ING kehidupan sehari-hariné wong Israèl kuwi mesthi ana musik. Ing Alkitab kerep disebutké soal wong-wong sing main musik lan nyanyi. Malah, sepuluh persèn bagéan ing Alkitab kuwi isiné lagu. Contoné Mazmur, Kidung Agung, lan Kidung Pangadhuh. Kuwi sebabé, ing buku Music in Biblical Life disimpulké, ”Saka Alkitab, awaké dhéwé isa éntuk gambaran nèk bangsa Israèl nggunakké musik ing kegiatané saben dina, bahkan ing kegiatan sing ora ana hubungané karo musik.”

Ing kegiatan saben dina. Kanggo ngungkapké perasaané, biasané wong Israèl main alat musik lan nyanyi. (Yés. 30:29) Wektu ana pelantikan raja, menang perang, lan perayaan pas ngibadah, biasané ana wong-wong wédok sing main rebana, nyanyi, lan nari merga bahagia. (PH. 11:34; 1 Sam. 18:​6, 7; 1 Raj. 1:​39, 40) Wong Israèl ya nyanyi lagu-lagu sedhih pas ana sing mati. (2 Bb. 35:25) Menurut Cyclopedia karyané McClintock lan Strong, ”Jelas banget nèk bangsa Israèl seneng karo musik.”

Ing istanané raja. Raja-raja Israèl ya seneng menikmati musik. Raja Saul ngundang Daud ing istanané bèn main harpa kanggo dhèwèké. (1 Sam. 16:​18, 23) Terus wektu dadi raja, Daud nggawé alat musik, nggawé lagu-lagu sing indah, lan ngorganisasi orkèstra bèn main musik ing baité Yéhuwah. (2 Bb. 7:6; Am. 6:5) Raja Salomo ya nduwé penyanyi lanang lan wédok ing istanané.—Pkh. 2:8.

Wektu ngibadah. Sing terutama, musik digunakké kanggo nyembah Yéhuwah. Malah, ing bait ing Yérusalèm, ana 4.000 wong lanang sing main alat musik. (1 Bb. 23:5) Meréka main simbal, alat musik sing nganggo senar, harpa, lan trompèt. (2 Bb. 5:12) Tapi, ora mung wong-wong sing wis terlatih thok sing nggunakké musik wektu ngibadah. Pas perjalanan ing Yérusalèm kanggo ngrayakké perayaan taunan, biasané wong Israèl ya padha nyanyi. Lagu-laguné disebut ”laguné wong sing munggah menyang kutha”. (Mzm. 120-134) Terus, menurut tulisan-tulisan Yahudi, selama perjamuan Paskah, wong Israèl ya nyanyi Mazmur Halèl. a

Nganti saiki, musik ya isih penting kanggo umaté Yéhuwah. (Yak. 5:13) Awaké dhéwé nyanyi kanggo muji Yéhuwah. (Éf. 5:19) Wektu nyanyi bareng, awaké dhéwé ya dadi ngrasa tambah bersatu karo para sedulur. (Kol. 3:16) Wektu susah, ya isa dikuwatké nèk main musik, nyanyi, utawa ngrungokké lagu-lagu soal Yéhuwah. (Kis. 16:25) Liwat musik, awaké dhéwé isa mbuktèkké nèk beriman lan sayang karo Yéhuwah.