèn wong kuwi isa bali manèh ing jemaat. Tapi ora mung kuwi. Biasané para pinituwa bakal ngandhani nèk beberapa bulan manèh, meréka péngin nemoni wong kuwi kanggo ndelok apa dhèwèké wis berubah. Nèk sakwisé beberapa bulan wong kuwi gelem ditemoni manèh, meréka bakal mbantu bèn wong kuwi tergerak kanggo bertobat lan akhiré bali ing jemaat. Nèk pas kesempatan kuwi isih durung gelem bertobat, para pinituwa bakal ngatur wektu kanggo ketemu manèh lan mbantu bèn wong kuwi gelem bertobat.

7. Nèk niru Yéhuwah, piyé para pinituwa nduduhké rasa mesakké karo wong sing ditokké saka jemaat? (Yérémia 3:12)

⁷ Wektu urusan karo wong sing ditokké saka jemaat, para pinituwa bakal niru Yéhuwah sing gampang mesakké. Misalé, wektu Yéhuwah urusan karo bangsa Israèl  mbiyèn. Yéhuwah ora ngentèni bangsa Israèl bertobat sik lagi dibantu. Bahkan sakdurungé meréka berubah, Yéhuwah wis ngutus para nabiné. Kaya sing disebutké ing artikel keloro majalah iki, Yéhuwah ngongkon Nabi Hoséa ngampuni lan nggawa bali Gomèr manèh. Wektu kuwi, Gomèr isih berbuat dosa. Kuwi nduduhké nèk Yéhuwah bener-bener nduwé rasa mesakké. (Hos. 3:1; Mal. 3:7) Nèk niru Yéhuwah, saka atiné para pinituwa kudu bener-bener nduwé kepénginan bèn wong sing dosa kuwi bertobat lan bali manèh ing Yéhuwah. Terus, ya ora bakal mempersulit wong sing bener-bener péngin bertobat.—Wacanen Yérémia 3:12.

8. Saka perumpamaané Yésus soal anak sing ilang, piyé perasaané Yéhuwah karo wong-wong sing wis ninggalké Dhèwèké? (Lukas 15:7)

⁸ Élinga perumpamaané Yésus soal anak sing ilang. Saka kadohan, wektu ndelok anaké bali, bapaké langsung ”mlayu, ngrangkul, terus ngambung dhèwèké”. (Luk. 15:20) Bapaké ora ngentèni anaké njaluk ngapura. Tapi merga sayang banget, dhèwèké langsung mlayu marani. Ya kaya ngono kuwi perasaané Yéhuwah karo wong sing wis ninggalké Dhèwèké. Para pinituwa kudu berupaya niru perasaané Yéhuwah kuwi. Meréka péngin wong-wong sing wis ninggalké Yéhuwah, isa bali manèh. (Luk. 15:​22-24, 32) Nèk ana wong dosa sing bertobat, Yéhuwah, Yésus, para malaékat, lan kabèh sedulur ing jemaat bakal seneng banget.—Wacanen Lukas 15:7.

9. Yéhuwah péngin bèn wong-wong sing dosa kuwi padha piyé?

⁹ Saka sing wis dibahas, mémang Yéhuwah ora bakal ngejarké wong sing ora bertobat tetep ana ing jemaat. Tapi Yéhuwah bakal terus berupaya nulungi meréka bèn bali. Perasaané Yéhuwah karo wong-wong sing berupaya bali disebutké ing Hoséa 14:4: ”Aku bakal nambani wong-wong kuwi, lan wong-wong kuwi bakal setya manèh. Aku bakal nresnani wong-wong kuwi saka ati-Ku merga Aku wis ora nesu manèh.” Kuwi sebabé, wektu sing nggawé dosa mulai nduduhké tandha-tandha nèk péngin bertobat, para pinituwa bakal langsung nggatèkké lan siap mbantu. Kata-kata kuwi ya ngyakinké wong-wong kuwi nèk Yéhuwah isih sayang karo meréka lan akhiré meréka dadi péngin ndang bali.

10-11. Piyé carané para pinituwa mbantu wong sing wis suwé banget ditokké saka jemaat?

¹⁰ Lha terus, piyé karo wong-wong sing wis suwé banget ditokké saka jemaat? Mungkin, meréka wis ora nglakoni dosané manèh. Utawa, bahkan wis ora éling apa kesalahané. Ora soal wis sepira suwéné meréka ditokké saka jemaat, para pinituwa bakal nggolèki lan ngunjungi meréka. Wektu ngunjungi, para pinituwa bakal ngejak meréka ndonga lan ngundang meréka bèn gelem bali manèh ing jemaat. Wong-wong sing wis suwé adoh saka Yéhuwah, mesthi butuh bantuan bèn isa cedhak manèh karo Yéhuwah lan kudu diélingké manèh soal ajaran ing Alkitab. Makané, nèk wong kuwi gelem bali manèh ing jemaat, para pinituwa bakal ngatur bèn ana sing mbantu dhèwèké sinau Alkitab, bahkan sakdurungé dhèwèké ditampa manèh ing jemaat. Élinga, nèk sing nduwé tanggung jawab kanggo nggawé pengaturan soal mandhu sinau Alkitab kuwi mung para pinituwa.

¹¹ Merga niru Yéhuwah sing gampang mesakké, para pinituwa bakal nggolèki kabèh sing wis ninggalké Yéhuwah lan ngundang meréka bèn péngin bali ing Yéhuwah. Nèk wong kuwi wis nduduhké pertobatané  lan ora mbalèni manèh dosané, dhèwèké isa ndang ditampa manèh ing jemaat.—2 Kor. 2:​6-8.

12. (a) Para pinituwa khususé kudu bener-bener ngati-ati soal apa? (b) Ngapa kok ora éntuk nganggep nèk wong sing melakukan dosa tertentu ora pantes dimesakké Yéhuwah? (Deloken cathetan ngisor.)

¹² Ing beberapa situasi, para pinituwa khususé kudu bener-bener ngati-ati sakdurungé mutuské nèk wong sing nggawé dosa isa ditampa manèh ing jemaat. Terutama karo wong-wong sing tau melakukan pelècèhan utawa penganiayaan anak, dadi murtad, utawa nggawé siasat bèn isa megat bojoné, para pinituwa kudu mastèkké tenan nèk meréka wis bener-bener bertobat. (Mal. 2:14; 2 Tim. 3:6) Para  pinituwa kudu mastèkké bèn para sedulur ora kena pengaruh sing èlèk. Tapi élinga, ora soal apa kesalahané, nèk wong kuwi wis bener-bener bertobat lan ora mbalèni manèh kesalahané, Yéhuwah gelem nampa manèh wong kuwi. Dadi, meskipun para pinituwa kudu bener-bener ngati-ati karo wong sing tau berbuat licik kaya ngono, meréka ora éntuk nganggep nèk wong sing wis melakukan dosa tertentu, ora pantes dimesakké Yéhuwah. b—1 Ptr. 2:10.

PARA SEDULUR KUDU PIYÉ?

13. Apa bédané carané memperlakukan wong sing ditegur karo sing ditokké saka jemaat?

¹³ Wektu ana pengumuman nèk ana sedulur sing ditegur, awaké dhéwé isih isa bergaul karo dhèwèké merga dhèwèké wis bertobat lan ora mbalèni manèh kesalahané. (1 Tim. 5:20) Dhèwèké isih dadi bagéan saka jemaat lan butuh dikuwatké para sedulur. (Ibr. 10:​24, 25) Tapi, nèk wong kuwi wis ditokké saka jemaat, awaké dhéwé kudu manut naséhat ing 1 Korintus 5:11 yaiku kudu ”mandheg bergaul” karo dhèwèké lan ’ora mangan bareng karo wong sing kaya ngono kuwi’.

14. Wektu urusan karo wong sing ditokké saka jemaat, wong Kristen isa mutuské apa berdasarkan hati nuraniné? (Deloken gambar.)

¹⁴ Apa petunjuk ing 1 Korintus 5:11 berarti awaké dhéwé ora éntuk ngundang wong kuwi teka ing pertemuan ibadah utawa ora éntuk nyapa wektu dhèwèké teka ing pertemuan ibadah? Ora ngono. Sing jelas, awaké dhéwé ora bakal bergaul karo dhèwèké. Tapi, berdasarkan hati nuraniné dhéwé-dhéwé, saben wong Kristen isa mutuské arep ngundang wong sing ditokké kuwi apa ora kanggo teka ing pertemuan ibadah. Mungkin merga kuwi keluarga utawa kanca cedhak. Lha terus, nèk dhèwèké teka, kudu piyé? Nèk ing petunjuk sing mbiyèn, awaké dhéwé ora bakal nyapa utawa nyalami wong kuwi. Tapi saiki, saben  wong Kristen kudu mutuské berdasarkan hati nuraniné dhéwé-dhéwé, apa meréka arep nyapa utawa nyalami wong kuwi apa ora. Sing jelas, awaké dhéwé ora bakal ngobrol suwé utawa bergaul karo wong kuwi.

15. Sing dimaksud ing 2 Yohanes 9-11 kuwi wong sing melakukan dosa apa? (Deloken kothak ” Apa sing Dibahas Yohanes lan Paulus Kuwi Maksudé Perbuatan Dosa sing Padha?”)

¹⁵ Tapi mungkin ana sing mikir, ’Lha kan ing Alkitab disebutké nèk ora éntuk ngucapké salam karo wong dosa, ta? Nèk ngucapké salam, kuwi berarti ”ndhukung tumindaké sing jahat”.’ (Wacanen 2 Yohanes 9-11.) Tapi berdasarkan kontèksé, sing dimaksud ing 2 Yohanes 9-11 kuwi wong sing murtad utawa ngojok-ojoki wong liya bèn nglanggar pathokan ing Alkitab. (Why. 2:20) Para pinituwa ora bakal ngunjungi wong sing kaya ngono kuwi. Mémang, awaké dhéwé isih berharap meréka bakal berubah. Tapi sakdurungé kuwi, awaké dhéwé ora bakal nyapa utawa ngundang meréka teka ing pertemuan ibadah.

NIRU YÉHUWAH SING SENENG NGAMPUNI LAN GAMPANG MESAKKÉ

16-17. (a) Apa sing dipénginké Yéhuwah saka wong-wong sing wis nggawé dosa? (Yèhèzkièl 18:32) (b) Piyé para pinituwa isa mbuktèkké nèk gelem kerja sama karo Yéhuwah?

¹⁶ Apa sing wis dipelajari ing limang artikel pelajaran ing majalah iki? Yéhuwah ora péngin ana wong sing disingkirké. (Wacanen Yèhèzkièl 18:32.) Yéhuwah péngin bèn wong sing dosa isa akrab manèh karo Dhèwèké. (2 Kor. 5:20) Makané kèt mbiyèn, Yéhuwah ping bola-bali ngundang umaté sing dosa bèn bertobat lan bali manèh. Nèk berupaya mbantu wong-wong sing nggawé dosa gedhé bèn bertobat, para pinituwa mbuktèkké nèk gelem kerja sama karo Yéhuwah.—Rm. 2:4; 1 Kor. 3:9.

¹⁷ Bayangna piyé bahagiané Yéhuwah, Yésus, lan para malaékat saben ana sing gelem bertobat lan bali manèh ing jemaat. Nèk ngrenungké sifaté Yéhuwah sing gampang mesakké, seneng ngampuni, lan apikan banget, awaké dhéwé mesthi bakal tambah sayang karo Dhèwèké.—Luk. 1:78.