1. Bèn dadi wong Kristen sing luwih apik kudu piyé?

 NYENENGKÉ banget ndelok pertumbuhané bocah. Mémang, nèk bocah wis mesthi bakalé dadi gedhé. Tapi, nèk kanggo wong Kristen, saya tambah umuré kuwi ora otomatis dadi wong Kristen sing luwih apik. b (1 Kor. 13:11; Ibr. 6:1) Bèn isa dadi wong Kristen sing luwih apik kudu nduwé hubungan sing akrab karo Yéhuwah, kudu njaluk roh suciné Yéhuwah bèn isa nduwé sifat-sifat sing apik, lan belajar ketrampilan sing isa bermanfaat dienggo sukmbèn.—WB. 1:5.

2. Ing Purwaning Dumadi 1:27 ana keterangan apa, lan apa sing bakal dibahas ing artikel iki?

² Yéhuwah nyiptakké wong lanang lan wong wédok. (Wacanen Purwaning Dumadi 1:27.) Selain fisiké sing béda, wong lanang lan wong wédok kuwi perané ya béda. Merga perané béda, meréka butuh sifat-sifat lan ketrampilan sing dibutuhké bèn isa memenuhi peran kuwi mengko. (PD. 2:18) Ing artikel iki bakal dibahas piyé bèn cah-cah wédok isa dadi wong Kristen sing luwih apik. Terus, ing artikel berikuté bakal dibahas piyé bèn cah-cah lanang isa dadi wong Kristen sing luwih apik.

3-4. Cah-cah wédok isa éntuk conto sing apik saka sapa waé? (Deloken gambar kanggo paragraf 3-4.)

³ Ing Alkitab ana akèh conto wong wédok sing sayang lan nglayani Yéhuwah. (Deloken artikel ing jw.org sing judhulé  ”Apa yang Bisa Kita Pelajari dari Para Wanita di Alkitab?”) Kaya sing disebutké ing ayat téma, wong-wong wédok kuwi ”isa ngendhalèni kebiasaané” lan ”setya marang Gusti Allah wektu nindakké apa waé”. Terus, ing jemaat ya ana akèh contoné sedulur-sedulur wédok sing wis terbukti bener-bener sayang karo Yéhuwah.

⁴ Cah-cah wédok, ana ora sedulur wédok sing mbok kenal sing péngin mbok tiru teladané? Gatèkna sifat-sifat apiké, terus pikirna carané niru. Ing paragraf-paragraf berikuté bakal dibahas sifat-sifat sing dibutuhké lan apa sing isa diupayakké bèn kowé isa dadi wong Kristen sing luwih apik.

5. Ngapa kok wong Kristen sing luwih apik kudu rendah hati?

⁵ Bèn isa dadi wong Kristen sing luwih apik, kudu rendah hati. Nèk wong wédok rendah hati, dhèwèké ora mung bakal nduwé hubungan sing apik karo Yéhuwah, tapi ya karo wong liya. (Yak. 4:6) Wong wédok sing rendah hati lan sayang Yéhuwah bakal gelem manut petunjuk ing 1 Korintus 11:3. Ing kono, Yéhuwah wis nentokké sapa sing dadi kepala ing jemaat lan ing keluarga. c

6. Apa sing isa dipelajari saka Ribka?

⁶ Gatèkna contoné Ribka. Dhèwèké kuwi wong wédok sing terbukti kendel lan wicaksana. (PD. 24:58; 27:​5-17) Tapi, dhèwèké tetep ngajèni lan gelem manut petunjuk. (PD. 24:​17, 18, 65) Kaya Ribka, nèk kowé rendah hati lan gelem manut karo wong-wong sing wis dikèki Yéhuwah wewenang, kowé bakal dadi conto sing apik kanggo keluarga lan sedulur-sedulur ing jemaat.

7. Apa sing isa dipelajari saka Èster?

⁷ Menurut Alkitab bèn isa dadi wong Kristen sing luwih apik, ora mung kudu rendah hati tapi ya kudu ngerti keterbatasané. (WB. 11:2) Contoné wong wédok  sing ngerti keterbatasané kuwi Èster. Meskipun Èster kuwi ratu, dhèwèké gelem ngrungokké naséhaté Mordekai sepupuné. (Èst. 2:​10, 20, 22) Kowé ya isa kaya Èster nèk gelem njaluk naséhat lan ngetrapké kuwi.—Tit. 2:​3-5.

8. Ing 1 Timotius 2:​9, 10, ana pathokan apa soal milih pakaian lan dandanan?

⁸ Ana bukti liyané nèk Èster ngerti keterbatasané. Meskipun dhèwèké ”ayu lan penampilané nyenengké”, Èster ora nggolèk perhatian bèn disanjung-sanjung wong. (Èst. 2:​7, 15) Piyé carané niru Èster? Salah sijiné nèk ngetrapké naséhat ing 1 Timotius 2:​9, 10. (Wacanen.) Rasul Paulus ngandhani nèk wong wédok kudu nganggo klambi sing sederhana, terus wektu dandan ya kudu nganggo pertimbangan sing apik. Kata Yunani sing dienggo ing ayat kuwi berarti wong wédok kudu nganggo klambi sing sopan lan ora marakké wong liya dadi risi, apamanèh nganti mikir sing saru. Nyenengké banget ndelok sedulur-sedulur wédok sing ngupaya ngetrapké naséhat iki.

9. Apa sing isa dipelajari saka Abigail?

⁹ Bèn isa dadi wong Kristen sing luwih apik, cah-cah wédok kudu nduwé pertimbangan sing apik. Maksudé piyé? Nduwé pertimbangan sing apik kuwi berarti ngerti endi sing bener lan sing salah, terus isa nggawé keputusan sing bener. Gatèkna contoné Abigail. Merga bojoné nggawé keputusan sing ora wicaksana, kabèh wong ing keluargané nyawané terancam. Abigail ora meneng waé. Merga dhèwèké nduwé pertimbangan sing apik, kabèh wong ing keluargané ora sida dipatèni. (1 Sam. 25:​14-23, 32-35) Nèk nduwé pertimbangan sing apik, awaké dhéwé ngerti kapan wektuné kudu ngomong lan kapan kudu meneng. Awaké dhéwé ya tetep nggatèkké wong liya tapi ora nyampuri urusané.—1 Tés. 4:11.

10-11. Apa manfaaté nèk isa maca lan nulis? (Deloken gambar kanggo paragraf 10-11.)

¹⁰ Cah wédok ya isa belajar ketrampilan. Ana beberapa ketrampilan sing bermanfaat nganti suwé, meskipun belajaré kuwi pas isih cilik. Gatèkna conto-contoné.

¹¹ Maca lan nulis. Ing beberapa kebudayaan, wong wédok ora kudu isa maca lan nulis. Tapi, sakjané ketrampilan kuwi penting kanggo kabèh wong Kristen. d (1 Tim. 4:13) Dadi meskipun angèl, kowé kudu tetep ajar maca lan nulis. Apa manfaaté? Nèk isa maca lan nulis, kowé bakal  dadi luwih gampang golèk gawéan. Kowé ya dadi luwih gampang sinau lan ngajari wong soal Alkitab. Sing paling penting, kowé bakal luwih cedhak karo Yéhuwah pas maca lan ngrenungké Alkitab.—Yos. 1:8; 1 Tim. 4:15.

12. Piyé carané ngetrapké Wulang Bebasan 31:26?

¹² Komunikasi sing apik. Wong Kristen kudu ngerti cara sing apik kanggo ngomong lan ngrungokké. Yakobus ngekèki naséhat, ”Saben wong kudu cepet ngrungokké, ora kesusu ngomong.” (Yak. 1:19) Nèk pas ana sing ngomong, ya kudu dirungokké tenanan bèn ”isa ngrasakké apa sing dirasakké wong liya”. (1 Ptr. 3:8) Nèk ana sing lagi crita tapi awaké dhéwé ora mudheng, kudu takon tapi sing sopan. Terus, sakdurungé ngomong, kudu dipikir sik. (WB. 15:​28, cathetan ngisor) Pikirna, ’Sing arep tak omongké iki bener lan nguwatké ora ya? Terus, apa caraku ngomong wis apik lan sopan?’ Gatèkna lan tirunen contoné sedulur-sedulur wédok sing seneng ngrungokké lan ngomongé ya alus. (Wacanen Wulang Bebasan 31:26.) Nèk ngetrapké kuwi kabèh, hubunganmu karo wong liya dadi luwih apik, lan kowé ya bakal luwih gampang nggolèk kanca.

13. Kowé isa belajar ngurusi gawéan omah, saka sapa? (Deloken gambar kanggo paragraf 13.)

¹³ Ngurusi gawéan omah. Ing endi-endi, sing biasané ngurusi gawéan omah kuwi wong wédok. Kowé isa belajar carané ngurusi gawéan omah saka ibumu utawa saka wong liya sing luwih berpengalaman. Sedulur wédok sing jenengé Cindy crita, ”Saka ibuku, aku belajar nèk aku sregep, seneng kerja keras, mengko aku bakal ngrasa puas. Merga aku wis diajari masak, resik-resik, njait, lan ngatur dhuwit, aku dadi mandiri lan luwih siap nèk arep nglayani Yéhuwah luwih akèh. Ibuku ya ngajari aku bèn dadi wong sing seneng nampa tamu. Kuwi marakké aku isa bergaul karo sedulur-sedulur sing isa tak tiru teladané.” (WB. 31:​15, 21, 22) Sedulur wédok sing sregep, murah hati, lan isa ngurusi gawéan omah kuwi berkah kanggo keluargané lan kanggo sedulur-sedulur ing jemaat.—WB. 31:​13, 17, 27; Kis. 16:15.

14. Saka pengalamané Kristal, kowé isa ngerti nèk kudu ngapa, lan kuwi tujuané bèn isa apa?

¹⁴ Ajar mandiri. Kabèh wong Kristen kudu belajar nyukupi kebutuhané dhéwé. (Flp. 4:11) Sedulur wédok sing jenengé Kristal ngomong, ”Aku dikon wong tuwaku belajar beberapa ketrampilan ing sekolah sing isa bermanfaat kanggo aku sukmbèn. Bapakku nyaranké aku mèlu kelas akuntansi, lan ternyata kuwi bermanfaat.” Selain belajar ketrampilan bèn isa kerja, kowé ya kudu belajar ngatur  dhuwitmu. (WB. 31:​16, 18) Nèk kowé ngrasa puas karo sing wis mbok duwèni lan berupaya ora nduwé utang, kowé isa nduwé rencana-rencana bèn isa nglayani Yéhuwah luwih akèh.—1 Tim. 6:8.

15-16. Ngapa kok sedulur-sedulur wédok sing ora nikah kuwi berharga? (Markus 10:​29, 30)

¹⁵ Nèk kowé berupaya nduwé sifat-sifat sing disenengi Yéhuwah lan belajar ketrampilan, kuwi mesthi bakal ana manfaaté kanggo kowé sukmbèn. Ayo ndelok conto-contoné.

¹⁶ Nèk milih ora arep nikah sik. Kaya omongané Yésus, ana wong-wong wédok sing milih ora nikah meskipun ing kebudayaané wong sing ora nikah kuwi dianggep anèh. (Mat. 19:​10-12) Sing liyané, mungkin ora nikah-nikah merga ana alesan liyané. Tapi kanggoné Yéhuwah lan Yésus, wong sing ora nikah kuwi ya tetep dianggep berharga. Ing sak donya, ana akèh sedulur wédok sing ora nikah, sing dadi teladan lan berkah kanggo sedulur-sedulur. Merga meréka sayang lan nggatèkké liyané, meréka dadi kaya mbakyu, adhi wédok, utawa ibu kanggo sedulur-sedulur liyané.—Wacanen Markus 10:​29, 30; 1 Tim. 5:2.

17. Bèn isa dadi pelayan sepenuh waktu, apa waé sing isa diupayakké?

¹⁷ Nèk arep dadi pelayan sepenuh waktu. Ing sak donya, ana akèh sedulur wédok sing semangat banget ing kegiatan nginjil. (Mzm. 68:11) Apa saiki kowé isa nggawé rencana kanggo dadi pelayan sepenuh waktu? Misalé dadi perintis, rélawan pembangunan, utawa kerja ing Bètel. Nèk mémang nduwé rencana kuwi, dongakna. Terus, takona karo sedulur-sedulur sing wis dadi pelayan sepenuh waktu apa waé syarat-syaraté. Bar kuwi, nggawéa rencana sing sesuai karo keadaanmu. Nèk kowé dadi pelayan sepenuh waktu, ana akèh banget kesempatan menarik sing isa mbok rasakké.

18. Ngapa kok kudu dipikir tenanan sik nèk arep milih bojo? (Deloken gambar kanggo paragraf 18.)

¹⁸ Nèk milih arep nikah. Sifat-sifat lan ketrampilan sing dibahas mau bakal bermanfaat kanggo kowé bèn isa dadi bojo sing apik. Nèk mémang péngin nikah, kudu dipikir tenanan pas arep milih bojo. Soalé, pernikahan kuwi ikatan seumur hidup. Élinga, nèk kowé bakalé kudu manut  karo wong sing arep mbok nikahi kuwi. (Rm. 7:2; Éf. 5:​23, 33) Makané, pikirna, ’Apa omongan lan tingkah lakuné mbuktèkké nèk dhèwèké berupaya niru Yésus? Apa dhèwèké ngutamakké Yéhuwah? Apa dhèwèké isa nggawé keputusan sing bener? Apa dhèwèké gelem ngakoni kesalahané? Apa dhèwèké ngajèni wong wédok? Apa dhèwèké isa mbantu aku bèn tetep akrab karo Yéhuwah? Apa dhèwèké isa nyukupi kebutuhanku? Apa dhèwèké isa dadi sahabat kanggo aku? Apa dhèwèké wong sing tanggung jawab? Misalé, ing jemaat, dhèwèké éntuk tugas apa lan apa dhèwèké tenanan wektu nglakoni tugasé kuwi?’ (Luk. 16:10; 1 Tim. 5:8) Nèk kowé péngin éntuk bojo sing apik, kowé kudu nduwé sifat-sifat sing apik sik.   

19. Ngapa kok tugasé wong wédok kanggo ”nulungi” bojoné kuwi dudu tugas sing rèmèh?

¹⁹ Ing Alkitab, wong wédok wis dikèki tugas Yéhuwah dadi ”pasangan” lan ’sing nulungi’ bojoné. (PD. 2:18) Kuwi dudu tugas sing rèmèh, malah kuwi tugas sing penting. Soalé, Yéhuwah ya kerep disebut ”sing nulungi”. (Mzm. 54:4; Ibr. 13:6) Carané nulungi, wong wédok kudu ndhukung bojoné. Misalé, nèk bojoné nggawé keputusan kanggo keluarga, dhèwèké ya kudu gelem kerjasama. Terus, merga sayang Yéhuwah, dhèwèké ya bakal berusaha bèn réputasi bojoné tetep apik. (WB. 31:​11, 12; 1 Tim. 3:11) Nèk kèt saiki kowé berusaha tambah sayang karo Yéhuwah lan seneng nulungi wong liya, kowé bakal dadi luwih siap kanggo nglakoni tugas dadi bojo sing apik.

20. Apa manfaaté nèk kowé dadi ibu sing apik?

²⁰ Nèk dadi ibu. Bar nikah, kowé isa waé nduwé anak. (Mzm. 127:3) Mula, kèt saiki kudu dipikirké, piyé bèn isa dadi ibu sing apik. Sifat-sifat lan ketrampilan sing dibahas mau bakal bermanfaat bèn kowé isa dadi istri lan ibu sing apik. Nèk kowé sayang, apikan, lan sabar, suasana ing omah bakal dadi nyenengké lan anak-anakmu bakal ngrasa disayangi.—WB. 24:3.

21. Apa sing njenengan hargai saka sedulur-sedulur wédok sing isih enom, lan ngapa? (Deloken gambar halaman 1.)

²¹ Sedulur-sedulur wédok sing isih enom, kowé disayangi merga wis akèh berkorban kanggo Yéhuwah lan umaté. (Ibr. 6:10) Kowé berupaya nduwé sifat-sifat sing disenengi Yéhuwah, lan belajar ketrampilan sing bermanfaat kanggo kowé sukmbèn lan berguna kanggo wong liya. Kowé nduwé peran sing penting ing organisasiné Yéhuwah.