Wis luwih saka setaun, sedulur-sedulur ing Bètel nggarap proyèk pembangunan stasiun radio WBBR ing Staten Island, New York City. Pertama-tama meréka ngresiki lahané, terus mbangun omah sing gedhé kanggo para pekerja lan siji bangunan manèh kanggo nyimpen peralatan. Pas kuwi wis rampung, para sedulur mulai nyiapké perlengkapan sing dibutuhké kanggo siaran radio. Tapi, bar kuwi ana beberapa kesulitan.

Masang anténa utama kanggo stasiun radio kuwi ternyata ora gampang. Anténané dhuwuré 91 mèter, dadi kudu disangga rong cagak kayu sing masing-masing dhuwuré 61 mèter. Pas pertama kali nyoba masang, ternyata gagal. Tapi merga bantuané Yéhuwah, akhiré berhasil. Sedulur Calvin Prosser, sing mèlu proyèk kuwi ngomong, ”Nèk sekali masang langsung berhasil, kami isa dadi sombong.” Para sedulur ngakoni nèk meréka isa berhasil kuwi merga Yéhuwah. Tapi, bar kuwi ana kesulitan liyané manèh.

Wektu kuwi, siaran radio durung umum. Dadi, kanggo tuku peralatané ya angèl. Makané, para sedulur nggunakké pemancar radio 500 watt rakitané wong. Meréka ya ora tuku mikrofon, tapi nggunakké mikrofon télpon. Wektu kuwi, bulan Februari pas bengi-bengi, sedulur-sedulur péngin nyoba alat kuwi. Tapi sing disiarké apa? Para sedulur kuwi nyanyi lagu Kerajaan. Sedulur Ernest Lowe nyritakké kejadian sing lucu pas bengi kuwi. Dadi, wektu para sedulur lagi nyanyi, meréka ditélpon karo Hakim Rutherford. b Ternyata,  Hakim Rutherford ngrungokké nyanyiané meréka saka radioné. Dhèwèké lagi ana ing Brooklyn, sing jaraké kira-kira 25 kilomèter saka stasiun radio kuwi.

Sedulur Rutherford ngomong, ”Wis, stop siarané! Swarané kaya grombolan kucing.” Para sedulur kuwi isin banget, terus ngendhegké siarané. Tapi paling ora, saiki meréka wis ngerti nèk radioné isa dienggo siaran.

Tanggal 24 Februari 1924, stasiun WBBR mulai siarané sing pertama. Sedulur Rutherford ngomong nèk stasiun radio kuwi bakal digunakké ”kanggo ngrampungké gawéan saka Kristus”. Rutherford ya ngomong nèk stasiun radio iki tujuané ”bèn kabèh wong, ora soal apa kepercayaané, isa ngerti isiné Alkitab lan ngerti nèk jaman saiki kuwi penting”.

Siaran pertamané kuwi lancar lan ana akèh sing ngrungokké. Selama 33 taun, WBBR dadi stasiun radio organisasiné Yéhuwah.

Sasi Juli 1924, Siswa-Siswa Alkitab ngadakké pertemuan rohani ing Columbus, Ohio. Siswa-Siswa Alkitab saka akèh negara padha teka. Ing kana ceramahé disampèkké nganggo basa Arab, Hongaria, Inggris, Italia, Jerman, Lituania, Polandia, Prancis, Rusia, Ukraina, Yunani, lan basa-basa sing digunakké ing Skandinavia. Beberapa bagéan saka acara kuwi disiarké liwat radio WBBR. Terus, sedulur-sedulur ya ngatur bèn koran Ohio State Journal saben dina nggawé artikel soal acara pertemuan kuwi.

Dina Kemis 24 Juli, ana luwih saka 5.000 sedulur sing nginjil ing kutha kuwi. Meréka berhasil ngedumké kira-kira 30.000 buku, lan mulai éwonan pelajaran Alkitab. Ing The Watch Tower disebutké nèk kuwi ”bagéan sing paling nyenengké saka pertemuan kuwi”.

Ana sing menarik manèh saka pertemuan rohani kuwi. Dina Jumat, 25 Juli, Sedulur Rutherford macakké dokumèn sing isiné ngelokké para pemimpin gréja. Dhèwèké ya ngomong nèk para pemimpin politik, agama, lan pebisnis ”marakké wong-wong ora isa ngerti sing bener soal Kerajaané Gusti Allah, padahal kuwi saranané Gusti Allah kanggo mberkahi manungsa”. Ing dokumèn kuwi ya disebutké nèk meréka salah merga ”ndhukung Liga Bangsa-Bangsa lan ngomong nèk Gusti Allah mréntah bumi liwat organisasi kuwi”. Siswa-Siswa Alkitab kudu kendel banget nyampèkké berita kuwi kanggo wong-wong.

 Bar kuwi, ana artikel ing The Watch Tower sing nyebutké nèk pertemuan ing Columbus kuwi marakké para sedulur dadi tambah kuwat imané lan tambah kendel kanggo nginjil meskipun ana akèh tantangan. Leo Claus, sing ya teka ing pertemuan kuwi ngomong, ”Bar pertemuan, kami dadi semangat banget péngin nyritakké berita kuwi ing dhaérah kami.”

Dokumèn sing diwacakké Sedulur Rutherford mau digawé dadi selebaran sing judhulé Ecclesiastics Indicted (Dakwaan kanggo Para Pemimpin Gréja). Sasi Oktober, Siswa-Siswa Alkitab mulai ngedumké jutaan selebaran kuwi. Ing kutha cilik Cleveland, Oklahoma, Frank Johnson lagi mbagèkké selebaran kuwi. Dhèwèké wis rampung 20 menit sakdurungé dhèwèké dijemput karo sedulur liyané. Wong-wong ing kono padha nesu karo Frank lan mulai ngincer dhèwèké. Makané, ora aman nèk dhèwèké ngentèni ing njaba. Akhiré, Frank ndhelik ing gréja cedhak kono. Ternyata gréjané kosong. Dadi, dhèwèké ndèlèhké selebaran ing Alkitabé pendhéta gréja kuwi lan ing saben kursi. Bar kuwi, dhèwèké cepet-cepet lunga saka gréja kuwi. Merga isih ana wektu, dhèwèké lunga ing loro gréja liyané lan ndèlèhké selebaran kaya mau.

Frank langsung cepet-cepet balik ing panggonan dhèwèké arep dijemput. Dhèwèké ndhelik ing pom bènsin, karo ngati-ati bèn ora nganti konangan. Dhèwèké ndelok nèk wong-wong sing ngoyak kuwi liwat tapi ora ndelok Frank. Sedulur-sedulur sing ya lagi nginjil ing cedhak kono teka lan njemput Frank, terus meréka lunga saka kono.

Salah siji sedulur kuwi crita, ”Pas lunga ninggalké kutha kuwi, kami ngliwati telu gréja mau. Ing saben gréja kuwi, ana kira-kira wong 50 sing lagi ngadeg ing ngarep. Ana sing lagi maca selebaran kuwi. Terus ya ana sing lagi nduduhké selebaran kuwi karo pendhétané. Untung kami wis lunga. Kami bersyukur banget Yéhuwah wis nglindhungi lan mbantu bèn kami ora kecekel.”

Siswa-Siswa Alkitab ing negara-negara liya ya kendel nginjil. Ing Prancis bagéan utara, Józef Krett nginjil karo para penambang sing asalé saka Polandia. Dhèwèké wis ditugaské kanggo nyampèkké ceramah sing judhulé ”Sedhéla Manèh Wong Mati Bakal Diuripké”. Wektu undangané wis diedumké kanggo penduduk kutha kuwi, ana pendhéta sing nglarang jemaaté teka. Tapi, akhiré malah ana luwih saka 5.000 wong sing teka kanggo ngrungokké ceramahé Sedulur Krett, termasuk pendhéta kuwi. Sedulur Krett ngundang pendhéta kuwi kanggo mbéla kepercayaané, tapi dhèwèké ora gelem. Bar rampung ceramah, Sedulur Krett ngedumké kabèh publikasi sing dhèwèké gawa merga wong-wong kuwi kétok banget nèk péngin ngerti isiné Alkitab.—Am. 8:11.

Ing Afrika, Claude Brown nginjil ing Tanjung Emas (saiki disebut Ghana). Akèh wong ing kono isa ngerti ajaran sing bener merga ceramah-ceramahé Sedulur Brown lan publikasi sing dhèwèké bagèkké. Ana mahasiswa farmasi sing jenengé John Blankson sing ngrungokké salah siji ceramahé Sedulur Brown. Dhèwèké langsung ngerti nèk kuwi ajaran sing bener. John crita, ”Aku seneng banget isa ngerti sing bener. Akèh wong ing kampusku langsung tak critani soal kuwi.”

John wis ngerti nèk ajaran soal Tritunggal kuwi ora bener. Dadi, suatu hari dhèwèké lunga ing gréja Anglikan, terus takon karo pendhéta ing  kono soal Tritunggal. Pendhéta kuwi malah nesu, terus ngomong, ”Kowé kuwi dudu wong Kristen. Kowé kuwi pengikuté Iblis. Metua saka kéné!”

Pas wis tekan omah, John nulis surat ngejak pendhéta kuwi diskusi soal Tritunggal ing ngarepé wong akèh. Bar maca suraté John, pendhéta kuwi ngongkon John lunga ing kantoré dosèn ing kampusé. Dosèn kuwi nakoni John apa mémang dhèwèké nulis surat kuwi.

John njawab, ”Iya, Pak”.

Dosèn kuwi ngongkon John nulis surat permintaan maaf kanggo pendhéta kuwi.

John nulis, ”Pak, aku dikongkon dosènku nulis surat permintaan maaf kanggo njenengan. Aku gelem nulis, nèk njenengan gelem ngakoni nèk sing njenengan ajarké kuwi salah.”

Dosèn kuwi kagèt, terus ngomong, ”John, mosok kowé arep nulis kaya ngéné?”

John njawab, ”Iya, Pak.”

Dosèn kuwi ngomong, ”Kowé ngerti ora, pendhéta kuwi gréjané didhukung pamréntah. Nèk kowé nglawan dhèwèké, kowé mengko isa ditokké saka kampus.”

”Tapi Pak, . . . wektu njenengan mulang, terus ana sing kami durung paham, kan kami éntuk takon ta Pak?”

”Ya, éntuk.”

”Nah, wingi kuwi ya ngono. Pendhéta kuwi ngajarké Alkitab, terus aku takon. Nèk dhèwèké ora isa njawab, mosok aku kudu nulis surat permintaan maaf?”

John ora ditokké saka kampusé, terus ya ora perlu nulis surat permintaan maaf.

Soal kegiatan selama taun 1924, ing The Watch Tower disebutké, ”Awaké dhéwé mesthi ya ngrasakké kaya sing diomongké Daud, ’Njenengan bakal mènèhi aku kekuwatan kanggo perang’. (Mzm. 18:39) Selama taun iki, awaké dhéwé ngrasa dikuwatké banget merga wis ndelok bantuané Gusti Allah . . . Umaté sing setya . . . seneng martakké kabar apik.”

Merga nginjil nganggo radio terbukti berhasil, ing akhir taun kuwi, para sedulur nggawé rencana kanggo nggawé stasiun radio liyané ing cedhak Chicago. Stasiun radio sing anyar iki disebut WORD. Jeneng kuwi cocog soalé ”word” artiné ”omongan”, lan stasiun radio iki digunakké kanggo martakké omongané Gusti Allah. Merga nggunakké pemancar radio 5.000 watt, stasiun radio iki isa nyiarké kabar apik soal Kerajaané Gusti Allah nganti tekan panggonan-panggonan sing luwih adoh, bahkan nganti tekan Kanada.

Taun 1925, Siswa-Siswa Alkitab éntuk pemahaman anyar saka Yéhuwah soal Wahyu bab 12. Ternyata kuwi marakké beberapa sedulur dadi ora trima, terus ora gelem nglayani Yéhuwah manèh. Tapi, ana akèh sedulur sing seneng merga dadi luwih paham soal peristiwa-peristiwa sing kelakon ing swarga lan pengaruhé kuwi kanggo umaté Yéhuwah ing bumi.