1. Pas jamané para rasul, piyé umaté Yéhuwah diarahké lan diatur?

 YÉHUWAH seneng nèk kabèh teratur. (1 Kor. 14:33) Wektu Yéhuwah ngongkon bèn kabar apik diwartakké ing sak donya, Dhèwèké péngin gawéan kuwi diorganisasi. (Mat. 24:14) Sing ditugasi kanggo ngawasi gawéan kuwi Yésus. Yésus mastèkké bèn gawéan nginjil diatur lan diorganisasi. Mbiyèn, ana para rasul lan pinituwa ing Yérusalèm sing dadi pengurus pusat. Meréka ngekèki arahan lan petunjuk kanggo kabèh jemaat. (Kis. 15:2; 16:4) Ing jemaat-jemaat, ana para pinituwa sing nyampèkké keputusan kuwi ing para sedulur. (Kis. 14:23) Merga para sedulur gelem manut arahané para pinituwa, ”jemaat-jemaat dadi saya kuwat imané, lan . . . jumlahé wong-wong sing percaya dadi saya akèh”.—Kis. 16:5.

2. Kèt taun 1919, piyé carané Yéhuwah mulang lan ngarahké umaté?

² Nganti saiki, Yéhuwah isih terus ngarahké umaté liwat Yésus. Kèt taun 1919, Yésus ngatur gawéan nginjil, mulang, lan ngekèki petunjuk murid-muridé liwat sak kelompok pinituwa sing nduwé harapan munggah swarga. a (Luk. 12:42) Yéhuwah bener-bener mberkahi kerja kerasé meréka.—Yés. 60:22; 65:​13, 14.

3-4. (a) Kèkana conto akibaté nèk ora diorganisasi. (b) Apa sing bakal dibahas ing artikel iki?

³ Nèk ora diorganisasi, awaké dhéwé ora bakal isa ngrampungké tugas martakké kabar apik. (Mat. 28:​19, 20) Misalé, bayangna nèk ora ana pengaturan  soal dhaérah nginjil. Saben wong mesthi nggarap dhaérahé sak senengé dhéwé. Akibaté, mungkin ana dhaérah sing kerep banget digarap, tapi ana dhaérah sing babar blas ora tau digarap. Apa njenengan isa mikirké conto liyané?

⁴ Sing dilakukan organisasiné Yéhuwah saiki sakjané niru sing dilakukan Yésus pas ing bumi. Mémangé pas ing bumi Yésus ngapa waé? Piyé organisasiné Yéhuwah niru contoné Yésus kuwi? Terus, piyé bèn awaké dhéwé isa terus percaya karo organisasiné Yéhuwah? Pertanyaan-pertanyaan kuwi bakal dibahas ing artikel iki.

ORGANISASINÉ YÉHUWAH NIRU CONTONÉ YÉSUS

5. Menurut Yohanes 8:​28, apa buktiné organisasiné Yéhuwah niru Yésus?

⁵ Sing diomongké lan dilakukan Yésus kuwi mung sing diajarké Bapaké. Organisasiné Yéhuwah niru contoné Yésus. Buktiné, wektu ngekèki petunjuk lan pathokan soal sing bener lan sing salah, dhasaré mung saka Alkitab. (Wacanen Yohanes 8:28; 2 Tim. 3:​16, 17) Awaké dhéwé kerep diélingké kanggo mempelajari Alkitab. Nah, apa manfaaté nèk manut naséhat kuwi?

6. Apa manfaaté mempelajari Alkitab nganggo publikasi saka organisasi?

⁶ Wektu mempelajari Alkitab, awaké dhéwé isa mbandhingké sing ditulis ing Alkitab karo petunjuk saka organisasi sing disampèkké ing publikasi. Nèk wis mbuktèkké dhéwé petunjuk kuwi dhasaré mémang saka Alkitab, awaké dhéwé isa tambah percaya karo organisasi.—Rm. 12:2.

7. Yésus martakké soal apa, lan piyé organisasiné Yéhuwah niru contoné?

⁷ Yésus martakké ”kabar apik soal Kerajaané Gusti Allah”. (Luk. 4:​43, 44) Yésus ya ngongkon murid-muridé martakké kuwi. (Luk. 9:​1, 2; 10:​8, 9) Saiki, ora soal manggon ing endi utawa nduwé tugas apa ing organisasi, kabèh sing gabung ing organisasiné Yéhuwah ya nduwé tugas kanggo martakké kabar apik.

8. Awaké dhéwé dikèki tugas istiméwa apa?

⁸ Awaké dhéwé dikèki tugas nyritakké soal Kerajaané Gusti Allah. Tugas iki istiméwa soalé ora kabèh wong dikèki tugas iki. Mbiyèn pas ing bumi, Yésus ora ngéntukké roh-roh jahat nyritakké soal dhèwèké. (Luk. 4:41) Saiki, wong sing péngin nginjil karo Seksi Yéhuwah ya kudu memenuhi syarat-syarat sing wis ditentokké. Nèk nganggep tugas iki istiméwa, awaké dhéwé mesthi bakal martakké kabar apik ing endi waé lan kapan waé. Kaya Yésus, awaké dhéwé péngin ngupaya sing paling apik kanggo nginjil lan mulang wong-wong soal Alkitab.—Mat. 13:​3, 23; 1 Kor. 3:6.

9. Apa buktiné organisasiné Yéhuwah berupaya bèn wong-wong ngerti jenengé Gusti Allah?

⁹ Yésus ngandhani wong liya soal jenengé Gusti Allah. Wektu ndonga, Yésus ngomong, ”Aku wis nduduhké jeneng-Mu marang wong-wong.” (Yoh. 17:26) Merga niru Yésus, organisasiné Yéhuwah ya berupaya bèn akèh wong isa ngerti jenengé Gusti Allah. Salah siji buktiné kuwi liwat Kitab Suci Terjemahan Donya Anyar. Ing kono, jenengé Gusti Allah diterjemahké sesuai karo naskah asliné. Saiki, terjemahan Alkitab kuwi wis ana lengkap utawa sebagéan ing luwih saka 270 basa. Ing Lampiran A4 lan A5 terjemahan iki,  ana luwih akèh penjelasan soal ngapa lan piyé jenengé Gusti Allah digunakké manèh sesuai naskah asliné. Terus, ing Lampiran C Alkitab Edisi Pelajaran basa Indonesia dijelaské bukti-bukti nèk jenengé Gusti Allah ana ing Kitab-Kitab Yunani Kristen ping 237.

10. Apa sing isa dipelajari saka pengalamané wong wédok ing Myanmar?

¹⁰ Kaya Yésus, awaké dhéwé péngin ngandhani sak akèh-akèhé wong bèn padha ngerti jenengé Gusti Allah. Ana wong wédok ing Myanmar sing umuré 67 nangis bar ngerti jenengé Gusti Allah. Dhèwèké crita, ”Iki pertama kaliné aku krungu nèk jenengé Gusti Allah kuwi Yéhuwah. . . . Kuwi hal sing paling berharga sing tau tak pelajari.” Pengalaman kuwi mbuktèkké nèk wong ngerti jenengé Gusti Allah, uripé isa dadi luwih bermakna.

BUKTINÉ NÈK TERUS PERCAYA KARO ORGANISASINÉ YÉHUWAH

11. Apa buktiné nèk para pinituwa percaya karo organisasiné Yéhuwah? (Deloken gambar.)

¹¹ Para pinituwa ya isa mbuktèkké nèk percaya karo organisasiné Yéhuwah. Wektu éntuk petunjuk, petunjuké diwaca tenanan. Terus, ngupayakké sing paling apik bèn isa ngetrapké petunjuk kuwi. Petunjuk kuwi ora mung soal carané nyampèkké bagéan ing pertemuan ibadah utawa carané ndonga ing ngarepé wong akèh, tapi ya soal carané nggatèkké para sedulur ing jemaat. Nèk para pinituwa manut petunjuké organisasi, para sedulur bakal ngrasa digatèkké lan disayangi.

12. (a) Ngapa kok kudu manut karo para pinituwa? (Ibrani 13:​7, 17) (b) Ngapa kok kudu luwih nggatèkké sifat-sifat apiké para pinituwa?

¹² Wektu éntuk arahan saka para pinituwa, awaké dhéwé kudu manut tenanan. Nèk manut, tugasé para pinituwa bakal dadi luwih ènthèng. Ing Alkitab disebutké, ”Kowé kudu manut lan tundhuk karo wong-wong sing mimpin kowé.” (Wacanen Ibrani 13:​7, 17.) Tapi kadhang kuwi ora gampang, soalé para pinituwa isih durung sampurna. Nah, nèk sing digatèkké mung kekurangané, kuwi malah nyenengké mungsuh-mungsuhé awaké dhéwé. Kok isa? Wong-wong kuwi péngin awaké dhéwé ora percaya manèh karo organisasiné Yéhuwah. Dadi, nèk awaké dhéwé mulai mikir èlèk soal para pinituwa, isa waé ya dadi mikir èlèk soal organisasi, terus akhiré dadi ora percaya manèh. Lha terus, apa waé taktik sing digunakké para mungsuh, lan piyé carané bèn ora kapusan?

AJA NGANTI TERPENGARUH INFORMASI SING SALAH

13. Piyé carané mungsuhé Yéhuwah nggawé èlèk jenengé organisasi?

¹³ Para mungsuh senengé nggawé èlèk jenengé organisasiné Yéhuwah. Bahkan, sesuatu sing dilakukan umaté Yéhuwah merga manut pathokan ing Alkitab ya isa waé dianggep èlèk. Misalé, Yéhuwah péngin awaké dhéwé resikan, omongan lan tingkah lakuné nggenah, lan ngibadah sesuai sing Dhèwèké karepké. Dadi, nèk ana sing nggawé dosa lan ora gelem bertobat, wong kuwi kudu ditokké saka jemaat. (1 Kor. 5:​11-13; 6:​9, 10) Tapi, para mungsuh malah nggunakké kuwi kanggo nudhuh nèk awaké dhéwé wongé kaku, ora sayang, lan ora nduwé toléransi.

14. Informasi sing salah soal organisasi kuwi sumberé saka sapa?

¹⁴ Kenali sumberé. Sumberé informasi  sing ora bener soal organisasi kuwi Sétan. Sétan kuwi ”bapaké wong-wong sing seneng ngapusi”. (Yoh. 8:44; PD. 3:​1-5) Sétan nggunakké wong-wong kanggo nyebarké informasi sing salah soal organisasiné Yéhuwah. Kuwi kelakon pas jamané Yésus lan para rasul.

15. Apa waé upayané para pemimpin agama kanggo ngèlèk-èlèk Yésus lan murid-muridé?

¹⁵ Kèt mbiyèn, Sétan selalu nggunakké wong-wong kanggo nyritakké sing ora bener soal Yésus lan murid-muridé. Misalé, pas Yésus nggawé mukjijat ngusir roh jahat, para pemimpin agama nudhuh nèk Yésus isa ngusir roh jahat merga ”dibantu penguasané roh-roh jahat”. (Mrk. 3:22) Terus, pas Yésus diadili, para pemimpin agama nudhuh Yésus ngrèmèhké Gusti Allah. Meréka ya ngojok-ojoki wong akèh bèn njaluk Yésus dipatèni. (Mat. 27:20) Terus, pas murid-muridé Yésus martakké kabar apik, mungsuh-mungsuhé ”ngojok-ojoki lan mengaruhi” wong-wong bèn nganiaya murid-muridé Yésus. (Kis. 14:​2, 19) Ana keterangan soal Kisah 14:2 ing Menara Pengawal 1 Desember 1998. Isiné: ”Ora mung ora gelem nampa kabar apik, wong Yahudi sing nentang ya ngojok-ojoki wong liya bèn ya padha mèlu sengit karo murid-muridé Yésus.”

16. Nèk krungu berita sing ora bener, kudu éling apa?

¹⁶ Nganti saiki, Sétan isih terus ngèlèk-èlèk umaté Yéhuwah. Menurut Alkitab, dhèwèké ”lagi nyesatké kabèh penduduk ing bumi”. (Why. 12:9) Nèk krungu berita sing ora bener soal organisasi utawa  para sedulur sing dadi pengawas, kudu éling nèk Yésus lan murid-muridé mbiyèn ya ngalami kaya ngono. Yésus ya tau ngramalké nèk umaté Yéhuwah bakal dianiaya lan difitnah. (Mat. 5:​11, 12) Bèn ora diapusi berita-berita sing ora bener, awaké dhéwé kudu éling nèk kuwi sumberé saka Sétan. Tapi, selain kuwi, awaké dhéwé kudu piyé?

17. Piyé bèn ora kapusan informasi sing salah? (2 Timotius 1:13) (Deloken kothak ” Bèn Ora Kapusan Informasi sing Salah”.)

¹⁷ Aja percaya informasi sing ora bener. Nèk éntuk informasi sing ora bener, awaké dhéwé kudu piyé? Rasul Paulus ngongkon Timotius ”ngélikké wong-wong bèn . . . ora nggatèkké crita-crita palsu” lan ”nolak crita-crita palsu”. (1 Tim. 1:​3, 4; 4:7) Coba pikirna: Nèk ana panganan sing tiba ing lantai, terus reged, nèk bayi mungkin langsung njupuk lan dipangan. Tapi nèk wong wis gedhé ora mungkin kaya ngono, soalé ngerti kuwi isa marakké lara. Awaké dhéwé ora gelem percaya informasi sing ora bener merga ngerti kuwi sumberé saka sapa. Awaké dhéwé mung percaya karo ”sing bener”.—Wacanen 2 Timotius 1:13.

18. Piyé carané mbuktèkké nèk awaké dhéwé percaya karo organisasiné Yéhuwah?

¹⁸ Mau wis dibahas telung cara organisasiné Yéhuwah niru contoné Yésus. Pas sinau Alkitab, coba pikirna bukti liyané nèk organisasiné Yéhuwah niru Yésus. Bantunen para sedulur bèn ya percaya karo organisasiné Yéhuwah. Terus, njenengan dhéwé ya kudu terus setya nglayani Yéhuwah lan ndhukung organisasiné. (Mzm. 37:28) Ayo awaké dhéwé terus menghargai kesempatan istiméwa isa dadi bagéan saka organisasiné Yéhuwah.