ANA akèh anugrah sing wis dikèki Yéhuwah, termasuk awaké dhéwé bébas kanggo milih sing awaké dhéwé senengi. Nah, ing Alkitab disebutké nèk anggur kuwi termasuk anugrah saka Gusti Allah. Menurut Alkitab, ”Panganan disedhiakké kanggo nggawé ngguyu, lan anggur nggawé urip dadi seneng.” (Pkh. 10:19; Mzm. 104:15) Tapi kenyataané, soal minuman keras kuwi dadi masalah kanggo beberapa wong. Apamanèh ing beberapa panggonan, ana pendapat lan pathokan sing béda-béda soal kuwi. Dadi, piyé bèn awaké dhéwé isa nggawé keputusan sing bener?

Sakjané, kunciné, awaké dhéwé kudu mikirké pandhangané Yéhuwah, dudu pandhangan utawa kebiasaané wong liya. Nèk nduwé pandhangan sing padha kaya Gusti Allah, awaké dhéwé mesthi bakal bahagia lan mesthi ana akèh manfaaté.

Kanggo wong-wong sing kerep ngombé lan ngombéné akèh, meréka ngombé mungkin merga péngin rilèks, nglalèkké masalahé, utawa bèn kétok kerèn lan kuwat.

Tapi, awaké dhéwé bersyukur merga wis dikèki tuntunan saka Gusti Allah. Misalé, Yéhuwah ngandhani akibaté nèk kakèhan ngombé minuman keras. Ing Wulang Bebasan 23:​29-35 dijelaské apa waé akibaté nèk mabuk. a Pinituwa ing Eropa sing jenengé Daniel crita nèk sakdurungé dadi Seksi Yéhuwah, dhèwèké kerep mabuk-mabukan. Dhèwèké crita, ”Merga mabuk, aku akhiré dadi nggawé keputusan sing ora bener lan aku nyesel nganti saiki.”

Makané, bèn isa nggawé keputusan sing bener lan ora kena akibat merga kakèhan ngombé minuman keras, awaké dhéwé kudu terus mikirké pandhangané Yéhuwah.

Ayo mbahas pathokan ing Alkitab soal ngombé minuman keras lan alesané wong-wong ngombé minuman keras.

Yéhuwah ora nglarang wong ngombé minuman keras. Malah, menurut Alkitab ngombé anggur kuwi marakké seneng. Ing Alkitab disebutké, ”Mangana karo rasa seneng, lan ngombéa anggurmu karo ati sing seneng.” (Pkh. 9:7) Kadhang-kadhang, Yésus lan beberapa umaté Yéhuwah ya ngombé anggur.—Mat. 26:​27-29; Luk. 7:34; 1 Tim. 5:23.

Mémang, menurut Alkitab nèk arep ngombé minuman keras kuwi ora apa-apa. Sing ora éntuk kuwi nèk ngombéné kakèhan. Ing Alkitab disebutké, ”Aja mabuk merga ngombé anggur.” (Éf. 5:18) Terus ya disebutké nèk ”wong sing seneng mabuk . . . ora bakal nampa warisan Kerajaané Gusti Allah.” (1 Kor. 6:10) Sing dilarang Yéhuwah kuwi nèk ngombéné nganti mabuk. Makané timbang mung mèlu-mèlu wong liya, awaké dhéwé kuduné mikirké piyé bèn isa nggawé Gusti Allah seneng.

Ana sing ngrasa nèk isa ngombé akèh, tapi ora mabuk. Tapi, nèk mikir kaya ngono kuwi bahaya. Ing Alkitab dijelaské nèk ”ketagihan ngombé anggur” isa marakké wong dadi nggawé dosa sing gedhé lan marakké Yéhuwah ora seneng. (Tit. 2:3; WB. 20:1) Malah, Yésus ya ngélingké nèk wong isa waé ora mlebu donya anyar gara-gara ”kakèhan ngombé”. (Luk. 21:​34-36)  Dadi, bèn ora kakèhan ngombé nganti mabuk, apa waé sing kudu awaké dhéwé pikirké?

Soal ngombé minuman keras, nèk mung mèlu-mèlu kebiasaané wong liya kuwi bahaya. Bahkan soal mangan lan ngombé, wong Kristen kudu mikirké sing nggawé Yéhuwah seneng. Ing Alkitab disebutké, ”Ora soal kowé mangan, ngombé, utawa nindakké apa waé, kowé kudu nindakké kabèh demi kemuliaané Gusti Allah.” (1 Kor. 10:31) Ayo ngrembug pertanyaan-pertanyaan lan pathokan ing Alkitab sing kudu dipikirké.

Apa aku ngombé minuman keras mung merga péngin disenengi wong liya? Ing Pangentasan 23:2 disebutké, ’Aja mèlu-mèlu wong akèh.’ Ing ayat kuwi, Yéhuwah ngandhani bèn wong Israèl aja nganti niru-niru kelakuané wong sing dudu umaté Yéhuwah. Naséhat kuwi ya kanggo awaké dhéwé saiki. Nèk mèlu-mèlu pendapat lan kebiasaané wong liya soal ngombé minuman keras, awaké dhéwé isa waé dadi nglanggar pathokané Yéhuwah lan ora akrab manèh karo Dhèwèké.—Rm. 12:2.

Apa aku ngombé minuman keras mung bèn kétok kerèn? Ing beberapa dhaérah, kerep ngombé lan ngombéné akèh kuwi dianggep biasa. (1 Ptr. 4:3) Tapi ing 1 Korintus 16:13 disebutké, ”Kowé kudu tetep sadhar, nduwé iman sing kuwat, kendel, lan kuwat.” Apa ngombé minuman keras isa marakké wong dadi kuwat? Ora. Malah, kuwi isa marakké wong dadi ora isa mikir lan ora isa ngendhalèni kelakuané. Dadi ngombé minuman keras kuwi ora marahi kétok kerèn, tapi malah kétok lemah. Ing Yésaya 28:7 disebutké nèk wong sing kakèhan ngombé minuman keras dadi sempoyongan, pikirané ora bener, lan dadi gampang nggawé dosa.

Bèn isa nggawé keputusan sing bener, awaké dhéwé butuh kekuwatan saka Yéhuwah. Terus, awaké dhéwé ya ’kudu tetep sadhar lan nduwé iman sing kuwat’. (Mzm. 18:32) Kuwi berarti awaké dhéwé kudu menghindari situasi sing isa waé marakké  gampang kegodha nglakoni sing salah. Pas Yésus ing bumi, wong-wong ngajèni Yésus merga dhèwèké kendel lan selalu nglakoni sing bener.

Apa aku ngombé minuman keras bèn isa nglalèkké masalahku? Sing nulis Mazmur tau nulis ngéné, ”Wektu aku ngrasa kuwatir banget, Njenengan [Yéhuwah] nggawé aku tenang lan bahagia.” (Mzm. 94:19) Nèk pas lagi ana masalah, kudu njaluk tulung karo Yéhuwah, aja malah ngombé-ngombé. Cara sing paling apik kuwi kudu luwih kerep ndonga karo Yéhuwah. Terus, ya isa njaluk naséhaté sedulur ing jemaat sing luwih berpengalaman. Sakjané, ngombé minuman keras kuwi malah marahi wong dadi ora péngin nglakoni sing bener lan kuwi ora isa ngrampungi masalah. (Hos. 4:11) Daniel sing disebutké mau crita, ”Aku kerep ngrasa kuwatir lan ngrasa bersalah. Bèn luwih tenang, aku ngombé-ngombé minuman keras. Tapi, masalahku malah tambah akèh. Terus, aku ya kélangan kanca, lan dadi ora nduwé harga diri.” Daniel crita manèh, ”Akhiré aku ngerti nèk sing tak butuhké kuwi Yéhuwah, dudu ngombé minuman keras. Aku isa ngadhepi lan ngatasi masalahku merga bantuané Yéhuwah.” Bahkan nèk masalahé gedhé banget nganti marahi putus asa, Yéhuwah bakal selalu siap nulungi.—Flp. 4:​6, 7; 1 Ptr. 5:7.

Bèn isa ngerti apa njenengan wis terlalu kerep utawa terlalu akèh ngombé, isa mikirké pertanyaan-pertanyaan iki, ’Apa aku tau diélingké karo kanca utawa keluargaku soal kuwi?’ Nèk iya, kudu ngati-ati soalé kuwi isa waé wis dadi kebiasaan sing ora njenengan sadhari. ’Apa saya suwé aku ngombéné saya akèh?’ Nèk kuwi diterus-teruské, njenengan isa waé dadi kecanduan. ’Apa isa selama beberapa hari aku ora ngombé minuman keras?’ Nèk ora isa, kuwi berarti njenengan wis kecanduan lan njenengan butuh bantuané dokter.

Merga ndelok bahayané, ana sing milih ora ngombé minuman keras. Sing liyané mungkin ora ngombé merga ora doyan. Nèk ana kancané  njenengan sing milih kaya ngono, njenengan kudu menghargai keputusané.

Bèn ngombéné ora nganti kakèhan, njenengan kudu nentokké batesan kanggo njenengan dhéwé. Misalé, nentokké sepira akèhé sing arep diombé. Utawa nentokké sepira kerepé éntuk ngombé, mungkin seminggu sepisan utawa ngombé sithik pas mangan. Terus ya nentokké jenis minuman keras apa sing kuwat diombé. Misalé, isa ngombé sak cukupé anggur utawa bir sing kadar alkoholé rendah, tapi ora ngombé minuman keras sing kadar alkoholé dhuwur, bahkan nèk kuwi dicampur minuman liyané. Nèk wis nentokké batesan, mengko bakal luwih gampang nolak bèn ngombéné ora kakèhan. Njenengan ora perlu terpengaruh utawa nguwatirké omongané wong liya.

Terus, ya ana manèh sing kudu dipikirké. Ing Roma 14:21 disebutké, ”Mendhing ora mangan daging, ora ngombé anggur, lan ora nindakké apa waé sing isa nggawé imané sedulurmu dadi lemah.” Ngetrapkéné piyé? Meskipun njenengan nduwé hak kanggo ngombé, tapi nèk kuwi isa marahi hati nuraniné wong liya dadi ora pénak, luwih apik ora ngombé waé. Nèk ngupayakké kuwi, kuwi bukti nèk njenengan sayang, ngajèni, lan luwih mikirké perasaané wong liya timbang perasaané njenengan dhéwé.—1 Kor. 10:24.

Apamanèh nèk ana aturan saka pamréntah soal minuman keras. Misalé, ora éntuk nyopir utawa nganggo mesin bar ngombé minuman keras. Pamréntah ya mungkin nentokké umur pira éntuk ngombé. Nèk ana aturan kuwi ya kudu manut.—Rm. 13:​1-5.

Ana akèh banget anugrah sing wis dikèki Yéhuwah kanggo awaké dhéwé. Termasuk, awaké dhéwé bébas arep mangan apa lan arep ngombé apa. Sing paling penting, meskipun bébas milih, awaké dhéwé tetep nggawé pilihan sing nggawé Yéhuwah seneng.