1. Piyé perasaané Yéhuwah pas ndeloki umaté?

 SAKA swarga, Yéhuwah nggatèkké umaté. Dhèwèké ngerti wektu umaté lagi sedhih utawa seneng. (Mzm. 37:18) Wektu ndelok umaté berjuang bèn tetep setya meskipun lagi sedhih, kecéwa, utawa lara ati, Yéhuwah seneng. Tapi ora mung seneng, Dhèwèké ya péngin menghibur, nguwatké, lan nyemangati umaté.

2. Wong-wong sing atiné wis luka diapakké Yéhuwah, lan piyé bèn isa éntuk manfaat saka kepeduliané Yéhuwah?

² Ana gambaran sing apik soal carané Yéhuwah nggatèkké wong sing atiné wis luka. Ing Mazmur 147:3 disebutké nèk ”luka-lukané wong kuwi diperban”. Nah, piyé bèn isa éntuk manfaat saka kepeduliané Yéhuwah? Gambarané ngéné: Dokter sing berpengalaman ngerti akèh cara kanggo nambani wong sing terluka. Tapi bèn isa mari, wong sing terluka kuwi kudu manut omongané dokter. Nah ing Alkitab, Yéhuwah tau ngomong apa karo wong-wong sing atiné wis luka? Terus, piyé carané ngetrapké naséhaté? Kuwi sing bakal dibahas ing artikel iki.

YÉHUWAH NGYAKINKÉ NÈK AWAKÉ DHÉWÉ KUWI BERHARGA

3. Ngapa kok ana sing ngrasa nèk ora berharga?

³ Saiki, akèh wong ora sayang karo liyané. Meréka seneng ngrèmèhké lan marakké wong liya ngrasa ora berharga. Sedulur wédok sing jenengé Helen a ngomong, ”Kèt cilik, aku ora tau ngrasa disayang. Bapakku kejem lan mèh saben dina ngunèk-unèkké aku, marakké aku ngrasa ora berharga.” Isa waé kaya Helen, njenengan ya tau dijahati, disalah-salahké, utawa dianggep ora berguna. Nèk ngalami  kuwi, isa waé njenengan dadi ngrasa nèk ora ana wong sing bener-bener sayang karo njenengan.

4. Menurut Mazmur 34:​18, apa janjiné Yéhuwah kanggo wong-wong sing ”atiné susah”?

⁴ Meskipun njenengan disia-sia wong liya, Yéhuwah sayang lan nganggep njenengan berharga. Dhèwèké ”cedhak karo wong sing atiné susah”. (Wacanen Mazmur 34:18.) Nèk njenengan ”putus asa”, élinga nèk Yéhuwah ndelok apiké njenengan lan péngin cedhak karo njenengan. (Yoh. 6:44) Dhèwèké selalu siap nulungi merga sayang banget karo njenengan.

5. Saka carané Yésus memperlakukan wong-wong sing dirèmèhké wong liya, awaké dhéwé isa ngerti apa?

⁵ Nèk ndelok contoné Yésus, awaké dhéwé isa ngerti nèk Yéhuwah nganggep berharga lan ndeloki apiké awaké dhéwé. Selama ing bumi, Yésus nggatèkké lan apikan karo wong-wong sing dirèmèhké wong liya. (Mat. 9:​9-12) Wektu ana wong wédok sing lara parah ndemèk klambiné Yésus merga péngin mari, Yésus ora nyenèni, tapi malah muji dhèwèké merga nduwé iman. (Mrk. 5:​25-34) Sifat-sifaté Yésus persis kaya Yéhuwah. (Yoh. 14:9) Dadi, njenengan isa yakin nèk iman lan rasa sayangé njenengan mesthi digatèkké Yéhuwah.

6. Apa sing isa dilakukan nèk ngrasa ora berharga?

⁶ Apa sing isa dilakukan nèk njenengan ngrasa ora berharga? Wacanen lan renungna ayat-ayat ing Alkitab bèn isa yakin nèk njenengan berharga kanggo Yéhuwah. b (Mzm. 94:19) Aja mbandhing-mbandhingké karo wong liya, terus ya aja  fokus karo sing ora isa dilakukan. Yéhuwah ora tau nuntut sing ora isa njenengan lakukan. (Mzm. 103:​13, 14) Nèk njenengan tau ngalami pelècèhan sèksual, dikasari, utawa dilarani ati, élinga nèk kuwi dudu salahé njenengan. Terus, sing bakal dihukum Yéhuwah kuwi pelakuné, dudu korbané. (1 Ptr. 3:12) Sandra, sing pas cilik kerep disia-sia, crita, ”Aku selalu ndonga bèn Yéhuwah mbantu aku isa ndelok sifat-sifat apikku, sing Dhèwèké delok saka aku.”

7. Kesulitan sing tau diadhepi kuwi isa bermanfaat. Kok isa?

⁷ Awaké dhéwé isa dadi saranané Yéhuwah mbantu wong liya. Awaké dhéwé nduwé kesempatan istiméwa dadi kanca nyambut gawéné Yéhuwah ing kegiatan nginjil. (1 Kor. 3:9) Merga wis tau ngalami kesulitan, awaké dhéwé isa dadi luwih gampang memahami perasaan lan mbantu wong sing lagi susah. Helen, sing dicritakké mau, wis nampa bantuan lan dadi isa mbantu liyané. Helen crita, ”Mbiyèn aku ngrasa ora berharga, tapi Yéhuwah nggawé aku ngrasa disayangi lan berguna, merga isa mbantu wong liya.” Helen saiki nglayani dadi perintis biasa.

YÉHUWAH PÉNGIN AWAKÉ DHÉWÉ YAKIN NÈK WIS BENER-BENER DIAMPUNI

8. Ana jaminan apa saka Yéhuwah ing Yésaya 1:18?

⁸ Ana umaté Yéhuwah sing isih terus-terusan ngrasa bersalah merga kesalahané mbiyèn, embuh sing dilakukan sakdurungé utawa sakwisé dibaptis. Tapi élinga, Yéhuwah wis ngekèki tebusan merga sayang banget karo awaké dhéwé. Yéhuwah péngin awaké dhéwé beriman karo tebusan kuwi. Yéhuwah ya ngomong, nèk awaké dhéwé wis ’ngrampungké masalah’ c karo Dhèwèké, awaké dhéwé bakal bener-bener diampuni. (Wacanen Yésaya 1:18.) Rasané bersyukur banget merga sing diéling-éling Yéhuwah kuwi dudu kesalahané awaké dhéwé mbiyèn, tapi upayané awaké dhéwé.—Mzm. 103:​9, 12; Ibr. 6:10.

9. Ngapa kok ora perlu terus-terusan mikirké kesalahan masa lalu?

⁹ Timbang terus-terusan menyesali apa sing wis dilakukan mbiyèn, luwih apik mikirké sing isa dilakukan saiki lan sukmbèn. Gatèkna contoné Rasul Paulus. Dhèwèké gela banget merga mbiyèn wis nganiaya wong Kristen. Tapi, dhèwèké ngerti nèk saiki wis diampuni Yéhuwah. (1 Tim. 1:​12-15) Apa bar kuwi dhèwèké terus-terusan mikirké dosané mbiyèn? Ora. Paulus wegah mikirké soal kuwi, termasuk soal hal-hal sing wis berhasil dhèwèké lakukan pas isih dadi wong Farisi. (Flp. 3:​4-8, 13-15) Tapi, Paulus terus ngupayakké sing paling apik ing pelayanané, lan terus fokus karo masa depan. Nah, awaké dhéwé ya kaya ngono. Sing wis berlalu, ora isa diubah. Tapi kaya Paulus, ora soal piyé keadaané saiki, awaké dhéwé isa ngluhurké Yéhuwah lan terus fokus karo janjiné ing masa depan.

10. Nèk kesalahané njenengan mbiyèn marakké wong liya terluka, njenengan kudu piyé?

¹⁰ Mungkin njenengan isih ngrasa bersalah merga kesalahané njenengan mbiyèn marakké wong liya terluka. Nèk wis kaya ngono, upayakna kanggo memperbaiki kesalahan kuwi, termasuk kudu tulus  njaluk ngapura. (2 Kor. 7:11) Ndongaa bèn Yéhuwah nulungi wong sing wis njenengan larani kuwi. Yéhuwah isa mbantu njenengan lan wong kuwi ngrasakké kedamaian manèh lan terus setya nglayani Dhèwèké.

11. Apa sing isa dipelajari saka contoné Nabi Yunus? (Deloken gambar.)

¹¹ Gatèkna contoné Nabi Yunus. Yéhuwah ngongkon dhèwèké lunga ngétan ing Niniwé, tapi dhèwèké malah lunga ngulon ing Tarsyis. Bar dihukum Yéhuwah, Yunus belajar saka kesalahané. (Yun. 1:​1-4, 15-17; 2:​7-10) Yéhuwah isih nganggep Yunus nabiné lan ngekèki dhèwèké kesempatan manèh kanggo lunga ing Niniwé. Saiki, Yunus manut. Yunus gelem nampa tugas saka Yéhuwah meskipun wektu kuwi mungkin isih ngrasa bersalah. (Yun. 3:​1-3) Dadi, nèk awaké dhéwé melakukan kesalahan, ya kudu belajar saka kesalahan kuwi. Terus bar kuwi, gelem manut nèk dikèki tugas apa waé karo Yéhuwah.

YÉHUWAH NGGAWÉ AWAKÉ DHÉWÉ AYEM LIWAT ROH SUCI

12. Bèn awaké dhéwé isa tetep ayem wektu ngalami peristiwa sing marakké trauma, Yéhuwah ngekèki kedamaiané piyé? (Filipi 4:​6, 7)

¹² Wektu ngalami peristiwa sing marakké trauma, Yéhuwah isa nggawé awaké dhéwé ayem liwat roh suciné. Gatèkna pengalamané Roni karo Karla. Anaké lanang bunuh diri. Meréka crita, ”Kami wis tau ngadhepi akèh masalah, tapi iki sing paling abot. Pirang-pirang dina kami ora isa turu. Dadi, kami ndonga. Bar kuwi, kami ngrasakké rasa ayem kaya sing disebutké ing Filipi 4:​6, 7.” (Wacanen.) Nèk lagi ngadhepi masalah sing marakké perasaan dadi kacau, critakna kabèh karo Yéhuwah sing njenengan rasakké. Bahkan nèk ndongané suwé lan ping bola-bali, Yéhuwah gelem ngrungokké. (Mzm. 86:3; 88:1) Njenengan ya isa bola-bali njaluk roh suciné Yéhuwah merga mesthi bakal dikèki.—Luk. 11:​9-13.

13. Menurut Éfésus 3:​16, bèn awaké dhéwé isa terus setya nglayani Yéhuwah, roh suci mbantuné piyé?

¹³ Wektu ngrasa ora nduwé kekuwatan merga masalah sing abot banget, roh suci isa marakké njenengan nduwé kekuwatan manèh kanggo terus setya nglayani Yéhuwah. (Wacanen Éfésus 3:16.) Gatèkna pengalamané Sedulur Flora. Flora karo bojoné kuwi utusan injil. Tapi bojoné selingkuh, terus meréka cerai. Flora crita, ”Aku terus-terusan mikirké nèk aku wis dikhianati lan kuwi marakké aku sedhih banget. Aku ndonga njaluk roh suci bèn ora putus asa. Awalé tak pikir lara atiku iki ora bakal isa mari. Tapi, ternyata Yéhuwah nulungi lan nambani lara atiku.” Flora dadi tambah percaya karo Yéhuwah lan yakin nèk Yéhuwah bakal mbantu dhèwèké ngadhepi masalah apa waé. Flora ngomong manèh, ”Kata-kata ing Mazmur 119:32 ngélingké aku soal carané Yéhuwah nulungi aku. Ing kono disebutké, ’Aku péngin banget manut karo préntah-Mu merga Njenengan nggawé atiku yakin.’”

14. Bèn isa éntuk luwih akèh roh suci, kudu piyé?

¹⁴ Bar ndonga njaluk roh suci, kudu piyé? Kudu melakukan hal-hal sing marakké isa éntuk luwih akèh roh suci. Contoné, teka ing pertemuan ibadah lan nginjil. Terus ya maca Alkitab saben dina bèn isa terus mikirké pikirané Yéhuwah. (Flp. 4:​8, 9) Wektu maca, gatèkna contoné tokoh-tokoh ing Alkitab sing ngadhepi masalah, lan renungna piyé Yéhuwah  mbantu meréka. Sandra, sing disebutké mau, tau ngadhepi masalah sing abot lan bertubi-tubi. Dhèwèké ngomong, ”Aku tersentuh banget karo kisahé Yusuf. Meskipun dijahati lan disia-sia, Yusuf bertékad tetep setya karo Yéhuwah.”—PD. 39:​21-23.

YÉHUWAH NGGAWÉ AWAKÉ DHÉWÉ AYEM LIWAT SEDULUR SEIMAN

15. Awaké dhéwé isa éntuk penghiburan saka sapa, lan meréka menghiburé piyé? (Deloken gambar.)

¹⁵ Sedulur seiman ya isa ”menghibur” wektu awaké dhéwé lagi susah. (Kol. 4:11) Liwat para sedulur, awaké dhéwé isa ngrasakké nèk bener-bener disayangi Yéhuwah. Meréka menghiburé piyé? Meréka gelem ngancani, ngrungokké, ngekèki ayat ing Alkitab, utawa ndonga bareng. d (Rm. 15:4) Kadhang, meréka ya ngélingké bèn awaké dhéwé mikirké manèh sing bener menurut Yéhuwah. Kuwi isa marakké perasaané awaké dhéwé dadi luwih tenang. Meréka ya kadhang ngekèki bantuan praktis, misalé ngekèki panganan.

16. Bèn isa ngrasakké dhukungané para sedulur, kadhang awaké dhéwé kudu piyé?

¹⁶ Para sedulur mesthi sayang lan péngin mbantu, tapi mungkin meréka ora ngerti perasaané awaké dhéwé utawa  sing awaké dhéwé butuhké. (WB. 14:10; 17:17) Dadi nèk péngin ngrasakké dhukungané meréka, kadhang mémang kudu ngomong nèk butuh bantuan. Nèk lagi sedhih, kecéwa, utawa lara ati, critakna sing njenengan rasakké karo sedulur sing kuwat imané. Kandhanana apa sing njenengan butuhké. Njenengan mungkin ya isa crita karo siji utawa loro pinituwa sing njenengan percaya. Ana sedulur-sedulur wédok sing luwih nyaman crita karo sedulur wédok liyané sing luwih berpengalaman.

17. Apa waé sing isa marakké awaké dhéwé ora ngrasakké dhukungané para sedulur, terus piyé carané ngatasi?

¹⁷ Merga sedhih, kecéwa, utawa lara ati, kadhang dadi ora péngin ketemu sapa-sapa. Terus, kadhang para sedulur ya ora isa memahami perasaané awaké dhéwé, utawa malah salah ngomong. (Yak. 3:2) Kuwi kabèh isa marakké awaké dhéwé dadi péngin menyendiri. Nèk ana kepénginan kuwi, aja dituruti. Soalé mengko dadi ora isa ngrasakké dhukungané para sedulur. Sedulur Gavin, pinituwa sing ngalami déprèsi ngomong, ”Kerep-kerepé aku ora péngin ketemu utawa omong-omongan karo para sedulur.” Tapi, Gavin berjuang kanggo ngatasi perasaan kuwi. Bar bergaul, biasané dhèwèké dadi ngrasa luwih bahagia. Sedulur Emi crita, ”Merga sing tak alami mbiyèn, aku ora gampang percaya karo wong liya. Tapi, aku berupaya niru Yéhuwah sing sayang lan percaya karo para sedulur. Aku ngerti nèk kuwi ora mung nggawé Yéhuwah bahagia, tapi ya isa marakké aku bahagia.”

JANJINÉ YÉHUWAH ING MASA DEPAN ISA NGGAWÉ AWAKÉ DHÉWÉ AYEM

18. Apa sing bakal awaké dhéwé alami ing masa depan, lan apa sing isa diupayakké saiki?

¹⁸ Ing masa depan, Yéhuwah bakal nyingkirké kabèh luka utawa trauma. (Why. 21:​3, 4) Malah sukmbèn, kabèh kuwi ”ora bakal ana manèh ing ati”. (Yés. 65:17) Bahkan saiki waé, Yéhuwah ya wis ’nambani luka-lukané’ awaké dhéwé. Kabèh bantuan sing wis disedhiakké Yéhuwah kudu dimanfaatké. Aja lali nèk Yéhuwah ”perduli” karo awaké dhéwé.—1 Ptr. 5:7.