Saka artikel kuwi, awaké dhéwé isa ngerti nèk mung ana siji masalah penting sing mempengaruhi malaékat lan manungsa, yaiku soal jenengé Yéhuwah sing kudu disucèkké. Haké Yéhuwah kanggo mréntah lan apa ana manungsa sing bakal tetep setya karo Yéhuwah ana hubungané karo masalah sing penting mau.

Kenapa awaké dhéwé isa nyimpulké nèk jenengé Yéhuwah sing kudu disucèkké kuwi masalah sing paling penting? Ayo dibahas telu alesané.

Pertama, Sétan ngèlèk-èlèk jenengé Yéhuwah ing Taman Èden. Pas omong-omongan karo Hawa, Sétan ngomong nèk Yéhuwah jahat lan ora adil. Sétan mitnah Yéhuwah lan nudhuh nèk Yéhuwah ngapusi. Sétan ngrusak reputasiné Yéhuwah. Makané Sétan dadi ”Iblis” sing artiné ”tukang mitnah”. (Yoh. 8:44) Merga percaya omongané Sétan, Hawa ora manut lan ora ngakoni haké Yéhuwah kanggo mréntah. (PD. 3:1-6) Nganti saiki, Sétan isih ngèlèk-èlèk jenengé Yéhuwah. Wong-wong sing terpengaruh omongané Sétan bakal luwih angèl manut karo Yéhuwah. Kanggoné umaté Yéhuwah, jenengé Yéhuwah dièlèk-èlèk kuwi bener-bener ora adil. Merga jenengé Yéhuwah dièlèk-èlèk, saiki ana akèh kejahatan lan penderitaan.

Keloro, Yéhuwah péngin nggawé jenengé suci manèh bèn kabèh ciptaané éntuk manfaat. Kuwi penting banget kanggo Yéhuwah. Yéhuwah ngomong, ”Aku mesthi bakal nggawé jeneng-Ku sing luhur dadi suci.” (Yèh. 36:23) Saka conto dongané, Yésus ngandhani apa sing paling penting kanggo didongakké murid-muridé. Yésus ngomong, ”Muga-muga jeneng-Mu disucèkké.” (Mat. 6:9) Ing Alkitab bola-bali disebutké nèk ngluhurké jenengé Yéhuwah kuwi penting banget. Misalé, ”Luhurna Yéhuwah merga jenengé.” (1 Bb. 16:29; Mzm. 96:8) ”Kowé kudu nyanyi lagu pujian kanggo jenengé sing mulya.” (Mzm. 66:2) ”Aku bakal ngluhurké jeneng-Mu saklawasé.” (Mzm. 86:12) Pas ing bait Yérusalèm Yésus ngomong, ”Bapak, muga-muga jeneng-Mu diluhurké.” Yéhuwah saka swarga njawab, ”Kuwi wis Tak luhurké lan bakal Tak luhurké manèh.”​—Yoh. 12:28. a

Ketelu, jenengé Yéhuwah ana hubungané karo tujuané sing bakal kelakon sukmbèn. Sakwisé Pamréntahan Sèwu Tauné Yésus rampung, ana ujian akhir. Bar kuwi piyé pandhangané malaékat lan manungsa karo jenengé Yéhuwah? Bèn ngerti jawabané, coba diéling-éling manèh masalah  sing ana hubungané karo jenengé Yéhuwah, haké Yéhuwah kanggo mréntah lan apa manungsa isa tetep setya. Apa manungsa sing wis terbukti setya isih kudu mbuktèkké manèh kesetiaané? Ora. Wong-wong kuwi wis sampurna lan wis terbukti bener-bener setya. Wong-wong kuwi bakal nampa urip saklawasé. Wektu kuwi apa isih ana sing ragu soal haké Yéhuwah kanggo mréntah? Ora. Soalé kabèh sing ing swarga lan ing bumi wis bersatu. Kabèh ngakoni nèk mung Yéhuwah sing berhak mréntah lan carané mréntah sing paling apik. Wektu kuwi apa jenengé Yéhuwah tetep penting kanggo ciptaané?

Jenengé Yéhuwah wis bener-bener suci lan bébas saka tudhuhan palsu. Tapi jenengé Yéhuwah tetep sing paling penting kanggo kabèh ciptaané. Kabèh ciptaané bakal terus ndelok kabèh perbuatané Yéhuwah sing luar biasa. Sakwisé Yésus masrahké kekuasaané, Yéhuwah bakal ”dadi Penguasané kabèh wong”. (1 Kor. 15:28) Kabèh manungsa ya bakal ”nduwé kebébasan kaya anak-anaké Gusti Allah”. (Rm. 8:21) Yéhuwah bakal nggawé kabèh ciptaané sing ana ing bumi lan swarga bersatu, dadi sak keluarga.—Éf. 1:10.

Wektu kuwi kelakon, kabèh sing ana ing swarga lan bumi mesthi seneng lan péngin muji Yéhuwah. Daud tau ngomong, ”Muga-muga Yéhuwah . . . dipuji. . . . Muga-muga jenengé sing luhur dipuji nganti saklawasé.” (Mzm. 72:18, 19) Awaké dhéwé bakal selalu nduwé alesan kanggo muji Yéhuwah nganti saklawasé.

Saka jenengé, awaké dhéwé isa ngerti akèh soal Yéhuwah. Sing paling utama kuwi soal katresnané. (1 Yoh. 4:8) Awaké dhéwé isa éling nèk kabèh perbuatané kuwi dhasaré katresnan. Misalé wektu nggawé manungsa, mènèhi korban tebusan, lan wektu mréntah umaté. Awaké dhéwé bakal terus ngrasakké katresnané Yéhuwah nganti saklawasé. Awaké dhéwé dadi péngin saya cedhak karo Yéhuwah lan muji jenengé nganti saklawasé.​—Mzm. 73:28.