1-2. (a) Umaté Yéhuwah isa waé ragu soal apa waé? (b) Apa sing bakal dibahas ing artikel iki?

 ORA soal tuwa utawa enom, umaté Yéhuwah kadhang isa ngrasa ragu-ragu. a Misalé, cah enom sing ragu-ragu arep dibaptis merga ora yakin nèk Yéhuwah sayang tenan karo dhèwèké. Utawa, sedulur lanang sing wektu enomé luwih milih ngutamakké Yéhuwah timbang gawéan sing gajiné gedhé, saiki bar wis nduwé keluarga lan dhuwité pas-pasan, mulai mikir apa mémang keputusané pas isih enom kuwi wis tepat. Utawa, sedulur wédok lansia sing kekuwatané wis ora kaya mbiyèn, mungkin cilik ati merga sing dilakukan saiki ora isa seakèh mbiyèn. Apa njenengan ya tau mikir, ’Yéhuwah kuwi bener-bener nggatèkké aku apa ora ya? Apa pengorbanan sing wis tak gawé kanggo Yéhuwah mbiyèn kuwi bener? Apa aku isih berguna kanggo Yéhuwah?’

² Nèk perasaan kaya ngono ora ndang diatasi, mengko suwé-suwé dadi ora beriman lan ora nglayani Yéhuwah manèh. Ing artikel iki bakal dibahas pathokan-pathokan ing Alkitab sing isa marakké yakin nèk (1) Yéhuwah bener-bener nggatèkké, (2) keputusan sing wis digawé mbiyèn kuwi wis bener, lan (3) awaké dhéwé isih berguna kanggo Yéhuwah.

 CARANÉ NGATASI

3. Apa salah siji cara kanggo ngatasi perasaan ragu-ragu?

³ Nèk mulai ngrasa ragu-ragu, salah siji cara sing isa dilakukan kuwi nggolèki keterangan ing Alkitab. Nèk kuwi dilakukan, awaké dhéwé bakal luwih akrab lan percaya karo Yéhuwah, lan isa ”nduwé iman sing kuwat”.—1 Kor. 16:13.

4. Piyé carané ”mastèkké” kabèh perkara? (1 Tésalonika 5:21)

⁴ Wacanen 1 Tésalonika 5:21. Menurut Alkitab, awaké dhéwé dikon ”mastèkké” kabèh perkara. Carané piyé? Nèk ora yakin karo sesuatu, kudu nggolèki nèk menurut Alkitab kuwi piyé. Misalé, nèk cah enom mau ora yakin Yéhuwah bener-bener nggatèkké dhèwèké, ya aja meneng waé. Dhèwèké kudu ”mastèkké” sik saka Alkitab apa mémang Yéhuwah ora perduli karo dhèwèké.

5. Pas lagi meragukan sesuatu, cara mastèkkéné piyé?

⁵ Wektu maca Alkitab, kuwi sakjané seolah-olah lagi ngrungokké omongané Yéhuwah. Tapi, nèk pas lagi meragukan sesuatu, sing dibutuhké kuwi ora mung sekedar maca thok, tapi ya ngerti pandhangané Yéhuwah soal kuwi. Mulané, kudu riset nggunakké sarana riset saka organisasi. (WB. 2:​3-6) Terus ya isa ndonga njaluk Yéhuwah nuntun lan mbantu bèn isa ngerti pandhangané Yéhuwah soal kuwi. Bar kuwi, golèka pathokan ing Alkitab lan saran-saran sing sesuai karo situasiné awaké dhéwé. Awaké dhéwé ya isa éntuk manfaat nèk maca kisahé tokoh-tokoh ing Alkitab sing ya tau ngrasakké kaya awaké dhéwé.

6. Pas lagi meragukan sesuatu, apa manfaaté nèk teka ing pertemuan ibadah?

⁶ Awaké dhéwé ya isa ngrungokké omongané Yéhuwah ing pertemuan ibadah. Mulané nèk rajin teka, isa waé saka ceramah utawa jawabané para sedulur, awaké dhéwé isa éntuk sesuatu sing marakké dadi ora ragu-ragu manèh. (WB. 27:17) Saiki, ayo mbahas hal-hal sing isa marakké ragu-ragu lan carané ngatasi.

WEKTU ORA YAKIN NÈK YÉHUWAH BENER-BENER NGGATÈKKÉ

7. Apa sing mungkin dipikirké wong-wong?

⁷ Perasaan ora berharga kuwi isa marakké dadi mikir nèk ora mungkin isa sahabatan karo Yéhuwah, sing nyiptakké alam semesta. Raja Daud ya tau ngrasa kaya ngono. Merga saking takjubé karo perhatiané Yéhuwah kanggo manungsa, Daud ngomong, ”Oh Yéhuwah, manungsa kuwi apa kok nganti mbok gatèkké? Manungsa kuwi apa kok nganti Njenengan perduli karo dhèwèké?” (Mzm. 144:3) Apa njenengan ya tau mikir kaya ngono? Ayo nggatèkké keterangan-keterangan iki.

8. Menurut 1 Samuèl 16:​6, 7, 10-12, apa sing didelok Yéhuwah saka wong-wong?

⁸ Saka Alkitab, isa disimpulké nèk Yéhuwah nggatèkké wong-wong sing disepèlèkké wong liya. Contoné, wektu Yéhuwah ngongkon Samuèl ing omahé Isai kanggo nglantik salah siji anaké dadi calon rajané Israèl. Isai nduwé anak lanang wolu, tapi sing diceluk kanggo nemoni Samuèl mung pitu. Daud sing paling enom ora diceluk. b Tapi, ternyata malah Daud sing dipilih Yéhuwah. (Wacanen 1 Samuèl 16:​6, 7, 10-12.) Yéhuwah ndelok piyé atiné  Daud. Yéhuwah ngerti tenan nèk Daud sayang banget karo Yéhuwah.

9. Apa sing marakké njenengan yakin nèk Yéhuwah bener-bener nggatèkké njenengan? (Deloken gambar.)

⁹ Coba pikirna bukti nèk Yéhuwah mémang nggatèkké. Yéhuwah mesthi ngekèki naséhat sing cocog karo sing njenengan butuhké. (Mzm. 32:8) Kuwi bukti nèk Dhèwèké kenal tenan karo njenengan. (Mzm. 139:1) Wektu ngetrapké naséhaté lan ngrasakké manfaaté, njenengan bakal dadi tambah yakin nèk Yéhuwah bener-bener nggatèkké. (1 Bb. 28:9; Kis. 17:​26, 27) Yéhuwah ya nggatèkké upayané njenengan kanggo terus setya nglayani. Yéhuwah ndelok sifat apiké njenengan lan péngin dadi kancané njenengan. (Yér. 17:10) Dhèwèké mesthi seneng banget nèk njenengan gelem dadi kancané.—1 Yoh. 4:19.

WEKTU ORA YAKIN NÈK KEPUTUSAN SING WIS DIGAWÉ KUWI TEPAT

10. Nèk lagi mikirké soal keputusan sing tau digawé, isa waé dadi kepikiran apa?

¹⁰ Kadhang-kadhang, ana sing mulai kepikiran karo keputusan-keputusan sing tau digawé lan mulai ora yakin apa meréka wis nggawé keputusan sing tepat. Mungkin, mbiyèn ana sing ninggalké gawéan sing gajiné gedhé bèn isa nglayani Yéhuwah luwih akèh. Nah saiki, bar ndelok kancané sing terus kerja wis suksès, akhiré dadi mikir, ’Pengorbanan sing wis tak gawé kanggo Yéhuwah mbiyèn kuwi bener apa ora ya? Nèk mbiyèn aku ora nggawé pilihan kuwi, sakjané aku isa éntuk apa?’

11. Apa sing marakké pikirané sing nulis Mazmur 73 dadi ora tenang?

¹¹ Wektu ndelok wong-wong sing ora nglayani Yéhuwah padha sugih, uripé pénak,  ora nduwé masalah, sing nulis Mazmur 73 dadi ngrasa nèk upayané kanggo nglayani Yéhuwah kuwi ora ana gunané. Merga kepikiran kuwi terus, akhiré sedina muput pikirané dadi ora tenang. (Mzm. 73:​3-5, 12-14) Lha terus, piyé dhèwèké ngatasi perasaan kuwi?

12. Menurut Mazmur 73:​16-18, apa sing marakké pikirané sing nulis mazmur dadi tenang?

¹² Wacanen Mazmur 73:​16-18. Sing nulis mazmur mlebu ing panggonan suciné Yéhuwah. Ing antarané wong-wong sing nyembah Yéhuwah, dhèwèké dadi isa mikir sing bener. Dhèwèké ngerti nèk meskipun wong-wong sing ora nglayani Yéhuwah kétoké uripé pénak, meréka ora nduwé masa depan. Dhèwèké dadi tenang lan yakin nèk nglayani Yéhuwah kuwi mémang pilihan sing paling apik. Hasilé, dhèwèké bertékad kanggo terus nglayani Yéhuwah.—Mzm. 73:​23-28.

13. Bèn ora menyesali keputusan sing wis digawé kanggo nglayani Yéhuwah, njenengan kudu piyé? (Deloken gambar.)

¹³ Njenengan ya isa kaya sing nulis mazmur mau. Bèn ora menyesali keputusan sing wis digawé kanggo nglayani Yéhuwah, coba éling-élingen berkah apa waé sing wis ditampa nganti saiki. Bandhingna karo sing dialami wong-wong sing ora nglayani Yéhuwah. Meréka ngutamakké gawéan lan urip sing nyaman saiki merga mikiré ora ana harapan ing masa depan. Tapi, nèk awaké dhéwé piyé? Yéhuwah wis janji ora mung bakal ngekèki berkah saiki, tapi ya ing masa depan. (Mzm. 145:16) Terus, pikirna, nèk misalé isa ngubah keputusan sing digawé mbiyèn, apa wis mesthi saiki bakal bahagia?  Durung mesthi. Tapi sing jelas, keputusan sing digawé merga sayang Yéhuwah lan wong liya, mesthi bakal marakké bahagia.

WEKTU ORA YAKIN NÈK ISIH BERGUNA KANGGO YÉHUWAH

14. Apa sing dirasakké beberapa umaté Yéhuwah, lan kuwi marakké meréka dadi mikir apa?

¹⁴ Merga wis lansia, lara-laranen, utawa cacad, ana umaté Yéhuwah sing ngrasa nèk sing dilakukan saiki ora isa seakèh mbiyèn. Kuwi marakké meréka ngrasa ora berharga. Meréka mungkin mikir, ’Apa aku isih berguna kanggo Yéhuwah?’

15. Sing nulis Mazmur 71 yakin soal apa?

¹⁵ Sing nulis Mazmur 71 ya tau ngrasa cilik ati. Dhèwèké ndonga, ”Aja ninggalké aku pas aku ora nduwé kekuwatan manèh.” (Mzm. 71:​9, 18) Meskipun ngrasa kaya ngono, dhèwèké yakin nèk tetep nglayani Yéhuwah, Yéhuwah bakal nguwatké dhèwèké. Dhèwèké ya dadi ngerti nèk Yéhuwah seneng karo wong sing ngupayakké sing paling apik meskipun nduwé keterbatasan.—Mzm. 37:​23-25.

16. Sedulur-sedulur lansia isih isa melakukan apa waé kanggo Yéhuwah? (Mazmur 92:​12-15)

¹⁶ Sedulur-sedulur lansia, pikirna piyé pandhangané Yéhuwah soal njenengan. Yéhuwah isa mbantu njenengan bèn terus nglayani Dhèwèké meskipun nduwé keterbatasan. (Wacanen Mazmur 92:​12-15.) Timbang mikirké sing ora isa dilakukan, fokus waé karo apa sing isa dilakukan saiki. Misalé, nèk njenengan terus setya lan nggatèkké para sedulur, kuwi isa nguwatké meréka. Njenengan ya isa nyritakké piyé Yéhuwah mbantu njenengan selama iki lan janji ing Alkitab sing njenengan entèn-entèni. Terus ya aja lali nèk dongané njenengan sing tulus kuwi mesthi bermanfaat kanggo sedulur  liya. (1 Ptr. 3:12) Ora soal piyé keadaané, mesthi ana sesuatu sing isa awaké dhéwé lakukan kanggo Yéhuwah lan wong liya.

17. Ngapa kok aja seneng mbandhing-mbandhingké karo wong liya?

¹⁷ Nèk cilik ati merga ora isa nglayani Yéhuwah seakèh mbiyèn, élinga nèk Yéhuwah menghargai apa waé sing isa njenengan upayakké kanggo Dhèwèké. Terus, aja seneng mbandhing-mbandhingké, soalé Yéhuwah ya ora seneng mbandhing-mbandhingké umaté. (Gal. 6:4) Maria ngekèki Yésus minyak wangi sing regané larang banget. (Yoh. 12:​3-5) Tapi, randha mlarat mung isa nyumbang dhuwit rècèh loro ing bait. (Luk. 21:​1-4) Meskipun ngono, kanggoné Yésus, loro-loroné wis mbuktèkké iman. Sifaté Yésus persis kaya Yéhuwah. Dadi, meskipun njenengan ngrasa nèk sing isa dikèkké kanggo Yéhuwah kuwi mung sithik, nèk kuwi dikèkké merga beriman lan sayang Yéhuwah, njenengan isa yakin nèk Yéhuwah menghargai kuwi.

18. Bèn ora ragu-ragu manèh, kudu piyé? (Deloken kothak ” Ayat-Ayat ing Alkitab sing Isa Diéling-éling”.)

¹⁸ Mémang, kadhang awaké dhéwé isa waé ngrasa ragu-ragu. Tapi kaya sing wis dipelajari, kuwi isa diatasi nèk ngetrapké saran ing Alkitab. Dadi, nèk ana sing marahi ragu-ragu, ngupayaa bèn ora ragu-ragu manèh. Yakina nèk Yéhuwah nggatèkké njenengan masing-masing. Dhèwèké menghargai pengorbanané njenengan lan péngin mberkahi. Yéhuwah sayang lan perduli karo saben umaté sing setya.