1. Piyé bèn isa luwih seneng sinau ramalan ing Alkitab?

 CAH enom sing jenengé Ben crita, ”Aku seneng banget pas sinau ramalan ing Alkitab.” Apa njenengan ngrasa ngono? Utawa, ngrasa nèk sinau ramalan ing Alkitab kuwi angèl? Pas sinau mungkin rasané bosen. Tapi nèk ngerti kenapa Yéhuwah péngin ramalan kuwi ditulis ing Alkitab, mungkin awaké dhéwé dadi seneng.

2. Apa sing dirembug ing artikel iki?

² Ing artikel iki bakal dibahas kenapa awaké dhéwé kudu sinau ramalan ing Alkitab lan kudu piyé pas sinau. Mengko ya bakal dibahas loro ramalan sing ditulis Danièl lan apa manfaaté nèk sinau soal kuwi.

3. Piyé carané bèn isa paham tenan ramalan ing Alkitab?

³ Bèn isa paham ramalan ing Alkitab, awaké dhéwé butuh bantuan. Umpamané ngéné, njenengan lunga ing dhaérah sing durung tau ditekani. Tapi, ana kancané njenengan sing ngerti tenan dhaérah kuwi. Dhèwèké ngerti njenengan lagi ing ngendi lan kudu liwat dalan endi bèn isa tekan tujuan. Njenengan mesthi bersyukur merga nduwé kanca sing siap mbantu. Yéhuwah ya kaya kanca sing siap mbantu. Dhèwèké ngerti nèk awaké dhéwé urip ing dina-dina terakhir lan ngerti uripé awaké dhéwé sukmbèn piyé. Dadi bèn isa paham tenan ramalan ing Alkitab, awaké dhéwé kudu rendah hati njaluk bantuané Yéhuwah.​—Dan. 2:28; 2 Ptr. 1:19, 20.

4. Apa tujuané ramalan-ramalan ditulis ing Alkitab? (Yérémia 29:11) (Deloken gambar kanggo paragraf 4.)

⁴ Wong tuwa péngin anak-anaké bahagia. Yéhuwah  ya kaya ngono. (Wacanen Yérémia 29:11.) Tapi bédané, Yéhuwah isa ngandhani apa sing kelakon sukmbèn lan kuwi kabèh mesthi bener. Kuwi ditulis ing Alkitab bèn awaké dhéwé ngerti apa sing bakal kelakon. Awaké dhéwé mesthi bersyukur merga Yéhuwah wis ngandhani soal kuwi. (Yés. 46:10) Kok isa awaké dhéwé yakin nèk ramalan ing Alkitab mesthi bakal kelakon?

5. Apa waé sing isa dipelajari saka pengalamané Max?

⁵ Ing sekolahan, cah-cah enom ya ngadhepi masalah. Ing sekitaré mungkin ana wong-wong sing ora percaya isiné Alkitab. Merga ndelok kelakuan lan krungu omongané, cah-cah enom mungkin dadi ragu apa kepercayaané mémang bener. Gatèkna pengalamané Max. Dhèwèké crita, ”Pas isih sekolah, aku mulai ragu apa agama sing diajarké wong tuwaku bener lan apa Alkitab mémang saka Gusti Allah.” Wong tuwané Max piyé? Max crita manèh, ”Wong tuwaku tetep tenang, meskipun sakjané aku ngerti nèk wong tuwaku kuwatir.” Kabèh pertanyaané Max dijawab saka Alkitab. Max crita, ”Aku dhéwé ya sinau ramalan ing Alkitab, terus aku mbahas kuwi karo cah-cah enom ing jemaat.” Apa hasilé? Max crita, ”Aku dadi yakin nèk Alkitab mémang saka Gusti Allah.”

6. Nèk ragu kudu piyé, lan kenapa kuwi penting?

⁶ Kaya Max, nèk njenengan mulai ragu isiné Alkitab bener apa ora, aja ngrasa bersalah. Tapi ya aja meneng waé. Rasa ragu kuwi kaya karat. Nèk dijarké, suwé-suwé isa ngrusak barang sing berharga. Nèk terus-terusan ragu, suwé-suwé dadi ora nduwé iman. Mula coba pikirna, ’Apa aku percaya karo janjiné Yéhuwah soal masa depan?’ Nèk ragu, njenengan perlu sinau ramalan-ramalan ing Alkitab sing wis kelakon. Piyé carané?

7. Ngapa Danièl dadi conto sing apik pas sinau ramalan? (Danièl 12:10) (Deloken gambar kanggo paragraf 7.)

⁷ Danièl dadi conto sing apik pas sinau ramalan. Tujuané bener, péngin ngerti sing bener. Danièl rendah hati, njaluk bantuané Yéhuwah. (Dan. 2:18) Danièl ngerti nèk Yéhuwah mung mbantu wong-wong sing dadi kancané lan sing manut pathokané. (Dan. 2:27, 28; wacanen Danièl 12:10.) Danièl ya tliti, sinau Kitab-Kitab Suci sing wis ana. (Yér. 25:11, 12; Dan. 9:2) Piyé carané niru Danièl?

8. Ngapa kok ana sing nggolèk-nggolèk bukti nèk ramalané Alkitab ora kelakon, tapi apa tujuané awaké dhéwé sinau ramalan?

⁸ Mikirké tujuané. Apa njenengan  sinau ramalan ing Alkitab bèn ngerti sing bener? Nèk iya, Yéhuwah bakal mbantu. (Yoh. 4:23, 24; 14:16, 17) Mémangé ana tujuan liyané? Ana sing mung nggolèk-nggolèk bukti nèk Alkitab dudu saka Gusti Allah. Wong-wong kuwi mikir nèk Alkitab dudu saka Gusti Allah, dadi isa nentokké dhéwé endi sing bener lan sing salah. Tapi awaké dhéwé kudu nduwé tujuan sing bener. Sakliyané kuwi ana sipat sing dibutuhké bèn isa paham ramalan ing Alkitab.

9. Sipat apa sing dibutuhké bèn isa paham ramalan ing Alkitab? Jelasna.

⁹ Rendah hati. Yéhuwah janji bakal mbantu wong sing rendah hati. (Yak. 4:6) Ndongaa njaluk bantuané Yéhuwah bèn isa paham ramalan ing Alkitab. Awaké dhéwé sadhar nèk butuh bantuané budhak sing setya lan wicaksana sing mènèhi mangan ing wektu sing pas. (Luk. 12:42) Merga Yéhuwah Gusti Allah sing teratur, masuk akal nèk Yéhuwah mung nggunakké siji sarana kanggo mbantu awaké dhéwé paham isiné Alkitab.​—1 Kor. 14:33; Éf. 4:4-6.

10. Apa waé sing isa dipelajari saka pengalamané Esther?

¹⁰ Tliti. Coba mulai sinau ramalan sing menurut njenengan menarik. Esther, sing disebutké ing artikel sakdurungé wis nyoba kuwi. Dhèwèké tertarik karo ramalan soal Mésias. Dhèwèké crita, ”Pas umur 15, aku nggolèk bukti nèk ramalan soal Mésias kuwi ditulis sakdurungé Yésus lair.” Dhèwèké sinau soal Gulungan Laut Mati. Esther ngomong, ”Beberapa ditulis sakdurungé Yésus lair. Aku dadi yakin nèk ramalan kuwi mesthi saka Gusti Allah.” Esther crita manèh, ”Mémang aku kudu maca ping bola-bali bèn isa paham.” Tapi dhèwèké seneng merga upayané ora sia-sia. Sakwisé sinau beberapa ramalan ing Alkitab, Esther crita, ”Aku bener-bener yakin nèk Alkitab mémang saka Gusti Allah.”

11. Apa manfaaté nèk yakin Alkitab bener?

¹¹ Nèk ndelok ramalan ing Alkitab wis kelakon, awaké dhéwé dadi semakin percaya karo Yéhuwah lan kabèh arahané. Nèk sinau ramalan ing Alkitab, awaké dhéwé isa tetep nduwé harapan ora soal ngadhepi masalah apa. Mengko bakal dibahas loro ramalan sing ditulis Danièl sing saiki lagi kelakon. Nèk paham soal kuwi, awaké dhéwé isa nggawé keputusan sing apik.

12. Sikil bagéan ngisor sing digawé saka ’wesi campur karo tanah liat sing lembèk’ nggambarké sapa? (Danièl 2:41-43)

¹² Wacanen Danièl 2:41-43. Ing mimpiné Nébukhadnézar sing dijelaské  Danièl, sikilé patung sing bagéan ngisor sing didelok raja, digawé saka ”wesi sing campur karo tanah liat sing lembèk”. Nèk mbandhingké ramalan kuwi karo ramalan liyané ing buku Danièl lan Wahyu, awaké dhéwé isa nyimpulké nèk kuwi Inggris Amerika sing kerja sama sing dadi pamréntahan paling kuwat saiki. Danièl ngomong nèk ”kerajaan kuwi bakal kuwat sebagéan lan rapuh sebagéan”. Kok isa? Soalé masyarakat, sing digambarké kaya tanah liat, nggawé pamréntah, sing digambarké kaya wesi, dadi lemah. b   

13. Saka ramalan soal sikil patung sing bagéan ngisor, awaké dhéwé isa ngerti soal apa?

¹³ Saka ramalan soal patung gedhé sing disebutké Danièl, khususé soal sikil bagéan ngisor, awaké dhéwé isa ngerti soal iki: Pertama, Inggris Amerika terbukti kuwat tapi ya lemah. Loro negara kuwi menang pas Perang Donya I lan II, tapi rakyaté ora isa bersatu karo pamréntah. Keloro, Inggris Amerika bakal dadi pamréntahan sing paling kuwat terakhir sakdurungé Kerajaané Gusti Allah ngancurké kabèh pamréntahané manungsa. Meskipun ana pamréntahan-pamréntahan sing nyerang Inggris Amerika, tapi Inggris Amerika tetep kuwat. Awaké dhéwé yakin soal kuwi, merga ”watu” sing nggambarké Kerajaané Gusti Allah bakal ngancurké sikil bagéan ngisor kuwi, yaiku pamréntahan Inggris Amerika.​—Dan. 2:34, 35, 44, 45.

14. Apa manfaaté nèk paham soal ramalan sikil wesi campur tanah liat?

¹⁴ Apa njenengan yakin nèk ramalan soal sikil wesi campur tanah liat kuwi bener? Nèk iya, apa pengaruhé kanggo njenengan? Njenengan ora bakal ngutamakké harta merga ngerti nèk sedhéla manèh donya iki bakal dihancurké. (Luk. 12:16-21; 1 Yoh. 2:15-17) Njenengan dadi ngerti pentingé nginjil lan mulang. (Mat. 6:33; 28:18-20) Sakwisé sinau ramalan kuwi coba pikirna, ’Saka keputusanku, apa kétok nèk aku yakin nèk Kerajaané Gusti Allah bakal ngancurké kabèh pamréntahan?’

15. Sapa ”raja lor” lan ”raja kidul”? (Danièl 11:40)

¹⁵ Wacanen Danièl 11:40. Ing Danièl Bab 11 disebutké ana loro raja sing saingan bèn dadi pamréntahan paling kuwat sak donya. Nèk mbandhingké ramalan kuwi karo ramalan liyané ing Alkitab, awaké dhéwé isa nyimpulké nèk ”raja lor” kuwi Rusia lan balané, lan ”raja kidul” kuwi Inggris Amerika. c

16. Apa sing dialami umaté Yéhuwah sing manggon ing dhaérah kekuasaané ”raja lor”?

¹⁶ Umaté Yéhuwah sing manggon ing dhaérah kekuasaané ”raja lor” dianiaya. Ana sing digebugi lan dipenjara merga tetep setya karo Yéhuwah. Tapi sedulur-sedulur kuwi ora wedi. Malah imané dadi tambah kuwat. Kok isa? Sedulur-sedulur kuwi ngerti nèk sing dialami mbuktèkké ramalan ing buku Danièl  lagi kelakon. d (Dan. 11:41) Merga awaké dhéwé ya ngerti soal kuwi, harapané awaké dhéwé dadi tambah nyata lan imané awaké dhéwé dadi tetep kuwat.  

17. Apa sing dialami umaté Yéhuwah sing manggon ing dhaérah kekuasaané ”raja kidul”?

¹⁷ Mbiyèn umaté Yéhuwah sing manggon ing dhaérah kekuasaané ”raja kidul” ya dianiaya. Pas Perang Donya I lan II, ana sing dipenjara merga ora gelem mèlu perang lan bocah-bocah ditokké saka sekolahan merga ora gelem hormat bendéra. Tapi saiki umaté Yéhuwah sing manggon ing dhaérah kuwi ya ngadhepi masalah liya. Misalé pas mèh pemilu, mungkin ana sing terpengaruh kanggo ndhukung partai utawa calon pemimpin tertentu. Mungkin ora nganti nyoblos, tapi ing njero ati dhèwèké berharap ana sing menang. Awaké dhéwé péngin bener-bener tetep  nétral bahkan ing njero ati.​—Yoh. 15:18, 19; 18:36.

18. Pas ”raja lor” karo ”raja kidul” perang, awaké dhéwé piyé? (Deloken gambar kanggo paragraf 18.)

¹⁸ Wong-wong sing ora percaya ramalan ing Alkitab mungkin bakal wedi pas ndelok ”raja kidul” ”srudug-srudugan” karo ”raja lor”. (Dan. 11:40, cathetan ngisor.) Loro-loroné nduwé senjata nuklir sing cukup kanggo matèni kabèh manungsa. Tapi awaké dhéwé ngerti nèk Yéhuwah ora bakal ngijinké kuwi kelakon. (Yés. 45:18) Awaké dhéwé ora wedi, tapi imané awaké dhéwé dadi tambah kuwat. Awaké dhéwé ngerti nèk akhir donya iki wis cedhak.

19. Pas sinau ramalan ing Alkitab, isa waé ora ngerti soal apa, tapi kudu piyé?

¹⁹ Meskipun Danièl nulis ramalan-ramalan mau, tapi dhèwèké ora ngerti kabèh artiné. (Dan. 12:8, 9) Ana beberapa ramalan ing Alkitab sing kadhang awaké dhéwé ora ngerti kelakoné piyé. Tapi kuwi ora berarti ora bakal kelakon. Awaké dhéwé yakin nèk Yéhuwah bakal mbantu bèn paham, kaya mbiyèn Yéhuwah mbantu para abdiné.​—Am. 3:7.

20. Sedhéla manèh ramalan Alkitab apa sing bakal kelakon, lan awaké dhéwé kudu piyé?

²⁰ Sedhéla manèh bakal ana pengumuman ”tentrem lan aman”. (1 Tés. 5:3) Terus pemimpin politik bakal nyerang agama palsu lan nyingkirké kuwi. (Why. 17:16, 17) Bar kuwi umaté Yéhuwah bakal diserang. (Yèh. 38:18, 19) Sakwisé peristiwa-peristiwa kuwi, Armagédon dimulai. (Why. 16:14, 16) Awaké dhéwé yakin nèk ora suwé manèh kuwi bakal kelakon. Karo ngentèni, awaké dhéwé péngin terus nggatèkké ramalan sing durung kelakon lan ngandhani wong liya soal kuwi.