1. Apa sing digatèkké wong Babilon saka Danièl?

 PAS isih enom, Nabi Danièl ditawan wong Babilon lan digawa adoh saka omahé. Tapi pejabat Babilon sing ndelok ”penampilané” Danièl terkesan merga dhèwèké ’ora cacad, nggantheng,’ lan saka keturunané bangsawan. (1 Sam. 16:7) Makané Danièl dilatih kanggo nglayani raja ing istana.​—Dan. 1:3, 4, 6.

2. Yéhuwah nganggep Danièl wong kaya apa? (Yèhèzkièl 14:14)

² Yéhuwah sayang karo Danièl, dudu merga penampilané utawa jabatané ing istana, tapi merga Danièl gelem dadi wong sing bener. Malah mungkin pas Danièl umur 20-an, Yéhuwah nyebutké Danièl bareng karo Nuh lan Ayub sing wis bertaun-taun setya nglayani Yéhuwah. (PD. 5:32; 6:9, 10; Ayb. 42:16, 17; wacanen Yèhèzkièl 14:14.) Yéhuwah terus sayang karo Danièl selama uripé.​—Dan. 10:11, 19.

3. Apa sing mèh dibahas?

³ Ing artikel iki bakal dibahas loro sipaté Danièl sing nggawé dhèwèké disayangi Yéhuwah. Awaké dhéwé bakal mbahas sik sipat kuwi apa lan kapan Danièl nduduhké. Bar kuwi, bakal dibahas piyé carané Danièl nduwé sipat-sipat kuwi lan piyé carané niru. Meskipun artikel iki khususé kanggo cah enom, kabèh isa niru Danièl.

4. Apa buktiné Danièl kendel?

⁴ Wong sing kendel isa waé wedi, tapi bakal tetep nggawé keputusan sing bener. Danièl kuwi cah enom sing kendel. Salah siji buktiné kelakon kira-kira rong taun sakwisé Yérusalèm dihancurké Babilon. Raja Nébukhadnézar éntuk mimpi soal patung gedhé sing nggawé dhèwèké kepikiran. Dhèwèké arep matèni kabèh wong wicaksana ing istana, termasuk Danièl, nèk ora ana sing isa ngandhani mimpiné lan artiné. (Dan. 2:3-5) Tapi, Danièl langsung ”ngadhep Raja lan njaluk bèn diwènèhi kesempatan kanggo njelaské arti mimpiné Raja”. (Dan. 2:16) Danièl kendel lan nduwé iman sing gedhé. Ing Alkitab ora disebutké nèk Danièl tau njelaské arti mimpi. Makané Danièl njaluk tulung karo kanca-kancané, yaiku Syadrakh, Mésyakh, lan Abèdnégo, b ”ndonga bèn Gusti Allah sing nguwasani swarga dadi mesakké lan ngandhani rahasia soal mimpi kuwi”. (Dan. 2:18) Yéhuwah njawab donga kuwi. Merga dibantu Yéhuwah, Danièl isa njelaské arti mimpiné Raja Nébukhadnézar. Danièl karo kanca-kancané ora sida dipatèni.

5. Apa bukti liyané nèk Danièl kendel?

⁵ Sakwisé peristiwa kuwi, Nébukhadnézar éntuk mimpi manèh soal wit sing gedhé banget. Danièl kudu kendel njelaské arti mimpiné. Dhèwèké kudu ngandhani nèk Nébukhadnézar bakal édan lan ora bakal mréntah selama beberapa waktu. (Dan. 4:25) Nébukhadnézar isa waé mikir nèk Danièl mbrontak nglawan dhèwèké. Danièl isa waé dipatèni. Tapi, Danièl tetep kendel njelaské arti mimpi kuwi.

6. Kok isa Danièl kendel?

⁶ Kok isa Danièl kendel? Wong tuwané Danièl mesthi dadi conto sing apik. Danièl mesthi ya didhidhik sesuai arahané Yéhuwah lan diajari soal Hukumé Yéhuwah kèt cilik. (PT. 6:6-9) Danièl ora mung ngerti soal Sepuluh Préntah  thok. Dhèwèké ya ngerti akèh soal hukum liyané, misalé soal apa sing éntuk lan sing ora éntuk dipangan wong Israèl. c (Km. 11:4-8; Dan. 1:8, 11-13) Danièl ya sinau soal umaté Yéhuwah ing jaman mbiyèn lan ngerti apa akibaté nèk ora manut Yéhuwah. (Dan. 9:10, 11) Danièl ya ngrasakké dhéwé nèk Yéhuwah lan malaékaté terus ndhukung dhèwèké.​—Dan. 2:19-24; 10:12, 18, 19.

7. Apa manèh sing nggawé Danièl kendel? (Deloken gambar kanggo paragraf 7.)

⁷ Danièl sinau ramalan-ramalan, termasuk ramalané Yérémia. Danièl ngerti nèk wong Yahudi sing ditawan ing Babilon bakal dibébaské. (Dan. 9:2) Merga ndelok akèh ramalané Yéhuwah kelakon, Danièl dadi semakin percaya karo Yéhuwah lan semakin kendel. (Bandhingna karo Roma 8:31, 32, 37-39.) Danièl ya kerep ndonga. (Dan. 6:10) Dhèwèké nyritakké perasaané lan ngakoni dosané. Danièl njaluk bantuané Yéhuwah. (Dan. 9:4, 5, 19) Kaya awaké dhéwé, Danièl ya kudu berjuang bèn isa kendel. Tapi merga sinau, ndonga, lan percaya karo Yéhuwah, Danièl isa kendel.

8. Piyé bèn isa kendel?

⁸ Nèk awaké dhéwé piyé? Meskipun wong tuwané awaké dhéwé kendel, tapi ora otomatis awaké dhéwé dadi kendel. Kendel butuh upaya. Kuwi isa dipadhakké kaya sinau ketrampilan anyar. Bèn isa trampil, awaké dhéwé mesthi nggatèkké tenanan pas diajari, terus ditiru. Bèn kendel, awaké dhéwé isa nggatèkké conto-conto wong sing kendel, terus niru wong-wong kuwi. Nah, apa sing isa ditiru saka Danièl? Awaké dhéwé kudu ngerti tenan isiné Alkitab. Kerepa ndonga lan curhat karo Yéhuwah. Awaké dhéwé percaya nèk Yéhuwah mesthi bakal terus mbantu. Dadi pas ana masalah, awaké dhéwé isa kendel.

9. Apa manfaaté nèk kendel?

⁹ Kendel akèh manfaaté. Gatèkna pengalamané Ben sing sekolah ing Jerman. Ing sekolahé, kabèh percaya évolusi lan nganggep kisah penciptaan ing Alkitab mung dongèng. Ben dikèki kesempatan njelaské ing ngarep kelas ngapa kok dhèwèké percaya nèk kabèh ana sing nyiptakké. Dhèwèké kendel njelaské kepercayaané. Apa hasilé? Ben crita, ”Guruku ngrungokké lan cathetan sing tak enggo prèsentasi difotokopi terus dibagèkké ing kanca sak kelasku.” Piyé tanggepané kancané Ben? Ben crita manèh, ”Kancaku gelem ngrungokké lan ngomong nèk kagum karo aku.” Kaya pengalamané Ben, biasané wong sing kendel diajèni wong liya. Wong-wong kuwi isa waé péngin kenal karo Yéhuwah. Awaké dhéwé mesthi péngin dadi wong sing kendel.

10. Setya kuwi maksudé apa?

¹⁰ Ing Alkitab, kata Ibrani sing diterjemahké dadi ”setya” utawa ”katresnan sing langgeng” biasané dienggo  nggambarké katresnané Yéhuwah kanggo umaté. Kata kuwi ya isa dienggo nggambarké katresnané umaté Yéhuwah. (2 Sam. 9:6, 7) Apa njenengan ngerti nèk tékadé njenengan kanggo tetep setya isa luwih kuwat? Gatèkna contoné Danièl.

11. Apa buktiné Danièl tetep setya nganti tuwa? (Deloken gambar halaman 1.)

¹¹ Danièl ngadhepi akèh masalah selama uripé. Tapi, mungkin sing paling abot pas umuré wis 90-an. Wektu kuwi Babilon wis dikalahké karo Média lan Pèrsia, lan dipréntah karo Raja Darius. Para pejabat ing istana ora seneng karo Danièl lan ora ngajèni Gusti Allahé Danièl. Dadi, wong-wong kuwi nggawé rencana bèn Danièl dipatèni. Wong-wong kuwi mengaruhi raja bèn setuju karo peraturan sing nggawé Danièl kudu milih setya karo Yéhuwah utawa raja. Bèn isa setya karo raja lan ora kétok béda, Danièl mung kudu mandheg ndonga karo Yéhuwah selama 30 dina. Tapi merga Danièl ora gelem, dhèwèké diuncalké ing guwa singa. Yéhuwah nylametké Danièl merga tetep setya. (Dan. 6:12-15, 20-22) Piyé bèn awaké dhéwé isa tetep setya kaya Danièl?

12. Kok isa Danièl setya karo Yéhuwah?

¹² Kaya sing disebutké sakdurungé, wong isa setya nèk nresnani. Danièl isa setya karo Yéhuwah merga sayang karo Yéhuwah. Danièl isa sayang karo Yéhuwah mesthi merga mikirké sipat-sipaté lan piyé carané Yéhuwah nduduhké kuwi. (Dan. 9:4) Danièl ya mikirké lan bersyukur kanggo kabèh berkah saka Yéhuwah kanggo dhèwèké dhéwé lan kanggo umaté.​—Dan. 2:20-23; 9:15, 16.   

13. (a) Cah-cah enom ngadhepi masalah apa waé? Wènèhana conto. (Deloken gambar kanggo paragraf 13.) (b) Kaya ing vidéo, piyé kowé isa njelaské nèk ditakoni apa Seksi-Seksi Yéhuwah ndhukung homosèksual?

¹³ Kaya Danièl, cah-cah enom saiki ya ana ing antarané wong-wong sing ora sayang Yéhuwah lan ora manut pathokané. Wong-wong kuwi isa waé  ora seneng karo sing nyembah Gusti Allah. Cah-cah enom diécé merga tetep setya karo Yéhuwah. Kuwi sing dialami karo cah enom sing jenengé Graeme saka Australia. Dhèwèké ngadhepi masalah pas SMA. Guruné takon ing kelas piyé nèk ana kancané sing ngaku nèk homosèksual. Guru kuwi ngongkon kabèh sing ndhukung homosèksual ngadeg ing sebelah kiwa lan sing ora ndhukung ing tengen. Graeme crita, ”Sak kelas, mung aku karo kancaku sing Seksi Yéhuwah sing ngadeg ing tengen. Selama sak jam, kancaku karo guruku ngécé aku. Aku berusaha tetep tenang lan berupaya njelaské kepercayaanku. Tapi aku ora dirungokké babar blas.” Piyé perasaané Graeme? Dhèwèké crita manèh, ”Aku ora seneng diécé. Tapi aku ngrasa seneng banget merga isa njelaské kepercayaanku lan tetep setya karo Yéhuwah.” d

14. Apa salah siji cara bèn isa tetep setya karo Yéhuwah?

¹⁴ Kaya Danièl, awaké dhéwé isa tetep setya karo Yéhuwah nèk sayang karo Dhèwèké. Awaké dhéwé isa tambah sayang karo Yéhuwah nèk sinau soal sipat-sipaté. Misalé sinau saka ciptaané. (Rm. 1:20) Bèn semakin ngajèni lan sayang Yéhuwah, isa sinau saka kumpulan artikel ”Apa Iki Dirancang?” utawa ndelok vidéoné. Awaké dhéwé ya isa sinau saka brosur Benarkah Kehidupan Diciptakan? utawa Asal Mula Kehidupan—Lima Pertanyaan yang Patut Direnungkan. Sedulur Esther saka Denmark crita, ”Penalaran ing brosur-brosur kuwi masuk akal. Aku ora ngrasa dipeksa kudu percaya. Isiné mung mènèhi fakta lan aku dhéwé sing kudu mutuské.” Ben sing disebutké sakdurungé ngomong, ”Merga sinau bahan-bahan kuwi imanku dikuwatké. Aku dadi yakin nèk Gusti Allah sing nyiptakké kabèh.” Bar sinau bahan-bahan kuwi, njenengan mungkin setuju karo kandhané Alkitab, ”Oh Yéhuwah, Gusti Allahku, mung Njenengan sing pantes nampa kemuliaan, kehormatan, lan kuwasa merga Njenengan sing nyiptakké kabèh.”​—Why. 4:11. e

15. Apa cara liyané bèn isa tambah akrab karo Yéhuwah?

¹⁵ Cara liyané bèn isa tambah sayang karo Yéhuwah kuwi sinau soal Yésus. Sedulur wédok sing isih enom sing jenengé Samira saka Jerman wis nyoba kuwi. Dhèwèké crita, ”Aku tambah kenal karo Yéhuwah merga sinau soal Yésus.” Pas isih bocah, Samira mikir, ’Mosok Yéhuwah nduwé perasaan?’ Tapi Samira isa paham perasaané Yésus. Dhèwèké crita, ”Aku seneng karo Yésus merga dhèwèké gampang dicedhaki lan seneng karo bocah-bocah.” Saya akèh dhèwèké sinau soal Yésus, saya akrab karo Yéhuwah. Kok isa? Dhèwèké crita manèh, ”Suwé-suwé aku paham nèk Yésus bener-bener mirip karo Yéhuwah. Aku dadi sadhar nèk kuwi dadi salah siji alesané Yéhuwah ngutus Yésus ing bumi, yaiku bèn manungsa isa luwih kenal karo Yéhuwah.”  (Yoh. 14:9) Nèk njenengan péngin luwih akrab karo Yéhuwah, apa isa nyoba sinau soal Yésus? Njenengan mesthi tambah sayang karo Yéhuwah lan tékadé njenengan kanggo tetep setya bakal saya kuwat.

16. Apa manfaaté nèk tetep setya? (Mazmur 18:25; Mikha 6:8)

¹⁶ Wong sing setya biasané kancané ya setya. (Rut 1:14-17) Sakliyané kuwi wong sing setya karo Yéhuwah ya isa ngrasa ayem. Apa sebabé? Merga Yéhuwah janji bakal setya karo wong sing setya karo Dhèwèké. (Wacanen Mazmur 18:25; Mikha 6:8.) Bayangna, Pencipta sing mahakuwasa gelem janji bakal terus sayang karo awaké dhéwé. Nèk wis ngono, masalah, mungsuh, bahkan kematian ora isa misahké awaké dhéwé saka Yéhuwah. (Dan. 12:13; Luk. 20:37, 38; Rm. 8:38, 39) Niru Danièl lan tetep setya karo Yéhuwah penting banget.

17-18. Apa manèh sing isa dipelajari saka Danièl?

¹⁷ Ing artikel iki awaké dhéwé wis ngrembug loro sipaté Danièl. Tapi isih akèh sing isa dipelajari saka dhèwèké. Misalé, Yéhuwah mènèhi Danièl beberapa wahyu lan mimpi, lan kemampuan kanggo njelaské ramalan. Akèh ramalan kuwi sing wis kelakon. Sing liyané bakal kelakon sukmbèn lan bakal dirasakké karo kabèh wong sak donya.

¹⁸ Ing artikel berikuté bakal dirembug loro ramalané Danièl. Nèk ngrembug soal kuwi, awaké dhéwé isa nggawé keputusan sing apik saiki. Awaké dhéwé ya isa luwih kendel lan tetep setya kanggo ngadhepi apa sing bakal kelakon sukmbèn.