• ”Rasané kaya diselingkuhi bojoku bola-bali.”

• ”Apa aku kurang ayu? Aku ngrasa direndhahké, ora berguna.”

• ”Rasané lara banget. Kabèh tak pendhem dhéwé.”

• ”Kayané Yéhuwah ora perduli karo aku.”

Kata-kata ing ndhuwur nduduhké nèk istri bener-bener sengsara nèk bojoné nonton pornografi. Apa manèh nèk kuwi ndhelik-ndhelik utawa wis suwé nganti bertaun-taun. Dhèwèké mesthi dadi ora percaya manèh karo bojoné. Ana sing ngomong, ”Aku mikir, ’Jebulé bojoku kaya ngono. Apa manèh sing didhelikké?’”

Artikel iki wis disiapké kanggo istri sing bojoné ora isa mandheg nonton pornografi. a Mengko bakal ana pathokané Alkitab sing menghibur bèn isa yakin nèk Yéhuwah sayang lan péngin mbantu. Kuwi isa dadi sumberé rasa ayem lan bantuan bèn isa tetep cedhak karo Yéhuwah. b

Mémang bojoné njenengan mèh ngapa waé, ora kabèh isa dikendhalèni. Tapi tetep ana sing isa diupayakké bèn njenengan luwih ayem. Gatèkna saran-saran iki.

Ora perlu ngrasa bersalah. Ana istri sing mikir, ’Apa bojoku nonton pornografi gara-gara salahku ya?’ Alice c ngrasa nèk dhèwèké ora isa nyenengké bojoné. Dhèwèké mikir, ’Kok bojoku luwih seneng ndelok wong wédok liya timbang aku?ʼ Terus, ya ana istri sing dadi ngrasa bersalah sakwisé nesu-nesu karo bojoné. Danielle crita, ”Merga aku nesu-nesu terus karo suamiku, suasanané dadi ora karuan. Aku ngrasa bersalah.”

Nèk njenengan ngrasa kaya ngono, aja lali Yéhuwah ora bakal nyalahké njenengan merga tingkah lakuné bojoné njenengan. Ing Yakobus 1:14 disebutké, ”Saben wong diuji wektu dhèwèké ditarik lan digodha  karo kepénginané dhéwé.” (Rm. 14:12; Flp. 2:12) Malah sakjané Yéhuwah menghargai upayané njenengan kanggo terus setya karo Dhèwèké.​—2 Bb. 16:9.

Nèk suami nonton pornografi, kuwi dudu tandha nèk istri kurang memuaskan. Para ahli ngomong nèk nonton pornografi, wong dadi nduwé nafsu sing ora isa dipuaské.

Ora perlu terlalu kuwatir. Catherine ngomong nèk dhèwèké kepikiran terus bojoné nonton pornografi. Frances crita, ”Nèk ora ngerti bojoku ing endi, aku dadi kuwatir. Saben dina perasaanku ora karuan.” Sing liyané ngrasa isin banget wektu ketemu karo sedulur-sedulur ing jemaat sing ngerti masalahé. Sing liyané manèh ngrasa nèk ora nduwé sapa-sapa merga mikir nèk ora ana sing isa memahami keadaané.

Ngrasa kaya ngono kuwi wajar. Tapi nèk terus-terusan kuwatir, njenengan isa terlalu curiga lan wedi, padahal sing dikuwatirké durung tentu kelakon. Luwih apik pikirna hubungané njenengan karo Yéhuwah. Saya cedhak karo Yéhuwah, njenengan isa saya kuwat.​—Mzm. 62:2; Éf. 6:10.

Njenengan isa terbantu nèk maca lan ngrenungké kisah-kisah ing Alkitab soal wong wédok sing terhibur merga ndonga karo Yéhuwah. Yéhuwah mémang ora selalu nyingkirké masalahé, tapi mesthi mènèhi rasa ayem. Misalé Hana sing ”sedhih banget” merga keadaané. Sakwisé ”ndonga marang Yéhuwah suwé banget”, Hana ngrasa ayem meskipun dhèwèké ora ngerti bakalé piyé.​—1 Sam. 1:10, 12, 18; 2 Kor. 1:3, 4.

Njaluka bantuané para pinituwa. Para pinituwa isa dadi ”panggonan berlindung pas ana angin gedhé” lan ”pas ana badai”. (Yés. 32:2) Para pinituwa isa ngandhani sedulur wédok endi sing isa dipercaya sing isa dicritani lan isa menghibur.​—WB. 17:17.

Apa mungkin njenengan mbantu bojoné njenengan bèn mandheg nonton pornografi? Mungkin isa. Menurut Alkitab, ngalahké mungsuh ”wong loro bareng-bareng luwih apik timbang dhèwèkan”. (Pkh. 4:9-12) Beberapa penelitian nyebutké nèk suami istri sing kerja sama isa berhasil ngatasi  kecanduan pornografi lan percaya manèh karo bojoné.  

Mémang kuwi bergantung apa bojoné njenengan gelem mandheg nonton pornografi apa ora. Apa dhèwèké njaluk kekuwatan saka Yéhuwah lan bantuané para pinituwa? (2 Kor. 4:7; Yak. 5:14, 15) Apa dhèwèké nggawé rencana bèn ora nonton pornografi manèh, misalé ora kerep-kerep dolanan HP lan menghindari situasi sing isa nggawé kegodha? (WB. 27:12) Apa dhèwèké gelem dibantu lan jujur karo njenengan? Nèk iya, njenengan isa mbantu.

Piyé carané? Gatèkna pengalamané Felicia. Dhèwèké nikah karo Ethan, sing kecanduan pornografi pas isih cilik. Felicia nggawé Ethan leluasa crita kapan waé nèk kepénginané kanggo nonton pornografi muncul manèh. Ethan ngomong, ”Aku jujur lan terbuka karo bojoku. Dhèwèké sayang karo aku. Buktiné dhèwèké mbantu aku nggawé batasan-batasan lan kerep nakoni aku. Dhèwèké ya mbantu bèn aku ora kerep-kerep internètan.” Mémang, Felicia sedhih banget merga Ethan nduwé kepénginan nonton pornografi manèh. Tapi Felicia ngomong, ”Bojoku ora bakal mandheg nonton pornografi mung merga aku nesu. Sakwisé mbahas cara ngatasiné, bojoku gelem kerja sama bèn aku ora sedhih manèh.”  

Nèk rembugan kaya ngono, suami isa mandheg nonton pornografi lan bojoné isa percaya manèh karo dhèwèké. Nèk suami terbuka soal kelemahané, kegiatané, lan lunga ing endi waé, mesthiné ora ana rahasia manèh ta?

Apa kétoké bojoné njenengan isa dibantu? Nèk iya, coba maca lan ngrembug bareng artikel iki. Kanggo bojoné njenengan, tujuané bèn dhèwèké isa mandheg nonton pornografi lan mbuktèkké nèk isa dipercaya. Kuduné dhèwèké ora nesu, tapi mikirké apa akibaté kanggo njenengan nèk dhèwèké nonton pornografi. Kanggo njenengan, tujuané bèn njenengan isa ndhukung lan mènèhi kesempatan bèn isa percaya manèh karo bojoné njenengan. Njenengan karo bojoné njenengan kudu ngerti sik kenapa ana sing ora isa mandheg nonton pornografi lan cara ngatasiné. d

Piyé nèk njenengan wedi nèk ngobrolké soal kuwi malah dadi padu? Njenengan isa  ngejak pinituwa sing dipercaya karo njenengan lan bojoné njenengan. Pinituwa kuwi isa ngancani pas njenengan rembugan bareng karo bojoné njenengan. Élinga bahkan sakwisé mandheg nonton pornografi, percaya manèh karo bojoné njenengan butuh wektu. Aja gampang nyerah. Gatèkna apa waé tandhané nèk hubungané njenengan saya apik meskipun kuwi sepélé. Nèk terus sabar, njenengan mesthi isa percaya manèh karo bojoné njenengan.​—Pkh. 7:8; 1 Kor. 13:4.

Nèk bojoné njenengan kambuh, apa berarti dhèwèké ora mertobat utawa ora nduwé harapan manèh? Ora mesthi ngono. Apa manèh nèk wis kecanduan, dhèwèké kudu terus berjuang. Bahkan nèk wis bertaun-taun ora nonton, dhèwèké isa kambuh manèh. Bèn ora kambuh, kudu nggawé batasan-batasan sing luwih kuwat lan kudu tetep kaya ngono bahkan nèk masalahé kétoké wis isa diatasi. (WB. 28:14; Mat. 5:29; 1 Kor. 10:12) Dhèwèké kudu berusaha bèn ’pikirané dadi anyar’ lan ”sengit karo apa sing jahat”. Kuwi termasuk pornografi lan tingkah laku sing ana hubungané karo kuwi, misalé masturbasi. (Éf. 4:23; Mzm. 97:10; Rm. 12:9) Apa dhèwèké gelem berupaya kaya ngono? Nèk iya, berarti dhèwèké nduwé harapan. e

Tapi piyé nèk bojoné njenengan ora gelem mandheg nonton pornografi? Wajar nèk njenengan kecéwa, nesu, lan ngrasa dikhianati. Pasrahna rasa kuwatiré njenengan karo Yéhuwah. Yéhuwah mesthi bakal mènèhi rasa ayem. (1 Ptr. 5:7) Terusa sinau Alkitab, ngrenungké kuwi, lan ndonga bèn isa tetep cedhak karo Yéhuwah. Yéhuwah mesthi ya bakal cedhak karo njenengan. Kaya sing disebutké ing Yésaya 57:15, Yéhuwah ana bareng karo ”wong sing lara ati lan sedhih” merga péngin nguwatké. Terusa setya nglayani Yéhuwah. Njaluka bantuané para pinituwa. Yakina nèk bojoné njenengan isa berubah.​—Rm. 2:4; 2 Ptr. 3:9.